Seminary
Mosiah 4: “Kanunay Magbaton sa Kapasayloan sa Inyong mga Sala”

“Mosiah 4: ‘Kanunay Magbaton sa Kapasayloan sa Inyong mga Sala,’” Manwal sa Magtutudlo sa Basahon ni Mormon (2024)

“Mosiah 4,” Manwal sa Magtutudlo sa Basahon ni Mormon

Mosiah 4

“Kanunay Magbaton sa Kapasayloan sa Inyong mga Sala”

Imahe
batan-on nga malipayon tan-awon

Unsa kaha ang kalahian sa imong kinabuhi kon gibati nimo ang dugang nga kalipay ug kalinaw sa tanlag? Ang mga Nephite, natandog sa mga pagtulun-an ni Hari Benjamin, “napuno sa hingpit nga kalipay” ug mibati og “kalinaw sa ilang tanlag” samtang sila naghinulsol ug nakadawat og kapasayloan sa ilang mga sala (Mosiah 4:3). Si Hari Benjamin mitudlo dayon kanila unsaon sa pagpadayon pagbaton niini nga kapasayloan sa ilang mga sala. Kini nga leksiyon makatabang kanimo nga makasabot unsa ang imong mahimo aron makadawat ug makapadayon sa pagbaton sa kapasayloan sa imong mga sala.

Pagpabiling espirituhanong lig-on

Tan-awa ang mosunod nga hulagway ug hunahunaa kon unsa ang kinahanglan nga buhaton sa usa ka tawo aron kini nga tanom magpabilin nga himsog ug magtubo.

Imahe
himsog nga tanom

  • Unsa ang mahitabo niini nga tanom kon kini ibutang sa usa ka mangitngit nga lawak o dili gayod mabisbisan?

  • Sa unsang paagi kini may kalabotan sa atong espirituwal nga kahimsog ug mga panginahanglan?

Sama sa pag-atiman sa usa ka tanom, ang pagpabilin sa atong kaugalingon nga himsog sa espirituhanong paagi nagkinahanglan og makanunayon nga paningkamot. Sa Mosiah 4, gitudloan ni Hari Benjamin ang iyang katawhan kon unsay ilang kinahanglang buhaton aron magpabiling lig-on sa espirituhanong paagi. Samtang magtuon ka, pamalandongi ang mga pagtulun-an nga makatabang nimo sa imong mga paningkamot nga magpabiling lig-on sa espirituhanong paagi sa tibuok nimong kinabuhi ug molambo nga mas mahisama sa Manluluwas.

Padayon nga magbaton og kapasayloan sa atong mga sala

Hinumdomi nga isip kabahin sa pakigpulong ni Hari Benjamin, mipaambit siya og mensahe nga iyang nadawat gikan sa usa ka anghel mahitungod sa pag-anhi ni Jesukristo ug sa kaimportante sa pagbuntog sa atong napukan nga kinaiya pinaagi sa Pag-ula sa Manluluwas (tan-awa sa Mosiah 3).

Basaha ang Mosiah 4:1–3, mangita sa mga panalangin ug mga pagbati nga nasinati sa katawhan ni Hari Benjamin.

  • Unsay mipatigbabaw kanimo gikan niining mga bersikulo?

  • Unsa sa imong hunahuna ang kinahanglan nga buhaton sa mga tawo aron magpabilin niining putli ug malipayon nga kahimtang?

Handurawa kon unsa kaha ang kahimtang nga nahimong usa sa mga katawhan ni Hari Benjamin nianang adlawa. Pamalandongi kon sa unsang paagi kaha kini makaimpluwensiya sa imong mga pagbati mahitungod ni Jesukristo ug unsa, gikan niini nga kasinatian, ang gusto nimong ipabilin uban kanimo hangtod sa kahangtoran.

  • Unsa kaha ang kalainan nga mahimo niini sa imong kinabuhi kon gibati nimo ang kapasayloan sa imong mga sala sa kanunay?

Ang nahibilin sa mga pagtulun-an ni Hari Benjamin sa Mosiah 4 makatabang kanato nga makasabot nga human kita makadawat og kapasayloan gikan ni Jesukristo, kinahanglan gayod kita nga maningkamot nga padayon nga magbaton sa kapasayloan sa atong mga sala.

  • Unsa sa imong hunahuna ang kalainan tali sa pagdawat ug padayon nga pagbaton sa kapasayloan sa atong mga sala?

  • Ngano sa imong hunahuna nga importante alang kanato nga maningkamot sa pagpabiling magbaton sa kapasayloan sa atong mga sala sa tibuok natong kinabuhi?

Ikonsiderar kon sa unsang paagi kini nga kamatuoran magamit sa imong kaugalingong kinabuhi. Unsa ka maayo paminaw nimo ang imong padayong pagbaton og kapasayloan sa imong mga sala? Samtang magpadayon ka sa pagtuon, pangitaa ang mga kamatuoran nga makatabang nimo nga makasabot unsay imong mahimo aron padayong magbaton sa kapasayloan sa imong mga sala.

Sa imong journal sa pagtuon, ikonsiderar ang pagsulat og ulohan [heading] nga giulohan og, “Unsa ang atong mahimo aron padayon nga magbaton sa kapasayloan sa atong mga sala.”

Basaha ang Mosiah 4:9–16 ug pangitaa ang mga pagtulun-an ni Hari Benjamin nga makatabang kanato nga makasabot kon unsaon nato nga padayong magbaton og kapasayloan sa atong mga sala.

  1. Tubaga ang mosunod nga mga pangutana:

    • Unsa ang labing menos tulo ka mga butang nga gitudlo ni Hari Benjamin nga kinahanglan natong buhaton aron padayon nga magbaton og kapasayloan sa atong mga sala nga labing makahuluganon alang kanimo?

    • Sa imong hunahuna, unsa kaha alang kanimo ang pagbuhat niini nga mga pagdapit gikan ni Hari Benjamin diha sa imong kinabuhi?

    • Sa unsang paagi nga ang pagbuhat niini nga mga butang makatabang kanimo nga padayon nga magbaton og kapasayloan sa imong mga sala?

Akong sunod nga mga lakang

Pamalandongi kon unsa ka maayo ang imong nahimo sa pagbuhat sa mga pagtulun-an ni Hari Benjamin gikan niini nga mga bersikulo. Mahimo nimo kini pinaagi sa pagtutok sa tulo o upat ka kinaiya nga bag-o lang nimo giila ug sa pagpangutana sa imong kaugalingon sama sa:

  • Unsa ka dako ang akong paningkamot niini?

  • Unsa ka sagad ang pagbuhat nako niini?

  • Unsa nga mga pagbati ug mga impresyon ang akong gibati karon nga mahimong nagsugyot og mga bahin nga mahimo nakong pauswagon?

Sa mainampoon nga paagi paghimo og piho nga plano aron molambo sa usa ka bahin. Pamalandongi ang bisan unsang mga babag nga mahimo nimong atubangon samtang naningkamot ka nga molambo niini nga bahin ug unsa ang imong mahimo aron makadawat sa tabang sa Ginoo sa pagbuntog niini nga mga hagit. Mahimong makatabang ang pagpaambit sa imong tumong ngadto sa usa ka miyembro sa pamilya o sa minahal sa kinabuhi nga makasuporta kanimo niini. Mahimo usab nimong iapil kini nga tumong sa imong mga tumong sa Kabataan ug Kabatan-onan.