Atamai i Aoaoga Faavae: 3 Nifae 12:48

“Ia Outou Atoatoa e pei lava o Aʼu, po o lo Outou Tamā O Le o i le Lagi E Atoatoa.”

tamaitai talavou o loo mafaufau loloto

I lau suesuega o le 3 Nifae 12, na e aoao ai e uiga i le ia atoatoa e pei o Iesu Keriso ma le Tama Faalelagi. O lenei lesona o le a fesoasoani e te tauloto ai le mau faasino ma le fasifuaitau autu o le mau mo le 3 Nifae 12:48, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Faamatala ma tauloto

I le taimi o le lesona talu ai, sa e aoaoina ai le upumoni lenei: E finagalo Iesu Keriso ia tatou atoatoa e pei o Ia ma lo tatou Tama oi le Lagi.

Vaai faalemafaufau faapea e i ai sau uo e talitonu e lē o i ai ni faamoemoega o le Atua ia i tatou e sili atu nai lo le amiolelei ma le faaaloalo i isi.

• E faapefea ona e faamatalaina le 3 Nifae 12:48 i se auala e mafai ona faaopoopo atu ai i le malamalama o lau uo?

O le fuaitau autu o le mau mo le 3 Nifae 12:48 o le, Ia outou atoatoa e pei lava o au, po o lo outou Tamā o le o i le lagi e atoatoa.” Faaaoga le metotia lenei, po o se isi e te filifilia, e fesoasoani ai ia te oe e tauloto le mau faasino ma le fasifuaitau autu o le mau.

Tusi le “3 Nifae 12:48” i le ogatotonu o se fasi pepa. I le tulimanu e tasi o le itulau, tusi ai upu “Ia atoatoa.” I se isi tulimanu, tusi ai “e pei lava o a’u.” I se isi tulimanu, tusi ai “po o lou Tama o i le lagi.” I le tulimanu mulimuli, tusi ai “e atoatoa.” Taumafai e tauloto le mau faasino ma le fasifuaitau autu o le mau e ala i le faapa’i atu o lau penitala po o lou tamailima i fasifuaitau taitasi i le faasologa, e amata i le mau faasino o loo i le ogatotonu. E mafai ona fesoasoani le fai leotele o upu a o e pa’i i ai. A uma ona faia lenei mea mo ni nai taimi, taumafai e toe fai le mau faasino ma le fasifuaitau atoa mai le manatuaga.

Faataitai le faaaogaina

Faaaoga ni nai minute e toe faamanatu ai mataupu faavae i parakalafa 5–12 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2023). Filifili se tasi o mataupu faavae e suesue atili i ai.

• E faapefea ona e faamatalaina le mataupu faavae na e filifilia i se tagata e lē masani i ai?

Faaaoga le ata faataitai lenei e fesoasoani ia te oe e faaaoga ai aoaoga a le Faaola o loo i le 3 Nifae 12:48 ma mataupu faavae o le mauaina o le malamalama faaleagaga.

O Ioane o se alii talavou e talitonu i le Atua. Peitai, e i ai ni vaega o le talalelei e lē fiafia e mafaufau i ai. O se tasi o na mea o le apoapoaiga a le Faaola ina ia atoatoa. Sa taumafai o ia e faia ni suiga ma avea atili e faapei o Keriso ae e fai lava ma faavaivai. Na te lagona e pei ua toilalo o ia, o le atoatoa la mo ia e lē mafai.

Iloilo manatu faavae ma fesili faatasi ai ma se vaaiga e faavavau

Ua aoao mai le Pepa Autu o le Atamai i Aoaoga Faavae e faapea, pe a feagai ma se faafitauli faigata, e mafai ona tatou “toe faatulaga le fesili (ia ese le vaai i le fesili) ma vaai i manatu e faavae i le tulaga faatonuina a le Alii o le upumoni nai lo le taliaina o manatu po o talitonuga o le lalolagi” (itulau 3). O fesili nei e mafai ona fesoasoani i lenei faagasologa.

aikona, faamaumau

1. Tali fesili nei:

• O le a sou manatu e faapefea ona ese le silasila a le Alii i le atoatoa nai lo le toatele i le lalolagi?

• E faapefea e lo tatou malamalama i le ata o le faaolataga ma le Togiola a Iesu Keriso ona fesoasoani tatou te malamalama lelei ai i mea o loo aoao mai e le Faaola i le 3 Nifae 12:48?

Saili le malamalama atili e ala i punaoa faalelagi ua filifilia

• E mafai faapefea ona e faaaogaina mea ua e aoaoina i le 3 Nifae 12:48 e uiga i le atoatoa e tali atu ai i le popolega o Ioane?

Faitau ia lē itiiti ifo ma le tolu o mau nei, ma vaavaai mo ni malamalamaaga faaopoopo e uiga i le faaatoatoaina i le ala na aoao mai e Iesu.

• Eteru 12:27

• Moronae 10:32

• Mataupu Faavae ma Feagaiga 67:13

• Mataupu Faavae ma Feagaiga 76:69

• Efeso 4:11–13

aikona, faamaumau

2. Tali le fesili lenei:

• E mafai faapefea e malamalamaaga na e maua ona fesoasoani ia Ioane i lona popolega?

Faatino i le faatuatua

Faitau ia parakalafa 5–7 i le vaega o le “Mauaina o le Malamalama Faaleagaga i le Pepa Autu o le Atamai i Aoaoga Faavae, ma vaavaai mo le mea e mafai ona fai e Ioane e faatino ai i le faatuatua.

aikona, faamaumau

3. Tali se tolu o fesili nei:

• O lē fea o nei aoaoga e te manatu e mafai ona fesoasoani ia Ioane? Aisea?

• O le a se mea e mafai ona tatalo e uiga i ai Ioane o le a faapea ona fesoasoani i lona tulaga?

• O le a se mea o le a e fautuaina Ioane e fai e “ola ai i le faatuatua” seia oo ina ia maua le malamalama atili e uiga i lona gafatia e atoatoa ai?

• E mafai faapefea e mea ua e aoaoina i le 3 Nifae 12:48 e uiga i le atoatoa ona tosina ai ou lava lagona ma amioga?