1 Nephi 2

“Ikaw Kanunay Naningkamot sa Pag-ila Kanako”

Nephi nag-ampo daplin sa sapa

Ang Ginoo usahay mosugo kanato sa pagbuhat og mga butang nga tingali lisod natong sabton o buhaton. Human sa pag-awhag sa katawhan sa Jerusalem sa paghinulsol, si Lehi mituman sa usa ka pagpadayag sa pagbalhin sa iyang pamilya ngadto sa kamingawan. Imbis nga magbagulbol sama ni Laman ug Lemuel, si Nephi midangop sa Ginoo alang sa dugang nga panabot ug gipahumok ang iyang kasingkasing. Kini nga leksiyon gituyo aron pagtabang kanimo nga mobati og mas dakong tinguha sa pagdangop ngadto sa Ginoo kon Siya mohangyo kanimo sa pagbuhat og lisod nga mga butang.

Pagsanong sa tambag sa Ginoo

Hunahunaa nga naminaw ka sa kinatibuk-ang komperensya ug ang Presidente sa Simbahan mihatag og tambag nga sa imong hunahuna lisod sundon. Human sa komperensiya, nagsugod ka sa pagkadungog sa ubang mga miyembro sa Simbahan nga nangreklamo mahitungod sa iyang tambag ug nangutana nganong ang propeta mihangyo kanato sa pagbuhat niini nga butang. Samtang naminaw ka niini nga mga argumento, nagsugod ka sa paghunahuna kon unsa ang imong buhaton.

• Unsa kaha ang pipila ka negatibo nga mga pamaagi sa pagtubag sa mga reklamo ug mga pagsaway sa mga miyembro?

• Unsa ang pipila ka positibo nga mga pamaagi sa pag-atubang niini nga sitwasyon? Unsay makapahimuot sa Ginoo?

Sa 1 Nephi 2, imong makita ang mga anak ni Lehi nga misanong sa lain-laing mga paagi sa usa ka mahagiton nga sugo nga gihatag sa Dios kanila pinaagi sa Iyang propeta. Sa imong pagtuon, pangitaa ang mga baroganan nga makatabang nimo kon morag lisod ang pagsunod sa propeta.

Ang Ginoo misugo kang Lehi sa pagbiya sa Jerusalem

Tingali imong mahinumdoman nga si Lehi gisugo sa Ginoo sa pagpasidaan sa mga tawo sa Jerusalem nga sila pagalaglagon kon sila dili maghinulsol. Basaha ang 1 Nephi 2:1–5, nga mangita sa tambag sa Ginoo ngadto ni Lehi human siya makasangyaw og paghinulsol. Mahimo usab nimong tan-awon ang “Nakigtambag si Lehi sa Iyang Pamilya sa Pagbiya sa Jerusalem” (2:27), anaa sa ChurchofJesusChrist.org.

mapa sa posibleng rota sa biyahe ni Lehi sa kamingawan

Ang gilay-on nga lagmit gibiyahe sa pamilya ni Lehi gikan sa Jerusalem ngadto sa mga utlanan sa Pulang Dagat gibana-bana nga 200 ka milya (320 kilometros). Ang ilang panaw migahin og daghang mga adlaw ug midala kanila latas sa init ug dili mabungahon [barren] nga nasod nga nailhan nga adunay mga kawatan nga naghulat nga makapanulis sa dili andam nga mga pumapanaw.

• Kon ikaw usa sa mga anak ni Lehi, unsa sa imong hunahuna ang imong mahimong reaksiyon niini nga sitwasyon? Ngano man?

• Unsa kaha ang imong mga pangutana?

• Sa unsang paagi nimo makita ang kaluoy sa Ginoo nga gipakita sa Iyang sugo sa pagbiya sa Jerusalem?

Niining mahagitong higayon sa kasaysayan sa pamilya ni Lehi, atong makita ang lain-laing mga tubag gikan sa iyang mga anak. Ang pagtandi ug pagpangita og kalainan sa mga indibidwal diha sa mga kasulatan usa ka kahanas sa pagtuon sa kasulatan nga makatabang nimo nga mas mahunahuna kon unsaon pagsanong sa tukma nga paagi sa piho nga mga sitwasyon. Paggahin og higayon sa makadiyot sa pagbansay niini nga kahanas pinaagi sa paghimo og talaan nga susama sa mosunod diha sa imong journal sa pagtuon, pagbasa sa mga bersikulo sa matag kolum, ug pagrekord sa imong mga nakaplagan diha sa talad.

Tubag ni Laman ug Lemuel	Tubag ni Nephi ug Sam
Tubag ni Laman ug Lemuel 1 Nephi 2:11–13	Tubag ni Nephi ug Sam 1 Nephi 2:16–21

Mahimo usab nimong tan-awon ang “Si Nephi Nag-ampo alang kang Laman ug Lemuel” (6:02), anaa sa ChurchofJesusChrist.org, nga mangita og ubang mga panabot nga mahimo nimong idugang sa imong tsart.

icon, rekord

1. Tubaga ang mosunod nga mga pangutana:

   • Unsa ang imong namatikdan samtang imong gitandi ang mga aksiyon ni Laman ug Lemuel ngadto sa mga aksiyon ni Nephi ug Sam?

   • Sa usa ka kapahayag [sentence], unsaon nimo pag-summarize ang imong nakat-onan gikan sa mga ehemplo ni Laman ug Lemuel? Unsaon nimo pag-summarize ang imong nakat-onan gikan sa mga ehemplo ni Nephi ug Sam?

Paggahin og higayon sa makadiyot sa pagrebyo sa imong gisulat. Ikonsiderar kon hain nga mga aksiyon o mga motibo ang labing parehas sa imong kaugalingon. Unsa nga mga tinguha, mga hunahuna, o mga pagbati ang niabot kanimo samtang imong gihimo kini nga pagtandi?

Gikan kang Laman ug Lemuel tingali imong nadiskobrehan nga ang wala pagkahibalo sa mga pamaagi sa Ginoo ug ang dili pagtuo sa Iyang mga propeta mahimong hinungdan sa atong pagbagulbol. Gikan ni Nephi tingali imong nakat-onan nga kon kita makugihon nga nagtinguha sa pagsabot sa mga kasugoan sa Ginoo, Siya makapahumok sa atong mga kasingkasing aron sa pagtabang kanato sa pagtuo ug pagsunod.

Ang komento ni Nephi nga ang Ginoo “[mipalumoy sa iyang] kasingkasing” (1 Nephi 2:16) nagpakita nga, susama ni Laman ug Lemuel, kini dili sayon nga kasugoan alang kaniya nga tumanon. Hunahunaa kon sa unsang paagi ang desisyon ni Nephi nga modangop sa Ginoo niini nga sitwasyon nahimong nakaapekto sa nahibilin sa iyang kinabuhi. Hunahunaa kon sa unsang paagi nga ang kinabuhi ni Laman ug Lemuel mahimong lahi kon sila misunod sa ehemplo ni Nephi.

icon, rekord

2. Tubaga ang mosunod nga mga pangutana:

   • Unsa ang pipila ka mga sitwasyon nga imong giatubang o mahimong atubangon diin ikaw makabenepisyo sa pagsunod sa ehemplo ni Nephi?

   • Sa unsang paagi nga ang mapahiubsanong pagtinghuha sa Ginoo niini nga mga kahimtang, kay sa dili pagtuo ug pagbagulbol, makaapekto sa imong kinabuhi karon ug sa umaabot?

   • Unsa ang imong nasabtan mahitungod sa Dios nga makapugong kanimo sa pagbagulbol kon Siya mohangyo kanimo sa pagbuhat og lisod nga butang?

Si Elder Neil L. Andersen sa Korum sa Napulog Duha ka Apostoles mipaambit unsa ang atong mahimo kon kita sa sinugdanan wala makasabot o mouyon sa tambag gikan sa propeta sa Ginoo.

Elder Neil L. Andersen

Ayaw katingala kon usahay ang imong personal nga mga panglantaw dili kanunay mahiangay sa mga pagtulon-an sa propeta sa Ginoo. Mga gutlo kini sa pagkat-on, sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayod nga moabot ang panahon nga makadawat kita og dugang nga espiritwal nga katin-awan gikan sa atong Langitnong Amahan. Usa ka propeta ang mihulagway sa dili ikatandi nga gasa sa Manluluwas isip “ang kabubut-on sa Anak ingon nga gituhop ngadto sa kabubut-on sa Amahan” [Mosiah 15:7]. Ang pagtugyan sa atong kabubut-on ngadto sa kabubut-on sa Dios, sa tinuod, dili man gayod pagtugyan apan ang sinugdanan sa usa ka mahimayaong kadaogan. (Neil L. Andersen, “Ang Propeta sa Dios,” Liahona, Mayo 2018, 26-27)

• Unsa nga mga panalangin ang miabot kanimo samtang ikaw nagtinguha sa pagtugyan sa imong kabubut-on ngadto sa Langitnong Amahan, sama sa gibuhat ni Jesus ug ni Nephi?

Paggahin og higayon sa makadiyot sa pagrekord sa imong mga hunahuna ug espirituhanong mga impresyon. Unsa ang imong nakat-onan nga gusto nimong mahinumdoman? Unsa nga mga kausaban ang imong gibati nga nadasig nga himoon sa imong kinabuhi base sa imong natun-an karon?

Opsiyonal: Gustong Makat-on Pa og Dugang?

Sa unsang paagi nga ang paglig-on sa akong relasyon ngadto sa Manluluwas makaimpluwensiya sa paagi sa akong pagsanong sa lisod nga mga sitwasyon?

Si Elder Craig C. Christensen sa Seventy mitudlo:

Elder Craig C. Christensen

Human maminaw sa iyang amahan nga namulong sa daghan niyang espirituhanong [mga] kasinatian, gusto si Nephi nga mahibalo sa nahibaloan sa iyang amahan. Lapas kini sa yano nga pagkakuryuso—butang kini nga iyang gusto ug gipangita. Bisan “sa iyang kabatan-on,” anaa niya ang “dako nga tinguha nga mahibalo sa mga misteryo sa Dios” [1 Nephi 2:16]. Nangandoy siya nga “makakita, ug makadungog, ug masayod niini nga mga butang, pinaagi sa gahom sa Espiritu Santo” [1 Nephi 10:17].

… Tungod sa matuohon niyang kasingkasing ug paningkamot, gipanalanginan si Nephi og talagsaong kasinatian. Nakadawat siya og saksi sa pagkatawo, kinabuhi, ug Paglansang sa Manluluwas nga si Jesukristo, nakita niya ang pag-abot sa Basahon ni Mormon ug ang Pagpahiuli sa ebanghelyo sa ulahing mga adlaw—tanan gumikan sa sinsero niyang tinguha nga mahibalo sa iyang kaugalingon.

Kining personal nga mga kasinatian uban sa Ginoo nag-andam kang Nephi alang sa mga kalisdanan ug sa mga hagit nga iyang atubangon sa umaabot. Naghimo kini nga nalig-on siya bisan ang uban sa iyang pamilya naglisod. Makahimo siya niini kay siya nakakat-on sa iyang kaugalingon nga siya nasayod sa iyang kaugalingon. Gipanalanginan siya og kaugalingon niyang pagpamatuod. (Craig C. Christensen, “Ako Nasayod Niini nga mga Butang sa Akong Kaugalingon,” Liahona, Nob. 2014, 51)

Paghanduraw sa mga kasulatan

Aron mas mahanduraw ang mga kasulatan, ikonsiderar ang pagtan-aw sa “Ang Pamilya ni Lehi Namiya padulong sa Kamingawan” (3:47) agig dugang sa pag-analisar sa teksto.