Doktrinal nga Kahanas: Mosiah 18:8–10

“Kamo Nakasulod ngadto sa usa ka Pakigsaad uban Kaniya”

Alma nagbunyag diha sa mga tubig sa Mormon

Sa miaging leksiyon, imong nakat-onan kon sa unsang paagi ang atong pakigsaad sa bunyag uban sa Manluluwas makaapekto sa paagi sa atong pagpuyo sa atong kinabuhi. Kini nga leksiyon makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Mosiah 18:8–10, mapasabot ang doktrina nga gitudlo niadto nga mga bersikulo, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo gamit niini nga tudling sa kasulatan.

Isag-ulo ug ipasabot

Han-aya ang pakisayran ug mahinungdanon nga hugpong sa mga pulong sa kasulatan sa ubos alang sa Mosiah 18:8–10 pinaagi sa pagsulat niini sa imong journal sa pagtuon sa saktong pagkasunod-sunod. Kon gikinahanglan, susiha ang imong pagkatukma pinaagi sa pagtan-aw sa lista sa mga pakisayran sa doktrinal nga kahanas ug sa mahinungdanon nga mga hugpong sa mga pulong sa kasulatan diha sa kataposan sa Mahinungdanon nga Dokumento sa Doktrinal nga Kahanas (2022).

pagpabunyag sa 8 Ginoo diha sa Mosiah kamo 18 ingon og pakigsaad kaniya nga nakasulod ngadto usa ka saksi 10 ngalan sa usa uban ka

Human nimo masulat ang husto nga hugpong sa mga pulong, paggahin sa makadiyot sa pagsulay sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan pinaagi sa pagsulti niini sa pipila ka mga higayon.

icon, rekord

1. Kompletoha ang mosunod nga kalihokan:

Sa miaging leksiyon, imong nakat-onan nga kon kita bunyagan, kita mosulod ngadto sa usa ka pakigsaad uban sa Dios nga kita moserbisyo Kaniya ug maghupot sa Iyang mga sugo. Handurawa nga gihangyo ka nga mamulong diha sa bunyag sa otso anyos nga bata mahitungod sa pakigsaad nga iyang gihimo. Irekord kon sa unsang paagi ang Mosiah 18:8–10 makatabang kanimo sa pagpasabot sa pakigsaad ug sa unsang paagi ang pagtuman sa pakigsaad makatabang sa bata nga mahimong mas mahisama ni Jesukristo.

Pagbansay sa paggamit

Gikan sa panumdoman, sulayi paglista ang tulo ka mga baroganan sa pag-angkon og espirituhanong kahibalo, lakip ang mubo nga paghulagway sa unsay gipasabot sa matag baroganan. Kon gikinahanglan, rebyoha ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Basaha ang mosunod nga senaryo, ug gamita ang matag usa sa mga baroganan sa pag-angkon og espirituhanong kahibalo sa pag-andam og pipila ka tambag alang ni Anna nga mahimo niyang magamit sa pagtabang ni Paula.

Namatikdan ni Anna nga si Paula, usa ka babaye sa iyang klase sa simbahan, nanlimbasog nga magmalipayon o makighigala. Si Anna nakadungog nga si Paula usahay mopili nga dili motambong sa mga kalihokan sa kabatan-onan o mga miting sa simbahan tungod kay gibati niya nga dili siya apil sa grupo ug wala gidawat sa ubang mga babaye. Gusto ni Anna nga tabangan si Paula nga mobati nga mas gihangop, apan wala pa gyod siya sukad nakaistorya ni Paula ug nabalaka nga tingali kiwaw o lisod nga makig-istorya kaniya.

2.  Tubaga ang mosunod nga pangutana:

• Unsaon nimo paggamit ang matag usa sa tulo ka mga baroganan sa pag-angkon og espirituhanong kahibalo ug ang mga pagtulun-an sa Mosiah 18:8–10 aron matabangan si Anna sa iyang sitwasyon?

Kon misulay ka ug nagkinahanglan gihapon og tabang sa pagtubag sa miaging pangutana, ang mosunod nga mga pangutana makatabang sa paggiya kanimo:

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka mga tudling sa kasulatan o mga pamahayag sa mga lider sa Simbahan nga imong nahibaloan nga makatabang ni Anna? Sa unsang paagi nga ang mga pagtulun-an sa Mosiah 18:8–10 makatabang?

• Sa unsang paagi nga ang pagpakig-istorya sa kapangulohan sa klase sa Young Women makahatag ni Anna og dugang nga pagsabot mahitungod sa sitwasyon ni Paula?

Susihon ang mga konsepto ug mga pangutana inubanan sa mahangtorong panglantaw

• Unsa ang kinahanglang masabtan ni Anna kon sa unsang paagi nakita sa Ginoo ang mga pakigsaad sa bunyag nga makatabang niya sa pagbuntog sa iyang mga pagbati sa pagduha-duha?

• Sa unsang paagi ang paghinumdom sa gibati sa Ginoo mahitungod ni Paula makatabang ni Anna?

• Sa unsang paagi ang pagdasig ni Paula makatabang ni Anna nga mahimong mas mahisama sa Langitnong Amahan ug ni Jesukristo?

Lihokon inubanan sa hugot nga pagtuo

• Unsa ang mahimo ni Anna aron matuman ang piho nga mga saad sa bunyag nga gitudlo ni Alma sa Mosiah 18:8–10?

• Unsa nga mga ehemplo ni Jesukristo sa pagtabang sa uban ang imong ipaambit kang Anna aron sa pagtabang kaniya nga molihok uban sa hugot nga pagtuo?