era wavolita na rara ni kama na cauravou

iVakavuvuli—Na Cava

Tiko kei Ira.

“Ka sa yaco ni ra sa lako na tamata dauveiqaravi ka cakacaka ena nodra igu, ka sa cakacaka vata talega kei ira na Turaga ni were ni vaini.” (Jekope 5:72).

Na tikinayaga ka bulia na nona ivakadinadina e dua na cauravou sai koya na nona veimaliwai kei ira tale eso era sa yavutaki ena kosipeli. Na veimaliwai matadonu ena kedra maliwa na icaba, itubutubu, kei ira na iliuliu e bibi sara me vakatitobutaki na saumaki mai ni cauravou.

Na keba e vakarautaka na madigi me vakayagataki kina na gauna vakaibalebale kei ira na cauravou yadudua. Ni sa yaco mo kila na lomadra kei na gagadre ni cauravou, na nodra gunitoso kei na rere, na nodra taledi kei na malumalumu, era na kila ni ko kauwai. Ni ra sa kila ni ko kauwai tiko, na nomu idre ni veidusimaki ena rawa ni muataki ira vua na iVakabula.

Na tautuba e vakarautaka e dua na ituvaki yaga vei ira na cauravou mera veiucui kina kei na iVakabula ni ra cakacaka vata, rawata na cakacaka veibolei, veilasamaki, ka vulica mera qaravi ira na tani. Ni ko ni iliuliu ka dauveituberi ni kuoramu, sa rawa mo ni ivakaraitaki ni veiqaravi ni ko laveti ira cake na tani, vaqaqacotaka na veimaliwai ka vakatorocaketaka na veivakabauti vei ira na cauravou, ka dolele yani me okati ira kece. Era na vuli ena nodra sarava—ka qai cakava.

Sa nomuni na madigi cecere mo ni veiqaravi vei ira yadua na cauravou ena sala eso oqo:

• Ni bera na keba mo masulaki ira yadua na cauravou ka vakakina ena veisiga ni keba.

• Vakayagataka na gauna me yaco mo kilai ira yadudua na cauravou.

• Raica me ra okati na cauravou yadua ka vakila ni ra lomani, vakabibi o ira era kunedredre, sega ni tokoni, se sa tekivu mera lako sese.

• Cakava na cakacaka rawarawa ni lomavinaka kei na veiqaravi ka sureti ira na cauravou mera cakava vakakina.

• Vakavakarau mo wasea na nomu ivakadinadina ena veigauna eso ena ituvatuva tuvanaki.

era masu na cauravou

Semati Ira vata kei Lomalagi.

“A sa kaya kina vei Samuela ko Ilai, mo laki davo; ia kevaka sa kacivi iko ko koya, mo kaya, mo Ni vosamai, Jiova; ni sa vakarorogo na nomuni tamata. A sa lako ko Samuela, ka davo ena nona tikina.

“A sa lako mai ko Jiova, ka tu, ka kaci me vaka e liu, i Samuela, i Samuela. A sa kaya ko Samuela, mo Ni vosa mai; niu sa vakarorogo na Nomuni tamata” (1 Samuela 3:9–10).

Na keba e bulia na madigi duatani ka tudei me semati ira na cauravou vata kei na Tamadra Vakalomalagi. Era na tuvanaka ena veisiga na iliuliu kei na dauveituberi ni kuoramu ena nodra taroga, “Na madigi cava eda na cakava mera rawata kina na cauravou yadua na nona vakadinadina vakayalo vakai koya ga?” E dua na inaki taumada ni keba o ya mera vukei na cauravou yadua mera saumaki mai ki na kosipeli i Jisu Karisito ka bulataka na kena ivakavuvuli. Na cauravou yadua e dodonu mera lesu mai na keba ka kila vakavinaka cake na ivurevure ni veidusimaki vakayalo ka vakayago.

Ni o tuvanaka na veika mo vakavulica ena keba, vakasamataka na kilaka kei na kilamaqosa ka na vukei ira yadua na cauravou mera vakayacora na nona itavi ni matabete ka vakarautaki koya me dua na daukaulotu gugumatua, dua na tagane vakawati yalodina, ka tama dauloloma. Vakarautaka na madigi veiraurau mera qaravi ira kina na tani ka mera tubu cake vakayalo, veimaliwai, vakayago, kei na vakasama (raica na Luke 2:52). Vakasamataka talega na itaviqaravi e vakabibitaka na itovo savasava kei na ivakarau buladodonu ni vulici ni ivolanikalou e veisiga, masumasu yadudua, veivutuni, talairawarawa, kei na rokovi ni Siga ni Vakacecegu.

O ira na cauravou era ciqociqo vakalevu cake mai na veivosaki vakosipeli mai na nodra rogoca na ivakavuvuli me baleta na kosipeli. Vakayagataka na veimadigi yadua mo laivi ira kina na cauravou mera wasea na nodra veikasotavi. Na keba e rawa ni solia na madigi vinaka ni veitalanoa ka rawa ni semati ira na cauravou ki lomalagi.

era vakaivava ni waicevata na cauravou

Laiva Mera Veiliutaki.

“Ia, sa kilikili ki na tamata yadua me vulica na nona itavi; io me vakayacora ena yalodina na itavi ni ilesilesi sa lesi kina” (Vunau kei na Veiyalayalati 107:99).

Me vaka na tamata kecega, era diva na cauravou mera vakila ni ra gadrevi. Era na gadreva mera vakila na nomuni veivakabauti ka soli vei ira na ilesilesi vakaibalebale. O ira na cauravou era vakawaleni ena nodra ilesilesi ni matabete era na rawa ni luvuci mai na veika vakavuravura.

Era na tauyavutaka na cauravou na kilamaqosa ni veiliutaki ni ra tuvanaka ka liutaka na keba. Sa rawa vei ira na dauveituberi mera vukei ira na cauravou mera vulica na veiliutaki ena nodra veitokoni kei na veidusimaki ni ra tuvanaka na keba na mataveiliutaki ni kuoramu. Vukei ira mera vulica na sala mera:

• Veiqaravi.

• Vakatavuvuli.

• Veilesi.

• Veitaratara ena veikanamaki.

• Vakamuria na Veiilesilesi

Vakasamataka na veika ea tukuna o Elder Jeffrey R. Holland: “Eda dau vakawalena na nodra gumatua ka dau vakalevulevuya na nodra veikasotavi” (“E Rawa ni O Veivakavulici ena iVakarau ni iVakabula” [soqoni ni veituberi ni veiliutaki e vuravura raraba, 5 ni Nove., 2016], broadcasts.ChurchofJesusChrist.org).

Me ikuri ki na mataveiliutaki ni kuoramu, sa rawa mera lesi eso tale na cauravou mera vakaitavi ena so na ituvaki ni keba. Era na veivuke ena veitokoni, veivakavulici, ka dusimaki ira na cauravou o ira na dauveituberi ni kuoramu mera gugumatua kina ena nodra vakayacora na nodra ilesilesi me rawa ni ra vulica na itabagone taucoko na veiliutaki.

Era na veivosaki na iliuliu ni kuoramu vata kei na matabisopi kei na dauveituberi ni kuoramu ni ra tuvanaka, cakava, ka dikeva na keba. Era lesia na ilesilesi vei ira tale eso na cauravou ena kuoramu.

Mera vorata na dauveituberi na uqe me suguta na itavi ka nodra na cauravou.