Atamai i Aoaoga Faavae: 2 Nifae 2: 27

Ua Tatou Saoloto e Filifili e Ala i le Puluvaga Sili

O Le Mana Faaliliu o le Tusi a Mamona

I se lesona talu ai, “2 Nifae 2:26–30,” na e aoaoina ai ua tatou saoloto e filifili le saolotoga ma le ola e faavavau e ala ia Iesu Keriso. O lenei lesona e mafai ona fesoasoani ia te oe e tauloto ai le mau o le atamai i aoaoga faavae ma le fasifuaitau autu o le mau mo le 2 Nifae 2:27, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Gaoioiga e Ono Mafai Ona Aoao Ai

Tauloto ma faamatala

Faitau le 2 Nifae 2:27 ma tusi se ata e fesoasoani ia te oe e vaai faalemafaufau ai i le uiga o le fuaitau autu o le mau: “Ua latou saoloto e filifili le saolotoga ma le ola e faavavau … [po o] le … faatagataotauaina ma le oti. Ia aofia ai le fasifuaitau autu i lau atatusi e fesoasoani ia te oe e tauloto ai.

O le isi, tusi i luga o lau ata le uiga o le ua tatou saoloto e filifili le saolotoga ma le ola e faavavau e ala ia Iesu Keriso, pe filifili le faatagataotauaina ma le oti. Ia aofia ai le uiga o lenei fuaiupu ia te oe lava ia ma pe faapefea ona fesoasoani ia te oe e mulimuli atili ai ia Iesu Keriso.

Ma le mea mulimuli, a o tilotilo i le ata, toe fai le tusi faasino ma le fasifuaitau autu o le mau seia oo ina e iloaina mai le manatuaga.

Mafaufau e tuu lau atatusi i se mea o le a e vaai soo i ai mo nai aso e sosoo ai ma faataitai le fai o le tusi faasino ma le fasifuaitau autu o le mau i taimi taitasi e te vaaia ai.

Faataitai le faaaogaina

Ina ia toe faamanatu mataupu faavae o le mauaina o le malamalama faaleagaga, vaai pe mafai ona e manatua pe o a mataupu faavae taitasi e tolu. Ona vaai lea pe mafai ona e faafetauia fasifuaitau nei ma le mataupu faavae sa’o. (Faaaoga parakalafa 5–12 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae [2022] e siaki ai lou sa’o.)

• “Puipuia i tatou mai faamatalaga sese ma mai ia i latou o e saili e faaumatia le faatuatua”

• “Vaai i manatu e faavae i le tulaga faatonuina a le Alii o le upumoni nai lo le taliaina o manatu po o mafaufauga o le lalolagi”

• “Faalagolago i le molimau ua uma ona tatou maua”

Faitau le ata faataitai lenei ma mafaufau pe faapefea ona faaaoga e Ivan ia mataupu faavae o le mauaina o le malamalama faaleagaga.

Sa fuafua Ivan e faaalu le aoauli o le Aso Toonai faatasi ma ana uo, ae ina ua faafuasei ona tu atu se tasi o i latou ma se ava malosi e faasoa atu, sa ia lagona ua oo i le taimi mo ia e alu ese ai. Sa ia iloa o le a le faateia ana uo ona ua ia masani i le tuumuli atu i le fale i tulaga faapena i le taimi ua tuanai. A o savali ese atu o ia, sa ia lagona atu lana uo o Tanielu o fai mai, “E foliga mai o le a le faatagaina e le lotu a Ivan lona faia o se mea.”

Sa faaauau pea ona mafaufau Ivan i le faamatalaga a Tanielu a o savali atu o ia i le fale.

Iloilo manatu faavae ma fesili faatasi ma se vaaiga e faavavau.

Faitau le parakalafa 8 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Ia gauai faapitoa atu i le uiga o le toe faaupuina o fesili.

aikona, faamaumau

1. Faamaea le gaoioiga toefaaupu lenei:

   Faataitai le tomai o le toefaaupuina o le faamatalaga a Tanielu. Muamua, faailoa manatu po o mafaufauga o Tanielu. Ma le isi, mafaufau i le mataupu i le tulaga o le fuafuaga o le faaolataga ma aoaoga a le Faaola. Tusi se parakalafa e faatusatusa ai le manatu o Tanielu i mea ua e iloa e uiga i le faitalia i le fuafuaga a le Tama Faalelagi. O fesili nei e mafai ona fesoasoani ia te oe e toefaaupu ai, ae e le manaomia ona e taliina fesili uma i lau parakalafa.

   1. Faailoa mai ni manatu po o ni mafaufauga e ono aofia ai.

      • O le a se mea e foliga mai e talitonu i ai Tanielu e uiga i le saolotoga ma le faamoemoega o le faitalia?

      • O le a se mea e foliga mai e talitonu i ai o ia e uiga i tulaga faatonuina o le Ekalesia a le Faaola?

   2. Mafaufau i le mataupu i le anomea o le fuafuaga o le faaolataga ma aoaoga a le Faaola.

      • O le a se mea na e oo i ai e ala i le ola ai i le talalelei a Iesu Keriso ua fesoasoani ia oe e ese ai lau vaai i mea nai lo le vaai a Tanielu?

      • O a vaega o le fuafuaga o le faaolataga e te manatu o le a sili ona aoga mo Tanielu e malamalama ai?

      • O le a le ituaiga saolotoga ua ofo mai e le Faaola ia i latou o e faaaogaina lo latou faitalia e tausi ai Ana poloaiga? O le a le ituaiga o faatagataotauaina e taunuu i ai mai le teenaina o i latou?

Faitau palakalafa 5–7, 11 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) ma mafaufau loloto pe faapefea ona faatatau mataupu faavae nei e lua i le tulaga o Ivan.

Faatino i le faatuatua

• Afai e amata ona fesiligia e Ivan lana faaiuga e savali ese mai tulaga matautia faaleagaga, o le a se mea e mafai ona e faasoa atu ia te ia mai palakalafa 5–7? Aisea?

Saili le malamalama atili e ala i punavai paia ua filifilia

• O a punavai o loo ta’ua i le parakalafa 11 e te manatu o le a sili ona aoga ia Ivan?

• E faapefea e upumoni o loo i le 2 Nifae 2:27 ona fesoasoani ia te ia?