2 Nīfai 5

Nofo ʻi he Fiefia

Finemui fofonga malimali

Hili e māvahevahe ʻa Nīfai mo hono ongo taʻoketé, naʻá ne fokotuʻu mo kinautolu ne muimui ʻiate iá ha kiʻi kolo foʻou. Naʻe tupulaki pea moʻui ʻa e kakai ʻo Nīfaí ʻi he fiefia. ʻE lava ke tokoni atu e lēsoni ko ʻení ke ke ʻiloʻi ʻa e meʻa te ke lava ʻo fai ke ke nofo ai ʻi he fiefiá.

Ngaahi ʻEkitivitī Ako ʻOku Ala Fakahokó

Nofo ʻi he fiefia

• Ko e hā e meʻa ʻokú ne ʻai ha taha ke fiefiá?

• ʻOkú ke pehē ʻe tali fēfē ia ʻe ha toʻu tupu?

• ʻOkú ke pehē ʻe tali fēfē ʻe he Fakamoʻuí?

Fakakaukau ki he founga te ke ala tali ʻaki e fehuʻi ʻuluakí. ʻOku ofi nai e anga hoʻo vakai ki he fiefiá ki he founga ʻe ala tali ai ʻe ha toʻu tupu pe ko e Fakamoʻuí? Ko e hā ha liliu ʻe ala hoko ʻi hoʻo moʻuí ʻi hoʻo vakai ki he fiefiá ʻo hangē ko e Fakamoʻuí? ʻI hoʻo ako ʻa e 2 Nīfai 5, kumi e meʻa te ke lava ʻo fai ke ke fiefia aí.

ʻOku fakaikiiki ʻe he 2 Nīfai 5 ʻa e mavahe ʻa e fāmili ʻo Līhaí ki he kau Nīfaí mo e kau Leimaná. ʻI he palani ʻa Leimana mo Lēmiuela ke tamateʻi ʻa Nīfaí, naʻe fakatokanga ʻa e ʻEikí kia Nīfai ke mavahe mei hono ngaahi tokouá (vakai, 2 Nīfai 5:1–5). Naʻe talangofua ʻa Nīfai ki he ʻEikí peá ne mavahe mo kinautolu naʻa nau “tui ki he ngaahi fakatokanga mo e ngaahi fakahā ʻa e ʻOtuá” (2 Nīfai 5:6) pea nau fokotuʻu ha kiʻi kolo foʻou.

Naʻe nofo pē ʻa e kau Leimaná ʻi he fonuá pea naʻa nau angatuʻu ʻo fakafepaki ki he ʻEikí. Naʻe “motuhi atu ʻa [kinautolu] mei [hono] ʻaó” (2 Nīfai 5:20). Ko e fakamalaʻia ʻoku fakamatalaʻi ʻi he vahe ko ʻení ko e mavahe ia mei he ʻOtuá (vakai, 2 Nīfai 5:20–24). Ko e liliu ʻi he kili ʻo e kau Leimaná ko ha fakaʻilonga pe fakahaaʻi ia ʻo e fakamalaʻiá. ʻOku ʻikai ke mahino kakato ʻa e natula ʻo e fakaʻilonga ko ʻení. Naʻe kamata ke fakafaikehekeheʻi ʻe he fakaʻilongá ʻa e kau Leimaná mei he kau Nīfaí. Kimui angé, ʻi he fakatou aʻusia ʻe he kau Nīfaí mo e kau Leimaná ha vahaʻa-taimi ʻo ʻenau faiangahalá mo e māʻoniʻoní, naʻe fakaʻau ke ʻikai toe mahuʻinga ʻa e fakaʻilongá ko ha fakahaaʻiʻanga ʻo e tuʻunga ʻo e kau Leimaná ʻi he ʻao ʻo e ʻOtuá.

Lau ʻa e 2 Nīfai 5:27 pea fakatokangaʻi ʻa e founga hono fakamatalaʻi ʻe Nīfai ʻa e kolo foʻou naʻá ne fokotuʻú.

• ʻOkú ke pehē ʻoku ʻuhinga ki he hā e nofo ʻi he fiefiá?

• Ko e hā ha ngaahi faingataʻa ʻe ala hoko ʻi he nofo ʻi he fiefiá?

Vakai ki he ngaahi veesi kimuʻa ʻi he vahé ke maʻu ha ʻilo ki he meʻa naʻe fai ʻe he kau Nīfaí ʻo tupu ai ʻenau nofo ʻi he fiefiá?

Lau ʻa e 2 Nīfai 5:10–17, 26 pea fakakakato ʻa e fakamatala ko ʻení ʻaki e meʻa ʻokú ke maʻú:

lava ʻo tokoni mai ke u muimui ʻi he Fakamoʻuí mo nofo ʻi he fiefia.

• Ko e hā mo ha toe meʻa ʻokú ke pehē ʻe tokoni atu ke ke nofo ʻi he fiefiá?”

• Ko e hā hono tuʻo lahi hoʻo kau ʻi he faʻahinga ʻekitivitī pehení?

Ko ha founga ʻe tolu ʻoku malava ke fakaʻosi ʻaki e sētesi ko ʻení ko e “Talangofua ki he ngaahi fono ʻa e ʻOtuá,” “Ngāué,” mo e “Ko e temipalé.” Toe fekumi ke loloto ange ki he ngaahi ʻekitivitī ʻoku hoko atu aí.

Kātaki ʻo fakakakato ha taha ʻo e ngaahi ʻekitivitī ko ʻení.

ʻEkitivitī Ko e Talangofua ki he ngaahi fono ʻa e ʻOtuá

• Ko e hā ha niʻihi ʻo e ngaahi lao ʻi homou koló?

• Ko e hā ha ola ʻo e muimui maʻu pē pe ʻikai ke muimui ʻi he ngaahi lao ko iá?

• ʻOku faitatau pe kehe fēfē ʻa e fakafehoanaki ko ʻení mei he ngaahi fono ʻa e ʻOtuá?

Naʻe talangofua ʻa Nīfai mo hono kau muimuí ki he ngaahi fekau ʻa e ʻEikí (vakai, 2 Nīfai 5:10). Lau ʻa e potufolofola fakataukei fakatokāteline Mōsaia 2:41 pea fekumi ki he meʻa naʻe fie maʻu ʻe he Tuʻi ko Penisimaní ke mahino ki hono kakaí fekauʻaki mo hono tauhi e ngaahi fekau ʻa e ʻOtuá. ʻE lava ke mou fakafekauʻaki e veesi ko ʻení ki he 2 Nīfai 5:10.

fakaʻilonga, lekooti

1. Tali e ongo fehuʻi ko ʻení:

• ʻOkú ke pehē ʻoku tokoniʻi fēfē nai kitautolu ʻe he talangofua ki he ngaahi fono ʻa e ʻOtuá ke tau fiefiá?

• Naʻe fakatātaaʻi fēfē nai ʻe Sīsū Kalaisi ʻa e talangofuá?

• Ko e hā ha niʻihi ʻo e ngaahi fekau ʻa e ʻOtuá kuo nau ʻomi kiate koe ha fiefia ʻoku lahi angé?

ʻEkitivitī 2 Ngāué mo e moʻui fakafalala pē kiate kitá

Fakaʻaongaʻi ha kiʻi taimi ke ke lisi ai ʻi ha laʻipepa pe ʻi hoʻo tohinoa akó ʻa e ngaahi lelei te ke pehē ʻoku maʻu mei he ngāue mālohí.

Lau ʻa e 2 Nīfai 5:11, 15, 17 pea feinga ke ʻiloʻi ʻa e ngaahi founga kehekehe naʻe ngāue ai e kau Nīfaí mo e ngaahi ola ʻo ʻenau ngaahi ngāué.

• Ko e hā e meʻa naʻá ke maʻú?

Lau ʻa e “Ngāue mo e Moʻui Fakafalala Pē Kiate Kitá” ʻi he kiʻi tohi Ki Hono Fakamālohia ʻo e Toʻu Tupú (2011) pea vakai ki he meʻa ʻokú ke ako fekauʻaki mo e tefitoʻi moʻoni ʻo e ngāué.

fakaʻilonga, lekooti

2. Tali e ngaahi fehuʻi ko ‘ení:

• Ko e hā mo ha toe ngaahi lelei kehe ʻo e ngāué naʻá ke maʻú? (Fakakaukau ke tānaki atu ʻeni ki hoʻo lisí.)

• Ko e fē ʻi he ngaahi lelei ko ʻení kuó ke ʻosi aʻusiá?

• ʻE tokoniʻi fēfē nai ʻe he ngāué ha taha ke ne hoko ʻo hangē ange ko Sīsū Kalaisí?

ʻEkitivitī 3 Ko e Temipalé

moʻui fakafāmilí

• Ko e hā hoʻo fakakaukau pe ongo fekauʻaki mo e ngaahi temipalé?

Lau ʻa e 2 Nīfai 5:16 pea vakai ki he meʻa ʻokú ke ako fekauʻaki mo e temipale ʻa e kau Nīfaí.

• ʻOkú ke pehē ko e hā ne fuʻu feinga lahi ai ʻa Nīfai mo hono kakaí ke langa ʻa e temipalé?

• ʻOkú ke pehē ko e hā kuo kole mo hokohoko atu ai e kole ʻe he ʻEikí ki Hono kakaí ke nau feilaulau ke langa ha ngaahi temipalé?

Naʻe lea ʻaki ʻe Palesiteni Lāsolo M. Nalesoni ʻa e meʻá ni fekauʻaki mo e taumuʻa mo e ngaahi tāpuaki ʻo e ngaahi temipalé. Mahalo te ke fie mamata ʻi he foʻi vitiō “Ko e Temipalé mo Hoʻo Fakavaʻe Fakalaumālié” mei he taimi 4:27 ki he 5:55 pe lau ʻa e fakamatala ʻi laló.

Palesiteni Russell M. Nelson

ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. Ko e meʻa kotoa ʻoku akoʻi ʻi he temipalé, ʻi he fakahinohinó pea ʻi he Laumālié, ʻokú ne fakatupulaki ʻetau mahino kia Sīsū Kalaisí. ʻOku haʻi kitautolu kiate Ia ʻe Heʻene ngaahi ouau mahuʻingá ʻo fakafou ʻi he ngaahi fuakava toputapu ʻo e lakanga fakataulaʻeikí. Pea, ʻi heʻetau tauhi ʻetau ngaahi fuakavá, ʻokú Ne fakakoloaʻi leva kitautolu ʻaki Hono mālohi fakaivia mo faifakamoʻuí. Pea, te tau fie maʻu lahi Hono mālohí ʻi he ngaahi ʻaho ka hoko maí.

Kuo ʻosi talaʻofa mai “kapau [te tau] mateuteu ʻe ʻikai [te tau] manavahē”. Ko e fakapapauʻi mai ko ʻení ʻoku ʻi ai hono lelei lahi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fie maʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 93–94)

fakaʻilonga, lekooti

3. Tali e ngaahi fehuʻi ko ‘ení:

• Ko e hā e meʻa ʻoku mahuʻinga kiate koe mei he fakamatala ʻa Palesiteni Nalesoní.

• ʻE tokoniʻi fēfē nai koe ʻe he ʻalu ki he temipalé ke ke langa lelei ange ai ho fakavaʻé ʻia Sīsū Kalaisi? Te ke lava ʻo vahevahe ha aʻusia kapau te ke lava ʻo fakakaukau ki ha aʻusia ʻe taha.

• Ko e hā ha founga ʻoku ʻomai ai ʻe he temipalé ha fiefia lahi ange kiate koe pe ki ha tokotaha ʻokú ke ʻilo?

Fili Pē: Fie Ako Lahi Ange?

Ko e hā mo ha toe meʻa te tau lava ʻo fai ke fakaafeʻi ai ʻa e fiefiá ki heʻetau moʻui?

Naʻe akoʻi ʻe ʻEletā Kolotiō R. M. Kositā ʻo e Kau Fitungofulú:

ʻEletā Claudio R. M. Costa

ʻOku tau ako ʻoku maʻu ʻa e fiefiá ʻi hono fai ʻo e fanga kiʻi meʻa iiki ʻoku nau langaki hake kitautolú, ʻa ia ʻoku nau fakatupulaki ʻetau tuí mo e fakamoʻoní. Fanga kiʻi meʻa iiki ʻoku tau fakahoko ʻi heʻetau moʻui fakaʻahó, hangē ko e:

ʻOku tau fiefia ʻi heʻetau lotu he pongipongi mo e pō kotoa pē, ʻi he taimi ʻoku tau ongoʻi ai ʻoku fanongo mai ʻa e ʻEikí kiate kitautolu pea ʻokú Ne finangalo maʻu pē ke tāpuakiʻi, fakamolemoleʻi, mo tokoniʻi kitautolú. ʻOku tau fiefia ʻi heʻetau ongoʻi e ngaahi ueʻi ʻa e Laumālie Māʻoniʻoní ʻi heʻetau moʻuí—ʻi heʻetau ongoʻi e Laumālié ʻi he taimi ʻoku tau fai ai ha ngaahi tuʻutuʻuni mahuʻinga ʻi he moʻuí. … Ko hono fakanounoú, te tau lava ʻo ongoʻi fiefia ʻi he ʻaho kotoa pē ʻi heʻetau moʻuí ʻo fakafou ʻi he fanga kiʻi meʻa iiki ʻoku tau fakahokó, pea ʻoku tau fiefia kakato ʻi heʻetau tauhi e ngaahi fekau ʻa ha ʻOtua ʻofa ʻokú Ne tokanga mai kiate kitautolu. (Claudio R. M. Costa, “Fun and Happiness,” Ensign pe Liahona, Nov. 2002, 92–93)

2 Nīfai 5:20–21. Ko e hā ʻa e fakamalaʻia naʻe hoko ki he kakai Leimaná?

ʻI he kuonga ʻo Nīfaí, ko e mala ʻo e kakai Leimaná, naʻe “motuhi atu ʻa [kinautolu] mei he ʻao ʻo e ʻEikí … koeʻuhi ko ʻenau angahalá” (2 Nīfai 5:20–21). Naʻe ʻuhinga ʻeni, naʻe fakamavaheʻi ʻa e Laumālie ʻo e ʻEikí mei heʻenau moʻuí. ʻI he taimi ne tali ai ʻe he kau Leimaná kimui ange e ongoongolelei ʻo Sīsū Kalaisí, “naʻe ʻikai ke toe ʻiate kinautolu ʻa e fakamalaʻia ʻa e ʻOtuá” (ʻAlamā 23:18).

ʻOku toe pehē foki ʻi he Tohi ʻa Molomoná, naʻe ʻi ai ha fakaʻilonga ʻo ha kili lanu ʻuliʻuli ʻo e kau Leimaná hili e mavahe ʻa e kau Nīfaí meiate kinautolú. ʻOku ʻikai ke mahino kakato ʻa e natula mo e fōtunga ʻo e fakaʻilonga ko ʻení. Naʻe kamata ke fakaʻilongaʻi makehe ʻe he fakaʻilongá ʻa e kau Leimaná mei he kau Nīfaí. ʻI he foua kimui ange ai ʻe he kau Nīfaí mo e kau Leimaná fakatouʻosi ʻa e vahaʻataimi ʻo e faiangahalá mo e anga faitotonú, naʻe ʻikai toe ʻaonga ʻa hono fakaʻilongaʻi ʻe he fakaʻilongá ʻa e kau Leimaná’ ʻi heʻenau tuʻu ʻi he ʻao ʻo e ʻOtuá.

ʻOku fakapapauʻi mai ʻe he kau palōfitá ʻi hotau kuongá ni ko e kili fakapōpōʻulí ʻoku ʻikai ko ha fakaʻilonga ia ʻo ha houhau fakalangi pe fakamalaʻia. ʻOku tali ʻe he Siasí ʻa e akonaki ʻa Nīfaí, ʻoku “ʻikai taʻofi ʻe he ʻEikí ha tokotaha ʻoku haʻu kiate ia, pe ko ha ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine” (2 Nīfai 26:33). Naʻe pehē ʻe Palesiteni Lāsolo M. NaLēsoni:

“Naʻe fakamamafaʻi ʻe he ʻEikí ʻa ʻEne tokāteline mahuʻinga ʻo e faingamālie potupotutataú maʻa ʻEne fānaú. …

“…ʻOku ʻikai mahuʻinga e ngaahi faikehekehe ʻi he anga fakafonuá, leá, tangata pe fefiné, matakalí, mo e fōtunga ʻo e matá ki he fononga ʻa e kau faivelengá ʻi he hala ʻo e fuakavá mo haʻu ki hotau Huhuʻi ʻofeiná” (“President Nelson Remarks at Worldwide Priesthood Celebration,”1 Sune 2018, newsroom.ChurchofJesusChrist.org).

“ʻOku ou fakapapauʻi atu ʻoku ʻikai ke makatuʻunga hoʻo tuʻu ʻi he ʻao ʻo e ʻOtuá ʻi he lanu ho kilí. ʻOku makatuʻunga ʻa e hoifua mo e ʻikai ke hoifua mai ʻa e ʻOtuá mei hoʻo tauhi mateaki ki he ʻOtuá mo ʻEne ngaahi fekaú kae ʻikai ko e lanu ho kilí” (”Tuku ke Lāngilangiʻia ʻa e ʻOtuá,” Ensign peLiahona, Nōvema 2020, 94).