1 Nīfai 13–14

“Fakamahafu … ʻaki ʻa e Māʻoniʻoni pea mo e Mālohi ʻo e ʻOtuá”

sākalamēnití

Hili hono fakahā kia Nīfai ʻi ha mata meʻa-hā-mai ʻa e hē ʻa hono kakaí mei he moʻoní mo honau fakaʻauhá, naʻá ne mamata ʻe fakakoviʻi ʻe ha fuʻu siasi lahi mo fakalielia ʻa e ngaahi akonaki ʻo e Tohi Tapú mo tauʻi e Kau Māʻoniʻoni ʻa e ʻOtuá. Fakakaukauloto ki he fiefia ʻa Nīfai ʻi heʻene ʻiloʻi ʻe fakafoki mai ʻa e ongoongoleleí, ʻo ne tāpuakiʻi ʻa kinautolu kotoa pē te nau tali e ngaahi akonaki mo e ngaahi fuakava ʻa e Fakamoʻuí. Ko e taumuʻa ʻo e lēsoni ko ʻení ke tokoni ke mahino kiate koe ʻa e mahuʻinga ʻo e ngaahi fuakavá pea fakatupulaki hoʻo holi ke fakahoko mo tauhi kinautolú.

Fakatokangaʻi ange: ʻE akoʻi fakaikiiki ange ʻa e 1 Nīfai 13:20–42 ʻi he lēsoni hokó.

Toʻukupu ʻo e ʻOtuá ʻi he hisitōliá

Fakakaukauloto ʻoku fakahā atu kiate koe ha mata meʻa-ha-mai ʻo e ngaahi meʻa mahuʻinga taha naʻe hoko he taʻu ʻe 500 kuohilí, kau ai hotau taimí.

• ʻOkú ke pehē ko e hā ha ngaahi meʻa naʻe hoko te ke ala mamata ki ai ʻi he meʻa-hā-mai ko ʻení? Ko e hā hono ʻuhingá?

Naʻe fakahā ki he palōfita ko Nīfaí ha mata meʻa-hā-mai naʻe kau ai ha ngaahi meʻa mahuʻinga mei he vahaʻataimi ko ʻení. Fakatokangaʻi ʻa e meʻa naʻe fakahā ʻe Palesiteni Lāsolo M. Nalesoni ʻo kau ki he mata meʻa-hā-mai ʻa Nīfaí:

Palesiteni Lāsolo M. Nalesoni

ʻOku tau nofomuʻa ke sio tonu he meʻa naʻe mamata ki ai e palōfita ko Nīfaí ʻi ha mata meʻa-hā-maí. …

ʻOku kau kimoutolu, kāinga ʻi he houʻeiki tangata, fafine, mo e fānau naʻe mamata ki ai ʻa Nīfaí. Fakakaukau ki ai! (Russell M. Nelson, “Fanongo kiate Ia,” Ensign pe Liahona, Mē 2020, 88)

ʻI hoʻo ako ʻa e 1 Nīfai 13–14, fekumi ki ha fakamoʻoni ʻo e mālohi ʻo e ʻOtuá ʻi he ngaahi meʻa naʻe hoko ʻo aʻu mai ki hotau kuongá kae pehē ki he ngaahi talaʻofa mahuʻinga ʻe fakakakato ʻe he ʻEikí ʻi hoʻo moʻuí.

fakaʻilonga, lekooti

1. Fakakakato e ʻekitivitī ko ʻení:

Lau e ngaahi potufolofolá pea fakatauhoa ʻa e meʻa ʻoku fakamatalaʻi ʻi he ngaahi vēsí mo e ngaahi meʻa naʻe hoko ʻoku hiki atu ʻi laló. Fakatokangaʻi ange: ʻOku ʻuhinga ʻa e Kau Senitailé ʻi hono ngāue ʻaki ʻi he ngahi veesi ko ʻení ki he kakai ʻoku ʻikai mei Siuta pe nofo ʻi he fonua ʻo Siutá.

1 Nīfai 13:12–13, 16–19	Ko e fakamoʻoniʻi ʻe he lekooti ʻo e kau Nīfaí (Tohi ʻa Molomoná) mo ha ngaahi folofola kehe ʻa e moʻoni ʻo e lekooti ʻo e kau Siú (Tohi Tapú) pea mo fakafoki mai e ngaahi moʻoni mahinongofua mo mahuʻingaá.
1 Nīfai 13:23–26	Ko hono fuofua ʻiloʻi mo hono nofoʻi ʻo e fonua ʻo e talaʻofá ʻe he kau Senitailé.
1 Nīfai 13:35–36, 39–40	Ko e fakahalaʻi ʻo e lekooti ʻa e kau Siú (ko e Tohi Tapú) ʻe he fuʻu siasi lahi mo fakalieliá.
1 Nīfai 14:7–10	Ko e hoko mai ʻa e ngāue fakaofó (Fakafoki mai ʻo e ongoongoleleí). Ko e fili ʻa e kau Senitailé pe te nau tali pe fakasītuʻaʻi hono ngaahi tāpuakí.

• ʻOkú ke pehē ko e hā ʻoku mahuʻinga fekauʻaki mo e ngaahi kikite ko ʻeni?

Fakatatau ki he mata meʻa-hā-mai ʻa Nīfaí, “naʻá [ne] vakai ki he Laumālie ʻo e ʻOtuá … [naʻá ne] ueʻi hake” ʻa kinautolu naʻe fononga ki he fonua ʻo e talaʻofá (1 Nīfai 13:12–13). Naʻe mamata foki ʻa Nīfai naʻe ʻiate kinautolu ʻa e “māfimafi ʻo e ʻOtuá” (vakai ki he 1 Nīfai 13:16, 18–19).

• Ko e hā ʻokú ke ako fekauʻaki mo e ʻOtuá mei he ngaahi veesi ko ʻení?

• ʻE tāpuekina fēfē nai hoʻo moʻuí he taimí ni ʻe he mahino ko ʻeni fekauʻaki mo Iá?

Ko hono maʻu e mālohi ʻo e ʻOtuá ʻi heʻetau moʻuí

Naʻe fakahā kia Nīfai ʻa e ngaahi ʻaho fakaʻosí peá ne mamata ki hono Fakafoki Mai ʻo e Siasi ʻo Sīsū Kalaisí pea mo e fakafepaki ʻe fehangahangai mo iá. Naʻá ne mamata foki ki he ngaahi tāpuaki naʻe talaʻofa ki he kau muimui tauhi fuakava ʻo Sīsū Kalaisí.

Lau ʻa e 1 Nīfai 14:12–14, ʻo kumi e meʻa naʻe ako ʻe Nīfai fekauʻaki mo e kau mēmipa ʻo e Siasi ʻo Sīsū Kalaisí ʻi he ngaahi ʻaho kimui ní.

• Ko e hā ʻoku makehe kiate koe mei he fakamatala ʻa Nīfai kau ki he Siasi ʻo Sīsū Kalaisí mo hono kāingalotú ʻi hotau kuongá? Ko e hā hono ʻuhingá?

• Ko e hā ha ngaahi tefitoʻi moʻoni te ke lava ʻo ʻiloʻi mei he veesi 14?

Ko e tefitoʻi moʻoni ʻe taha te tau lava ʻo ako mei he ngaahi veesi ko ʻení ko e kapau te tau tauhi ʻetau ngaahi fuakavá, ʻe fakamahafu kitautolu ʻaki ʻa e māʻoniʻoni pea mo e mālohi ʻo e ʻOtuá.

• Ko e hā ha ngaahi fuakava kuó ke fakahoko pe te ke fakahoko mo e ʻOtuá?

• Ko e hā ha ngaahi founga ʻe niʻihi ʻoku tokoni atu ke ke tokanga taha ai ki hono tauhi ʻo e ngaahi fuakava kuó ke fakahokó?

Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻo e fakamahafu ʻaki ʻa e māʻoniʻoni pea mo e mālohi ʻo e ʻOtuá ʻi he fuʻu nāunau lahí:

ʻEletā Tēvita A. Petinā

ʻOku ʻikai ko ha foʻi fakakaukau lelei pē pe ko ha sīpinga ʻo ha lea fakafolofola fakaʻofoʻofa ʻa e kupuʻi lea ko ia “naʻe fakamahafu ʻa kinautolu ʻaki ʻa e māʻoniʻoni pea mo e mālohi ʻo e ʻOtuá ʻi he fuʻu nāunau lahi” [1 Nīfai 14:14]. Ka ko e ngaahi tāpuaki ko ʻení ʻoku hāsino moʻoni ia ʻi he moʻui ʻa e kau ākonga taʻefaʻalaua ʻa e ʻEikí ʻi he ʻaho kimui ní.

ʻOku ou fakamoʻoni atu ko e kakai fuakava ko ia ʻa e ʻEikí ʻi he ʻaho ní ʻoku fakamahafu moʻoni pē kinautolu ʻaki ʻa e faitotonu pea mo e mālohi ʻo e ʻOtuá ʻi he fuʻu nāunau lahi. Kuó u mamata tonu ʻi he tuí, loto-toʻá, fakakaukau leleí, vilitakí, mo e fiefia ʻoku ope atu he tuʻunga fakamatelié—pea ko e ʻOtuá pē ʻoku malava ke ne fai iá. (David A. Bednar, “ʻAki e Mālohi ʻo e ʻOtuá ʻi he Fuʻu Nāunau Lahi,” Liahona, Nōvema 2021, 29–30)

• Ko e hā ha ngaahi sīpinga ʻe niʻihi ʻe ala malava ke “fakamahafu [ai] ʻa kinautolu [homou toʻú] ʻaki ʻa e māʻoniʻoní”?

• Ko e fē ha taimi kuó ke aʻusia ai ha niʻihi ʻo e ngaahi tāpuaki ko ʻení “ko e ʻOtuá pē taha te Ne lava ʻo foaki atú”?

 

 

fakaʻilonga, lekooti

2. Fakakaukau mo fakahoko haʻo tali ki ha foʻi fehuʻi ʻe ua pe lahi ange mei he ngaahi fehuʻí ni:

• Ko e hā ʻoku talaatu ʻe hoʻo ngaahi ngāue fakaʻahó fekauʻaki mo hono mahuʻinga ʻo e ngaahi fuakava kuó ke fakahokó?

• Ko e hā ʻokú ke fiemaʻu ai ʻa e mālohi ʻoku maʻu mei he ngaahi fuakava mo e Tamai Hēvaní?

• Te ke lava fēfē ʻo fakaafeʻi kakato ange ki hoʻo moʻuí e ngaahi tāpuaki ʻo hono fakahoko mo fakaʻapaʻapaʻi e ngaahi fuakava mo e Tamai Hēvaní?

Ngaahi tali ki he siví: 1-e, 2-f, 3-a, 4-h

Fili Pē: Fie Ako Lahi Ange?

1 Nīfai 13. Ko e hā e ʻuhinga ʻo e foʻi lea Kau Senitailé ʻi he Tohi ʻa Molomoná?

ʻE lava ke ʻuhinga ʻa e Kau Senitailé “ki he ngaahi fonuá.” ʻOku ʻuhinga ia (1) kiate kinautolu ʻoku ʻikai ʻo e fale ʻo ʻIsilelí; (2) kiate kinautolu ʻoku ʻikai tui ki he ʻOtua ʻo ʻIsilelí pe ʻikai ke nau maʻu ʻa e ongoongoleleí, neongo pe ko hai honau hakó; pea mo e (3) kakai ʻoku ʻikai mei Siuta pe ʻikai nofo ʻi he fonua ʻo Siutá. Hangē ko ʻení, ʻoku ui e kau pilikimi mo e kau hikifonua mai ki he Ongo ʻAmeliká ko e kau Senitaile ʻi he 1 Nīfai 13:3–13 Ko kinautolu ne nau ʻomi e Tohi ʻa Molomoná ʻoku ui kinautolu ko e kau Senitaile ʻi he 1 Nīfai 13:38. Naʻe toe ʻomi foki ʻe he kau Senitailé ʻa e Tokāteline mo e Ngaahi Fuakavá mo e Mataʻitofe Mahuʻingá (vakai ki he 1 Nīfai 13:39; Tokāteline mo e Ngaahi Fuakava 109:60).

1 Nīfai 13:12. Ko hai ʻa e tangata ʻi he mata meʻa-hā-mai ʻa Nīfaí?

Naʻe fakamahinoʻi ʻe Palesiteni ʻEselā Tafu Penisoni (1899–1994) ko e tangata ko ʻeni ʻi he lotolotonga ʻo e kau Senitailé ko Kulisitofā Kolomupusi:

Palesiteni ʻEselā Tafu Penisoni

Naʻe ueʻi fakalaumālie ʻe he ʻOtuá “ha tangata ʻi he lotolotonga ʻo e kau Senitailé” (1 Nīfai 13:12) ʻa ia, naʻe tataki ʻe he Laumālie ʻo e ʻOtuá ke ne toe ʻiloʻi ʻa e fonua ko ʻAmeliká mo fakaʻilo e fonua foʻou mo mahu ko ʻení ki he kakai ʻi ʻIulopé. Ko e tangata foki ko iá ko Kulisitofā Kolomupusi, ʻa ia naʻá ne fakamoʻoni naʻe ueʻi fakalaumālie ia ʻi he meʻa naʻá ne faí.

Naʻe pehē ʻe Kolomupusi, “Naʻe fakaava hoku ʻatamaí ʻe hotau ʻEikí, fekauʻi atu au ʻi he funga ʻo e tahí, peá ne ʻomi ha maama ke fakahoko ʻaki e ngāué. Naʻe ui ʻe he niʻihi ne fanongo ʻi heʻeku ngāué ko ha ngāue vale ia, ne nau manukiʻi mo katakataʻi au. Ka ko hai ʻe toe veiveiua he naʻe ueʻi au ʻe he Laumālie Māʻoniʻoní? (Jacob Wasserman, Columbus, Don Quixote of the Seas, pp. 19–20). (The Teachings of Ezra Taft Benson [1988], 577)

1 Nīfai 14:10. Ko e hā ʻa e ongo siasi naʻe lave ki aí?

Palesiteni Tāleni H. ʻOakesi

Naʻe fakamatalaʻi ʻe ʻEletā Tāleni H. ʻOakesi ko e “siasi lahi mo fakalielia” naʻe fakamatalaʻi ʻe Nīfaí “ko ha faʻahinga fakakaukau fakapoto pe kautaha [ia] ʻoku nau fakafepakiʻi ʻa e tui ki he ʻOtuá. Pea ko e ‘pōpula’ ko ia ʻoku fekumi e ‘siasi’ ko ʻení ke ʻohifo ki ai e kāingalotú he ʻikai lahi ange ki he pōpula fakaesinó ʻo hangē ko e pōpula ki he ngaahi fakakaukau halá” (“Tuʻu ko e Kau Fakamoʻoni ʻo e ʻOtuá,” Liahona, Māʻasi 2015, 32).

ʻE tāpuekina fēfē ʻe he ʻOtuá ʻa e kau māʻoniʻoní ʻi he ngaahi ʻaho fakaʻosí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Niila L. ʻEnitaseni

ʻE kāinga, ʻoku tau moʻui ʻi he ngaahi ʻaho kimuʻa he Hāʻele ʻAnga Ua Mai ʻa e ʻEikí, ko ha taimi kuo fuoloa e nofo ʻamanaki atu ki ai e kakai tuí ʻi he ngaahi kuongá. ʻOku tau moʻui he ngaahi ʻaho ʻo e taú mo e ongoongo ʻo e tau, ngaahi ʻaho ʻo e fakatamaki fakanatula, ngaahi ʻaho ʻoku fefaʻuhi ai e māmaní mo e puputuʻú mo e moveuveú.

Ka ʻoku tau toe moʻui foki he kuonga nāunauʻia ʻo hono Fakafoki Mai ʻo e Ongoongoleleí, ko ha taimi kuo ʻave ai e ongoongoleleí ki he māmaní kotoa—ko ha taimi ne talaʻofa mai ai e ʻEikí te Ne “fokotuʻu hake … ha kakai haohaoa,” [Tokāteline mo e Ngaahi Fuakava 100:16] pea fakateunga kinautolu “ʻaki ʻa e māʻoniʻoni pea mo e mālohi ʻo e ʻOtuá” [1 Nīfai 14:14].

ʻOku tau fiefia he ngaahi ʻahó ni pea lotua te tau lava ke fehangahangai loto-toʻa mo hotau ngaahi faingataʻaʻiá mo e taʻepaú. (Neil L. Andersen, “Ke Hoko Mai Ho Puleʻangá,” Ensign pe Liahona, May 2015, 119)

ʻOku faitāpuekina fēfē nai kitautolu ʻi heʻetau ʻaʻeva he hala ʻo e fuakava?

Lau, mamata pe fanongo ki he lea ʻa ʻEletā D. Toti Kulisitofasoni ko e “ʻUhinga e Hala ʻo e Fuakavá” (Liahona, Mē 2021, 116–19).