“Fakataukei Fakatokāteliné: 2 Nīfai 32:8–9—‘Kuo Pau ke Mou Lotu Maʻu Ai Pē,’” Tohi ʻa Molomoná - Tohi Lēsoni ʻa e Tokotaha Akó (2024)
“Fakataukei Fakatokāteliné: 2 Nīfai 32:8–9,” Tohi ʻa Molomoná - Tohi Lēsoni ʻa e Tokotaha Akó
Fakataukei Fakatokāteliné: 2 Nīfai 32:8–9
“Kuo Pau Ke Mou Lotu Maʻu Ai Pē”
Naʻá ke ako ʻi ha lēsoni kimuʻa, “2 Nīfai 32:8–9,” kapau te tau lotu maʻu pē, ʻe fakatapui ʻe he Tamai Hēvaní ʻetau ngāué maʻá e lelei hotau laumālié. ʻE lava ke tokoni atu ʻa e lēsoni ko ʻení ke ke ako maʻuloto e potufolofola fakataukei fakatokāteline mo e kupuʻi lea folofola mahuʻinga ʻo e 2 Nīfai 32:8–9, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
Fakamatalaʻi mo ako maʻuloto
Toe fakamanatu ʻa e potufolofola fakataukei fakatokāteline “2 Nīfai 32:8–9” pea mo e kupuʻi lea folofola mahuʻinga ko e “Kuo pau ke mou lotu maʻu ai pē.” Faʻu ha kiʻi talanoa nounou ke fakafehokotaki e mataʻifika takitaha ʻi he potufolofolá ki he kupuʻi lea mahuʻingá—hangē ko ʻení, “Naʻe lotu ʻa ʻEti ʻi ha houa ʻe 32 he ʻaho.” ʻOku sai pē kapau ʻoku ʻikai ʻuhingamālie e meʻa te ke faʻú. Ko e meʻa mahuʻingá ke tokoni atu ke fakafehokotaki e potufolofolá ki he kupuʻi lea folofola mahuʻingá.
-
Fakakakato eni:
Fakakaukauloto ʻokú ke talanoa mo ha kaungāmeʻa ʻoku ʻikai ke ne ongoʻi taau ke lotu. Fakaʻaongaʻi e ngaahi kupuʻi lea mei he 2 Nīfai 32:8–9 ke tokoni ke mahino kiate ia ʻa e ʻuhinga ʻoku fiemaʻu ai ke tau lotu maʻu peé. Fakakau ʻi hoʻo fakamatalá ʻa e meʻa ʻokú ke pehē ʻoku ʻuhinga ki ai ke lotu maʻu peé.
Akoako hono fakaʻaongaʻí
-
Fili ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié. Tohi ki he lahi taha te ke lava ʻo manatuʻí fekauʻaki mo e tefitoʻi moʻoni. ʻI hoʻo ʻosí, fakafehoanaki e meʻa naʻá ke tohí mo e konga ʻoku fekauʻaki mo iá mei he palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022). Vakai pe ʻoku ʻi ai ha meʻa ʻokú ke fie tānaki ki he meʻa naʻá ke hikí.
-
Fakakaukau ki ha ngaahi fehuʻi pe hohaʻa te ke ala maʻu pe ko ha taha kehe fekauʻaki mo e lotú. (Ke fakakaukau ki ha ngaahi fehuʻi pe tālafili, te ke lava ʻo fehuʻi pē kiate koe, “Ko e hā ha ngaahi ʻuhinga he ʻikai lotu ai e kakaí?” pe “ʻE founga fēfē hano ʻai ʻe ha taha ʻene ngaahi lotú ke mahuʻingamālie angé?”) Fili ha fehuʻi pe hohaʻa ʻe taha ʻokú ke loto ke fakatefito ai, pea hiki hifo ia. Fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke tokoniʻi ha taha ʻokú ne maʻu ʻa e fehuʻi pe hohaʻa ko iá, hiki ʻa e founga ʻe lava ke tokoniʻi ai ia ʻe he tefitoʻi moʻoni takitaha. ʻE lava ke ke fakaʻaongaʻi e ngaahi meʻá ni ko ha fakahinohino.
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Ko e hā ha ngaahi maʻuʻanga tokoni kuo fokotuʻu fakalangi te ke fakaʻaongaʻi ke tali ʻaki?
Fakaʻaongaʻi ha maʻuʻanga tokoni kuo fokotuʻu fakalangi ke tokoni atu ʻi hoʻo teuteu ha talí. Te ke lava ʻo ʻave ha pōpoaki ki ha mātuʻa pe taki ʻo e Siasí ʻo kole tokoni ki ha ngaahi tali ʻe ala ʻoange. Te ke lava foki ʻo fekumi ʻi he folofolá pe ngaahi naunau ʻi he ChurchofJesusChrist.org. Ki ha ngaahi hohaʻa kehe, ʻe ala tokoni ʻa e lea ko ʻeni ʻa Palesiteni Pilikihami ʻIongí (1801–1877):
ʻOku tatau ai pē pe ʻokú ke ongoʻi fie lotu pe ʻoku ou ongoʻi fie lotu, ka ko e hokosia pē ʻa e taimi ke ke lotu aí peá ke lotu. Pea kapau ʻoku ʻikai ke tau ongoʻi ʻoku tau fie lotu, pea ʻoku totonu leva ke tau lotu kae ʻoua leva pē kuo tau ongoʻi fie lotu. (Ngaahi Akonaki ʻa e Kau Palesiteni ʻo e Siasí:Pilikihimi ʻIongi [1997], 54)
Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
-
Ko e hā ʻokú ke ʻilo fekauʻaki mo e Tamai Hēvaní mo Sīsū Kalaisi ʻoku fekauʻaki mo e fehuʻi pe hohaʻa ko ʻení?
-
Ko e hā ha ngaahi moʻoni taʻengata mei he 2 Nīfai 32:8–9 ʻe lava ʻo tokoni ki ha taha ʻokú ne maʻu ʻa e fehuʻi pe hohaʻa ko ʻení?
Ngāue ʻi he tuí
-
Ko e hā nai ha meʻa te ke fokotuʻu ange ki he tokotaha ko ʻení ke ne fai ke ne ngāue ai ʻi he tui kia Sisū Kalaisí? Ko e hā hono ʻuhingá?
-
Ko e hā ha meʻa te ke fakaafeʻi ai e tokotahá ni ke ne manatuʻi ʻe lava ʻo tokoni ke nau ngāue ʻi he tuí?