Mukenji wa ku Ngondu wa Bua Dikankamika dia Bansonga, , Ngondu Muinayi 2025
Diambuluisha difuma kudi Yezu Kilisto: Buatshinyi ne Mushindu kayi
Kumvua bua tshinyi Yezu Kilisto udi diandamuna ne mushindu kayi udiyi utuambuluisha.
Bimfuanyi bia kudi Dan Wilson
“Ndi ndiumvua bu nkadi muenza tshilema. Bidi bikola bua kutêtulula .”
“Bualu buanyi budi bukola. Tshienya mumanya mushindu wa kuya kumpala to.”
“Ndi ndiabakena bua matuku alualua. Tshiena mumanya ne ndi ne bidi bikumbana bua mema kuya kumpala.”
“Ndi mutshioka, kadi kutshidi bia bungi bia kuenza.”
Ukatuku mupeta bumua bua ku malu â anyi? Mulombodi Mukulu Russell M. Nelson uvua mulongesha, “Nkonku yonsu anyi malu awudi nawu, diandamuna didi anu disanganyibua mu moyo ne mu malongesha a Yezu Kilisto” (“The Answer Is Always Jesus Christ,” Ngondu Muinayi. 2023 mpungilu munena [Liahona, Ngondu Muitanu 2023, 127]).
Bidi biteketa bua kuamba, “Yezu Kilisto udi diandamuna.” Bidi bilomba dikankamika dikesa bua kumvua buatshinyi ne mushindu kayi Udiyi muikala diandamuna.
Mushindu kayi udi Kilisto muikala diandamuna?
Pavuaye munanukila mu kudifila mu bupikudi buenda, Mupandishi wakenza bintu bisatu bia mushinga:
-
Wakatshimuna lufu, kutupepejela bua kuikala babika ku lufu.
-
Wakafuta bua mibi yonsu, wakenza bua dikudimuna dia mutshima dikumbana, kutanta, ne kupinga kudi Nzambi. Bidi kabidi bituambuluisha bua kubuikidila bakuabu padibu benza bubi, bualu Kilisto wakangata mibi yabu pa yeya.
-
Wakumvua makenga a mubidi ne ntatu ne matêtshibua a mushindu onsu (tangila Alama 7:11–13). Etshi tshidi tshiumvuija ne mumanya bushuwa mushindu kayi wa kuambuluisha ne kondopa ne kukolesha bua kunanukila mu matêta ne kuditashisha bua kulua muakana.
Angata bualu bua mushindu yonsu , ne udi mua kusuika diandamuna ku tshimua anyi bia bungi bia ku bintu bisatu ebi.
Bupela anyi? Bualu Yezu Kilisto wakumanya malu onsu, mmumanya bushuwa tshinyi tshidibi bikala. Katu anu umbusha bipumbishi, kadi udi mua kukolesha bantu badi bikala ne majitu abu (tangila Mosiya 24:15).
Dipangila anyi? Bualu Kilisto wakatamba bubi, mapangila etu kâkuikala koku matuku onsu to. Dikudimuna mutshima didi diangata kabidi dishintuluka ne dilua uvuayi mumanya ne udi mua kuikala.
Masama anyi? Bualu wakatamba lufu, netubika ne mubidi mujalama kawuyi wa masama ne ntatu. Kilisto uvua kabidi “[ muangata ] pa mutu penda masama” (Alama 7:11), bimuenza bua alua muntu mujalama bua kutupesha dikankamika ne kututua mpanda.
Mushindu kayi udi Kilisto Wambuluisha?
Nansha patudi bamanya buatshinyi Mupandishi udi diandamuna (bua tshidiyi ne bidiyi mutuenzela), tutshidi ne dijinga dia kumanya mushidu kayi utudi tupeta diambuluisha ne makanda biumbukila kudiyi. Ngenyi mikesa nyoyeyi:
Disambila. Mu kusambila mu dîna dia Yezu Kilisto, bantu badi kabayi bajalama bu tuetu badi mua kuakula ne Nzambi mujalama. Tudi mua kusambila bua makanda atudi nawu dijinga mu manga malu, ne Nzambi neandamuna kabiyi mu mushinsu utudi basua anyi utudi batekemena, kadi mu mushindu watubeneshayi. Dibikila dia Mupandishi didi dilelela: “Lomba newupeta” (Yone 16:24; 3 Nefi 27:29; Dilongesha ne Bipungidi 4:7).
Dipa dia Nyuma wa Tshijila. Tatu wa mu Diûlu, Yezu Kilisto, ne Nyuma wa Tshijila badi tshintu tshimua mu kipatshila. Badi benza mudimu pamua! Diba dionsu wewa udiumvua mulombodibua anyi mukankamikibua kudi Nyuma wa Tshijila, udi mua kumvua ne Kilisto ke udi ukuambuluisha.
Dilama Bipungidi. Mukulu Dale G. Renlund wa mu Mpuilu wa Bapostolo Dikumi ne Babidi wakalongesha: “Muaku njila wa tshipungidi udi tshifuanyikijilu tshia mishindu ya bipungidi itudi tulonda bua kuya kudi kilisto ne kudisuika kudiyi. Kupitshila ku bipungidi ebi, tudi mua kupeta bukola buenda bua tshiendelela” (Mpungilu Munena wa mu Ngondu Muinayi 2023 [Liahona, Ngondu Muitanu 2023, 36]).
Ngâsa. Patudi tuteka ditabuja mu Yezu Kilisto ne tukudimuna mutshima, tudi mua kupeta diambuluisha dikuabu ne makanda (tshibikidibua kabidi ne ngâsa) bua kuenza bintu bituvua katuyi mua kuenza nkayetu (tangila Guide to the Scriptures, “Grace”). Bukola ebu, anyi ngâsa, bidi mua kulua mu mishindu ya bungi: kupitshila ku Nyuma wa Tshijila, ku mulunda, kudi muenyi, diumvua. Mu tshikosu, tshintu tshimpa tshionsu tshidi tshiluila kudi Nzambi ( tangila Moloni 7:22). Pawudi upeta lutulu lukesa, makanda makesa, bukola bukesa bua kunanukila, manya ne tshidi diambuluisha dia Kilisto kuwudi.
Vuluka buatshinyi ne Mushindu Kayi
Nanku musangu kumpala pawikala dijinga ne diandamuna ku lukonku anyi bualu, tangila kudi Kilisto. Vuluka ne bua butshimunyi buenda bua bubi, lufu ne ntatu yonsu ya mu mubidi wa tshifuaka kakuena tshintu tshidi katshiyi mua kukumbana. Tangila mushindu kayi udiyi mua kukubenesha, ne newumona buenzeji buenda mu moyo wenda. Mmukunanga bikola!
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, April 2025. Tshiluba. 19625 760