Pasiunang mga Materyal

Ang Plano sa Kaluwasan

Plano sa Langitnong Amahan alang sa Iyang mga Anak

Ang Dakong Konseho

Pinaagi sa atong mortal nga biyahe, ang mga pangutana kanunay nga motumaw mahitungod sa katuyoan ug kahulugan sa kinabuhi: Diin ko gikan? Nganong anaa ako dinhi? Asa ako padulong? Ang pagkasayod sa mga tubag niini nga mga pangutana makatabang nimo sa paglawig sa mga hagit sa kinabuhi ug sa pagpabilin sa dalan sa pakigsaad sa Ginoo. Kini nga leksiyon makatabang nimo nga makasabot ug mobati sa kaimportante sa plano sa Langitnong Amahan.

Ang Plano sa Langitnong Amahan

• Unsa kaha nga kahibalo ang para nimo dili ka mabuhi kon wala? Ngano man?

Pinaagi sa mga kasulatan ug sa modernong pagpadayag, kita adunay kahibalo sa kinabuhi sa wala pa dinhi sa yuta, sa Pag-ula sa Manluluwas, kinabuhi human sa kamatayon, ug sa daghan pang ubang mga elemento sa atong mahangturong pagpakabuhi. Kini nga kahibalo lisod mabuhi kon wala. Paggahin og panahon sa paghunahuna mahitungod sa unsay imong nahibaloan mahitungod sa plano sa Langitnong Amahan. Pamalandongi kon unsa kaha ang imong kinabuhi kon wala kana nga kahibalo.

Samtang magtuon ka karon, tinguhaa ang pakig-uban sa Espiritu Santo aron matabangan ka nga makat-on og dugang mahitungod sa mahigugmaong plano sa Langitnong Amahan alang sa Iyang mga anak.

Ang plano sa Langitnong Amahan diha sa Basahon ni Mormon

Ang Basahon ni Mormon nagtudlo og daghan mahitungod sa plano sa Langitnong Amahan. Si Presidente Russell M. Nelson namahayag: “ mopamatuod ko nga ang Basahon ni Mormon tinuod gayod nga pulong sa Dios. Naglangkob kini sa mga tubag sa labing importanting mga pangutana sa kinabuhi” (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 62). Ania ang pipila ka mga pangutana nga gitubag sa Basahon ni Mormon. Pagpili og labing menos duha ug basaha ang tudling sa kasulatan nga nagtabang sa pagtubag sa pangutana.

• Unsa ang gitudlo sa Basahon ni Mormon mahitungod sa kinabuhi sa wala pa dinhi sa yuta? (Alma 12:25, 30; ang hugpong sa mga pulong nga “katukoran sa kalibotan” nagpasabot sa kinabuhi sa wala pa dinhi sa yuta.)

• Unsa ang tahas ni Jesukristo sa plano sa Langitnong Amahan? (Alma 22:12–14)

• Unsa ang katuyoan sa kinabuhi? (Alma 34:32–33)

• Unsay mahitabo kon kita mamatay? (Alma 40:11–14, 21–23)

• Unsay mahitabo kon wala ang Pag-ula ni Jesukristo? (2 Nephi 9:6–11)

icon, rekord

1. Tubaga ang mosunod nga mga pangutana:

   • Unsa nga mga kamatuoran o doktrina ang imong naila gikan sa mga bersikulo nga imong gibasa?

   • Unsa nga mga pulong o hugpong sa mga pulong diha sa mga bersikulo ang nagtudlo sa kamatuoran o doktrina nga imong naila?

   • Hain sa mga pagtulun-an mahitungod sa plano sa Langitnong Amahan nga ikaw labing mapasalamaton? Ngano?

Ang plano sa Langitnong Amahan ug ang akong kinabuhi

Si Presidente M. Russell Ballard sa Korum sa Napulog Duha ka Apostoles mipasabot kon sa unsang paagi ang pagsabot sa plano sa Langitnong Amahan sa kaluwasan makatabang nato sa atong mga kinabuhi.

Presidente M. Russell Ballard

Kitang mga mortal adunay limitado nga panglantaw sa kinabuhi gikan sa mahangtorong panglantaw. Apan kon kita nahibalo ug nakasabot sa plano sa Langitnong Amahan, kita makaamgo nga ang pag-atubang sa kalisdanan mao ang usa sa nag-unang paagi nga kita gisulayan. …

Pinaagi sa pagtutok ug sa pagsunod sa mga baroganan sa plano sa Langitnong Amahan alang sa atong mahangtoron nga kalipay, kita makapalayo sa atong kaugalingon gikan sa kadautan sa kalibotan. Kon nakaangkla kita sa hustong pagsabot kon si kinsa kita, kon nganong ania kita dinhi sa kalibotan, ug asa kita makaadto human niining mortal nga kinabuhi, si Satanas dili mahimong mohulga sa atong kalipay sa bisan unsang matang sa tentasyon. Kon determinado kita nga mosunod sa plano sa Langitnong Amahan, atong gamiton ang hinatag sa Dios ngari kanato nga moral nga kabubut-on sa paghimo og mga desisyon base sa gipadayag nga kamatuoran, dili sa mga opinyon sa uban o sa kasamtangan nga panghunahuna sa kalibotan. (M. Russell Ballard, “Answers to Life’s Questions,” Ensign o Liahona, Mayo 1995, 23–24)

icon, rekord

2. Tubaga ang mosunod nga mga pangutana.

   • Sa unsang paagi naimpluwensiyahan ang imong kinabuhi pinaagi sa imong kahibalo sa plano sa Langitnong Amahan?

   • Unsa ang pipila ka mga sitwasyon diin ang kahibalo sa plano sa Langitnong Amahan makaapekto sa mga desisyon nga imong himoon?

   • Sa unsang paagi nga ang kahibalo sa plano sa Langitnong Amahan makaapekto sa imong panglantaw sa mga kahimtang ug mga kasinatian sa imong kinabuhi?

Opsiyonal: Gustong Makakat-on pa og dugang?

Sa unsang paagi nga ang plano sa kaluwasan ebidensiya sa gugma sa Dios?

Si Presidente M. Russell Ballard sa Korum sa Napulog Duha ka Apostoles mitudlo:

Presidente M. Russell Ballard

Ang Langitnong Amahan nahigugma pag-ayo kanato nga Iyang giandam ang Iyang plano sa kaluwasan diin ang usa ka Manluluwas mao ang pinakasentro nga binuhat. Ug si Jesus nahigugma pag-ayo kanato nga didto sa dakong Konseho sa Langit, dihang ang Langitnong Amahan nangutana, “Kinsa ako modala?” Si Jesus, kinsa mao ang unang natawo sa tanan nga espiritu nga mga anak sa Amahan, mitubag, “Ania ako, ipadala ako” [Abraham 3:27]. Siya miingon ngadto sa Amahan, “Amahan, ang imong pagbuot mao ang matuman, ug ang himaya maimo sa kahangtoran” [Moises 4:2]. Si Jesus miboluntaryo nga mahimong atong Manluluwas ug Manunubos aron nga kita mahimong sama Kanila ug makabalik ngadto sa Ilang presensiya. (M. Russell Ballard, “Gihigugma Mo ba Ako Labaw Pa Niini?,” Liahona, Nob 2021, 52)

Nganong aduna kitay mga hagit sa kinabuhi?

Si Presidente Dallin H. Oaks sa Unang Kapangulohan miingon:

Presidente Dallin H. Oaks

Tanan kita makasinati og mga oposisyon aron kita masulayan. Ang uban niini mao ang mga tentasyon sa pagpakasala. Ang uban mga mortal nga hagit gikan sa personal nga sala. Ang uban bug-at kaayo. Ang uban gaan ra. Ang uban walay hunong,, ug ang uban mga yugto lang. Walay usa nato nga makalikay. Ang oposisyon magtugot kanato sa pagtubo sa unsay gusto sa atong Langitnong Amahan nga atong makab-ot. (Dallin H. Oaks, “Oposisyon sa Tanang mga Butang,” Ensinya o Liahona, Mayo 2016, 116)

Sa unsang paagi ang pagkahibalo sa plano sa Langitnong Amahan makatabang nako?

Unsay katuyoan ug kahulogan sa kinabuhi?

Si Presidente Dallin H. Oaks sa Unang Kapangulohan mipasabot:

Presidente Dallin H. Oaks

Gitawag diha sa mga kasulatan isip ang “mahinungdanon nga laraw sa kalipay,” “laraw sa katubsanan,” ug “ang laraw sa kaluwasan” (Alma 42:8, 11, 5), kana nga laraw—nga gipadayag sa Pagpahiuli—nagsugod sa usa ka Konseho sa Langit. Isip mga espiritu, kita nagtinguha nga makakab-ot sa kinabuhing dayon nga gitagamtam sa atong langitnong mga ginikanan. Niana nga higayon kita miuswag kutob sa atong mahimo nga wala ang mortal nga kasinatian sa pisikal nga lawas. Aron mahatag kana nga kasinatian, ang Dios nga Amahan nagplano sa paglalang niini nga yuta. Sa giplano nga mortal nga kinabuhi, kita makasala samtang kita makasinati sa oposisyon nga gikinahanglan alang sa atong espiritwal nga paglambo. Kita usab makasinati sa pisikal nga kamatayon. Sa pagluwas nato gikan sa kamatayon ug sala, ang atong Langitnong Amahan mohatag og usa ka Manluluwas. Ang iyang Pagkabanhaw motubos sa tanan gikan sa kamatayon, ug ang Iyang maulaong pagsakripisyo mobayad sa kantidad nga gikinahanglan alang sa tanan aron malimpyohan gikan sa sala sa mga kondisyon nga gitakda sa pagdasig sa atong paglambo. Kining Pag-ula ni Jesukristo mao ang sentro sa plano sa Amahan. (Dallin H. Oaks, “Ang Dako nga Laraw,” Liahona, Mayo 2020, 93)