Doktrinal nga Kahanas: 3 Nephi 11:10–11

“Ako Mituman sa Kabubut-on sa Amahan sa Tanan nga mga Butang gikan sa Sinugdanan”

Kristo namulong sa mga Nephite

Sa imong pagtuon sa 3 Nephi 11, imong nakat-onan ang mahitungod ni Jesukristo nga nagpakita ngadto sa mga Nephite. Iyang gisulti kanila nga Iyang natuman ang kabubut-on sa Langitnong Amahan pinaagi sa pagdala diha sa Iyang Kaugalingon sa mga sala sa kalibotan. Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa 3 Nephi 11:10–11, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Isag-ulo ug ipasabot

Ang mahinungdanon nga hugpong sa mga pulong sa kasulatan sa 3 Nephi 11:10–11 mao ang “Ako mituman sa kabubut-on sa Amahan sa tanan nga mga butang gikan sa sinugdanan.” Mahimo nimong markahan kini nga bahin diha sa bersikulo 11 sa lahi nga paagi aron kini daling mailhan gikan sa ubang bersikulo.

Basaha ang mahinungdanon nga hugpong sa mga pulong sa kasulatan sa makadaghan nga higayon aron matabangan ka nga masag-ulo kini. Hunong panagsa aron sa pagtan-aw sa mosunod nga mga hulagway ni Jesukristo ug sa pagpamalandong sa kahulogan sa unsay Iyang gibuhat.

Si Kristo sa Getsemani ug si Kristo diha sa krus

Sa miaging leksiyon, inyong gihisgotan ang kamatuoran nga makita diha sa 3 Nephi 11:11 nga si Jesukristo mibuhat sa kabubut-on sa Amahan pinaagi sa pagdala diha sa Iyang Kaugalingon sa mga sala sa kalibotan.

Handurawa nga ang usa ka tawo kinsa gamay ra og nasayran mahitungod ni Jesukristo mihangyo kanimo sa pagtudlo sa unsay imong nahibaloan mahitungod Kaniya.

icon, rekord

1. Tubaga ang mosunod nga pangutana:

• Gamit ang pamahayag sa kamatuoran ug ang mahinungdanon nga hugpong sa mga pulong sa kasulatan, unsaon nimo sa pagpasabot sa unsay gibuhat ni Jesukristo alang kanato ug nganong mahinungdanon kini?

Pagbansay sa paggamit

Rebyoha sa daklit ang mga baroganan sa pag-angkon og espirituhanong kahibalo diha sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

Diha sa imong journal sa pagtuon, ipamubo ang matag usa sa tulo ka mga baroganan sa pag-angkon og espirituhanong kahibalo pinaagi sa pagsulat og usa ka kapahayag [sentence] aron sa pagpasabot sa matag usa.

Ikonsiderar ang mosunod nga sitwasyon:

Si Jessica nagsugod sa paggahin og dugang nga panahon uban sa usa ka bag-ong grupo sa mga higala. Kini nga mga higala wala mosunod ni Jesukristo, apan iyang namatikdan nga sila daw malipayon nga wala nag-ila sa Dios diha sa ilang mga kinabuhi. Si Jessica natudloan nga motuo ug mosunod ni Jesukristo. Kanunay niyang gikonektar ang kalipay ngadto sa pagsunod kang Jesukristo, apan nagsugod na siya sa paghunahuna kon unsa ka mahinungdanon ang pagsunod Kaniya.

Ang mga baroganan sa pag-angkon og espirituhanong kahibalo mahimong makatabang sa usa ka sitwasyon sama sa kang Jessica.

Susihon ang mga konsepto ug mga pangutana inubanan sa mahangtorong panglantaw

Aron matabangan ka nga makakita kon sa unsang paagi masusi ni Jessica ang iyang kabalaka nga adunay mahangtorong panglantaw, kopyaha ang mosunod nga tsart nganha sa imong journal sa pagtuon. Pagkahuman kompletoha ang tsart pinaagi sa paglista sa tanan nga mga rason ug mga resulta nga imong mahunahunaan alang sa duha ka mga kolum. Seguroha nga maglakip og mga ideya gikan sa 3 Nephi 11:10–11 samtang imong tubagan ang kolum sa tuo nga bahin.

	Pagsunod sa Uban	Pagsunod kang Jesukristo
Mga Rason:	Pagsunod sa Uban	Pagsunod kang Jesukristo
Mga Resulta:	Pagsunod sa Uban	Pagsunod kang Jesukristo

2. Tubaga ang mosunod nga mga pangutana:

• Sa unsang paagi kini nakatabang ang paghunahuna sa mga kapilian ni Jessica niini nga paagiha?

• Dugang pa sa 3 Nephi 11:10–11, unsa ang uban pang balaanong gitudlo nga mga tinubdan ang makatabang kang Jessica nga makasabot sa kamahinungdanon sa pagsunod kang Jesukristo?

• Unsa ang mahimo ni Jessica aron madugangan ang iyang hugot nga pagtuo kang Jesukristo ug mahimong mas andam nga mosunod Kaniya?

Hunahunaa kon sa unsang paagi ang unsay imong nakat-onan karon makapanalangin sa imong kinabuhi o sa kinabuhi sa tawo nga imong nailhan. Buhata ang espirituhanong mga pag-aghat nga tingali imong nabatonan atol sa leksiyon.