Mukenji wa ku Ngondu Bua Dikankamika dia Bansonga, Ngondu wa Muanda Mukulu 2025
Tshidi Nzambi Kayi Muikala
Malela 5 adi atangila Tatu wetu wa mu Diûlu
Tudi mua kulonga bia bungi pa tshidi Nzambi muikala patudi tumvua tshidiyi kayi muikala.
Bimfuanyi bia kudi Camila Gray
Dimua dia ku mabenesha manena a Dipinguluja didi ne Nzambi udi ubuluidibua yeya nkayenda ne buikadianganyi buenda bua Tatu wa mu Diûlu. Kadi misangu mikuabu tutu ne meji anyi ngenyi pa Nzambi idi mikala kayiyi milelela. Padibi bifika nunku, tudi mua kulonga bia bungi pa tshidi Nzambi muikala ku diumvua tshidiyi kayi muikala.
Nzambi kena muntu wa kua tshianana musomba mu nkuasa wa butumbi, kula bikola.
Udi Tatu wetu, muimpa bikola mutamba tatu muimpa wa pa buloba uwudi mua kuela meji. Nansha mutudi katuyi mua kuvuluka moyo wetu nenda kumpala kua kuledibua, mmutumanya umua ne umua bimpa. Udi ne mubidi muakana wa misunyi ne mifuba, ne tudi mu tshimfuanyi tshienda.
Pawudi ne lutatu bua kuenza tshifuanyi tshia bu mudi Nzambi mua kuikala, kudi tshilejelu tshilelela: Muanenda, Yezu Kilisto. Kilisto wakamba, “Ndi njila, bulelela, ne moyo: muntu kena mua kulua kudi Tatu, kayi mupitshile kundi. Bu nuenu bammanye, nuvua mua kumanya kabidi Tatu wanyi ” (Yone 14:6–7). Mu miaku mikuabu, tuetu basue kumanya munyi mudi Tatu wa mu Diûlu muikala, tudi mua kulonga mudi Yezu Kilisto muikila. Badi bikala bakana benza tshintu tshimua mu kipatshila.
Nzambi kena muntu udi ne malu abungi akuenza a mushinga makupita.
Nanku, dikuambuluisha bua upeta moyo wa tshiendelela didi mudimu wenda ne butumbi buenda. Udi #1 nshindamenu wenda! Kena muedibua mikalu kudi diba bu tuetu nansha. Mulomba diba dionsu mu disambila. Pashisha teleja mishindu ya bungi idiyi wandamuna.
Nzambi kena muntu udi ukuenzeja ku makanda bua wewa kumulonda.
Mukulu Dale G. Renlund wa mu Mpuilu wa Bapostolo Dikumi ne Babidi wakalongesha ne, “kipatshila ka Tatu wetu wa mu Diûlu bu muledi kakena ka kuikala ne bana badi benza tshidi tshimpa to; kadi ka kuikala ne bana badi basungula bua kuenza tshidi tshimpa ne ku ndekelu kulua bu Yeya.” Neakubikila, neakubela, ne akulongesha bulela, kadi kakumbusha budisuila bueba to ku dikuenzeja bua kumulonda yeya.
Nzambi kena muntu udi uteta bua akukuata wenza tshintu tshibi bua akunyoka.
Kadi, bu mudi Mukulu Patrick Kearon wa mu Mpuilu wa Bapostolo Dikumi ne Babidi muleja, “Nzambi udi ukukeba kakuyi dilekela,” biumvuija ne kena ulekela bua kuteta kukuambuluisha bua upingana kudiyi. Mmutumanya ne bonso buetu netupeta malu makola patuenza bilema. Nanku mmuenza njila bua tuetu kutokeshibua ku mibi ne kupeta bukola kupitshila ku bupikudi bua Muanenda.
Nzambi kena muntu muindila bua wuikala “mukumbana” anyi “muakana” kumpala kua yeya kukunanga.
Dinanga dienda bueba kadiena ne ndekelu. Mmukunanga anu mpindieuwu, nansha kuyi muakana! Mulombodi mukulu Jeffrey R. Holland, Mulombodi Mukulu Udiku wa mu Mpuilu wa Bapostolo Dikumi ne Babidi, wakafila butoka bukola bua bulelela ebu: “‘luaku bu muwudi,’ Tatu munangibua wakakula kudi umua ne umua wa kutudi, kadi wakakumbaja ‘Kupangidiki bua ushala bu muwudi to.’ Netuseka ne tuvuluka ne Nzambi mutuishibua bua kutuenza tshitudi katuyi tuelela meji mua kuikala.” Ne dinanga diakana ne dikankamika, Tatu wa mu Diûlu udi uteta bua kukuambuluisha bua kulua bu yeya ne kupeta bionsu bidiyi nabi, tshitupa ku diba.
Tshidi Nzambi Muikala
Mushindu muimpa wa kufika ku dimanya Tatu weba wa mu Diûlu udi wa kulama kutungunuka ne kupeta dimanya buenda. Mushindu kayi? Longa buenda ne Muanenda kupitshila ku mifundu ne mêyi a ba profete ba moyo. Musambila. Lama mikenji Yenda. Peta diba dia nkaya, bua kumutendelela mu ekelezia, mu ntempelo, ne miaba mikuabu. Enza ne lama bipungidi nenda. Neakuambuluisha bua kumanya tshidiyi muikala ne tshinyi tshidiyi umvua bueba.
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, August 2025. Tshiluba. 19616 760