Seminary
Alma 42, Bahin 2: “Ang Kaluoy Moangkon sa Mahinulsolon”

“Alma 42, Bahin 2: ‘Ang Kaluoy Moangkon sa Mahinulsolon,’” Manwal sa Magtutudlo sa Basahon ni Mormon (2024)

“Alma 42, Bahin 2,” Manwal sa Magtutudlo sa Basahon ni Mormon

Alma 42, Bahin 2

“Ang Kaluoy Moangkon sa Mahinulsolon”

Imahe
painting ni Jesukristo nga nagtunol sa usa ka maluloy-on nga kamot

Aron matabangan ang iyang anak nga lalaki nga si Corianton nga maghinulsol, gitudloan siya ni Alma mahitungod sa kaangayan ug kaluoy sa Dios ug sa unsang paagi nga “walay lain kon dili ang tinuod nga mahinulsolon mao ang maluwas” (Alma 42:24). Kon kita makasabot sa laraw sa kaluoy sa Langitnong Amahan, kita madasig sa paghinulsol. Kini nga leksiyon makatabang nimo nga masabtan kon sa unsang paagi ang Pag-ula ni Jesukristo nagtugot kanimo nga makadawat sa kaluoy nga gisaad sa laraw sa Langitnong Amahan.

Ang balaod mopahamtang sa silot

  • Unsa ang pipila ka mga kahimtang diin ang kaangayan tinguhaon? Unsa man usab kaha ang kaluoy?

Napanalanginan kitang tanan tungod kay ang Langitnong Amahan parehong makiangayon ug maluloy-on. Tungod sa laraw sa Langitnong Amahan, kitang tanan pagadad-on pagbalik ngadto sa presensiya sa Dios aron pagahukman (tan-awa sa Alma 42:23). Sa iyang makasasala nga kahimtang, si Corianton dili andam alang sa paghukom. Milaom si Alma nga ang pagtudlo kaniya mahitungod sa laraw sa Langitnong Amahan mogiya ni Corianton sa paghinulsol ug pag-alagad sa Dios. Samtang magtuon ka sa Alma 42, pangitaa kon unsay gitudlo ni Alma kang Corianton nga iyang mahimo aron makadawat sa kaluoy sa Dios.

Sama nga ang mga balaod adunay importante nga papel sa katilingban, ang mga balaod usa ka mahinungdanon nga bahin sa laraw sa Langitnong Amahan.

Basaha ang Alma 42:17–21, mangita sa pipila ka mga katuyoan sa balaod diha sa laraw sa Langitnong Amahan (tan-awa usab sa 2 Nephi 2:13).

  • Unsa ang imong nakat-onan mahitungod sa balaod sa laraw sa Langitnong Amahan?

Pagdrowing og mga timbangan nga susama sa mosunod diha sa imong journal sa pagtuon.

Imahe
drowing nga linya sa mga timbangan

Sulati [label] ang timbangan og “Kaangayan.”

Sumala sa balaod sa kaangayan makadawat kita og mga sangpotanan sa atong mga binuhatan. Kita makadawat og mga panalangin kon kita mosunod sa balaod ug silot kon kita makalapas sa balaod.

Sulati ang usa ka bahin sa timbangan og “paglapas sa balaod” ug ang pikas nga bahin “silot nga gipas-an sa makasasala.”

Kon kita makalapas sa usa ka balaod, ang timbangan mahimong dili balanse. Ang kaangayan nagkinahanglan nga ang timbangan mahimong balanse. Ang bayad (o silot) gikinahanglan aron mabalanse ang timbangan (tan-awa sa Alma 42:22).

  • Unsa ang mahitabo kanato kon ang timbangan sa kaangayan mabalanse lamang pinaagi sa atong silot?

Ang silot sa sala mao ang espirituhanon nga kamatayon, “ingon nga gipahimulag gikan sa atubangan sa Ginoo” (Alma 42:11).

Ang kaluoy moangkon niadtong naghinulsol

Tungod kay ang Dios “usa ka mahingpit, makiangayon nga Dios, ug usa ka maluloy-on nga Dios usab” (Alma 42:15), Siya nag-andam og laraw aron kita makadawat og kaluoy kon kita makasala.

Basaha ang Alma 42:15, 22–25, mangita kon unsay gihatag sa laraw sa Langitnong Amahan sa pagbalanse sa mga timbangan sa kaangayan.

Butangi og ekis o papasa ang pulong nga makasasala gikan sa mga timbangan sa kaangayan ug pulihi kini og Manluluwas.

Imahe
icon, rekord

  1. Tubaga ang mosunod nga mga pangutana:

    • Unsaon nimo pagpasabot ang dayagram sa mga timbangan sa kaangayan sa imong kaugalingong mga pulong?

    • Unsa ang gibuhat ni Jesukristo aron ang kaluoy mahatag? (tan-awa sa Doktrina ug mga Pakigsaad 19:16–19).

    • Unsa ang gikinahanglan gikan kanato aron makadawat sa kaluoy sa Manluluwas? (tan-awa sa Alma 12:32–34; 34:15–16).

Usa ka baroganan nga atong makat-onan mao nga kon kita tinud-anay nga mahinulsolon, makadawat kita og kaluoy pinaagi sa Pag-ula sa Manluluwas.

Ang mahinulsolon nagpasabot nga magmapainubsanon ug mopadayag og kasubo alang sa sala (tan-awa sa 2 Mga taga-Corinto 7:10; 2 Nephi 2:7; Mosiah 4:10)

Imahe
icon, rekord

  1. Tubaga ang mosunod nga pangutana:

    • Ngano sa imong hunahuna nga ang tinuod nga mahinulsolon lamang ang maluwas?

Hunahunaa nga ikaw si Corianton ug wala pa makahinulsol sa tanan nimong mga sala. Basaha ang Alma 42:26–30, mangita sa mga pulong o mga hugpong sa mga pulong nga makapadasig kanimo sa paghinulsol.

  • Unsa nga mga pulong o mga hugpong sa mga pulong ang mahimong makadasig kanimo sa paghinulsol? Ngano man?

Human matudloi si Corianton mahitungod sa laraw sa Langitnong Amahan (tan-awa sa Alma 40–42), gipahinumdoman ni Alma si Corianton nga siya “tinawag sa Dios sa pagsangyaw sa pulong” aron sa “pagdala og mga kalag ngadto sa paghinulsol” (Alma 42:31). Si Corianton naghinulsol sa iyang mga sala ug mituman sa iyang calling (tan-awa sa Alma 49:30).

Pamalandong sa imong panginahanglan sa paghinulsol, ug hunahunaa kon sa unsang paagi ka mahimong tinuod nga mahinulsolon. Hinumdomi nga ang Langitnong Amahan mopasaylo kanimo kon ikaw maghinulsol (tan-awa sa Mosiah 26:30; Isaias 1:18).

  1. Kompletoha ang mosunod:

    Pagsulat og tulo o upat ka mga kapahayag nga nagpasabot sa papel sa Pag-ula ni Jesukristo diha sa laraw sa Langitnong Amahan. Ilakip ang mga papel sa kaangayan ug kaluoy ug unsa ang gikinahanglan natong buhaton aron makadawat og kaluoy. Irekord ang bisan unsang mga pagbati nga gusto nimong ipahayag mahitungod sa Manluluwas.