Rebyo 6 sa Doktrinal nga Kahanas

Sabta ug Ipasabot

babaye nagtudlo og klase

Usa sa mga katuyoan sa doktrinal nga kahanas mao ang pagtabang kanimo nga makasabot sa mga pagtulun-an sa Langitnong Amahan ug ni Jesukristo nga anaa sa mga tudling sa doktrinal nga kahanas ug makahimo sa pagpasabot niini sa imong kaugalingon nga mga pulong. Kini nga leksiyon makatabang sa pagpalawom sa imong pagsabot ug pagpasabot sa mga kamatuoran gikan sa usa o daghan pa sa mga tudling sa doktrinal nga kahanas gikan sa Basahon ni Mormon.

Estratehiya

Paghunahuna sa imong paborito nga paugnat sa kusog [sport], dula sa tabla [board game], dula sa baraha [card game], o dula sa video [video game].

rugby

• Unsa nga mga estratehiya ang makatabang sa pagdaog sa imong paborito nga paugnat sa kusog [sport] o mga dula? Ngano man?

• Ngano nga importante nga adunay usa ka estratehiya o plano sa usa ka dula?

ChurchofJesusChrist.org

• Agi og dugang sa pagbasa sa mga kasulatan, sa unsang paagi kini makatabang kanimo nga makabaton og mga estratehiya alang sa mas maayong pagsabot sa mga pulong sa Dios diha sa mga kasulatan?

• Unsa nga mga estratehiya ang imong gigamit nga nakatabang kanimo nga makasabot sa mga kasulatan?

Adunay daghang mga estratehiya aron matabangan ka nga mas masabtan og maayo ang mga kasulatan. Niini nga leksiyon makabaton ka og kahigayonan sa pagsulay og estratehiya aron mas masabtan ang usa o daghan pa nga mga tudling sa doktrinal nga kahanas sa Basahon ni Mormon.

Sa ubos mao ang lista sa mga tudling sa doktrinal nga kahanas gikan sa unang katunga sa Basahon ni Mormon. Pagpili og usa o daghan pa nga gusto nimong masabtan pag-ayo.

Unang 12 ka Tudling sa Doktrinal nga Kahanas ug Mahinungdanon nga Hugpong sa mga Pulong

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

© 2024 by Intellectual Reserve, Inc. All rights reserved.

Palawman ang imong pagsabot

Basaha ang tudling o mga tudling nga imong napili.

• Unsa man ang gikan niini nga mga tudling ang gusto pa nimong mas masabtan? Unsa nga mga estratehiya ang imong magamit aron mahimo kini?

Gamita ang mosunod nga estratehiya, o lain nga imong nahibaloan, aron sa pagpalawom sa imong pagsabot sa tudling o mga tudling nga imong napili. Makabaton ka og kahigayonan sa pagpasabot sa imong nakat-onan unya sa leksiyon.

Ang Alang sa Kalig-on sa mga Kabatan-onan nga magasin sagad naglakip sa kalihokan sa pagtuon sa kasulatan nga gitawag og “Pagtulun-an human sa usa ka Pagtulun-an,” diin gipasabot o naghatag og kahulogan sa pipila ka mahinungdanon nga mga pulong o mga hugpong sa mga pulong gikan sa tudling sa kasulatan. Aron makakita og usa ka ehemplo sa kalihokan sa “Pagtulun-an human sa usa ka Pagtulun-an”, tan-awa sa “Ayaw Kahadlok,” Alang sa Kalig-on sa mga Kabatan-onan, Peb. 2021, 32 o “Pagpahimutang sa Tukuranan,” Alang sa Kalig-on sa mga Kabatan-onan, Ene. 2021, 19.

1. Kompletoha ang mosunod nga kalihokan:

Paghimo og imong kaugalingon nga “Pagtulun-an human sa usa ka Pagtulun-an” alang sa usa sa mga tudling sa doktrinal nga kahanas nga nalista sa ibabaw. Kon ganahan ka og art, ikonsiderar ang pagdugang og mga drowing o mga kolor sa imong pahina sa “Pagtulun-an human sa usa ka Pagtulun-an”. Gamita ang mosunod nga mga instruksiyon aron matabangan ka sa paghimo niini:

1. Sa ibabaw sa pahina, isulat ang tanang pulong sa tudling sa kasulatan nga imong napili.

2. Pagpili og labing minos lima ka pulong o mga hugpong sa mga pulong gikan niana nga tudling sa kasulatan ug ilista kini sa wala nga bahin diha sa pahina. Pagbilin og igo nga luna aron makahimo og mga mubo nga sulat tapad sa matag pulong o hugpong sa mga pulong.

3. Pangitaa ug ilista ang mga kahulogan, mga pagpasabot, mga ehemplo, may kalabotan nga mga kasulatan, o mga pamahayag gikan sa mga lider sa Simbahan nga makatabang sa pagpalawom sa imong pagsabot niining mahinungdanon nga mga pulong o mga hugpong sa mga pulong gikan sa tudling sa kasulatan. Ilista sila sunod sa pulong nga sila may kalabotan. Mahimo nimong gamiton ang mga himan sama sa Giya ngadto sa mga Kasulatan, Topical Guide, mga pakigpulong sa komperensiya, o mga magasin sa Simbahan.

4. Bisan asa sa imong dokumento, pagdugang og parapo bahin sa unsa ang imong nakat-onan o gusto nimong mahinumdoman gikan niini nga tudling. Ilakip ang unsay gitudlo niini kanimo kabahin sa Manluluwas, sa Iyang Simbahan, o sa Iyang misyon sa pagluwas kanato.

Kon gitinguha, sublia kini nga kalihokan uban sa laing tudling sa doktrinal nga kahanas gikan sa listahan.

Ipaambit unsa ang imong nakat-onan

Pangita og suod nga higala o sakop sa pamilya kang kinsa imong mapakigbahin ang imong pahina sa “Pagtulun-an human sa usa ka Pagtulun-an”. Ipasabot ang pipila sa imong nakat-onan mahitungod niini nga kasulatan samtang ikaw miapil niini nga kalihokan.