Mati

O Iesu Keriso O Lo Tatou Faaola

“Ia outou faalogo mai i nei upu. Faauta, o A’u o Iesu Keriso, o le Faaola o le lalolagi” (MF&F 43:34).

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga.Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: Sa aoao mai e Iesu Keriso le talalelei ma faatulagaina se faataitaiga mo i tatou.

Faailoa atu le aoaoga faavae (usuina o se pese): Usu faatasi mo ni taimi le pese “Do As I’m Doing” (CS, 276), ma valaaulia ni tamaiti eseese e filifili se taga e fai. Faamalamalama atu afai tatou te mulimuli i taga a isi tagata, ua tatou mulimuli i ana faataitaiga. Fesili atu po o ai na faatulagaina le faataitaiga sa’o atoatoa mo i tatou e mulimuli ai (Iesu Keriso). Valaaulia ia tamaiti e fai faatasi mai, “O Iesu Keriso na faatulagaina se faataitaiga mo i tatou.”

Uunaia le [agaga] malamalama (faitauina o tusitusiga paia): Tuu ata nei o mea na tutupu i luga o le laupapa: O Keriso o loo papatiso, o Keriso faatasi ma tamaiti, o Keriso o loo tatalo, ma le o Keriso o loo aoao atu. Faitau faatasi se tasi o mau nei, ma fai atu i tamaiti e faamatala mai po o le a le mea o loo aoao atu e Keriso i lena mau: Mareko 16:15; Ioane 13:34–35; 3 Nifae 11:37; 3 Nifae 18:19. Tusi atu faagesegese lou lima i ata taitasi ma valaaulia ia tamaiti e tutu pe a e tusi i le ata ua sili ona faailoa mai ai Keriso lea o loo faia mea na Ia aoaoina i tatou e fai i totonu o le mau na e faitauina. Toe fai mo isi mau o loo totoe.

E sili atu le migao o tamaiti pe a faaaofiaina i latou i le aoaoina. O le gaoioiga lenei, o le fai atu i tamaiti e tutu ma nonofo i lalo ma le migao o le a fesoasoani e faatosina mai ai o latou mafaufau.

Uunaia le faaaogaaga (tusi se ata): Tuu atu i tamaiti taitasi se fasi pepa, ma fai i ai e tusi sona lava ata o loo mulimuli i faataitaiga a Keriso. Mo se faataitaiga, e mafai e se tamaitiiti ona tusi sona lava ata o loo papatiso, aoao atu le talalelei i se uo, pe o fesoasoani i se isi tagata. Valaaulia ni nai tamaiti e faasoa atu i isi tamaiti a latou ata, ma uunaia i latou e faasoa atu a latou ata i o latou aiga.

Vaiaso 2: Ona o le Togiola a Keriso, ua mafai ai ona ou salamo ma toe nonofo faatasi ma le Atua.

Faailoa atu le aoaoga faavae (faatumu ia avanoa): A o le’i amataina le Peraimeri, tusi i luga o le laupapa, “Ona o le _______ a Keriso, ua mafai ona ou ______ ma toe nonofo faatasi ma le _____ .” Tusi ia upu Togiola, salamo, ma le Atua i ni uputusi eseese ma faapipii i lalo o ni nofoa se tolu i totonu o le potu. Fai atu i tamaiti e sue ia uputusi ma faapipii i luga o le laupapa i o latou tulaga sao. Faitau faatasi le fuaiupu.

Uunaia le [agaga] malamalama (faitauina o tusitusiga paia ma le taliina o fesili): Faapipii i luga o le laupapa ata o Keriso i Ketesemane ma le Faasatauroga. Ufiufi ia ata i ni tamai fasi pepa se tele. Tusi i luga o fasi pepa taitasi se fesili e uiga i le mea na tupu i ata ma se mau faasino mai le Mataio 26–27 po o le Luka 22–23 lea e mafai ona maua ai le tali. (Mo se faataitaiga: O le a le igoa o le nofoaga lea sa alu i ai Iesu e tatalo? Mataio 26:36.) Vaevae tamaiti i ni vaega, ma fai atu i vaega taitasi e sue se mau se tasi ma saili le tali o le fesili. Tuu atu i vaega e faasoa mai tali o a latou fesili ma aveese ia fasi pepa ia e faatatau i ai ina ia iloa atu ata.

Ina ia fetuunai gaoioiga o le faitauina o mau mo tamaiti laiti, fai atu ia i latou e faalogo ao e faitau, ona tutu lea i luga pe a latou faalogo i se upu po o se fasi fuaitau faapitoa.

Uunaia le faaaogaaga (vaaia o se lesona faatino): Talatalanoa ma tamaiti i uiga o upu Togiola ma le salamo, ma faamatala pe faapefea ona faamanuiaina i tatou e le Togiola (tagai i le Faamaoni i le Faatuatua: O Se Tusitaiala o le Talalelei [2004], 180–87, 146–50). Faaali atu i tamaiti se meaalofa. Fai atu i se tamaitiiti e taumafai e avatu le meaalofa i se isi tamaitiiti, ma fai atu i le tamaitiiti lona lua e tetee e aua nei ona ia taliaina. Faamatala atu afai tatou te le mauaina se meaalofa ua tuuina mai ia i tatou, e le mafai ona tatou fiafia i faamanuiaga o le meaalofa. Tuu atu i tamaiti e faalogo i mea e tatau ona latou faia e maua ai le meaalofa o le Togiola ao tou faitauina faatasi le Mataupu Faavae ma Feagaiga 19:16.

Vaiaso 3: Ona ua toetu Iesu, o le a faapena foi a’u.

Faailoa atu le aoaoga faavae (faalogologo i se tala): Faaaoga le ata mai le itulau 123 o le tusi lesona a le vasega pepe (tagai i faatonuga i le itulau 121) e faamatala ai le tala o le Toetu (tagai i le Ioane 19:41–42; 20:1, 11–18). Faamatala atu ina ua toetu Iesu Keriso, sa toe tuufaatasia Lona tino ma le agaga; o lenei mea ua mafai ai ona toetutu tagata uma. Fai i tamaiti e fai mai, “Ona sa toetu Iesu, o le a faapena foi a’u.”

Uunaia le [agaga] malamalama (talatalanoa i lagona): Lisi i luga o le laupapa ia upu e faamatala ai ni lagona atonu na i ai i le au soo i le aso na maliu ai Iesu (e pei o le tiga, faavauvau, faanoanoa, ma le leai o se faamoemoe). Fai atu i tamaiti e fautua mai ni upu faafeagai o na upu (e pei o le fiafia, olioli, faamoemoe, ma le faatuatua), ma tusi i luga o le laupapa. Faamatala atu o lagona ia o le au soo i le taimi na toetu ai Iesu. Talanoa i nisi o faamanuiaga e oo mai i le iloaina o le a tatou toe tutu (tagai i le Isaia 25:8; Alema 22:14).

Uunaia le faaaogaaga (fetufaai ia lagona): Tusi i luga o le laupapa, “Ou te faafetai na toetu mai Iesu aua …” Valaaulia se tagata o le uarota ua maliu se tasi e pele ia te ia e sau i le Peraimeri ma faasoa faapuupuu mai pe aisea e faafetai ai mo le Toetu. Fai atu i tamaiti pe latou te iloa se tasi ua maliu, ma valaaulia i latou e moeiini o latou mata ma mafaufau i lena tagata. Valaaulia nisi o tamaiti e tutu i luga ma faauma mai le fuaiupu o loo i luga o le laupapa ma faasoa mai po o le a le uiga o le Toetu ia i latou.

Vaiaso 4: O Iesu Keriso o lo tatou Faaola.

Faailoa atu le aoaoga faavae (talatalanoa i le upu “Faaola”): Faaali atu ni mea faitino po o ni ata e sui i tagata o e ono faasaoina o tatou olaga (e pei o se fomai, se leoleo, po o se leoleo laveai i le vai po o le sami), ma talanoa pe faapefea ona latou faasaoina i tatou. Faaali atu se ata o Iesu, ma faamatala atu ua na o Ia lava e toatasi e i ai le mana e faasaoina ai i tatou mai le taunuuga e faavavau o le oti ma le agasala. Tusi i luga o le laupapa, “O Iesu Keriso o lo tatou Faaola,” ma faitau faatasi ma tamaiti, ma tuu le faamamafa i le upu “Faaola.”

Uunaia le [agaga] malamalama ma le faaaogaaga (faalogologo i ni tala faatusipaia): Faamatala atu i tamaiti nisi o tala faatusipaia e faatatau i tagata o e na faasaoina mai le agasala e le Faaola (mo se faataitaiga, Alema le Itiiti [tagai i le Alema 36:6–24], Enosa [tagai i le Enosa 1:1–8], Seseroma [tagai i le Alema 15:3-12], tama o Lamonae [tagai i le Alema 22:1–26], po o le tagata na aumai ia Iesu [tagai i le Luka 5:17–26]). Faamatala atu o le a faasaoina i tatou uma mai le agasala e ala i le Togiola a Iesu Keriso. Molimau atu o Iesu Keriso o lo tatou Faaola, ma valaaulia ni nai tamaiti e tuu atu a latou molimau e uiga ia te Ia.