“iVurevure,” iDusidusi ni Keba ni Kuoramu ni Matabete i Eroni (2019)

“iVurevure,” iDusidusi ni Keba ni Kuoramu ni Matabete i Eroni

iVakatakilakila

era veivosaki na cauravou kei ira na iliuliu

iVurevure

iTavi ni iTubutubu ena Tabanalevu kei na iLiuliu ena iTeki

iLiuliu ena Tabanalevu

Me vaka ni ratou mataveiliutaki ni Matabete i Eroni ena tabanalevu, me ratou wanonova na bisopi kei rau na nona daunivakasala na cakacaka ni kuoramu. Eratou na vakaraica ka vaqaqacotaki ira na cauravou yadudua ni ratou cakacaka vata tiko vakavoleka kei ira na itubutubu kei ira na veiliutaki tale eso. (Raica na iVoladusidusi Raraba: Veiqaravi ena Lotu i Jisu Karisito ni Yalododonu Edaidai 10.3, ChurchofJesusChrist.org.)

Eratou vakadonuya na matabisopi na ituvatuva taucoko ni keba ni tabanalevu. Mera na vakalewena na iliuliu ni kuoramu, daunivakasala, kei ira na kenadau na iTuvatuva ni Veika e yaco kei na iTaviqaravi ka veivosaki kei na matabisopi me baleta na inaki, takete, vanua ni itaviqaravi, veika matailalai, kei na ituvatuva ni keba.

Mera na vakadonuya talega na matabisopi na ituvatuva ni ilavo kei na veitaqomaki kei na veimaroroi ni keba, ka oka kina na nodra digitaki na iliuliu uabula veiganiti kei na vakatulewataki ni ivakatagedegede ni keba me baleta na itovo kei na isulusulu. Sa rawa talega vei iratou na matabisopi me ratou sureti ira na turaga mai na tabanalevu, oka kina na tamadra na cauravou, me ra veivuke ena kena tokoni na keba ni kuoramu ni Matabete i Eroni.

Veiliutaki ena iTeki

Era na vakadonuya na iliuliu ni matabete ena iteki na ituvatuva taucoko ni keba ni Matabete i Eroni ena iteki. Na komiti ni Matabete i Eroni ena iteki kei na komiti ni Matabete i Eroni–Goneyalewa ena rawa ni veivuke ena kena tuvai na itaviqaravi oqo (raica na iVoladusidusi Raraba, 29.3.9).

Mera na oka na cauravou mai na iteki ena kena tuvai ka liutaki na keba ni iteki ena gauna ga e rawa kina. E rawa vei ira na iliuliu ni matabete ena iteki mera sureti ira na turaga mai na iteki, oka kina na tamadra na cauravou, me ra veivuke ena kena tuvai ka tokoni na keba ni Matabete i Eroni ena iteki.

iVakatakilakila

era wavolita na rara ni vakamakama na cauravou

Vakadikevi ni Keba

Na dikevi ni keba sa ka bibi sara ki na kena vinaka cake mai muri. Mera na sota na veiliutaki kei na daunivakasala ni kuoramu ni sa cava na keba me ra dikeva na itaviqaravi ni keba. Me vakanamata na vakadidike oqo ena kena rawati na inaki ni keba kei na sala me vakavinakataki kina na ituvaki ni veikasotavi mai muri.

Nanuma na taro eso oqo ena gauna ni vakadidike:

Era a vakila beka na cauravou na Yalo? Evei? Ena gauna cava?
Ea vakayacori beka na itaviqaravi ena sala ea tuvanaki kina? Cava na vuna se cava me sega kina?
Na cava ea rawa ni vinaka cake?
E tiko beka eso na leqa e gadrevi meda walia?
Era sa rawata li na cauravou na nodra takete? Cava na vuna se cava e sega kina?
Na cava e sa yaco ki na nodra bula na cauravou ena vuku ni keba?
Na cava e rawa ni da cakava meda tomana tikoga kina na tarai cake ni veikasotavi ea noda?

Nanuma mo sureti ira na lewe ni kuoramu mera vakasamataka lesu na veikasotavi. Vakayaloqaqataki ira mera wasea na veika era sa vulica ki na nodra matavuvale kei na itokani. Mai na itaviqaravi ni itabagone, sa rawa mo tomana tiko na kilamaqosa era sa vulica na cauravou mai na keba. Sa rawa mo veivosakitaka talega na ivunau ea vakavulici ena keba ki na soqoni ni kuoramu ni Sigatabu. Kevaka ea gumatua sara na itaviqaravi, navuca mo wasea vei ira tale eso.

Vakayagataka na veika o sa vulica ena nomu vakadidike mo vakavinakataka kina na keba ka tarava.

iVakatakilakila

keba ni sasamaki ni cauravou

Komiti ni Matakeba ni Matabete ena iTeki

E dau tuvanaki na matakeba ni Matabete i Eroni ni iTeki ena veidusimaki ni mataveiliutaki ni iteki ka cicivaki mai na mataveiliutaki ni Cauravou ena iteki se so tale era sa kacivi mera veivuke kina.

Na matakeba ni matabete e rawa ni keba siga dua, se keba sigavaka, se keba ni vica na siga ka rawa ni vakayacani vaka ivolanikalou, me vaka na keba nei Ilamani, na keba kei Saioni, kei na so tale.

Vakadeitaka ni ra na liutaka, tuvanaka, ka dusimaka na matakeba ni matabete na cauravou. Ni oti na veitaratara kei ira na Vitusagavulu ni iWasewase, e rawa ni tiko talega e vica na iteki me cokovata ki na dua na matakeba. Okata me veiraurau na veika vakayalo, veimaliwai, vakayago, vakasama, kei na itaviqaravi ni veiqaravi ena matakeba oqo.

Me ivakaraitaki:

Na itaviqaravi vakayalo e rawa me oka kina na vuli ivolanikalou, vuli mai na Vunautaka na Noqu Kosipeli, na cavuqaqataki ni ivolanikalou, veivosaki vakailawalawa, soqoni irara, soqoni ni ivakadinadina, se madigi ni veivakavulici vei ira na cauravou.
Na itaviqaravi ni vakavure vakasama e rawa ni oka kina na veivuke taumada ni bula, iwalewale ni qara na bula, kila na teitei, buki dali, se so tale na kilamaqosa.
Na itaviqaravi vakayago e rawa ni oka kina na qalo, qito, kaba, dakai titi, se so tale na soqo era na malele kina na cauravou.
Na itaviqaravi ni veimaliwai e rawa ni oka kina na vulici ni tataqomaki ena monalivaliva, veituberi ni veiliutaki, cakacaka ni yalovinaka sega ni namaki, se na kilamaqosa ni veitaratara.
Na itavi ni veiqaravi e rawa ni oka kina na ukutaki ni vanua ni keba se itikotiko, vakarautaki ni yaya ni vukei ni kawatamata, se vulici ni kilamaqosa me vakayagataki ena nodra qaravi na tani.

Sa rawa me lesi na tabanalevu yadua me tuvanaka ka raibaleta e vica na itaviqaravi. Digitaka e dua na vanua ni keba se itikotiko e rawa ni ciqoma na mataqali itaviqaravi e sa tuvanaki. Na gauna ni veitawasei e rawa ni solia na madigi vei ira na bisopi me ra veimaliwai kei ira na cauravou mai na nodra dui tabanalevu.

Vakatulewataka na Takete ni Matakeba

Ni ko veivosaki kei ira na iliuliu ni itabagone ka digitaka na lalawa ni nomu keba, ena masumasu mo tarogi iko vakaoqo: “Na cava e vinakata na Tamada Vakalomalagi me yaco ki na nodra bula na cauravou ena vuku ni matakeba oqo?” Na kena isau e dodonu me nomu lalawa talega ka me dua na idusidusi ki na vakatulewa tale eso.

Na matakeba ni matabete sa ikoya me vukei ira na cauravou mera tara cake na nodra ivakadinadina kaukauwa ni Turaga o Jisu Karisito ka vakalevulevuya na nodra itavi vakamatabete. E dodonu mo vakarautaka na madigi veirauti me qaravi ira kina na tamata ka vakatorocaketaka na bula vakayalo, veimaliwai, vakayago, kei na vakasama (raica na Luke 2:52; IVoladusidusi Raraba, 10.2.1.3; 20.2.6).

Vakaraica na sala eso mo vakaitavitaki ira kece kina na cauravou ena itavi kei na ilesilesi ni matakeba (raica na iVoladusidusi Raraba, 4.2.6).

Vaqara na veimadigi vakaibalebale ena tara cake na veiwekani kei na duavata. Na cauravou yadua e dodonu me vakila ni gadrevi ka yaga sara.

Na inaki ni nomu matakeba e rawa ni vakauqeti ena:

iToko ni kuoramu ni Matabete i Eroni
iTavi kei na ilesilesi ni matabete.
iToko vakayabaki ni itabagone.
Dua na ivolanikalou.
Dua na itukutuku ni parofita se iapositolo.
Na ivolalailai Me iSakisaki ni iTabagone .
Na parokaramu ni Gonelalai kei na iTabagone

iTaviqaravi ni Vakavakarau

Na itaviqaravi ni keba e rawa ni tekivu ni bera ni kemuni biubiu. Vakananuma me tuvanaki na itaviqaravi ena laveta cake na vakavakarau, tosoya cake na vuli, ka tara cake na nanamaki ki na keba.

Sa rawa mo:

Vakayacora e dua na itaviqaravi ni vakavakarau me baleti ira na cauravou kei na nodra matavuvale ka ra wasea kina na iliuliu ni kuoramu na itoko kei na matailalai ni keba.
Vakarautaka e dua na itaviqaravi me tuvai ka cokonaki kina na nomu keba.
Cakava e dua na ivolanikana me baleta na keba e tiko ena nomu ilavotuvai ka okati kina na kakana bulabula.
Vulica na sala me taqomaki kina na vanua, me vaka na qarauni ni benu, taqomaki ni ivurevure ni wai, kei na maroroi ni yaubula. Biuta na vanua ni keba me savasava cake mai na nomu a kunea.
Vakatovotovotaka na vakayagataki ni iyaya ni keba kei na vakasaqa e tautuba.
Vulica na iwalewale ni bula ena lekutu.
Cakava e dua na ituvatuva ni vakaukauwa yago ena vukei iko mo vakavakarau vakayago ki na keba. Oqo e rawa ni oka kina na itaviqaravi eso me vaka na taubale, vodo basikeli, se so tale na itaviqaravi ni vakaukauwa yago.

iVakatakilakila

cauravou e vadretitaka tiko e dua tale na cauravou

Vakavakarau ki na Tataqomaki ni Leqa Tubukoso

Dua vei ira na nomu ilesilesi bibi ena keba oya mo maroroi ira na cauravou ena nodra taqomaki vakayalo, buladodonu, ituvaki ni lomadra, ka vakayago. Na itovo kei na veimaliwai taucoko e dodonu me salavata kei na ivakatagedegede ni Lotu (raica na Me iSakisaki ni iTabagone kei na nodratou ivola vakayabaki na Mataveiliutaki Taumada me baleta na tataqomaki) kei na bulataka na itovo va-Karisito.

Me kuria, sa rawa mera tuva na iliuliu e dua na ivakatagedegede kei na idusidusi ni keba me vakadeitaka na taqomaki ka tauyavutaka e dua na draki e gadrevi me yaco kina na lalawa ni keba. E dodonu mera kilamatata tiko na itabagone ni vakaitavi e sega ni dua na dodonu ia e dua na galala ka rawa ni kaulaivi kevaka era ivukivuki baleca se ra yaco me vunileqa vei ira ga se o ira tale eso. Sa dodonu mera vakaraitaka na iliuliu kei na veituberi nanamaki eso oqo kivei ira na itubutubu kei ira na vakaitavi, ka dodonu mera veivosaki vata ena sala me na wali kina na kauwai ena rawa ni tubu mai.

Sa gadrevi e dua na iwiliwili veirauti ni iliuliu uabula mera tiko ena keba yadudua. Sa dodonu me na dau tiko ke lailai e rua na iliuliu uabula ena itaviqaravi yadua. Ena gadrevi beka na ikuri ni iliuliu uabula ena itaviqaravi levu cake. O ira kece na iliuliu e dodonu mera levea na ituvaki ni tiko taurua kei na dua na itabagone vakavo ga ke ra voleka tu e matadra na iliuliu uabula.

Ni tuvanaki e dua na itaviqaravi ni keba, mo nanuma tiko ni nodra taqomaki na tamata yadua sa ka yaga sara vakalevu me dua mada ga na iliuliu uabula e qaseta na itaviqaravi o ya.

Me ripotetaki vakatotolo vei ira na iliuliu ni matabete na vakacalaka se mavoa bibi cavaga ena gadrevi kina na veiqaravi bibi cake mai na veiqaravi taumada. Sa vakayaloqaqataki o ira kece na tiko ena keba, vakabibi o ira na qase veiliutaki, mera qaqarauni ki na ivakatakilakila cavaga ni veivakacacani kei na veivakawaleni. O ira ka sa kila rawa na vakacacani ni bula vakayago, veidauci, se vakasama mera ripotetaka na kena macala ki na tabana vakalawa e veiganiti kaya ka veitaratara vakatotolo kei na bisopi.

Sa dodonu mera vakavakarau vakayago na cauravou kei na iliuliu ki na cakacaka ni keba. Vakalailaitaka na leqa ena kena vakamuri na ivakaro ni vanua kei na lawa ni nomu vanua. Vakadeitaka me dau tiko na sala ni veilakoyaki kei na veitaratara ena veigauna kece sara. Ke rawa, sureta e dua na nasi, vuniwai, se so na kenadau ni veiqaravi taumada mera tiko ena keba. Kauta mai na veiyaya ni veiqaravi taumada. Maroroya voleka e dua na ivola ni itikotiko kei na naba ni talevoni ni nodra itubutubu se dauniveisusu yadudua na cauravou, na valenibula voleka eso, kei na veitaratara ni leqa tubukoso, me vaka na veiqaravi vakalawa, daubokobuka, se veiqaravi ni lori ni bula.

Ni bera na keba, sikovi ira na itubutubu ni cauravou mo kila kina na kedra ituvaki duidui na cauravou yadua—oka kina na gagadre ni kakana, veiqaravi vakavuniwai, kei na gagadre ni lomadra. Wanonova matua tiko na nodra itovo na itabagone ka veitarovi ke sa gadrevi. Na veivakatotogani, qitoduka, kei na so tale na veivosaki kei na itovo lomaca, tawasavasava, se veibeci ena sega ni vakatarai. Kilamatata ka ciqoma na ilesilesi ni kena tuvai na nodra taqomaki kei na bula-vinaka na itabagone o qarava tiko. Raica, veivosakitaka, ka vakarautaka na sala eso me vakalailaitaki kina na vunileqa ena keba. Raicalesu na iwasewase ni iVoladusidusi Raraba era volai toka e ra, nodratou ivola na Mataveiliutaki Taumada baleta na tataqomaki, idusidusi tataqomaki ni itabagone, kei na safety.ChurchofJesusChrist.org me baleta na itukutuku tale eso.

Sa dodonu mera tuvatuvaka vakavinaka sara na iliuliu uabula kei na itabagone me veiganiti kina na keba taucoko kei na lawatu ni Lotu. Vulica na idusidusi ena safety.ChurchofJesusChrist.org kei na iwasewase oqo ni iVoladusidusi Raraba:

iVakatakilakila

wili ivolanikalou na cauravou

Tukutuku ka Okati Ira na iTubutubu

Na veika sa vulica ena keba e dua na cauravou e dodonu me vaqaqacotaki koya ka vakalougatataka na nona matavuvale. Ni o vakavakarau ki na keba, sa rawa mo sureti ira na itubutubu mera wasea na gagadre vakayalo kei na inuinui e tu vei ira me baleta na luvedra tagane. Kila na nodra vakasama me baleta na itaviqaravi kei na kilamaqosa ena yaga ki na nodra matavuvale. Era rawa ni cau talega mai eso na itubutubu era kenadau ka kilamaqosa me veiwasei. Tukuna vei ira na itubutubu na tikinisiga, vanua, isau vakailavo, itoko, kei na itaviqaravi eso baleta na keba. Tukuna vei ira na itubutubu kei ira na cauravou na ivakatagedegede ni isulusulu kei na itovo e lavaki (raica na 1 Timoci 4:12

Ni se bera na keba, kerea e dua na itubutubu se dauniveisusu vei ira na vakaitavi yadua mera vakalewena ka solia lesu mai e dua na fomu ni Veivakadonui ni iTubutubu se Dauniveisusu ki na Veiqaravi Vakavuniwai. Na fomu e rawa ni kune ena safety.ChurchofJesusChrist.org. E dodonu mo vakarautaka na matailalai ni itukutuku me baleta na keba kei na itaviqaravi eso me rawa vei ira na itubutubu mera solia na veivakadonui ena veika era sa kila tu mera laki vakaitavi kina na luvedra tagane. (Raica na iVoladusidusi Raraba, 20.6.13.)

iVakatakilakila

vakasaqa tiko na cauravou

Vakasama me Baleta na iTaviqaravi ni Keba

Na itaviqaravi vakayalo, veimaliwai, vakayago, kei na vakasama mo navuca ni o tuvanaka na keba:

Vakayalo

Vakayagataki ni itukutuku raraba me iyaya ni kaulotu
Lolo ni tabana ni veimaliwai raraba.
Taro ni iVola i Momani
Qito ni ivakatagedegede
Lotu ena irara
Lotu ena mataka
Soqoni ni ivakadinadina
Vakavakarau ki na kaulotu
Itovo ni veisiga

Veimaliwai

Veimaliwai vakamatavuvale
Veitaratara kei ira tale eso
Tataqomaki ena monalivaliva
Cakacaka ni veiqaravi
Vakayacora na veicakacaka rawarawa ni lomavinaka kei na veiqaravi
Vuli ni veiliutaki

Veika vakayago

Caqe polo
Kaba baranivatu kei na sirodali
Vodo basikeli e ulunivanua
Tolunaqito
iLakolako vakaosoti
Bolebole veikolo
Veitavi
Soka
Qito e wai
Qalo
Vodo bavelo
Voce
Vodo bilibili ena waikui
Vakatasosoko ena waqa lalai
Taubale
Taubale drekeiyaya
50-maile (80-km) taubale drekeiyaya
Vakadidike painia
Keba ni basikeli
Qito ni vulaibatabata
Nunu delaniwai.
Siwa
iVavawaicevata
Keba ni vulaibatabata

Ka ni vakasama

Kilayaga ni kaivanualala
Kilayaga ni gutanabula e tautuba
Vakamatautaki
Ta kau
Vavavi ena ovani vaka-Daji.
Udrevi buka
Buki dali
Tataqomaki ena kama
Veivakabulai
Gutanabula ena leqa tubukoso
Maroroi ni tautuba
Vakadidike ni teitei
Vaqaqara ena misini
Kunesala e wai
Veitaba e tautuba
Cula leca
Ceu kau
Vakasaqa e tautuba
Gutanabula ena lekutu
Vana takete
Veivuke taumada

Na ikuri ni vakasama ni itaviqaravi e rawa ni kune ena ChurchofJesusChrist.org/youth/activities. Na vakasama era vakabibitaki tiko ena iwasewase oqo e tiko na kedra ivola ni itaviqaravi ena mata ni iTaviqaravi ni iTabagone.