Alema 34:1–17

O Le Togiola e Le Gata ma Faavavau a Iesu Keriso

O loo tatalo Iesu Keriso i le Faatoaga o Ketesemane

Na i ai se taimi na e mafaufau ai pe o le a faape’ī lou olaga e aunoa ma Iesu Keriso ma Lana Togiola? Na aoao atu e Amoleka sa Sorama e faapea o tagata uma lava e faamaaa, pauu, ma leiloloa e aunoa ma le taulaga e le gata ma faavavau a le Alo o le Atua. O lenei lesona ua faamoemoe e fesoasoani e te malamalama ai i le ala e mafai ai e Iesu Keriso ona faamanuia oe e ala i Lana taulaga togiola e le gata ma e faavavau.

O le a faapefea ona ese ai le olaga?

O le a faapefea ona ese le olaga e aunoa ma …?

Mafaufau i ni nai auala e mafai ona e tali ai lenei fesili i tagata po o mea e te faalagolago i ai. Mo se faataitaiga, atonu e te mafaufau pe faapefea ona ese lou olaga e aunoa ma se tagata faapitoa, nisi o tekinolosi po o meafaigaluega e masani ona e faaaogaina, po o se gaoioiga e te fiafia i ai.

O Keriso o loo tatalo i Ketesemane

Faaalu sina taimi e fatu ai se lisi i lau api talaaga mo suesuega e uiga i nisi o auala o le a ese ai lou olaga e aunoa ma Iesu Keriso ma Lana Togiola. A o e suesue i le aso, o le a e aoaoina upumoni e mafai ona fesoasoani ia te oe e malamalama atili ai i lou manaomia o Iesu Keriso.

Ua molimau atu Amoleka ia sa Sorama e uiga ia Iesu Keriso

Atonu e te manatua na talai atu Alema ma Amoleka i sa Sorama, o e sa talitonu o le a “leai se Keriso” (Alema 31:16). Ina ua uma ona faamaumauina e Alema ana savali o loo tusia i le Alema 32–33, sa faasoa atu e Amoleka lana lava molimau e uiga i le Faaola.

Faitau le Alema 34:1–10, ma vaavaai mo mea na faasoa atu e Amoleka e uiga ia Iesu Keriso ma Lana Togiola.

O le Alema 34:9–10 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O a upu po o fasifuaitau e uiga ia Iesu Keriso ma Lana Togiola na e iloa e faapitoa le anoa? Aisea?

• O le a se mea na e aoaoina mai nei fuaiupu e uiga i le mafuaaga tatou te manaomia ai Iesu Keriso e togiola mo i tatou?

• O le a faapefea ona e aoteleina aoaoga a Amoleka i le Alema 34:8–10 o se faamatalaga o le upumoni?

Atonu ua e faailoa maia se upumoni e talitutusa ma lenei: A aunoa ma le Togiola e le gata ma faavavau a Iesu Keriso, o le a leiloloa tagata uma e faavavau.

• Aisea o le a “lē maalofia le fano” o tagata uma pe leiloloa ai e faavavau e aunoa ma Iesu Keriso ma Lana Togiola?

E le gata ma faavavau

Mafaufau e maka ia upu “e le gata ma faavavau” i le faaiuga o le fuaiupu 10 ma kopi le ata lenei i lau api talaaga mo suesuega:

o upu “o le Togiola a Iesu Keriso” i tafatafa o se aū e faasino i upu “e le gata ma faavavau”

• O le a sou manatu o le a le uiga o le Togiola a Iesu Keriso e le iu ma e faavavau?

Sa faasoa mai e Peresitene Russell M. Nelson le malamalamaaga lenei:

Peresitene Russell M. Nelson

O Lana Togiola e le gata—e leai sona iuga. E le gata foi ina ia mafai ona faaolaina tagata ola uma mai le oti e le iu. Sa le gata pe a fua i Lona puapuagatia tele. … Sa le gata i se tulaga—na faia i le taimi e tasi mo tagata uma. Ma o le alofa mutimutivale o le Togiola ua oo atu e le gata i le le mafaitaulia o tagata, ae faapea foi i le tele o lalolagi e le mafaitaulia na foafoaina e Ia. E le gata i le tulaga e sili atu i se fua faatatau po o se malamalama o le tagata soifua. (Russell M. Nelson, “The Atonement,” EnsignNov. 1996, 35)

• O le a se mea na fesoasoani lenei saunoaga ia te oe e aoao pe lagona ai e uiga ia Iesu Keriso ma Lana taulaga togiola?

E faapefea ona faatatau ia te oe?

E ui e mafai e le Faaola ona faamanuiaina se aofaiga e le mafaitaulia o tagata e ala i Lana Togiola, ae e mafai foi ona Ia faamanuiaina oe lava ia. Mafaufau e faafou le ata i lau api talaaga mo suesuega ia foliga faapea:

o upu “o le Togiola a Iesu Keriso” i tafatafa o se aū e faasino i upu “e le gata ma faavavau” ma se aū e faasino i le upu “patino”

Suesue punaoa nei, ma vaavaai mo nisi o auala e mafai ai e le Faaola ona faamanuia patino ai oe ona o Lana Togiola e le gata ma faavavau.

• Alema 34:11–17

• 2 Nifae 9:10

• Mataupu Faavae ma Feagaiga 58:42

Na aoao mai Peresitene Tad R. Callister, o le sa avea ma Peresitene Aoao o le Aoga Sa:

Peresitene Tad R. Callister

E i ai nisi taimi sa ou feiloai ai i nisi o le Au Paia lelei o loo i ai ni faafitauli i le faamagaloina o i latou lava, o ē sa aunoa ma le iloa na latou tuuina ma le le sa’o ni tapulaa i mana togiola o le Faaola. E aunoa ma le iloa, ua latou liuaina se Togiola le i’u i se togiola e gata lea e le taulimaina ai a latou agasala po o vaivaiga patino. Ae o se Togiola le i’u, ona na te faaaofiaina ma totogia agasala uma ma vaivaiga, faapea ai foi ma sauaga uma po o tiga e mafua ona o isi. (Tad R. Callister, “O Le Togiola a Iesu Keriso,” Ensign po o le Liahona, Me 2019, 85–86)

aikona, faamaumau

1. Tali ia le itiiti ifo ma le tasi o fesili nei:

   • O le a se mea na e aoaoina e uiga i nisi o auala e mafai ona faamanuia patino ai oe e le Faaola e ala i Lana Togiola e le gata ma faavavau?

   • O le a faapefea ona ese lou olaga e aunoa ma Iesu Keriso ma Lana Togiola?

Tuu i le faitalia: O e Manao e Aoao Atili?

E mafai faapefea e Iesu Keriso ona faamanuiaina au lava ia e ala i Lana Togiola e le gata ma faavavau?

Na aoao mai Elder Michael John U. Teh o le Fitugafulu:

Elder Michael John U. Teh

E tele taimi e faigofie atu mo i tatou ona mafaufau ma tautatala e uiga i le Togiola a Keriso i mea faalauaitele, nai lo le faailoaina o le taua patino i o tatou olaga. O le Togiola a Iesu Keriso e le i’u ma e faavavau ma e aofia ai le lautele ma le loloto o mea uma ma tagata uma ae e aafia patino ai i tatou uma taitoatasi. Ona o Lana taulaga togiola, ua i ai i le Faaola le mana e faamama, faamalolo, ma faamalolosia ai i tatou taitoatasi. (Michael John U. Teh, “O lo Tatou Faaola Patino,” LiahonaMe 2021, 99)

E mafai faapefea e Iesu Keriso ma Lana Togiola ona tuuina mai ia te au le faamoemoe?

Na aoao mai Elder Dieter F. Uchtdorf o le Korama a Aposetolo e Toasefululua:

Peresitene Dieter F. Uchtdorf

O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou solitulafono ma ni lē atoatoa. Nai lo le nofoa’i i na mea ma lagonaina le lē matogiolaina, e mafai ona tatou a’oa’o mai ai ma lagonaina le faamoemoe. O le meaalofa faamamā o le salamo e mafai ai ona tuua i tua a tatou agasala ma tutula’i a’e o ni tagata fou.

Ona o Iesu Keriso, e le tau faamatalaina ai i tatou i o tatou to’ilalo. E mafai ona latou faaleleia i tatou. (Dieter F. Uchtdorf, “O Loo ia i Tatou le Atua,” Liahona, Me 2021, 8–9)

Na aoao mai Elder Gerrit W. Gong o le Korama o Aposetolo e Toasefululua:

Elder Gerrit W. Gong

Afai sa tatou lagonaina, pe o lagonaina, le lē mautinoa, tuuatoatasi, ita, teenaina, lē fiafia, po o le vavae ese mai le Atua ma Lana Ekalesia toefuataiina, atonu e manaomia se isi fuataga o taumafaiga ma le faatuatua e toe foi atu ai i Lana ala o feagaiga. Ae e tauia! Faamolemole o mai, pe toe o mai, i le Alii o Iesu Keriso! O le alofa o le Atua e sili atu ona malosi nai lo noataga o le oti—faaletino pe faaleagaga. O le Togiola a lo tatou Faaola e lē mafuatia ma e faavavau. E tofu i tatou uma ma masalosaloga ma mea e toilalo ai. E i ai taimi tatou te ono se ese ai ma le ala. Ua faamautinoa mai ma le agaalofa e le Atua ia i tatou, po o fea lava o tatou i ai, po o a foi mea sa tatou faia, e leai se mea e ta’u o le lē toe foi. E faatalitali mai o Ia e sauni e opogi i tatou. (Gerrit W. Gong, “O La Tatou Afi o le Tolauapiga o le Faatuatua,” Ensign po o le Liahona, Nov. 2018, 41)