O Itulau Tomua o le Tusi a Mamona

Faatomuaga i le Tusi a Mamona

O Le Maa’au’au o La Tatou Tapuaiga

O se tamaitiiti o loo faitau i tusitusiga paia

Na ta’ua e Iosefa Samita le Tusi a Mamona o le maa‘au‘au o la tatou tapuaiga. I totonu o le tusi o loo i ai se valaaulia e ole atu i le Atua pe moni. E faitau miliona tagata ua mulimuli i lenei valaaulia ma maua se molimau mai le Agaga Paia i le moni o le Tusi a Mamona. O lenei lesona ua faamoemoe e fesoasoani ia te oe e faateleina ai lou manao e suesue le Tusi a Mamona i aso taitasi e faamalosia ai lau molimau i lona moni.

O Faamanuiaga mai le Tusi a Mamona.

• O le fea o faamanuiaga nei e te lagona o le a matuai aafia lelei ai lou olaga i aso taitasi? O le a se mea e te matua loto e fai ina ia maua ai ia faamanuiaga?

  • o se gafatia sili atu e lagona ai le siufofoga o le Agaga

  • tali i fesili ma le taitaiga mo lou olaga

  • o se gafatia sili atu e tetee atu ai i faaosoosoga ma mea leaga

O nisi nei o faamanuiaga e mafai ona oo mai i le suesueina o le Tusi a Mamona.

Faitau ma mafaufau e faailoga le saunoaga a Iosefa Samita i le parakalafa 6 o le faatomuaga i le Tusi a Mamona.

• O le a se mea e tulagaese ia te oe mai le saunoaga a Iosefa Samita?

O le maa’au’au o la tatou tapuaiga

Faitotoa faa’ofu’ofu

• Aisea e taua tele ai le maa i le ogatotonu pito i luga o le faaofuofu (le maa’au’au)? O le a le mea e tupu i le faaofuofu pe a aveese le maa?

Sa aoao mai Peresitene Ezra Taft Benson (1899–1994):

Peresitene Ezra Taft Benson

O le Tusi a Mamona o le maa’au’au o la tatou molimau ia Iesu Keriso, o Ia lava o le maatulimanu o mea uma tatou te faia. Na te molimau i Lona moni ma le mana ma le manino. …

… O le Tusi a Mamona o le maa’au’au lea o le molimau. E faapei ona pa’ū le faitotoa faaofuofu pe a aveese le maa’au’au, e faapena foi le tū ma le pa’ū o le Ekalesia atoa ma le moni o le Tusi a Mamona. (Ezra Taft Benson, “O Le Tusi a Mamona—o le Maa‘au’au o Lo Tatou Tapuaiga,” Ensign, Nov. 1986, 5, 6)

O le maa’au’au o la tatou molimau ia Iesu Keriso

• O le a sou manatu o le a le uiga o le Tusi a Mamona o le maa’au’au o la tatou molimau ia Iesu Keriso?

Na molimau mai e le aunoa tusitala o le Tusi a Mamona ia Iesu Keriso. Ina ia iloa pe faapefea ona maua e tagata eseese ni mau faasino ia Iesu Keriso i itulau o le tusi, matamata le vitio “Book of Mormon Experiment Honolulu” (2:35). E mafai ona maua lenei vitio i le ChurchofJesusChrist.org.

aikona, faamaumau

1. Faamaea le gaoioiga lenei, ma tali fesili o loo i lalo.

Filifili soo se itulau mai le Tusi a Mamona, ma vaavaai mo mau taitasi uma e faasino i le Faaola i lena itulau.

• O a mea na e mauaina e uiga i le Faaola?

• O a ni mea ua fesoasoani ai ia te oe ia fuaitau na e mauaina e malamalama ai pe lagona ai e uiga i le Faaola?

Mafaufau pe o le a faapefea ona faamanuiaina oe e ala i le i ai o se molimau sili atu ona malosi ia Iesu Keriso. A o e suesue i le Tusi a Mamona, vaavaai mo mau faasino ia Iesu Keriso ma mo mea ua e aoaoina e uiga ia te Ia. A o e faia, o le a tuputupu ae lou malamalama ma le molimau i le Faaola.

O Le maa’au’au o la tatou molimau

• O le fea o faamatalaga nei e sili ona faamatalaina ai ou lagona e uiga i le Tusi a Mamona?

  • Ou te faatuatuaina isi o e ua mauaina a latou lava molimau patino ma faamautinoa mai ia te au e moni le Tusi a Mamona.

  • Ou te le o mautinoa pe ua ou iloa e moni le Tusi a Mamona.

  • Ua ou mauaina se molimau mai le Agaga Paia e faapea e moni le Tusi a Mamona.

• Aisea e te manatu ai atonu e finagalo le Tama Faalelagi ia e iloa e moni le Tusi a Mamona?

Faitau le parakalafa lona lua i le parakalafa mulimuli i le faatomuaga, faapea foi le Moronae 10:3–5, ma vaavaai mo mea e mafai ona e faia ia iloa ai pe moni le Tusi a Mamona.

• E tusa ai ma mea na e faitauina, o le a le mea e manaomia e se tasi ona fai ia iloa ai pe moni le Tusi a Mamona?

Na faasoa mai e Elder Ulisses Soares o le Korama a Aposetolo e Toasefululua le ala na tuputupu ae ai lana molimau i le Tusi a Mamona a o ia auai i le seminare. Atonu e te manao e maimoa le “The Coming Forth of the Book of Mormon,” o loo maua i le ChurchofJesusChrist.org, mai le faailotaimi 12:03 i le 14:12.

Faitau le parakalafa mulimuli i le faatomuaga o le Tusi a Mamona, ma vaavaai po o le a le isi malamalama e oo mai faatasi ma se molimau o le Tusi a Mamona.

• E mafai faapefea e le i ai o se molimau o le Tusi a Mamona ona aafia ai lou olaga?

Suesue le Tusi a Mamona i aso taitasi

Na fofogaina mai e Peresitene Russell M. Nelson ia i tatou uma ia folafolaga pe afai tatou te suesue i le Tusi a Mamona i aso uma. Faitau le faamatalaga lenei, pe matamata le vitio “The Book of Mormon: What Would Your Life Be Like without It?” i le ChurchofJesusChrist.org mai le taimi 11:52 i le 13:05.

Peresitene Russell M. Nelson

Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le [suesueina o le] Tusi a Mamona i aso taitasi, e mafai ona puipuia oe mai mea leaga o le aso, e aofia ai ma le mala faataumaoi o ponokalafi ma isi vaisu faagase mafaufau.

Soo se taimi lava ou te faalogo ai i se tasi, e aofia ai ma a’u lava ia, o faapea, “Ou te iloa e moni le Tusi a Mamona,” e oso lava lo’u fia alaga atu, “E manaia tele, ae le lava lena!” E manaomia ona tatou lagonaina, i le loloto i le ‘taele’ o o tatou loto [Alema 13:27], o le Tusi a Mamona ele taumasalomia o le afioga lava a le Atua. E tatau ona tatou lagonaina le o’oo’o lea tatou te le mananao ai lava e ola i se aso e aunoa ma le tusi. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Ensign po o le Liahona, Nov. 2017, 62–63)

aikona, faamaumau

2. Tali fesili nei:

   • O le a se mea ua faagaeetia ai oe mai lenei faamatalaga?

   • O le a sou lagona e uiga i le valaaulia e faitau le Tusi a Mamona i aso uma?

Afai e te lei faia lava, fai se fuafuaga e faamalosia ai lau molimau ia Iesu Keriso e ala i se suesueina i aso taitasi o le Tusi a Mamona. Mo se faataitaiga, e mafai ona e filoma’otia pe fia ni minute o le a e suesue ai i le aso. E mafai ona e fuafua pe faapefea ona e taulai atu i mea o loo aoao mai e le Tusi a Mamona e uiga i le Faaola. Mafaufau i soo se faafitauli atonu e te lua feagai i au suesuega i aso taitasi ma le mea e mafai ona e faia e faatoilaloina ai.

Tuu i le Faitalia: O e Manao e Aoao Atili?

O le a le maa’au’au?

Ina ia aoao atili e uiga i le matafaioi a se maa’au’au, matamata le vitio “Look to the Book, Look to the Lord” mai le faailotaimi 5:16 to 6:41.

E faafia ona ta’ua e le Tusi a Mamona ia Iesu Keriso?

Na aoao mai Elder Gary E. Stevenson o le Korama a Aposetolo e Toasefululua e faapea:

Elder Gary E. Stevenson

O le a e faitauina toto’a fuaitau o lenei tusi taua ma fetaiai ai ma lou Faaola pele, le Alii o Iesu Keriso, toetoe lava i ona itulau uma. O se faatatau i le faaaogaina o nisi ituaiga o suafa mo Lona suafa pe tusa o se averesi o le faatasi i le 1.7 fuaiupu taitasi. (Gary E. Stevenson, “Vaai i le Tusi, Vaai i le Alii,”,” Ensign po o le Liahona, Nov. 2016, 47)

E faapefea ona faamanuiaina au e ala i le suesueina o le Tusi a Mamona?

Sa molimau mai Peresitene Ezra Taft Benson (1899–1994):

Peresitene Ezra Taft Benson

Ua le na o le faapea ua aoao mai e le Tusi a Mamona ia i tatou upu moni, e ui o le mea moni lena na te faia. E le na o le faapea ua molimau le Tusi a Mamona ia i tatou e uiga ia Keriso, e ui lava ina moni foi lena mea. Ae o loo i ai se isi mea. O loo i ai se mana i le tusi e amata ona oo mai i lou olaga i le taimi lava e amata ai ona e suesue maelega i le tusi. O le a e maua le mana sili atu e tetee atu ai i faaosoosoga. O le a e maua le mana e aloese ai mai mea tau faasese. O le a e maua le mana e tumau ai i le ala sa’o ma le vaapiapi. O tusitusiga paia ua ta’ua o “afioga o le ola” [Mataupu Faavae ma Feagaiga 84:85], ma e leai se isi mea e sili atu ai ona moni lena faaupuga nai lo le Tusi a Mamona. A amata loa ona e matelaina ma galala i le fia maua o na afioga, o le a e maua le faamanuiaga tele ma le faateleina i le olaga. (Ezra Taft Benson, “O Le Tusi a Mamona—o le Maa‘au’au o Lo Tatou Tapuaiga,” Ensign, Nov. 1986, 7)

Na molimau mai Peresitene Thomas S. Monson (1927–2018):

Peresitene Thomas S Monson

Ou te augani atu ia i tatou uma ia suesue ma le agaga tatalo ma mafaufau loloto i le Tusi a Mamona i aso taitasi. A tatou faia lea mea, o le a tatou i ai i se tulaga e lagona ai le siufofoga o le Agaga, e tetee atu ai i faaosoosoga, e faatoilalo ai le masalosalo ma le fefe, ma maua ai le fesoasoaniga a le lagi i o tatou olaga. Ou te molimau atu ai ma lo’u loto atoa. (Thomas S. Monson, “O Le Mana o le Tusi a Mamona,” Ensign po o le Liahona, Me 2017, 87)

E faapefea ona ou faaavanoa se taimi e suesue ai le Tusi a Mamona?

Na aoao mai Elder Gary E. Stevenson o le Korama a Aposetolo e Toasefululua e faapea:

Elder Gary E. Stevenson

Ina ia fesoasoani e avea le Tusi a Mamona ma maa’au’au o lau molimau, ou te tuu atu ia te outou se lu’i. Talu ai nei sa ou iloa ai o le tele o atunuu i le lalolagi, e faaalu e le autalavou se averesi e fitu itula i le aso e matamata ai i le TV, komepiuta, ma telefonipoto. I le iloaina ai o lenei mea, e mafai ona e faia sina suiga itiiti? E mafai ona e suitulaga nisi o na taimi i aso taitasi—ae patino lava i taimi o loo faaalu i alafaasalalau faaagafesootai, le initoneti, taaloga, po o televise—i le faitauina o le Tusi a Mamona? Afai o suesuega ia ou te faasino atu i ai e sa’o, e faigofie lava la ona maua se taimi i aso taitasi e suesue ai le Tusi a Mamona e tusa lava pe na o se 10 minute i le aso. Ma e mafai ona e suesue i se ala e faatagaina ai oe e te mauaina ai le fiafia ma malamalama ai—pe o luga o lau tamai masini po o le tusi lava ia. (Gary E. Stevenson, “Vaai i le Tusi, Vaai i le Alii,” Ensign po o le Liahona, Nov. 2016, 46)