Վարդապետության սերտում. Մոսիա 4.9

«Հավատացե՛ք Աստծուն»

պատանին նայում է վերև և խորհում է

Մոսիա 4.9–10 հատվածն ուսումնասիրելիս սովորեցիք Աստծուն հավատալու կարևորության մասին: Այս դասը կօգնի ձեզ մտապահել Մոսիա 4.9 հատվածի վարդապետության սերտման հղումն ու հիմնական արտահայտությունը, բացատրել վարդապետությունը և իրական կյանքի իրավիճակներում կիրառել հոգևոր գիտելիքներ ձեռք բերելու սկզբունքները:

Մտապահեք և բացատրեք

Վերհիշեք ձեր փորձառությունը, երբ Մոսիա 4.9–10 հատվածում ուսումնասիրում էիք Բենիամին թագավորի ուղերձն Աստծուն հավատալու մասին, որն ուղղված էր իր ժողովրդին: Ըստ անհրաժեշտության՝ կարող եք կրկին կարդալ այդ հատվածները և վերանայել ձեր օրագրում նախորդ դասի համար ստեղծած գծապատկերը:

• Բենիամին թագավորն Աստծո մասին ի՞նչ կարևոր բնութագրիչների կամ հատկանիշների էր առաջարկում իր ժողովրդին հավատալ:

• Աստծո այդ հատկանիշներին հավատալն ի՞նչ ազդեցություն կարող է ունենալ ձեր կյանքում:

Ընտրեք Մոսիա 4.9–10 հատվածում հիշատակվող Աստծո բնութագրիչներից կամ հատկանիշներից մեկը, որոնց Բենիամին թագավորն ուսուցանում էր իր ժողովրդին հավատալ: Կիսվեք, թե դա ինչպես կբացատրեիք որևէ մեկին, ով չի հասկանում, թե ինչ է դա նշանակում:

Մոսիա 4.9 հատվածի հիմնական արտահայտությունն է՝ «Հավատացե՛ք Աստծուն. … հավատացե՛ք, որ նա ունի բոլոր իմաստությունը»: Հետևյալ վարժությունը կարող է օգնել ձեզ հիշել այս սուրբ գրության հղումը և հիմնական արտահայտությունը:

Ձեր օրագրում մեծ տառերով գրեք հավատացե՛ք բառը: Ներքևում գրեք Աստծուն բառը, իսկ դրա ներքևում գրեք հավատացե՛ք, որ նա ունի բոլոր իմաստությունը արտահայտությունը: Ներքևում մեծ տառերով գրեք սուրբ գրության հղումը՝ Մոսիա 4.9: Սկսելով վերևից՝ մատով ցույց տվեք բառը, արտահայտությունը կամ հղումը և բարձրաձայն ասեք յուրաքանչյուր տող: Այս վարժությունը կրկնեք մի քանի անգամ, մինչև մտապահեք:

Գործնական կիրառում

Կրկնեք հոգևոր գիտելիքներ ձեռք բերելու սկզբունքները, որոնք ուսուցանվում են «Ձեռք բերել հոգևոր գիտելիքներ» բաժնի 5–12 պարբերություններում՝ Վարդապետության սերտման հիմնական փաստաթղթում (2022): Կարող եք փորձել անգիր թվարկել բոլոր երեք սկզբունքները: Այնուհետև ձեր օրագրում գրեք, թե ինչպես եք օգտագործել կամ ինչպես կարող էիք օգտագործել այդ սկզբունքները:

Կարդացեք ստորև ներկայացվող սցենարը և մտածեք ձեր կյանքի այն իրավիճակների մասին, որոնցում հարցականի տակ է դրվել ձեր հավատքն Աստծո հանդեպ, կամ ձեր հավատքն այնքան ուժեղ չի եղել, որքան կցանկանայիք:

Միրան սովորում է մի դասարանում է, որտեղ ուսուցիչը ծաղրում է կրոնը և Աստծուն չի հավատում: Ուսուցչի մեկնաբանությունները սկզբում անհանգստացնում էին Միրային, բայց մի քանի ամիս այդ դասարանում սովորելով՝ նա սկսեց մտածել, որ գուցե իր ուսուցիչը ճիշտ է: Նա միշտ հավատացել է Աստծուն, բայց այժմ զգում է, որ կարող է սկսել կասկածել Աստծո գոյությանը:

Կարող եք փորձել Միրայի իրավիճակում կիրառել հոգևոր գիտելիքներ ձեռք բերելու սկզբունքները՝ դիտելով «Նրա շնորհը. ընտրել Աստծուն հավատալը» տեսանյութը (4:07), որը հասանելի է ChurchofJesusChrist.org կայքում: Դիտելիս ուշադրություն դարձրեք, թե այս տեսանյութում երիտասարդ տղան ինչպես է օգտագործել հոգևոր գիտելիք ձեռք բերելու սկզբունքները, և դրանք ինչպես կարող են Միրայի համար կիրառվել:

Օգտագործեք հոգևոր գիտելիքներ ձեռք բերելու սկզբունքները և Մոսիա 4.9 հատվածի վարդապետությունը, որպեսզի օգնեք Միրային նրա իրավիճակում կամ Աստծուն հավատալու հետ կապված մեկ այլ սցենարում, որն առնչվում է ձեր կյանքին:

Երբ խորհեք Միրային օգնելու մասին, մտածեք, թե ինչպես կպատասխանեիք հետևյալ հարցերին:

Գործեք հավատքով

• Ի՞նչ հավատքով լի գործողություններ կարելի է ձեռնարկել, եթե դժվար է Աստծուն հավատալը:

• Այդ գործողությունների կատարումն ինչպե՞ս կարող է օգնել նրանց:

Քննեք հասկացություններն ու հարցերը հավերժության հեռանկարով

• Մոսիա 4.9 հատվածի ո՞ր ուսմունքները կարող են օգնել այս իրավիճակում՝ հավերժության հեռանկար ունենալու համար:

• Աստծուն հավատալու կամ չհավատալու որոշումն ինչպե՞ս կարող է ազդել մարդու ապագայի վրա:

Ձգտեք մեծացնել հասկացողությունը աստվածայնորեն սահմանված աղբյուրների միջոցով

• Սուրբ գրությունների ի՞նչ լրացուցիչ հատվածներ կամ փորձառություններ (որոնք ունեցել եք դուք կամ ուրիշները) կարող են օգնել այս խնդրին:

• Ուրիշ որտե՞ղ կարելի է տեղեկություններ գտնել, որոնք կօգնեն այս իրավիճակում: Գտեք առնվազն մեկ այլ աղբյուր և բացատրեք, թե այն ինչպես կարող է օգնել:

1. Կիսվեք, թե ինչպես կօգտագործեիք հոգևոր գիտելիքներ ձեռք բերելու սկզբունքները և Մոսիա 4.9 հատվածում ուսուցանված վարդապետությունը՝ Միրային իր իրավիճակում օգնելու համար: