17

O Le a Ou Faasoa Atu

Folasaga mo le Faiaoga

Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:

O soo moni o Iesu Keriso e iloa lava i taimi uma i lo latou naunau e faasoa atu i isi mea ua latou maua (tagai, mo se faataitaiga, Galuega 2:44–45; Mosaea 18:28; 4 Nifae 1:3). E ala i le faasoa atu o o tatou faamanuiaga ma i latou o i ai manaoga, ua tatou faailoa atu o nei faamanuiaga e mai le Atua, ma ua tatou faailoa atu lo tatou alofa mo Ana fanau uma lava.

Sauniuniga

Aumai se mea faitino faigofie e mafai ona e faaaogaina e faaali atu ai le agaga fetufaai (e mafai ona e faaaogaina se aitema mai le potu o le vasega pepe, e pei o se mea taalo po o se tusi).

Gaoioiga e Aoao Ai

Amata i se gaoioiga faapotopoto. Mo manatu, tagai i le itulau 3.

Tatalo

Valaaulia se tamaitiiti e faia le tatalo amata.

Pese

Usu pe fai atu upu o le tali o le pese “O Loo Ou Taumafai e Avea e Pei o Iesu” (Tusipese a Tamaiti, 40–41) ma fai taga o loo i lalo. Valaaulia tamaiti tou te faia faatasi

Ia fealofani e pei o Iesu. (fusi oe lava ma liliu mai lea itu i lea itu)

Agalelei i mea uma e fai. (luelue le ulu i luga ma lalo)

I ou mafaufauga ia agamalu, (fusi oe lava ma liliu mai lea itu i lea itu)

Ua aoao mai o Iesu. (luelue le ulu i luga ma lalo)

Ta’u atu i tamaiti e finagalo le Tama Faalelagi ia tatou agalelei atu le tasi i le isi. Faamalamalama atu a tatou faasoa atu, ua tatou agalelei atu.

Faataitaiga

Ta’u i tamaiti o le a e faataitaia le faasoa atu. Faaali atu ia i latou le auala e faasoa ai i le fai atu, “O le a ou faasoa atu” a o e tuuina atu i le isi taitai vasega le aitema na e aumaia. Faamamafa atu le fiafia e maua i le fetufaai. Valaaulia tamaiti e fai mai, “O le a ou faasoa atu.”

Ata

Faaali atu le ata muamua i le itulau 74. Faasino i le teine i le itu agavale ma ta’u i tamaiti o le teine lea e i ai lana pepe taalo e fiafia tele e taalo ai; ina ua sau lana uo la te taaalo, na fai atu le teine, “O le a ou faasoa atu ia oe la’u pepe taalo.” Faamamafa atu ua fiafia uma i laua. Valaaulia tamaiti e fai mai, “O le a ou faasoa atu.”

girls playing

Faaali atu le ata lona lua i le itulau 74. Tusi i le tamaitiiti i le itu taumatau ma ta’u i tamaiti o le tamaitiiti lea e fiafia tele e taalo i ana mea taalo; ina ua sau lana uo la te taaalo, na fai atu le tamaitiiti, “O le a ou faasoa atu ia te oe a’u mea taalo.” Faamalamalama atu o lea ua fiafia uma i laua. Valaaulia tamaiti e fai mai, “O le a ou faasoa atu.”

boys playing

Pese

Usu pe fai atu upu ia i le “Mea Malie e Fai” (Tusipese a Tamaiti, 129) a o e faafoliga e fetufaai ma tamaiti. Valaaulia tamaiti tou te faia faatasi

Faasoa atu e malie tele,

Malie tele malie tele!

Faasoa atu e malie tele,

Malie naua!

Faaiuga

Ta’u i tamaiti e uiga i le fiafia e te lagona pe a e faasoa atu. Faamalamalama atu e lagona foi e le Tama Faalelagi le fiafia pe a tatou fetufaai.

Tatalo

Valaaulia se tamaitiiti e faia le tatalo faaiu.

Motugaafa Faafaiaoga

O le faasoa atu e masani lava ona faigata mo tamaiti laiti. O le a latou aoao mai i au faataitaiga. I le taimi o le lesona ma le faagasologa o le vasega, faaali atu ia i latou auala e te fetufaai atu ai ona tuuina atu lea ia i latou le avanoa e faataitai ai. (Tagai O Le Aoao Atu, E Leai Se Isi Valaauga e Sili Ai, 177.) Afai e mumusu, tau lava o le toe faaali atu ia i latou, e aunoa ma le faamalosia o i latou e faasoa atu.

Gaoioiga e Filifili Ai

Sauniuniga

• Mo le gaoioiga e fai i le ata tusi: Kopi le ata tusi o i le itulau 75 mo tamaiti taitoatasi.

  coloring page, sharing cube

  O Le A Ou Faasoa Atu

  O le a ou faasoa atu le ataata.

  O le a ou faasoa atu tusi.

  O le a ou faasoa atu meaai.

  O le a ou faasoa atu mea taalo.

  O le a ou faasoa atu vali.

• Mo le taaloga i le poloka: Kopi ma oti ese ia ata tusi o i le itulau 75. Valivali pe a manao ai. Gagau i luga o laina togitogi, ma faapipii pe kelu pito e maua ai se poloka.

Ata tusi

Faaali atu le ata tusi o i le itulau 75 ma tuuina atu i tamaiti taitoatasi se kopi o le ata tusi. Tusi i le ata o le tama o loo ataata ma faamalamalama atu e mafai ona faasoa atu o tatou foliga ataata. Valaaulia tamaiti e faasino mai le tama ataata o loo i a latou kopi. Toe fai mo isi ata tusi.

Taaloga i le Poloka

Faataavale le poloka na e faia. Ia faia e tamaiti ni taga faigofie e o faatasi ma le ata o loo pito i luga o le poloka. Ona valaaulia lea o tamaiti tou te fai atu faatasi, “O le a ou faasoa atu a’u [ataata, meataalo, meaai, ma isi].” A pito i luga le itu lea e i ai na o upu “O le a ou faasoa atu”, ia patipati lima o tamaiti ma faapea atu, “O le a ou faasoa atu.” Toe fai seia tofu avanoa uma tamaiti e faataavale le poloka.

cube diagram

Fuaiupu o Gaoioiga

Tauloto le fuaiupu o gaoioiga lea ma valaaulia tamaiti tou te faia faatasi:

Ou te fia mulimuli ia Iesu,

Ia agalelei foi ma agamalu. (fusi oe lava)

Ou te faasoa atu foliga ataata; (faasino i le gutu ma ataata)

Ou te faasoa foi a’u meataalo. (faafoliga e faasoa atu se mea taalo)

Ou te fia faia Lona finagalo.

Motugaafa Faafaiaoga

Faia o kopi: Afai e le maua se avanoa i se masini kopi, e mafai ona e tuua se pepa lanutasi i luga o le ata tusi ae lolomi ata i se penitala po o se peni. Aua le popole i le tau lolomiina uma o vaega uma; tau lava ina lolomi le tino ma ni nai vaega ia lava e faailoa mai ai le ata tusi.

Taaloga i le poloka: Afai e toatele ni tamaiti i lau vasega pepe, atonu o le a e manao e faataavale lava e oe le poloka i taimi uma nai lo le feauauai i ai o tamaiti.

Fuaiupu o gaoioiga: E fiafia tele tamaiti i solo ma pese e i ai taga faigofie. E mafai ona e faaaogaina fuaiupu o gaoioiga ua faatagaina e le Ekalesia e fesoasoani i tamaiti e lagona ai le fiafia e auai, sauni mo le tatalo, aoao mataupu faavae o le talalelei, pe auai i le lesona.