Seminary
2 Nephi 5:1–9: Ang mga Pasidaan sa Dios

“2 Nephi 5:1–9: Ang mga Pasidaan sa Dios,’” Manwal sa Magtutudlo sa Basahon ni Mormon (2024)

“2 Nephi 5:1–9: Ang mga Pasidaan sa Dios,’” Manwal sa Magtutudlo sa Basahon ni Mormon

2 Nephi 5:1-9

Ang mga Pasidaan sa Dios

Imahe
Ang pamilya ni Nephi milayas ngadto sa kamingawan

Tingale nakapasubo kini alang kang Nephi. Tungod kay sila si Laman ug Lemuel nagplano sa pagpatay kaniya, si Nephi gipasidan-an sa pagdala sa “kadto sila kinsa mituo sa mga pasidaan ug mga pagpadayag sa Dios” (2 Nephi 5:6) ug molayas ngadto sa kamingawan. Usahay, kita usab mahimong mapasidan-an sa Ginoo sa pisikal ug espirituwal nga mga kapeligrohan sa atong palibot. Kini nga leksiyon makatabang kanimo sa pagsunod sa mga pasidaan nga mahigugmaong gihatag sa Ginoo aron sa pagpanalipod kanimo.

Mga Posibleng Kalihokan sa Pagkat-on

Mga Pasidaan

Imahe
mga timailhan sa pasidaan

  • Ngano nga ang mga timailhan sa pasidaan sama niini mahinungdanon?

  • Ngano kaha nga ang ubang mga tawo motan-aw sa mga timailhan sa pasidaan nga may pagpasalamat? nga may kalagot?

  • Kanus-a ka nagmapasalamaton nga gipasidan-an?

Samtang nagtuon ka karon, hunahunaa kon nganong ang Dios nagpadala kanato og mga pasidaan. Sulayi usab ang paghinumdom sa lain-laing mga paagi nga tingali mi-reak ka sa mga pasidaan nga Iyang gihatag.

Ang mga pasidaan sa Dios alang kang Nephi

Basaha ang 2 Nephi 5:1–9, nga mangita sa pasidaan nga gihatag sa Ginoo ngadto kang Nephi human siya nahimong espirituhanong lider sa pamilya human sa kamatayon ni Lehi. O mahimo nimong tan-awon ang bidyo nga “Ang mga Nephite Milayas ngadto sa Kamingawan” gikan sa time code 0:00–3:21.

Sulayi nga ibutang ang imong kaugalingon sa dapit sa usa sa mga batan-ong Nephite kansang mga pamilya gidapit sa pagsunod ni Nephi.

  • Ngano kaha nga lisod ang pagbiya?

  • Unsa ang gikinahanglan alang kanimo sa paghimo og desisyon sa pagsunod ni Nephi ngadto sa kamingawan?

  • Sumala sa bersikulo 6, unsay nag-ila sa kinsay mikuyog niya?

Usa ka kamatuoran nga atong makat-onan gikan niini nga asoy mao nga ang Dios makapahilayo kanato gikan sa kapeligrohan kon kita mopili nga motuo sa Iyang mga pagpadayag ug maminaw sa Iyang mga propeta.

Imahe
icon, rekord

  1. Sulayi sa paghanduraw kon sa unsang paagi ang kalibotan (o ang imong personal nga kinabuhi) mahimong lahi kon ang Dios wala gayod magpasidaan kanato. Dayon tubaga ang bisan tulo lamang sa mosunod nga mga pangutana:

    • Ngano sa imong hunahuna gikinahanglan nato ang mga pasidaan sa Dios sa atong panahon?

    • Unsa ang lain-laing mga paagi nga ang Dios mipahibalo sa Iyang mga pasidaan ngadto sa mga tawo sa kinatibuk-an ug sa mga indibidwal mahitungod sa ilang piho nga mga kahimtang?

    • Unsa ang mga rason nga mahimong pilion sa usa ka tawo nga dili sundon ang mga pasidaan sa Dios, ug unsaon kaha nimo sa pagtubag sa usa ka tawo nga mihatag sa usa niini nga mga rason?

    • Sa unsang paagi ikaw o ang imong mga minahal napanalipdan pinaagi sa pagsunod sa mga pasidaan gikan sa Dios? Ipaambit ang usa ka piho nga ehemplo kon makahunahuna ka og usa.

Ang Dios nagpasidaan kanato pinaagi sa Iyang mga propeta

Usa sa mga paagi nga ang Dios mahigugmaong nagpasidaan kanato sa kakuyaw mao ang pinaagi sa Iyang buhi nga mga propeta. Pananglitan, diha sa 2 Nephi 5:5–6, daghan sa pamilya ni Nephi ang namati sa pasidaan nga gihatag kaniya sa Ginoo sa pagbiya ngadto sa kamingawan. (Tan-awa usab sa Amos 3:7.) Kita usab makakita og daghang propetikanhong mga pasidaan gikan sa Dios alang kanato diha sa Iyang mga kasulatan.

Paggahin og panahon sa pagsiksik sa mga kasulatan alang sa mga pasidaan nga gihatag sa Dios kanato pinaagi sa Iyang mga propeta kaniadto. (Ang pipila ka mga ehemplo naglakip sa Alma 41:10; Moroni 10:30, 32; Doktrina ug mga Pakigsaad 63:57–58; 89:1–4.)

Imahe
icon, rekord

  1. Tubaga ang bisan tulo lang sa mosunod nga mga pangutana:

    • Unsa nga mga pasidaan ang imong nakit-an nga sa imong hunahuna labing gikinahanglan sa kalibotan karon?

    • Unsa sa imong hunahuna ang mga sangpotanan sa pagsunod o dili pagtagad niini nga mga pasidaan?

    • Sa unsang paagi kini nga mga pasidaan timaan sa gugma sa Dios?

    • Sa unsang paagi nga ang pagsunod sa mga pasidaan nga imong nakaplagan makatabang nimo nga mahimong mas mahisama ni Jesukristo?

    • Sa unsang paagi nga ang dili pagtagad sa Iyang mga pasidaan makapahilayo kanato gikan Kaniya?

Ang mga pasidaan sa Dios alang kanimo

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Imahe
Presidente Boyd K. Packer

Wala paabota nga moagi mo niining kinabuhia nga dili masayop, apan dili mo makahimo og dagkong sayop nga wala mapasidan-i daan pinaagi sa mga aghat sa Balaang Espiritu. Kini nga saad magamit sa tanang mga miyembro sa Simbahan. (Boyd K. Packer, “Tambag ngadto sa mga Kabatan-onan,” Liahona, Nob. 2011, 18)

Pamalandongi kon sa unsang paagi ang pamahayag ni Presidente Packer ug ang unsay imong nakat-onan sa 2 Nephi 5 magamit sa imong kinabuhi. Dayon irekord ang imong mga hunahuna ug mga pagbati diha sa imong journal sa pagtuon. Ang mosunod mao ang pipila ka posibleng mga butang nga ikonsiderar:

  • Ang Langitnong Amahan ba nagpasidaan kanako og usa ka butang nga piho sa akong kinabuhi pinaagi sa mga hunahuna o mga pagbati gikan sa Espiritu?

  • Aduna bay piho nga mga pasidaan gikan sa Dios nga akong nadawat pinaagi sa mga lider sa Simbahan, mga ginikanan, mga panalangin sa pagkapari, o sa ubang paagi? Kumusta man ang akong pagsunod niini?

  • Unsa ang usa ka butang nga sa akong hunahuna gusto sa Langitnong Amahan nga akong buhaton sa unsay akong nakat-onan o gibati karon?