23

Ou te Fiafia i Tusitusiga Paia

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

E talia e le Ekalesia a Iesu Keriso o le Au Paia o Aso e Gata Ai le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele o tusitusiga paia. O le faamoemoega o tusitusiga paia o le molimau mai lea ia Iesu Keriso, ma fesoasoani ia i tatou e o mai ia te Ia ma maua le ola e faavavau (tagai 2 Nifae 25:26; Helamana 3:29–30). O tusitusiga paia o loo i ai foi tala e uiga i tagata o e na faamanuiaina i le usiusitai i le Tama Faalelagi. Na faailoa mai e Nifae lona fiafia i tusitusiga paia e faapea: “Aua e fiafia lo’u agaga i tusi paia, ua mafaufau foi i ai lo’u loto” (2 Nifae 4:15).

Sauniuniga

• Faitau le Mareko 10:13–16 ma le 1 Nifae 17:7–10; 18:1–4. Ia saunia e otooto nei tala mo tamaiti.

• Aumai lau kopi o tusitusiga paia.

• Faailoga le itulau 70 i le tusi lesona lenei e faafaigofie ai ona e susue i ai.

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Aoaoga o Mataupu Faavae

Faaali i tamaiti au tusitusiga paia ma ta’u atu ia i latou lou fiafia tele i tusitusiga paia. Valaaulia tamaiti e fai mai “tusitusiga paia.” Fai i ai tatou te aoao e uiga i le Tama Faalelagi ma Iesu Keriso mai i tusitusiga paia; tatou te aoao ai e alolofa i Laua ia i tatou ma mananao ina ia tatou fiafia.

Tala mai Tusitusiga Paia

Faaali atu le ata o i le itulau 98 ma faasino ia Iesu. Faamalamalama atu o tusitusiga paia e aoao mai ia i tatou e uiga ia Iesu. Susu’e le Tusi Paia ma otooto le tala ia Iesu o loo faamanuiaina tamaiti (tagai Mareko 10:13–16). O se faataitaiga lea:

E alofa Iesu i tamaiti. I se tasi aso na aumai ai e tagata a latou fanau iti ia Iesu (faasino i tamaiti i le ata). Na Ia siiina i latou i Ona aao ma faamanuia i latou.

Jesus Christ with children

Faaali atu le ata o i le itulau 70. Faamalamalama atu o loo ta’u mai e tusitusiga paia ia i tatou e uiga i tagata na faamanuiaina ina ua latou usiusitai i le Tama Faalelagi. Susu’e le Tusi a Mamona ma otooto le tala ia Nifae o loo fausia se vaa (tagai 1 Nifae 17:7–10; 18:1–4). O se faataitaiga lea:

O Nifae lea (faasino ia Nifae i le ata). Na fetalai le Alii ia Nifae e fau se vaa. E le i fauina lava e Nifae se vaa muamua, ae na usitai o ia. Na faaali mai e le Alii ia te ia le auala e fausia ai le vaa. (Ia faafoliga tamaiti o loo latou fausia se vaa.)

Nephi building a ship

Pese

Usu pe fai atu le tali o le “Saili, Mafaufau Loloto, ma Tatalo” (Tusipese a Tamaiti, 66) ma fai ia taga o loo i lalo. Valaaulia tamaiti tou te faia faatasi

Saili, (faafoliga o loo susu’e tusitusiga paia) suesue,

Ma tatalo tauanau. (piilima lima)

Le Agaga e taitai ai,

Ma ou iloa ai mea moni. (faafoliga o uu se tusi o matala)

Faaiuga

Ia faataitai e tamaiti le fuaiupu, “Ou te fiafia i tusitusiga paia.” Faasoa atu lou fiafia mo tusitusiga paia ma lau molimau ua moni ia.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

Tusitusiga Paia: “Afai e te aoaoina le fanau, e tatau ona e faaaogaina soo ia tusitusiga paia ma saili auala e faafiafia ai tamaiti e faaaoga tusitusiga paia” (O Le Aoao Atu, E Leai Se Isi Valaauga e Sili Ai, 61). Fesoasoani ia i latou e faamasani i tagata ma tala i totonu o tusitusiga paia. Fesoasoani ia i latou ia iloa o mea o loo e aoao atu ai i latou, e maua mai i tusitusiga paia.

Pese: A e usuina pe taulotoina se fuaiupu i tamaiti, ia tauloto upu ma taga. O le a mafai ai ona faatumauina lo outou fevaaiai ma tamaiti ma faaali atu ia i latou lou matua fiafia i le gaoioiga.

Gaoioiga e Filifili Ai

Sauniuniga

• Mo le gaoioiga i papeti: Kopi ma oti ese ia faatagata o i le itulau 99 mo tamaiti taitoatasi ma faia se kopi faaopoopo mo oe. Faapipii pe kelu se laau i le patua o faatagata taitasi e fai ai ni papeti laau.

  coloring page, Adam and Eve, Noah, Moses

  Atamu ma Eva

  Noa

  Mose

Gaoioiga i Papeti

Ia valivali e tamaiti faatagata ua uma ona e otiina mai. A maea, uu i luga lau papeti o Atamu ma Eva ma valaaulia tamaiti e uu i luga a latou papeti. Fai atu i ai latou te fai mai “Atamu ma Eva.” Susu’e le Feagaiga Tuai ma fai i tamaiti ua ta’u mai e tusitusiga paia ia i tatou o Atamu ma Eva o uluai tagata i le lalolagi, sa nonofo i laua i le Faatoaga o Etena. Fai i tamaiti ia faafoliga o loo faasavavali a latou papeti i le faatoaga.

Adam and Eve puppet diagram

Uu i luga lau papeti o Noa ma valaaulia tamaiti e uu i luga a latou papeti. Fai atu i ai latou te fai mai “Noa.” Fai atu i ai o loo ta’u mai e tusitusiga paia ia i tatou na fausia e Noa se vaa ma ao mai i ai meaola i totonu o lona vaa. Ia faafoliga tamaiti o i latou o ni meaola.

Noah puppet diagram

Uu i luga lau papeti o Mose ma valaaulia tamaiti e uu i luga a latou papeti. Fai atu i ai latou te fai mai “Mose.” Fai atu i ai o loo ta’u mai e tusitusiga paia ia i tatou na tuuina mai e le Alii ia Mose tulafono e 10. Valaaulia tamaiti e uu i luga tamatamai lima e 10 a o e faitau e tau i le 10.

Moses puppet diagram

Fuaiupu o Gaoioiga

Tauloto le fuaiupu o gaoioiga lea ma valaaulia tamaiti tou te faia faatasi:

Aoao a’u i tusitusiga paia; (faafoliga o faitau tusitusiga paia)

E ta’u mai ai le upu moni. (faasino ia oe)

Aoao a’u e usitai i perofeta.

Aoao a’u i tusitusiga paia; (faafoliga o faitau tusitusiga paia)

Ia ou iloa le mea moni. (faasino ia oe)

Aoao a’u ia ou iloa le ala.

Motugaafa Faafaiaoga

Valivali: A o valivali tamaiti, faamatala ia i latou e uiga i tagata o i le ata. Faamalamalama atu o loo ta’u mai e tusitusiga paia ia i tatou tala moni e faatatau i nei tagata ma le toatele o isi tagata o e na usiusitai i le Tama Faalelagi.

Afai e te manao ai, e mafai ona e faatali e faatoa faapipii papeti laau a tamaiti pe a uma ona latou valivaliina ia ata. Pe mafai foi ona ave e tamaiti a latou ata i le fale e faapipii e o latou matua.

Fuaiupu o gaoioiga: E mafai ona e faaaogaina fuaiupu o gaoioiga i soo se taimi a o faia le vasega pepe, i soo se taimi e manaomia ai ona gaoioi solo tamaiti, pe a e manaomia foi ona faapisi o latou mafaufau. O se auala lelei foi lea e toe faamanatu ai aoaoga faavae na e aoaoina muamua.