Pag-ila sa mga Timailhan sa Pagpang-abuso

Adunay komon nga mga ilhanan nga bantayan kon sa unsang paagi ang pag-abuso magsugod ug magpadayon. Pinaagi sa pagsabut niini nga mga timailhan, mahimo natong mahibaloan asa kita mohimo og aksyon aron sa paglikay nga dili mahitabo ang pag-abuso o sa pag-undang niini kon nasugdan na kini.

Mga Kaparehas nga mga Sitwasyon sa Pagpang-abuso

Ang mga biktima kasagaran naabuso sa usa ka tawo nga ilang nailhan.

Ang nakasala mahimong usa ka sakop sa pamilya o paryente, sama sa usa ka ginikanan, apohan, iyaan, uyoan, ig-agaw, o igsoon, higala sa pamilya, o usa ka silingan. Ang nakasala mahimong bisan unsa ang pangidaron. Ang nakasala talagsa ra gayud nga usa ka estranghero.

Ang mga nakasala mahimong anam-anam nga makaangkon sa pagsalig sa biktima o sa ilang mga sakop sa pamilya sa dili pa mahitabo ang pag-abuso.

Mao kini ang gitawag og “pagpamustura.” Ang pagpamustura kasagaran mahitabo ngadto sa mga bata ug kabatan-onan. Ang pagpamustura mahitabo sa higayon kon ang usa ka tawo makighigala o mosulay sa paghimo og emosyonal nga kasuod sa usa ka tawo nga adunay intensyon sa pag-abuso niana nga tawo. Ang mga kinaiya sa pagpamustura maglakip sa mga paghangyo og oras nga mag-inusara, mag-awhag og pagsekreto, mag-istorya bahin sa sekswal nga hilisgutan, o pagpakita og pornograpiya o pagsugod og pisikal nga kontak uban sa usa ka bata. Ang mga nakasala maningkamot nga naay mga komunikasyon tali nilang duha o kontak. Ang pagpamustura mahimo usab nga mahitabo diha sa internet ug pinaagi sa mobile device sa usa ka bata.

Ang mga nakasala kasagaran magsugod pinaagi sa pagsupak sa mga utlanan.

Ang mga utlanan mao ang mga limitasyon sa usa ka tawo sa mga kinaiya o lengwahe nga sila naghunahuna nga okay o nga mobati sila nga luwas. Ang pag-abuso usa ka paglapas nianang utlanan sa usa ka tawo. Ang pag-abuso usahay mahitabo tungod kay walay utlanan sa eksakto nga kinaiya tali sa duha ka tawo. Ang nakasala mahimong mosugod pinaagi sa pagtamak sa mga utlanan sa ginagmay nga mga paagi aron ang usa ka tawo mobati nga mas komportable, dili makabantay, o maanad na sa dili angay nga kinaiya o lengwahe. Ang nakasala mahimo usab nga hingpit nga dili mohatag og pagtagad sa mga utlanan.

Ang mga nakasala kasagaran mangita niadtong kinsa dali ra kaayo nga mapahimuslan.

Ang mga nakasala kanunay nga mangita niadtong kinsa dali nga mabiktima (sama sa tigulang, tawo nga may kakulian sa panglawas, o mga bata nga nag-edad og 18 paubos). Sila mangita og mga tawo nga wala makaangkon sa abilidad o pagsabut sa paghatag og pagtugot. Mangita usab sila niadtong kinsa mahimong dili matuohan. Ang mga nakasala naningkamot usab sa pagpangita kinsa ilang gihunahuna nga dili mosukol o dili mosulti sa laing mga tawo mahitungod sa pag-abuso.

Ang mga nakasala kasagaran naningkamot nga ipalayo ang mga biktima gikan sa uban.

Ang mga nakasala kasagaran naningkamot nga ipalayo kadtong gipagpusturahan o giabusuhan sa pagsalig o pakig-istorya sa uban. Ilang ipalayo ang biktima aron siya dili na o dili mahibalo unsaon sa pagpangayo sa uban alang sa suporta ug tabang. Mahimong maghimo usab sila og mga hulga batok sa pamilya sa biktima o mogamit og pagbasol, pagpakaulaw, o pagpangilad aron mapadayon ang pag-abuso.

Ang pagsabut niini nga mga pagkapareha makatabang kaninyo sa pag-ila ug sa paglikay sa mga sitwasyon nga mosangput ngadto sa pagpang-abuso. Mahimo kang mobuhat og aksyon aron mapugngan ang pag-abuso sa dili pa kini mahitabo.

Mga Kapanguhaan sa Komunidad ug Simbahan

(Pipila sa mga kapanguhaan nga nalista sa ubos wala gimugna, gimintinar, o gikontrol sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbing dugang nga mga kapanguhaan, ang Simbahan wala mag-endorso og bisan unsang sulod nga wala mahisubay sa mga doktrina ug mga pagtulun-an niini.)

“What Is Domestic Violence?” The National Domestic Violence Hotline
“Grooming Behavior,” Monica Applewhite, director of Confianza, LLC
“Grooming,”Abuseandrelationships.org
“Grooming: What It Is, Signs and How to Protect Children,” National Society for the Prevention of Cruelty to Children
“Creating a Family Safety Plan,” parentsprotect.co.uk
“Learn More,” National Coalition Against Domestic Violence