Siviʻi Hono 2 Hoʻo Akó

1 Nīfai 16–2 Nīfai 25

tokotaha ʻoku sio ki hono ʻatá

ʻOku fakataumuʻa ʻa e lēsoni ko ʻení ke tokoniʻi koe ke vakaiʻi e tuʻunga fakalakalaka kuó ke aʻusia lolotonga hoʻo ako e Tohi ʻa Molomoná.

Fakakaukau ki hono ako ʻo e ongoongoleleí

Toʻo hake ha sioʻata pe meʻa kehe ʻe ʻasi ai ha ʻata pea tuku ha kiʻi taimi ke ke sio ai kiate koe. Fulihi e sioʻatá ki toʻomataʻu pea ki he toʻohemá pea hiki e ngaahi meʻa he ʻikai te ke lava ʻo sio ki ai taʻe ʻi ai ha sioʻatá.

• Ko e hā e ngaahi lelei ʻo hono maʻu ha sioʻatá?

• ʻE lava fēfē ke faitatau e vakai kiate kitautolu ʻi he sioʻatá mo e fakakaukau mo hono siviʻi ʻetau ako e ongoongoleleí?

Hangē ko hoʻo lava ʻo vakai ki ho fōtungá, ʻe lava ke tokoniʻi koe ʻi hono tuku ha taimi ke ke vakaiʻi mo fakakaukau ai ki hoʻo ngaahi aʻusia ʻi hono ako ʻo e ongoongoleleí. ʻI hoʻo fakakaukau ki he meʻa kuó ke ako mei hoʻo ako ʻi he Tohi ʻa Molomoná, ʻe lava ke tokoniʻi koe ʻe he Laumālie Māʻoniʻoní ke vakai ki hoʻo fakalakalaká mo ʻiloʻi e ngaahi tafaʻaki ke fakaleleiʻí. ʻE tokoni atu e lēsoni ko ʻení ke ke fakakaukau ki hoʻo tupulaki fakataautahá mo e ngaahi aʻusia mei hono ako ʻo e Tohi ʻa Molomoná.

Ko e fakakaukau ki he fakalakalaka fakalaumālié

Fakakaukau ki he ngaahi ueʻi mo e ngaahi ongo mei he Laumālie Māʻoniʻoní naʻá ke mei maʻu ʻi hono ako ʻo e Tohi ʻa Molomoná. ʻOku lahi ha ngaahi founga kuo fetuʻutaki ai ʻa e Laumālie Māʻoniʻoní mo koe. Hangē ko ʻení, mahalo naʻe makehe ha ngaahi veesi pau kiate koe pea naʻá ke ongoʻi ha holi ke fakaʻilongaʻi kinautolu. Mahalo naʻá ke maʻu ha ongoʻi nonga pe ʻofa. Mahalo naʻá ke lau mo ongoʻi ʻoku ueʻi koe ke ke ngāue ʻi ha faʻahinga founga pau pe maʻu ha tali ki ha fehuʻi naʻá ke maʻu.

fakaʻilonga, lekooti

1. Tali ha fehuʻi ‘e tolú pe lahi ange mei he ngaahi fehuʻi ko ʻení: ʻE ala tokoni ke toe vakaiʻi hoʻo tohinoa akó ke tokoni atu ke ke tali e ngaahi fehuʻí.

   • Ko e ngaahi fakamatala pe potufolofola fē mei he Tohi ʻa Molomoná kuó ne tokoniʻi koe ke ke vakai ki he founga ʻoku fetuʻutaki ai ʻa e Tamai Hēvaní mo ʻEne fānaú?

   • Ko e hā ha ngaahi fakakaukau pe ongo kuó ke aʻusia ʻi he seminelí pe ʻi hoʻo ako fakataautaha he taʻu ní?

   • Ko e hā ha meʻa kuó ke fai ke fekumi ai ki ha fakahā mei he Tamai Hēvaní?

   • Ko e hā te ke lava ʻo fai ke fekumi ai ki ha fakahā mo mateuteu ke ʻiloʻi ʻa e fakahaá ʻi he taimi ʻoku hoko mai aí?

   • Ko e hā ha founga kuó ke ngāueʻi ai e ngaahi ongo kuó ke maʻú?

Fakamatalaʻi e Hinga ʻa ʻĀtama mo ʻIví pea mo e Fakalelei ʻa Sīsū Kalaisí.

Ko e mavahe ʻa ʻĀtama mo ʻIvi mei he Ngoue ko ʻĪtení

ʻOku liliu e tokotaha kotoa pē ʻe he Hinga ʻa ʻĀtama mo ʻIví. ʻOku akoʻi ʻi he Tohi ʻa Molomoná e ngaahi liliu ko ʻení pea mo e founga ʻoku huhuʻi ai kitautolu ʻe he Fakamoʻuí mei he Hingá. ʻE lava ke tokoni e ngāue ko ʻení ke ke akoako ai hono fakamatalaʻi e Hinga ʻa ʻĀtama mo ʻIví pea mo e Fakalelei ʻa Sīsū Kalaisí.

Fakakaukauloto ʻokú ke hoko ko ha faifekau pea ʻokú ke teuteu mo ho hoa ngāué ke akoʻi ha taha fekauʻaki mo e Hingá. Kuó mo fakakaukau ʻoku totonu ke ako ha taha fekauʻaki mo e Ko e Hingá mo hono ngaahi nunuʻa ki he faʻahinga ʻo e tangatá pea ʻoku totonu ke akoʻi ʻe he tokotaha ʻa e founga ʻoku tokoniʻi ai kitautolu ʻe he Fakamoʻuí ke ikunaʻi e ngaahi nunuʻa ʻo e Hingá.

Fili ha taha ʻo e ongo tefito ʻokú ke palani mo ho hoá ke akoʻí.

Fakaʻaongaʻi e folofolá ke tokoni atu ke fakamatalaʻi ʻa e tefito naʻá ke filí. ʻE ala tokoni ke toe vakaiʻi ʻa e 2 Nīfai 2:17–27; 9:6–12; 10:23–25, ngaahi fakamatala ʻi hoʻo tohinoa akó, pe ko e “Hinga ʻa ʻĀtama mo ʻIvi” ʻi he Ngaahi Tefito ʻo e Ongoongoleleí (topics.ChurchofJesusChrist.org) ke tokoni atu ʻi hoʻo teuteu ke vahevahé.

ʻI hoʻo ʻosí, fakakaukau ke vahevahe hoʻo fakamatalá mo ha taha kehe. Hangē ko ʻení, ko ha mēmipa ʻo e fāmilí, kaungāmeʻa, pe taki ʻo e Siasí.

fakaʻilonga, lekooti

2. Lekooti hoʻo fakamatala ki he tefito naʻá ke filí.

Ko ʻeku ngaahi ongo kau kia Sīsū Kalaisí

ʻOku fakamoʻoni e Tohi ʻa Molomoná kia Sīsū Kalaisi. Fakakaukau ki he meʻa kuó ke ako fekauʻaki mo e Fakamoʻuí. Toe vakaiʻi e ngaahi vahe kuó ke akó, hangē ko e 1 Nīfai 19, 2 Nīfai 9, mo e 2 Nīfai 25. Te ke lava foki ʻo kumi e ngaahi potufolofola kuó ke fakaʻilongaʻí. ʻE ala tokoni ke toe vakaiʻi ʻa e meʻa kuó ke tohi ʻi hoʻo tohinoa akó, tautautefito ki he ngaahi fakamatala fekauʻaki mo hoʻo ngaahi ongo kiate Iá.

fakaʻilonga, lekooti

3. Fakakakato eni: Fakakau ai e meʻa naʻá ke fakahokó pe ko hano fakamatalaʻi nounou ia.

   • Faʻu ha foʻi maau pe ko ha tohi ki he Fakamoʻuí ʻo fakahaaʻi hoʻo ngaahi ongo kiate Iá. Fakakaukau ke fakaʻaongaʻi e ngaahi foʻi lea pe kupuʻi lea mei he folofolá pe fakafekauʻaki mo e ngaahi potufolofolá.

   • Fakatahatahaʻi ha lisi ʻo ha ngaahi lea ʻokú ne fakamatalaʻi hoʻo ngaahi ongo fekauʻaki mo e Fakamoʻuí. Fakakau ai mo ha ngaahi fakamatala mei he folofolá. Faʻu ha ngaahi foʻi lea, pe tohiʻi e ngaahi foʻi leá ʻi ha ʻū laʻipepa taautaha pea fakakaukau ke tautau kinautolu ʻi ho lokí pe ʻi ha feituʻu kehe te ke toutou sio ai kiate kinautolu.

   • Tā fakatātaaʻi ha meʻa ʻoku tokoni atu ke fakahaaʻi ai hoʻo ngaahi ongo fekauʻaki mo e Fakamoʻuí.