“Mosaea 9–10: ‘I Le Malosi o le Alii,’” Tusi Lesona a Tagata o le Vasega o le Tusi a Mamona (2024)
“Mosaea 9–10,” Tusi Lesona a Tagata o le Vasega o le Tusi a Mamona
Mosaea 9–10
“I Le Malosi o le Alii”
Mata e mafai ona taulai atu i se mea tatou te mananao e faia ni faaiuga e aunoa ma le mafaufau i taunuuga e ono i ai? Sa matuai taulai atu Senifa i le toe foi atu i le laueleele o Nifae ma le toe fausia o aai iina lea na ia le mafaufau ai i nisi o taunuuga le lelei e mafai ona oo mai mai lana faaiuga. Ina ua uma ona oo i nisi o taunuuga, sa liliu atu Senifa ma lona nuu i le Alii i le faatuatua. O lenei lesona e mafai ona fesoasoani ia oe e iloa ai pe mafai faapefea ona e maua le malosi mai le Alii a o e tatalo ma agai atu i luma i le faatuatua.
Gasetoto o le la
-
O le la e 400 taimi e telē ai i lo le masina, e faapefea la ona matautia le gasetoto o le masina, po o le poloka o le malamalama ma le mafanafana o le la e pei ona faaalia i le ata lenei?
Ona e sili atu le latalata o le masina i le lalolagi nai lo le la, e mafai ona foliga mai e talitutusa lona lapoa ma le la ma punitia ai lona malamalama. E oo lava i se mea itiiti e pei o lou limamatua e mafai ona poloka ai lau vaaiga o le la pe afai e te faalatalataina atu i lou mata.
Sa faamalamalama mai e Elder Gary E. Stevenson o le Korama a Aposetolo e Toasefululua le auala e mafai ai ona avea se gasetoto o le la ma se talafaatusa mo o tatou olaga faaleagaga. Matamata i le “Gasetoto Faaleagaga” (15:12), o lo o maua i le ChurchofJesusChrist.org, mai le faailotaimi 1:01 i le 3:53, pe faitau le faamatalaga lenei.
I le tulaga lava e tasi lea e mafai ai e se masina itiiti lava ona punitia le la maoae, tineia ai lona malamalama ma le mafanafana, e mafai ona tupu se gasetoto faaleagaga pe a tatou faatagaina ni faalavefau laiti ma atuatuvale—ia tatou te fetaiai i o tatou olaga masani—ia faalatalata atili mai ma latou punitia ai le tulaga maoae, susulu, ma le mafanafana o le malamalama o Iesu Keriso ma Lana talalelei. (Gary E. Stevenson, “Gasetoto Faaleagaga,” Ensign po o le Liahona, Nov. 2017, 45)
-
O a nisi o mea laiti tatou te taulai atu i ai i nisi taimi e mafai ona punitia ai la tatou taulaiga ia Iesu Keriso ma Lana talalelei?
-
O a luitau po o taunuuga le lelei e mafai ona oo mai i le taulai tele atu i nei mea laiti?
Mafaufau i mea atonu o loo e taulai atu i ai e mafai ona punitia ai lau vaai ia Iesu Keriso ma Lana talalelei. A o e suesue, vaavaai mo upumoni e mafai ona fesoasoani ia te oe e faafou ai lau taulaiga i le Alii ina ia aloese ai mai se “gasetoto faaleagaga.”
O le soona naunau o Senifa
I se lesona talu ai, sa e aoaoina ai na taitai e Senifa se vaega o tagata mai le laueleele o Saraemila e toe foi atu i le laueleele o Nifae.
Sa i ai ia Senifa se manao tele e mautofi i lenei laueleele, ae o lana taulaiga na taitai atu ai i faafitauli mo ia ma lona nuu.
Faitau le Mosaea 9:1–3, 6, 10–15 (tagai foi Mosaea 7:21), ma vaavaai pe na faapefea e le taulaiga a Senifa ma lona nuu ona taitai atu ai i taunuuga le lelei. Ia matau o le soona naunau o lona uiga o le manao tele e faataunuu pe maua se mea.
-
O a nisi o taunuuga o le soona naunau ma telegese ai ona manatua le Alii?
O se tasi o upumoni e mafai ona tatou aoaoina o le soona naunau ma le telegese ona manatua o le Alii e mafai ona taitai atu ai i taunuuga le lelei.
-
O a nisi o auala atonu tatou te soona naunau ai ma ua faatelegese ai ona manatua le Alii i aso nei?
-
O a ni taunuuga lē lelei e ono feagai ma i tatou?
O le liliu atu i le Alii
Sa nonofo filemu Senifa ma lona nuu mo le tele o tausaga a o lei saili le tupu o sa Lamana e faatino lana fuafuaga o le aumaia o i latou i le pologa. Faitau fuaitau nei e vaai ai pe na faapefea ona liliu atu Senifa ma lona nuu i le Alii ina ua o mai sa Lamana e faatoilalo i latou.
-
O a mea na faia e tagata e tuu atu ai lo latou faatuatuaga i le Alii? O a ni taunuuga na i ai?
-
O a ni upumoni e mafai ona tatou aoaoina mai i lenei tala?
O se upumoni e tasi e mafai ona tatou aoao mai i lenei tala o le afai tatou te tatalo ma o atu i le faatuatua, e mafai ona tatou feagai ma o tatou luitau i le malosi o le Alii.
-
O le a se mea ua uma ona e iloa e uiga i le Tama Faalelagi ma Iesu Keriso lea e tuuina atu ia te oe le mautinoa ina ia tuuina atu lou faatuatuaga ia i Laua e ala i le tatalo ma agai atu i luma i le faatuatua?
-
O le a sou lagona i le iloaina o le a fesoasoani pea le Tama Faalelagi ma Iesu Keriso ia i tatou i o tatou luitau e ui lava ina ua tuanai ona tatou faia o ni mea sese?
-
O a ni faataitaiga i lou olaga, olaga o isi, po o tusitusiga paia o loo faapupula mai ai lenei upumoni?
Ina ia vaai i se faataitaiga o lenei upumoni, mafaufau e matamata le “Tatalo” (4:12), o loo maua i le ChurchofJesusChrist.org, po o le faitau e uiga i le Faaola o loo faataitaia lenei mataupu faavae i le Luka 22:39–45.
O upumoni e faaaoga i le olaga moni
Vaai faalemafaufau o se tamaitai talavou ua ia masalomia lana molimau. Pe a ia mafaufau i tua i lona olaga, na ia iloa ai sa ia taulai atu i le mauaina o ni togi lelei ma saunia ai mo lona lumanai atonu na te lei faafaileleina ai lana molimau e pei ona sa tatau ai, ma o lea ua ia matuā masalomia ai lava pe moni le Ekalesia.
-
Faaaoga mea na e aoaoina mai le Mosaea 9–10 ma ou lava aafiaga patino e tali ai fesili nei. Ia mafaufau foi pe faapefea ona faatatau au tali i lou lava olaga.
-
E mafai faapefea ona ia “tagi malosi atu i le Alii” (Mosaea 9:17)? E faapefea ona e faamatalaina lenei ituaiga o tatalo?
-
E mafai faapefea ona ia faalagolago i le Alii ma agai atu i luma i le faatuatua ia Iesu Keriso pe a uma ona tagi malosi atu i le Alii?
-
O le a se isi mea e mafai ona e fautuaina lenei tamaitai talavou e fai? Aisea?
-