Seminary
Helaman 8: Ang mga Propeta Nagpamatuod kang Jesukristo

“Helaman 8: Ang mga Propeta Nagpamatuod kang Jesukristo,” Manwal sa Magtutudlo sa Basahon ni Mormon (2024)

“Helaman 8,” Manwal sa Magtutudlo sa Basahon ni Mormon

Helaman 8

Ang mga propeta nagpamatuod kang Jesukristo

Imahe
Jesukristo

Sa kalibotan diin daghang mga tingog ang nagdani kanato sa daghang mga direksiyon, ang Dios mihatag kanato og mga propeta aron pag-angkla kanato ngadto Kaniya. Sa dihang si Nephi gipangutana sa daotang mga Nephite kon nganong mapintas kaayo siyang manulti mahitungod kanila, siya mipamatuod nga maisogon mahitungod sa Manluluwas. Kini nga leksiyon makatabang kanimo nga makasabot nga ang mga propeta nagpamatuod kang Jesukristo, ug kini makatabang nimo nga mobati sa kamatuoran sa ilang mga pagpamatuod.

Ang pagpamatuod sa usa ka saksi

Hunahunaa ang usa ka higayon nga nakadungog ka og usa ka butang nga lisod tuohan. Pananglitan, tingali nakadungog ka bahin sa usa ka tawo nga nakakab-ot og daw imposible nga butang o naayo sa milagro pinaagi sa gahom sa pagkapari. Unsa ang nagdala kanimo aron sa pagtuo? Sa unsang paagi ang pagpaminaw bahin niini gikan sa usa ka saksi makaapekto sa imong pagtuo?

Kadaghanan sa mga tawo wala makakita kang Jesukristo, apan daghan gihapon ang mituo Kaniya.

  • Unsa ang pipila ka mga rason kon nganong ang mga tawo mituo ni Jesukristo?

  • Unsa ang papel sa mga propeta sa pagtabang kanimo sa pagtuo sa Manluluwas?

Ang pagpamatuod sa mga propeta sa karaang panahon

Tingali imong mahinumdoman nga si propeta Nephi nanagna ngadto sa daotan nga mga Nephite nga sila pagalaglagon kon sila dili maghinulsol (tan-awa sa Helaman 7:22–29). Daghan sa mga Nephite nasuko kang Nephi tungod sa pagsulti batok sa ilang pagkadaotan (tan-awa sa Helaman 8:1–7). Si Nephi mibadlong niini nga mga katawhan ug misulti kanila nga sila milimod dili lamang sa iyang mga pulong apan sa mga pulong sa nangaging mga propeta, lakip ni Moises, kinsa mipamatuod kang Jesukristo (tan-awa sa Helaman 8:10–13).

Basaha ang Helaman 8:13–23, mangita sa unsay gipakigbahin ni Nephi mahitungod ni Moises ug sa ubang nangaging mga propeta. Mahimo nimong markahan ang mga ngalan sa mga propeta nga ginganlan ni Nephi.

  • Unsa ang managsama niining tanan nga mga propeta?

Usa ka kamatuoran nga atong makat-onan gikan niini nga mga bersikulo mao nga ang mga propeta nagpamatuod kang Jesukristo.

Si Elder Neil L. Andersen sa Korum sa Napulog Duha ka Apostoles mipahayag:

Imahe
Elder Neil L. Andersen

Ang labing importante nga tahas sa propeta sa Ginoo mao ang pagtudlo kanato sa Manluluwas ug paggiya kanato ngadto Kaniya. …

Ang propeta dili tigpataliwala ninyo ug sa Manluluwas. Hinoon, mobarog siya tupad kaninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. (Neil L. Andersen, “Ang Propeta sa Dios,” Liahona, Mayo 2018, 25, 27)

  • Ngano sa imong hunahuna nga ang labing dako nga gasa sa usa ka propeta kanato mao ang iyang pagsaksi kang Jesukristo?

Mga panig-ingnan sa mga propeta nga nagpamatuod kang Jesukristo

Paggahin og panahon sa pagtuon sa pipila sa mga pagpamatuod sa mga propeta kang Jesukristo. Samtang magtuon ka sa ilang mga pagpamatuod, ang Espiritu Santo makapamatuod sa kamatuoran sa ilang mga pulong diha sa imong kasingkasing ug hunahuna.

  1. Kompletoha ang usa sa mosunod nga mga kalihokan:

Kapilian A: Ang mga karaang propeta nagpamatuod mahitungod ni Jesukristo

Basaha ang dili momenos tulo sa mosunod nga mga pagpamatuod gikan sa mga propeta nga gihisgotan ni Nephi. Paghimo og lista sa unsay gitudlo niini nga mga pagpamatuod diha kanimo mahitungod ni Jesukristo.

Ribyoha ang lista nga imong gisulat. Hunahunaa ang pagrekord sa bisan unsa nga mga panglantaw, mga pagbati, o mga impresyon nga anaa kanimo mahitungod sa Manluluwas samtang nagtuon ka. Isulat ang pipila ka mga kapahayag [sentence] nga nagpasabot sa unsang paagi nga ang imong kinabuhi mahimong lahi kon ang mga propeta wala magtudlo kanato niini nga mga butang mahitungod ni Jesukristo.

Kon imong gipili kini nga kapilian, isumite ang imong gisulat.

Kapilian B: Ang mga propeta sa ulahing mga adlaw nagpamatuod ni Jesukristo

Pangita og duha o labaw pa sa duha ka mga panig-ingnan sa mga propeta o apostoles sa ulahing mga adlaw nga nagpamatuod ni Jesukristo. Mahimong gikan kini sa usa ka bag-ohay lang nga kinatibuk-ang komperensiya o gikan sa kasaysayan sa Simbahan. Ikonsiderar ang paggamit sa ChurchofJesusChrist.org o sa Gospel Library nga app sa imong pagpangita. Mahimo ka usab nga mobasa o maminaw sa “Ang Buhi nga Kristo: Ang Pagpamatuod sa mga Apostoles” anaa sa ChurchofJesusChrist.org.

Kon imong gipili kini nga opsiyon, isulat ang imong mga panig-ingnan sa mga propeta nga nagpamatuod kang Kristo. Isulat ang imong nakat-onan mahitungod ni Jesukristo, ug ilakip ang imong gibati samtang imong gibasa o nadungog kini nga mga pagpamatuod.