Bulelela bua Mioyo Yetu

Kudi Mukulu Quentin L. Cook

Wa mu Mpuilu wa Bapostolo Dikumi ne Babidi

Tatu wetu wa mu Dîulu wa Dinanga mmutubuluila malelela adi atangila moyo wetu wa kala, wa pindiewu, ne matuku alua, biangata mushindu wa kupeta manena a ku mapa onsu.

Mu dituku dia 22 wa Ngondu wa kumpala 1833 bakulu ba Ekelezia bavua basangila ne profete Joseph Smith mu kazubu kakesa ka diyeba ka Newel K. Whitney mu Kirtland, Ohio. Mu Ngondu wa dikumi ne Muibidi wa tshidimu tshishala, Joseph wakapeta dibuluila dimutuma bua kuenza kalasa ka pabuaku bua kulongolola bana betu ba baluma bua kuya mu mission.

“Ndikupesha mukenji,” Mukalenga mumanyisha, “nenulongeshangana umua ne umua dilongesha dia bukalenga.

“Longeshayi ne tshisumi ne lusa luanyi neluikale nenu, bua nulongeshibua biakana mu shindamenu, dilongesha, mu mukenji wa lumu luimpa, mu bionsu bidi bikala bitangila bukalenga bua Nzambi, bidi bia mushinga bua nenu kumvua; …

“Bua nuikala balongodibua mu bintu bionsu ne panganutuma kabidi bua kuenza mudimu wa dibikila dienu ne mudimu undi munupesha” (Dilongesha ne Bipungidi 88:77–78, 80).

“Kalasa ka baprofete” aka, bu muvuabu bakabikila, kakenza tshikumina tshimpa tshia nyuma. Balombodi ba bungi ba mbangabanga ba Ekelezia bavua balongeshibua momu. Lelu ewu buloba budi buikala ne miaba mishilangana, kadi diludiki divua Mukalenga mufila ditshidi dia mushinga bua kuteka mu tshienzedi. Tuetu bietu, tudi ne bua kukeba dimanya ne bulelela “bua malu bu mudiwu, ne muvuawu, ne mudiwu mua kulua” (Dilongesha ne Bipungidi 93:24).

Dikeba Dietu dia Bulelela

Mu tshikondo etshi tshitudi bikala, mamanya a bungi adiku buetu kupita tshia kala. Mu matuku mashala, wewa musua bua kumanya tshintu, udi ne bua kuya mu nzubu wa tshilaminu tshia mikanda ne kukeba. Lelu ewu internete ne telephone ya ku bianza bidi bitupesha ngumu ya bungi itudi mua kupeta mu tshitupa tshikesa.

Mukalenga udi usanka patudi tuenzela bintu ebi ne lungenyi buetu, mutupesha mubelu ewu: “Keba ne tshisumi ne longeshanganayi umua ne umua mêyi a lungenyi; kebayi mêyi a lungenyi mu mikanda mimpa kebayi ku dilonga kabidi ne ditabuja” (Dilongesha ne Bipungidi 88:118). Udi utukankamika bua tuetu kulonga tshidi tshitangila buloba budi butunyunguluka (tangila Dilongesha ne Bipungidi 88:79; 93:53), kadi mu dikeba dietu dia bulelela, tutangilayi kudi Nzambi, yeya udi “umvua bintu bionsu ne bintu bionsu bidi kumpala kuenda, …ne udi kumutu kua bintu bionsu, …ne bintu bionsu bidiku buenda ne bienda” (Dilongesha ne Bipungidi 88:41).

Amua a ku malelela adi Nzambi mutupesha, tshimua tshia ku shindamenu bua moyo wetu pa buloba tshidi ne udi Tatu wetu wa mu Diûlu. Tudi bana benda ba mu nyuma balume ne bakaji. Udi mutumanya ne mutunanga bushuwa. Ne bu bana benda ba mu nyuma, tudi ne buntu ne buikadianganyi bua bunzambi. Kumvua ne kuakidila malelela a tshiendelela â kudi kutupesha buikadianganyi, mushinga, ne tuipatshila tudi tutubenesha ne tutuludika mu moyo wetu kumpala kua kufua ne neatungunuka kuenza nunku mpidiewu ne tshiendelela.

Tuvua ne Tatu Ku tshibangidilu

Bu mutudi tukeba bulelela bua malu “bu muvuawu,” tudi tujingulula mêyi â umbukila kudi Mukalenga wetu, Yezu Kilisto: “Ne mpindiewu, bulelela ndi nuambila kunudi, Mvua ku tshibangidilu ne Tatu ne ndi wa kumpala ku diledibua,” ne “nuenu bienu nuvua ku tshibangilu ne Tatu” (Dilongesha ne Bipungidi 93:21, 23).

Kumpala kua moyo wetu pa buloba, tuvua babuela mu tshisangilu mu diûlu muvua Tatu wetu muleja bulongolodi buenda bua disanka. Muprofete Joseph Smith wakalongesha ne tshiena bualu tshia bulongolodi bua Nzambi tshidi tshia kutuenzela “ngâsa bua tuetu kulua bu mudiyi …kuzanjikibua nenda nkayenda.” Mudimu wenda ne butumbi udi “bua kutuala dibenga kufua ne moyo wa tshiendelela bia muntu” (Mose 1:39).

Tudi tuenzela budisuila buetu ne tusungula bua kulonda Bulongolodi bua Tatu wa mu Diûlu. Tuvua babeneshibua bua kuledibua mu moyo ewu, utudi tutungunuka ne budisuila buetu ne tudi mua kuenzela dimanya mu moyo wa lufu, kulonga, ne kuya kumpala mu moyo wa tshiendelela.

Mu luendu lua moyo wa lufu luetu, netupeta makenga ne ntatu. Kadi katuena ne bua kuluangana ne ntatu ya moyo nkayetu nansha. Joseph Smith wakalongesha ne Tatu wa mu Diûlu, “Tatu munena wa pa buloba[,] udi utangila bantu bonsu ne mêku ne dinanga dia Tatu ne lumonu lua muledi.”

Tatu wetu wa mu Dîulu, “Tatu wa lusa, ne Nzambi wa busambi bonsu,” neatubenesha, neatujula, neatusamba “mu makenga etu onsu, netuikala bakumbana bua kubasamba aba badi mu makenga, ne busambi butudi tusambibua kudi Nzambi” (2 Kolinto 1:3–4). Bu tshitupa tshinena tshia mu bulongolodi buenda, Tatu wa mu Diûlu mufila njila bua tuetu kupingana kudiyi.

Njila wa kuya kudi Tatu Wetu

Bulelela “bua malu bu mudiwu mikala bushuwa” (Yakobo 4:13) bidi biumvuika: Katuena mua kukumbaja bionsu bitudi mua kuenza bu bana ba Tatu wetu wa mu Diûlu nkayetu nansha. Yezu Kilisto muana mulela wa kumpala wa mu nyuma wa Tatu, wakenza tshipungidi bua kuikala Mupandishi ne Musungidi wetu.

Yezu Kilisto, “Umuepela Mulela wa Tatu, muwula tenta ne ngâsa ne bulelela, kabidi ne nyuma wa bulelela, … wakalua mu mubidi bua kusomba munkatshi muetu” (Dilongesga ne Bipungidi 93:11). Wakalua bua kutuleja njila bua kupeta diakalenga, ne kumvua disanka mu moyo ewu ne mu tshiendelela.

“Bualu bua Nzambi wakatamba kusua ba pa buloba, yeye wakabapa muanenda umuepela mulela, bua muntu yonso wamuitabuja kafu biandi, kadi ikale ne moyo wa tshiendelela.

“Bualu Nzambi kakatuma muanenda pa buloba bua kulumbuluisha ba pa buloba, kadi bua ba pa buloba basungidibua” (Yone 3:16–17).

Dimanya dia Mupandishi dia pa buloba didi ne mushinga “Kakapeta tshiwudi musangu wa kumpala to, kadi wakatungunuka ku ngâsa ne ngâsa” (Dilongesha ne Bipungidi 93:12). Wakakola tô “nepakapetayi tshiwudi tshia disanka tshia butumbi bua Tatu” ne bukola bonsu bua mu diûlu ne pa buloba, ne butumbi bua Tatu buvua nenda, bualu uvua mu yeya” (Dilongesha ne Bipungi 93:16–17). Musungidi wakalongesha:

“Ndi nnushila mêyi â bua numvua ne numanya mushindu kayi wa kutendelela, ne numaya nganyi unudi nutendelela, nanku bua nulua kudi Tatu mu dîna dianyi pakumbana diba bua kupeta tshiwudi tshienda.

“Panualama mikenji yanyi nenupeta tshiwudi tshienda, ne nuikala batumbishibua mu dîna dianyi bu mundi mu Tatu; ki bualu kayi, ndi nuambila, nenupeta ngâsa ku ngâsa” (Dilongesha ne Bipungidi 93:19–20).

Mu budimi bua Getesemane ne pa mutshi mutshiamakana, Yezu Kilisto wakambula pa Yeya mibi ya ba pa buloba ne wakakenga tunyinganyinga tonsu ne “makenga a mubidi ne ntatu ne matêtshibua a mushindu onsu” (Alama 7:11). Ebi biakamuenza, munena wa ku bonsu, kuzakala bua busami, ne bua kupuekesha mashi mu kasosu konsu (Dilongesha ne Bipungidi 19:18). Kupitshila ku Bupikudi buenda ne ku Dibika ku Lufu, Yezu Kilsto uvua muenza lupandu ne dizanjikibua bipepela bua bonsu.

Kupitshila ku ngâsa wa Mupandishi ne bupikudi buenda ne kudifila, tudi mua kukola tô ne patuapeta tshiwudi ne dituku dikuabu netulua bajalama. Bitualonda tshilejelu tshia Mupandishi ne tutumikila mikenji yenda, neatulombola ne kutuludika mu njila wetu wa dipingana mu butumbi kumpala kua Tatu mu Diûlu.

Kilisto mu Njila Mutangila Ku Yelushalema, Kudi Michael Coleman, kabiena bia kutentula to

Nenupeta Dipa dienda anyi?

Munkatshi mua malelela “a malu bu mudiwu mua kuikala” (Yakobo 4:13), tudi tulonga ne dimanya dietu ku tshiendelela nedienzeka ku disungula dietu dia kulonda Yezu Kilisto ne kupeta mapa adiyi ufila. Mifundu idi ilongesha ne “netusanka bua ebi bituikala bakumbana bua kupeta.” Bia dibungama, bakuabu “kabakusanka bua biakadibu ne bua kupeta ” (Dilongesha ne Bipungidi 88:32).

Mulombodi wanyi mission, Mukulu Marion D. Hanks (1921–2011), uvua musadila bu Mulombodi Munena mu mpuilu wa Bayidi Makumi ne Muanda Mutekete, wakalongesha bamissionaire benda ne: dilomba tshidibu bakumbana bua kupeta ne kusanka natshi didi mushindu wa kumona muaba utudi mu luendu luetu lua mu nyuma. “ Mushinga kayi bua muntu ewu udi ne bua kupeta dipa, kadi kabayi bamupesha dipa edi to?” Mutudi tupeta dipa dia kudi Mupandishi mu kunanukila dimukeba ne kumulonda, netusanka mu ditekemena dia moyo wa tshiendelela “ne mu yeya udi mufidi wa mapa” (Dilongesha ne Bipungidi 88:33). Dipa edi difidibua ne dinanga “didi dipa dinena dia ku mapa onsu a Nzambi” (Dilongesha ne Bipungidi 14:7).

Nzambi udi Tatu wetu wa mu Dîulu. Mmutumanya ne mutunanga. Bu mutudi tutangila kudiyi mu dikeba dietu dia bulelela, tudi mua kulamata ku lungenyi ne kupeta meji, kuakidila bulelela, dinanga moyo muimpa, ne kulamata ku bukenka budi bumbukila kudiyi (tangila Dilongesha ne Bipungidi 88:40). Nanku tuetu batungunuka mu moyo wetu tô “dituku nedilua ditumvua Nzambi mulua wa bukola mu yeya ne kudi yeya” (Dilongesha ne Bipungidi 88:49).

Nedikala dituku dinena dia butumbi ne dia disanka.

© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, August 2025. Tshiluba. 19613 760