“3 Nephi 2–5: ‘Andam … diha sa Kalig-on sa Ginoo,’” Manwal sa Magtutudlo sa Basahon ni Mormon (2024)
“3 Nephi 2–5,” Manwal sa Magtutudlo sa Basahon ni Mormon
3 Nephi 2–5
“Andam … diha sa Kalig-on sa Ginoo”
Minerva Teichert (1888-1976), Ang Tubag ni Lachoneus, 1949-1951, lana sa lino nga gilakip sa masonite, 36 x 48 ka pulgada. Brigham Young University Museum of Art.
Sama nga nag-atubang kita og mga hagit sa padulong nga pagbalik sa Manluluwas, ang mga Nephite nag-atubang og mga hagit sa katuigan sa wala pa Siya moabot ngadto kanila. Ang mga tulisan ni Gadianton nanghulga sa paglaglag sa mga Nephite. Hinuon, ang mga Nephite “andam sa pagsugat kanila … diha sa kalig-on sa Ginoo” (3 Nephi 4:10). Sama sa mga Nephite, mabuntog nato ang mga hagit pinaagi sa pagkaandam. Kini nga leksiyon makatabang kanimo nga makadawat sa kalig-on sa Ginoo pinaagi sa pagkaandam diha sa espirituhanon ug sa temporal nga paagi.
Pangandam
Hunahunaa ang usa ka higayon sa imong kinabuhi sa dihang gibati nimo nga andam ka o dili ka andam.
-
Unsa kadto nga sitwasyon, ug nganong gibati nimo nga andam ka o dili ka andam?
-
Kon gibati nimo nga dili ka andam, unsay imong nahimo aron sa mas maandam alang sa umaabot?
-
Unsay imong nahimo aron espirituhanong maandam sa mga hagit nga imong giatubang o mahimo nimong atubangon sa umaabot?
Samtang magtuon ka sa 3 Nephi 2–5, tinguhaa ang giya sa Espiritu aron mahibalo kon unsay imong mahimo aron maandam ang imong kaugalingon sa temporal ug espirituhanon nga paagi alang sa umaabot.
Pagpangandam ni Lachoneus
Si propeta Samuel mitagna nga dunay gabii nga walay kangitngit isip ilhanan sa pagkatawo ni Jesukristo. Sa diha nga kini nga panagna natuman (tan-awa sa 3 Nephi 1:15–19), “ang labaw nga bahin sa mga katawhan mituo, ug nakabig ngadto sa Ginoo” (3 Nephi 1:22). Apan human sa pipila ka tuig, ang uban misugod sa dili pagtuo.
Basaha ang 3 Nephi 1:27–30 ug 3 Nephi 2:1–3, mangita og mga rason nga ang uban nga mga tawo nahisalaag gikan sa Ginoo.
-
Unsa nga mga leksiyon ang atong makat-onan gikan niini nga mga bersikulo nga makatabang kanato nga magpabilin nga matinud-anon sa Ginoo sa atong panahon?
Ang mga tulisan ni Gadianton nagkadaghan ug nakig-away batok sa mga Nephite. Isip tubag, “ang mga Lamanite kinsa nakabig ngadto sa Ginoo nakighiusa sa ilang mga kaigsoonan, ang mga Nephite” (3 Nephi 2:12). Si Giddianhi, ang lider sa mga tulisan ni Gadianton, misulat ngadto ni Lachoneus, ang labaw nga maghuhukom sa mga Nephite. Diha niini, siya mihulga sa paglaglag sa mga Nephite kon sila dili mosurender (tan-awa sa 3 Nephi 3:1–10).
Basaha ang 3 Nephi 3:11–12, mangita kon giunsa pagtubag ni Lachoneus.
-
Unsa nga ebidensiya ang imong nakita sa hugot nga pagtuo ni Lachoneus diha sa Ginoo?
Basaha ang mosunod nga mga tudling, ug paghimo og usa ka listahan nga giulohan og “Mga Pagpangandam sa mga Nephite” diha sa imong journal sa pagtuon kon giunsa pagpangandam sa mga tawo sa temporal ug sa espirituhanon nga paagi alang sa higayon nga ang mga tulisan ni Gadianton mosulong. Kon mahimo, pamati sa audio niini nga mga tudling diha sa Gospel Library nga app.
-
Hain sa mga pagpangandam sa imong hunahuna ang labing nakatabang pag-ayo? Ngano man?
-
Sa unsang paagi sa imong hunahuna kini nga mga pagpangandam nakatabang kanila sa pagsalig sa Ginoo?
Basaha ang 3 Nephi 4:7–12, mangita kon sa unsang paagi napanalanginan ang mga Nephite tungod sa ilang espirituhanon ug temporal nga mga pagpangandam.
-
Unsa nga mga baroganan ang atong makat-onan gikan niini nga asoy? (Tan-awa sa 3 Nephi 4:10.)
Usa sa mga baroganan nga makat-onan nato gikan niini nga asoy mao ang kon kita mag-andam sa atong kaugalingon sa espirituwal ug temporal nga paagi, ang Ginoo mopalig-on kanato sa pagbuntog o paglahutay sa mga hagit.
Mga pagpangandam sa atong panahon
Aron matabangan ka nga ikonektar ang mga kasulatan sa atong panahon, paghimo og usa ka lista nga giulohan og “Modernong Pagkapareha” sunod sa lista sa mga pagpangandam sa Nephite. Ilista ang susamang mga pagpangandam nga atong mahimo, lakip na ang mga pagpangandam nga gitambag sa mga propeta nga atong himoon. Hunahunaa kon unsay imong gipangandaman ug kon sa unsang paagi kini nga mga ideya makatabang kanimo nga maandam diha sa kalig-on sa Ginoo.
Aron makakita og ehemplo sa pamilya nga gipanalanginan tungod sa ilang pagpangandam, tan-awa ang bidyo nga “Mga Kapanguhaan sa Temporal nga Pagpangandam” (3:09), nga anaa saChurchofJesusChrist.org.
-
Tubaga ang mosunod nga mga pangutana:
-
Pagpili og usa o subra pa sa usa ka mga pagpangandam gikan sa imong lista. Sa unsang paagi kini makatabang nato sa pagbuntog sa piho nga mga hagit nga atong giatubang sa atong panahon karon?
-
Sa unsang mga paagi sa imong hunahuna nga ang atong pagpangandam nagtugot sa Ginoo sa paglig-on kanato?
Ang mga tulisan ni Gadianton nagtukod og usa ka pagsulong nga napakyas tungod kay ang mga Nephite adunay balaan nga tabang sa ilang pagpangandam. Sa kataposan, ang mga tulisan ni Gadianton miatras. Sila gibabagan sa kasundalohan sa mga Nephite ug mitugyan sa ilang mga kaugalingon ingon nga mga binilanggo o gipamatay (tan-awa sa 3 Nephi 4:16–27).
Basaha ang 3 Nephi 4:30–33; 5:1–4, mangita kon sa unsang paagi mitubag ang mga katawhan sa ilahang pagkalig-on pinaagi sa Ginoo.
-
Sa unsang paagi ang ilang tubag nagpakita sa ilang hugot nga pagtuo sa Dios?
Pamalandongi ang usa ka panahon sa dihang ikaw mibati sa kalig-on sa Ginoo pinaagi sa pagpangandam sa temporal ug espirituhanon nga paagi.
Si Presidente Russell M. Nelson mipamatuod sa mga panalangin sa pagkaandam:
Ang kaaway dili gayod mohunong sa pag-ataki. Busa, kita dili gayod mohunong sa pagpangandam! Kon kita mas mobarog pinaagi sa kinaugalingon nga paningkamot—sa temporal, emosyonal, ug espiritwal—mas makaandam kita sa pagsanta sa walay hunong nga mga pang-ataki ni Satanas. …
Ako wala moingon nga ang umaabot nga mga adlaw sayon, apan ako mosaad kaninyo nga ang umaabot mahimayaon alang niadtong kinsa nakaandam ug kinsa nagpadayon sa pagpangandam nga mahimong mga instrumento sa mga kamot sa Ginoo. (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75-76)
-
Kompletoha ang mosunod:
Paghunahuna og hagit, kahimtang, o panghitabo nga kinahanglan nimong pangandaman. Hunahunaa kon paminaw nimo unsa ka kaandam karon. Tinguhaa ang giya sa Espiritu samtang ikaw motubag niining mga pangutana.
-
Unsa ang piho nga mga buhat nga mahimo nimong himoon aron sa pagpangandam?
-
Sa unsang paagi nimo maapil ang Ginoo sa imong mga pagpangandam?