“Helaman 11–12: Ang Liyok sa Garbo” Manwal sa Magtutudlo sa Basahon ni Mormon (2024)
“Helaman 11–12,” Manwal sa Magtutudlo sa Basahon ni Mormon
Helaman 11–12
Ang Liyok sa Garbo
Usa sa mga sundanan sa tibuok Basahon ni Mormon mao nga ang mga tawo kasagaran nga makalimot sa Dios ug mahimong mapahitas-on kon ang mga butang maayo ra og dagan alang kanila. Sa laing bahin, ang mga tawo kasagaran nga magpaubos sa ilang kaugalingon ug modangop ngadto sa Dios kon ang mga butang malisod. Nakabantay ka ba niini nga sundanan diha sa katilingban o sa imong kinabuhi? Kini nga leksiyon makatabang kanimo nga mobati og mas dakong tinguha nga mas magmapainubsanon ngadto sa Dios.
Mga Sundanan [Patterns]
Tan-awa ang mosunod nga mga numero. Sa 30 ka segundo, pangita og daghang mga numero kutob sa imong mahimo sa numerical nga pagkahan-ay, sugod sa “1.”
-
Pila ka mga numero ang imong nakit-an sulod sa 30 ka segundo? Namatikdan ba nimo ang usa ka sundanan diin nahimutang ang mga numero?
Adunay sundanan sa mga numero diha sa tsart. Kon magsal-ot ka ug pinatindog ug usa ka pinahigda nga linya sa tunga-tunga sa tsart aron makahimog upat nga managsama nga kwadrante, makit-an nimo nga ang mga numero nagsunod sa usa ka orasan nga sundanan, sama sa gipakita sa arrow. Pananglitan, ang “1” naa sa taas nga wala nga kuwadrante, “2” naa sa taas nga tuo, ug uban pa.
Paggahin og 30 pa ka segundo aron usbon ang hagit ug tan-awa ang kalainan nga mahimo niini sa pagsunod sa sundanan.
-
Unsa ang bili sa pag-ila sa mga sundanan nga sama niini?
Ang pagkahimong makaila sa mga sundanan usa ka kahanas nga makapalambo sa imong pagtuon sa kasulatan. Ang pagbuhat sa ingon makatabang kanimo nga mas magamit kon unsay anaa sa mga kasulatan ngadto sa imong kinabuhi.
Sa leksiyon karon, makakat-on ka mahitungod sa usa ka sundanan nga sagad gitawag og ang liyok sa garbo. Samtang ikaw magtuon, hunahunaa kon sa unsang paagi kana nga sundanan mahimong mahitabo sa imong kaugalingong kinabuhi ug kon unsay imong mahimo aron malikayan ang garbo ug madugangan ang kamapainubsanon.
Ang liyok sa garbo
Tingale makahinumdom ka nga si propeta Nephi makugihon ug nagtinguha lamang sa pagbuhat sa kabubut-on sa Ginoo. Isip resulta, ang Ginoo mipanalangin kaniya og dakong gahom ug misaad nga “tanan nga mga butang mahimo sumala sa [iyang] pulong.” (Helaman 10:5). Ang mga panghitabo nga nahitabo human si Nephi gihatagan niini nga gahom makatabang kanato nga makakita og panag-ingnan sa liyok sa garbo taliwala sa mga Nephite.
Idrowing ang mosunod nga dayagram sa liyok sa garbo diha sa imong journal sa pagtuon.
Basaha ang mga tudling sa kasulatan diha sa dayagram, sugod sa Helaman 10:13–15. Pangitaa ang mga pulong o mga hugpong sa mga pulong nga naghulagway sa hugna sa liyok garbo nga ang mga tawo nagsinati. Ikonsiderar ang pagmarka niana nga mga pulong ug mga hugpong sa mga pulong ug isulat ang ngalan sa hugna diha sa mga margin sa imong mga kasulatan tupad sa katugma nga mga bersikulo.
-
Nganong makatabang man kanato ang pagkahibalo niini nga sundanan?
Hunahunaa kon asa nimo makita ang imong kaugalingon dinhi niini nga sundanan. Samtang magpadayon ka sa pagtuon, hunahunaa kon unsaon nimo pagpalambo sa pagkamapainubsanon ug pagsalig sa Ginoo.
Pagkat-on gikan sa liyok sa garbo
Human giwagtang sa Ginoo ang kagutom, miuswag ang mga tawo. Apan, sulod lang sa pipila ka tuig, ang mga tawo nahimong mapahitas-on pag-usab ug nakasinati og gubat ug kasakit (tan-awa sa Helaman 11:21–33). Napukaw sila sa paghinumdom sa Dios apan daling nahulog sa garbo ug pagkadaotan pag-usab (tan-awa sa Helaman 11:34–38).
Namatikdan seguro nimo gikan sa imong pagtuon sa Basahon ni Mormon nga adunay mga higayon nga si propeta Mormon mihunong sa iyang pagsaysay sa pipila ka mga asoy aron sa pag-ila sa mga leksiyon nga atong makat-onan. Kasagaran niyang gamiton ang mga hugpong sa mga pulong sama sa “sa ingon kita makakita” o “sa ingon kita nakakita.”
-
Basi sa imong nakat-onan mahitungod sa mga Nephite sa Helaman 11, unsaon nimo sa pagkompleto niini nga pamahayag: “Ug sa ingon kita makakita …”?
Basaha ang Helaman 12:1–6, mangita sa pipila sa mga konklusyon nga gihimo ni Mormon human sa pagpakigbahin niini nga asoy.
-
Tubaga ang mosunod nga mga pangutana:
-
Ngano kaha sa imong hunahuna nga ang mga tawo nga mauswagon usahay makalimot sa Ginoo?
-
Sa unsang paagi malikayan o malaktawan sa usa ka tawo ang garbo ug pag-antos sa mga bahin sa liyok sa garbo (mga kahon 1 ug 2)?
-
Usa ka kamatuoran nga makatabang kanato nga magpabilin sa mas maayong bahin niini nga liyok mao kon mopili kita sa paghinumdom sa Ginoo, magpaubos sa atong kaugalingon, ug maghinulsol, malikayan nato ang garbo ug ang mga sangpotanan niini.
-
Tubaga ang mosunod nga pangutana:
-
Unsay atong buhaton nga makatabang kanato aron mahinumdom sa Ginoo ug malikay sa garbo?
-
Timbang-timbanga [evaluate] ang imong Kaugalingon
Hunahunaa kon sa unsang paagi nga ang mga kamatuoran nga imong natun-an karon may kalabotan kanimo. Ang mosunod nga pagsukod sa kaugalingon mahimong makatabang niini. Gradohi ang imong mga paningkamot sa mosunod nga mga dapit sa sukdanan gikan sa 1 ngadto sa 5, nga ang 1 mao ang “dili gayod” ug ang 5 mao ang “kanunay.”
-
Nibati o nipahayag ka ba sa imong pagpasalamat ngadto sa Dios ug sa uban?
-
Gigahinan ba nimo og panahon ang Dios kada adlaw?
-
Gibati ba nimo nga ang imong kalamposan resulta sa imong kaugalingon nga mga paningkamot?
-
Nagtinguha ka ba sa tabang ug giya sa Dios sa imong kinabuhi?
-
Gitratar ba nimo ang uban nga may kamabination ug pagtahod?
-
Gisaway ba nimo ang uban o naghimo og dili matarong nga mga paghukom ngadto kanila?
Sa imong journal sa pagtuon, pamalandongi ug isulat ang usa ka butang nga imong gibati nga mahimo nimo aron madugangan ang pagkamapainubsanon ug mabuntog ang garbo. Pangayo og tabang gikan sa Langitnong Amahan samtang maningkamot ka sa paglihok sa imong pasalig.