2 Nephi 5

Nagpuyo subay sa Matang sa Pagkamalipayon

Nagpahiyom nga batan-ong babaye

Human sa pagbulag gikan sa iyang mga igsoon, si Nephi ug kadtong misunod kaniya mitukod og bag-ong komunidad. Ang mga katawhan ni Nephi milambo ug mipuyo og mga kinabuhi nga miresulta sa kalipay. Kini nga leksiyon makatabang kanimo sa pagkahibalo kon unsa ang imong mahimo aron mabuhi subay sa matang sa pagkamalipayon.

Mga Posibleng Kalihokan sa Pagkat-on

Ang matang sa pagkamalipayon

• Unsay makapalipay sa usa ka tawo?

• Unsa sa imong hunahuna ang tubag sa kasagaran nga tin-edyer?

• Unsa sa imong hunahuna ang itubag sa Manluluwas?

Hunahunaa kon unsaon nimo pagtubag ang unang pangutana. Ang imong panglantaw ba sa kalipay mas duol sa kon unsang paagi ang kasagarang tin-edyer o kon sa unsang paagi motubag ang Manluluwas? Unsa kaha ang epekto sa imong kinabuhi ang pagtan-aw sa kalipay sama sa pagtan-aw sa Manluluwas? Samtang nagtuon ka sa 2 Nephi 5, pangitaa kon unsa ang mahimo nimong buhaton aron magmalipayon ka.

Ang kapitulo nga 2 Nephi 5 nagdetalye sa panagbulag sa pamilya ni Lehi ngadto sa mga Nephite ug sa mga Lamanite. Sa dihang si Laman ug si Lemuel miplano sa pagpatay kang Nephi, ang Ginoo mipasidaan kang Nephi sa pagbulag gikan sa iyang mga igsoon (tan-awa sa 2 Nephi 5:1–5). Si Nephi misunod sa Ginoo ug mibiya uban niadtong kinsa “mituo sa mga pasidaan ug mga pagpadayag sa Dios” (2 Nephi 5:6) ug mitukod og bag-ong komunidad.

Ang mga Lamanite mipabilin sa yuta ug misukol batok sa Ginoo. Sila “gipahimulag gikan sa iyang atubangan” (2 Nephi 5:20). Ang tunglo nga gihisgotan niini nga kapitulo mao ang pagkahimulag gikan sa Dios (tan-awa sa 2 Nephi 5:20–24). Ang pagkausab sa panit sa mga Lamanite usa ka timaan o timailhan sa tunglo. Ang kinaiyahan niini nga marka wala hingpit nga nasabtan. Ang timaan sa sinugdanan mipaila sa mga Lamanite gikan sa mga Nephite. Sa kadugayan, sa dihang ang mga Nephite ug mga Lamanite pareho nga miagi og mga panahon sa kadautan ug pagkamatarong, ang timaan dili na tukma nga ilhanan sa kahimtang sa mga Lamanite atubangan sa Dios.

Basaha ang 2 Nephi 5:27 ug matikdi kon giunsa paghulagway ni Nephi ang bag-ong komunidad nga iyang natukod.

• Unsa sa imong hunahuna ang gipasabot sa pagpuyo subay sa matang sa pagkamalipayon?

• Unsa nga mga hagit ang mahimong anaa sa pagpuyo subay sa matang sa pagkamalipayon?

Tan-awa ang nag-unang mga bersikulo sa kapitulo aron makaangkon og panabot sa unsay gibuhat sa mga Nephite nga midala kanila sa pagpuyo subay sa matang sa pagkamalipayon.

Basaha ang 2 Nephi 5:10–17, 26 ug kompletoha ang mosunod nga pamahayag sa unsay imong nakit-an:

makatabang kanako sa pagsunod sa Manluluwas ug sa pagpuyo subay sa matang sa pagkamalipayon.

• Unsa pa sa imong hunahuna ang makatabang kanimo nga magpuyo subay sa matang sa pagkamalipayon?

• Unsa ka kasagaran nga moapil niining mga matang sa mga kalihokan?

Tulo ka posible nga paagi sa paghuman niini nga kapahayag mao ang “Pagkamasulundon sa mga balaod sa Dios,” “Trabaho,” ug “Ang templo.” Ang mga kalihokan nga mosunod nagsusi sa matag usa niini sa mas lawom.

Palihog kompletoha ang duha sa mosunod nga mga kalihokan.

Kalihokan 1. Pagkamasulundon sa mga balaod sa Dios

• Unsa ang pipila sa mga balaod sa imong komunidad?

• Unsa ang mahimong resulta sa makanunayon nga pagsunod o dili pagsunod sa mga balaod?

• Sa unsang paagi kini nga pagtandi susama o lahi sa mga balaod sa Dios?

Si Nephi ug ang iyang mga sumusunod misunod sa mga sugo sa Ginoo (tan-awa sa 2 Nephi 5:10). Basaha ang tudling sa doktrinal nga kahanas sa Mosiah 2:41 ug pangitaa kon unsay gusto ni Hari Benjamin nga masabtan sa iyang katawhan mahitungod sa pagsunod sa mga sugo sa Dios. Mahimo nimong ikonsiderar ang pag-cross-reference niini nga bersikulo ngadto sa 2 Nephi 5:10.

icon, rekord

1. Tubaga ang mosunod nga mga pangutana:

• Sa imong hunahuna sa unsang paagi ang pagsunod sa mga balaod sa Dios makatabang kanato nga magmalipayon?

• Giunsa pagpakita ni Jesukristo ang pagkamasulundon?

• Unsa ang pipila sa mga sugo sa Dios nga nakahatag kanimo og mas dakong kalipay?

Kalihokan 2. Trabaho ug kaugalingon nga pagpaningkamot

Sa usa ka palid sa papel o sa imong journal sa pagtuon, paggahin og kadiyot sa paghimo og lista sa mga benepisyo nga imong masulti nga gikan sa kakugi.

Basaha ang 2 Nephi 5:11, 15, 17 ug ilha ang nagkalain-laing mga paagi nga ang mga Nephite mitrabaho ug ang mga resulta sa ilang mga paghago.

• Unsay imong nakit-an?

Basaha ang “Trabaho ug Pagpaningkamot sa Kaugalingon ” diha sa Alang sa Kalig-on sa mga Kabatan-onan nga booklet (2011)ug tan-awa kon unsay imong makat-onan mahitungod sa baroganan sa trabaho.

icon, rekord

2. Tubaga ang mosunod nga mga pangutana:

• Unsay dugang nga mga benepisyo sa trabaho ang imong nakaplagan? (Ikonsiderar ang pagdugang niini sa imong listahan.)

• Hain niini nga mga benepisyo ang imong nasinati?

• Sa unsang paagi ang pagtrabaho makatabang sa usa ka tawo nga mahimong mas mahisama ni Jesukristo?

Kalihokan 3. Ang templo

kinabuhi sa pamilya

• Unsa ang imong hunahuna o gibati mahitungod sa mga templo?

Basaha ang 2 Nephi 5:16 ug tan-awa unsay imong makat-onan mahitungod sa templo sa Nephite.

• Ngano sa imong hunahuna nga si Nephi ug ang iyang mga katawhan mihimo og ingon ka dako nga mga paningkamot sa pagtukod sa templo?

• Ngano sa imong hunahuna nga ang Ginoo mihangyo ug nagpadayon sa paghangyo sa Iyang katawhan sa pagsakripisyo sa pagtukod og mga templo?

Si Presidente Russell M. Nelson misulti sa mosunod mahitungod sa katuyoan ug mga panalangin sa mga templo. Mahimo nimong tan-awon ang bidyo nga “Ang Templo ug ang Inyong Espirituwal nga Pundasyon” gikan sa time code 4:27 hangtod sa 5:55 o basaha ang pamahayag sa ubos:

Presidente Russell M. Nelson

Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom. Ug oh, kadako sa atong panginahanglan sa Iyang gahom sa mga adlaw nga umaabot.

Kita gisaaran nga “kon [kita] andam dili [kita] mahadlok.” Kini nga kasiguroan adunay dagkong implikasyon karon. Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93–94)

icon, rekord

3. Tubaga ang mosunod nga mga pangutana:

• Unsay nakapadayeg kanimo sa pamahayag ni Presidente Nelson?

• Sa unsang paagi nga ang pagtambong sa templo makatabang nimo nga mas matukod ang imong pundasyon diha ni Jesukristo? Mahimo kang mopaambit og usa ka kasinatian kon makahunahuna ka og usa.

• Sa unsang paagi nga ang templo nakahatag og mas dakong kalipay nganha kanimo o sa usa ka tawo nga imong nailhan?

Opsiyonal: Gustong Makakat-on pa og Dugang?

Unsa pa ang atong mahimo aron madapit ang kalipay sa atong mga kinabuhi?

Si Elder Claudio R. M. Costa sa Seventy mitudlo:

Elder Claudio R. M. Costa

Atong nakat-onan nga ang kalipay anaa sa pagbuhat og ginagmay nga mga butang nga makapalig-on kanato, nga makadugang sa atong pagtuo ug pagpamatuod. Ang gagmay nga mga butang nga atong gibuhat sa atong adlaw-adlaw nga kinabuhi, sama sa:

Malipayon kita samtang mag-ampo kita kada buntag ug matag gabii, kon atong mabati nga ang Ginoo naminaw kanato ug andam kanunay sa pagpanalangin, pagpasaylo, ug pagtabang kanato. Malipayon kita kon atong bation ang mga pag-aghat sa Espiritu Santo sa atong mga kinabuhi—samtang atong bation ang Espiritu kon kita kinahanglang mohimo og importante nga mga desisyon sa kinabuhi. … Sa laktod, kita makabati og kalipay kada adlaw sa atong kinabuhi pinaagi sa ginagmay nga mga butang nga atong gibuhat, ug kita hingpit nga malipayon samtang kita nagsunod sa mga sugo sa usa ka mahigugmaong Dios kinsa nagpakabana kanato. (Claudio R. M. Costa, “Fun and Happiness,” Liahona, Nob. 2002, 92–93)

2 Nephi 5:20–21. Unsa ang tunglo nga miabot sa mga Lamanite?

Sa panahon ni Nephi ang tunglo sa mga Lamanite mao nga sila “[gi]pahimulag gikan sa atubangan [sa Ginoo] … tungod sa ilang kadautan. ” (2 Nephi 5:20–21). Nagpasabot kini nga ang Espiritu sa Ginoo gikuha gikan sa ilang kinabuhi. Sa dihang ang mga Lamanite sa kaulahian mihangop sa ebanghelyo ni Jesukristo, “ang tunglo sa Dios wala na mosunod kanila” (Alma 23:18).

Ang Basahon ni Mormon nag-ingon usab nga ang timaan sa itom nga panit miabot sa mga Lamanite human ang mga Nephite mibulag kanila. Ang matang ug dagway niini nga timaan wala masabti sa hingpit. Ang timaan sa sinugdanan mipaila sa mga Lamanite gikan sa mga Nephite. Sa kadugayan, sa dihang ang mga Nephite ug mga Lamanite pareho nga miagi og mga panahon sa kadautan ug pagkamatarong, ang timaan dili na tukma nga ilhanan sa kahimtang sa mga Lamanite atubangan sa Dios.

Ang mga propeta sa atong panahon mimatuod nga ang itom nga panit dili timailhan sa pagkawalay gusto o pagtunglo sa Dios. Ang Simbahan mihangop sa pagtulun-an ni Nephi nga ang Ginoo “wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye” (2 Nephi 26:33). Si Presidente Russell M. Nelson mipahayag:

“Gipasabot og maayo sa Ginoo ang Iyang mahinungdanon nga doktrina mahitungod sa patas nga oportunidad sa Iyang mga anak. …

“… Ang panagkalahi sa kultura, pinulongan, pamayhon, kaliwat, ug nasyonalidad molubad ngadto sa pagkawalay kahulugan kon ang tawong matinud-anon mosulod sa dalan sa pakigsaad ug moduol sa atong pinalangga nga Manunubos” (“President Nelson Remarks at Worldwide Priesthood Celebration,” Hunyo 1, 2018, newsroom.ChurchofJesusChrist.org).

“Akong isiguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagkanauyonan o wala mauyoni sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit” (“Ipatigbabaw ang Dios Labaw sa Tanan,” Liahona, Nob. 2020, 94).