“Peb lub Teeb Nyob hauv Roob Moj Sab Qhua,” Liyahaunas, Ib Hlis Ntuj 2024.
Zaj Lus hauv Liyahaunas Txhua Hli, Ib Hlis Ntuj 2024
Peb lub Teeb Nyob hauv Roob Moj Sab Qhua
Cov uas mob siab nyeem Phau Ntawv Maumoos, ua raws li tej lub ntsiab cai uas nyob haud, thiab thov Vajtswv seb puas muaj tseeb yuav hnov tus Vaj Ntsuj Plig Dawb Huv thiab yuav haj yam ntseeg, thiab muaj ib zaj lus tim khawv ntxiv txog tus Cawm Seej.
Daim duab txog Yales tus tij laug uas muaj cov pob zeb uas ci ntsa iab los ntawm Normandy Poulter
Txij thaum kuv yog ib tug tub hluas los, kuv muaj ib zaj lus tim khawv txog Phau Ntawv Maumoos. Kuv yeej ib txwm nyiam zaj dab neeg txog Yales tus tij laug thiab nws cov neeg thaum lawv mus rau “thaj av uas cog lus cia” (Ethaws 2:9).
Thaum xav txog qhov uas yuav mus nyob hauv cov nkoj uas tsis muaj teeb, Yales tus tij laug nug tias, “Saib seb, auj tus Tswv es, koj puas yuav cia peb hla cov dej loj no nyob hauv kev tsaus ntuj nti?” Tus Tswv teb hais tias “Koj xav kom kuv ua dab tsi es nej thiaj li muaj teeb pom kev nyob hauv nej cov nkoj?” (Ethaws 2:22, 23).
Yales tus tij laug paub tias tus Tswv muaj hwj chim tag nrho. Nws paub tias tus Tswv yog lub hauv paus ntawm txoj kev kaj tag nrho. Nws paub tias tus Tswv tau txib Nws cov neeg thov Nws thaum lawv xav tau tej yam. Yog li ntawd, Yales tus tij laug tau muab siab rau ntseeg tus Tswv npaj 16 lub pob zeb. Nyaj nej nco qab hais tias nws tau thov tus Tswv xuas Nws tus ntiv tes los kov cov pob zeb, “kom yuav ci pom kev nyob hauv qhov tsaus ntuj” (Ethaws 3:4).
Daim duab txog tus Tswv txoj kev kov cov pob zeb ntawd los twb nkag hauv kuv lub siab txij thaum kuv nyeem zaj dab neeg ntawd los. Kuv txawj pom daim duab ntawd hauv kuv lub siab zoo li tau tshwm sim rau kuv pom tiag tiag. Tej zaum yog vim qhov uas txoj kev kaj ua rau qhov tsaus ntuj ploj mus yog ib qho uas muaj tiag tiag rau kuv.
Thaum kuv tsis hnov tus Vaj Ntsuj Plig Dawb Huv, thaum kuv tsis tshua muaj siab hnov tau tus Tswv tus Ntsuj Plig, kuv hnov qhov tsaus ntuj. Tiam sis thaum kuv nyeem Phau Ntawv Maumoos, rov qab muaj qhov kaj. Phau Ntawv Maumoos yeej zoo li ib lub pob zeb ci ntsa iab uas tus Tswv kov rau kuv. Yog ib yam uas ci ntsa iab rau kuv lub neej.
Ib lub Teeb Mus Ib Txhis Li
Ib yam li cov uas tus Tswv coj los rau Amelikas puag thaum ub, peb sawv daws raug tej cua daj cua dub thiab tej hnub tsaus ntuj thaum peb mus rau thaj av uas cog lus cia ntawm kev tsa nto. Tiam sis tus Tswv yuav pab peb ib yam li Nws pab cov Neeg Yales thiab cov Neeg Nifais. Nws yuav coj peb kev thiab ci ntsa iab rau peb pom kev—yog peb mloog Nws lus, muab siab rau ntseeg Nws, thiab thov kom Nws pab peb.
Tus Tswv qhia Nifais tias, “Kuv kuj yuav ua nej lub teeb nyob hauv roob moj sab qhua; thiab kuv yuav npaj txoj hau kev ua nej ntej, yog hais tias nej ua raws li kuv tej lus txib; yog li ntawd, npaum li uas nej ua raws li kuv tej lus txib ces yuav coj nej mus rau thaj av uas cog lus cia; thiab nej yuav paub tias kuv yog tus uas coj nej” (1 Nifais 17:13).
Tus Tswv qhia Nifais tus kwv Yakhauj tias, “Kuv yuav ua lub teeb rau lawv cov uas mloog kuv tej lus mus ib txhis li” (2 Nifais 10:14).
Tus yaj saub Anpinadais ua tim khawv txog tus Cawm Seej hais tias, “Nws yog txoj kev kaj thiab txoj sia ntawm neeg ntiaj teb; muaj tseeb tiag, yog ib txoj kev kaj uas tsis txawj kawg, uas tsis muaj hnub yuav tsaus” (Mauxiyas 16:9).
Tus Cawm Seej ua tim khawv txog Nws tus kheej tias, “Kuv yog txoj kev kaj thiab txoj sia ntawm neeg ntiaj teb.” Nws hais ntxiv tias, “Saib seb kuv yog txoj kev kaj; kuv tau ua ib tug yam ntxwv rau nej” (3 Nifais 9:18; 18:16).
Hnov txoj Kev Kaj
Kuv hlub peb tus yaj saub, Thawj Tswj Hwm Russell M. Nelson. Kuv tau koob hmoov vim kuv nrog nws ua hauj lwm. Thaum Nws nkag hauv ib chav, ces zoo li chav ntawd ci ntsa iab dua ntxiv. Nws muaj Khetos txoj Kev Kaj.
Khetos txoj Kev Kaj los muaj tseeb tiag. Yog “lub zog, hwj cim, los yog hwj huam los saum ntuj los uas Vajtswv muab rau Khetos thiab ua rau txhua yam muaj txoj sia thiab txoj kev kaj.” Yog ib lub txiaj ntsim ntawm sab ntsuj plig uas yuav coj Vajtswv cov me nyuam mus rau tus Vaj Ntsuj Plig Dawb Huv thiab Yexus Khetos txoj moo zoo.1 Kev nyeem Phau Ntawv Maumoos yuav ua rau txoj Kev Kaj ntawd muaj zog.
Tej lub sij hawm peb yuav tsum xav txog peb lub neej dhau los thiab nco qab tias Vajtswv tau ua li cas kom pab peb. Thaum peb xav txog tej ntawd, peb yuav rov qab hnov tus Cawm Seej lub hwj huam dua. Thaum cov vaj lug kub hais tias, “Nco ntsoov, nco ntsoov” (Hilamas 5:12), kuv xav tias tej lus no hais kom peb, “Tsis txhob nco txog tej yam uas nej twb paub los sis hnov lawm xwb, cia li rov qab hnov txoj kev kaj ntawd dua.”
Yeej yooj yim rau ib txhia hnov txoj kev kaj ntawm sab ntsuj plig. Ib txhia los nyuaj rau lawv hnov txoj kev kaj ntawm sab ntsuj plig vim tias lawv muaj teeb meem los yog tej yam uas tab kaum hauv lub ntiaj teb no. Tiam sis yog peb rau siab ntseeg, ces txoj kev kaj yeej yuav los—tej lub sij hawm thaum peb tsis tau xav tias yuav los.
Thawj Tswj Hwm Nelson, tus uas tau ntuas peb kom “mob siab thov Vajtswv thaum kawm Phau Ntawv Maumoos txhua hnub,”2 tau hais txog ob peb yam uas Phau Ntawv Maumoos ua rau peb nyob ze tus Cawm Seej thiab pab peb hnov txoj kev kaj ntawm txoj moo zoo, to taub tej lus tseeb txog txoj moo zoo, thiab ua raws li tej lus qhia ntawm txoj zmoo zoo.
Thaum peb nyeem Phau Ntawv Maumoos, Thawj Tswj Hwm Nelson hais tias, peb yuav to taub, thiab ris Vajtswv txiaj rau, Yexus Khetos txoj Kev Theej Txhoj ntxiv.
Peb yuav xav “yug dua tshiab” (Mauxiyas 27:25) thaum phau ntawv no pab peb hloov siab (saib Mauxiyas 5:2).
Thaum peb nyeem thiab kawm txog tej lus qhia ntawm Phau Ntawv Maumoos txog kev muab Ixayees sau los ua ke, peb haj yam yuav xav nrhiav peb cov poj koob yawm txwv uas tuag lawm thiab ua cov kab ke ntawm kev cawm seej thiab kev tsa nto rau lawv nyob hauv lub tuam tsev.
Peb yuav hnov txoj kev kaj thaum peb txais kev teb peb tej lus nug, kev coj kom paub txiav txim siab, thiab lub zog kom hloov siab lees txim thiab tiv taus kev phem.
Thaum peb nyeem tej lus tseeb hauv Phau Ntawv Maumoos, peb yuav hnov kev kho mob, kev nplij siab, kev txum tim, kev pab, lub zog, thiab kev zoo siab rau peb sab ntsuj plig.3
“Auj yog li ntawd, qhov no puas muaj tseeb?” Amas tau nug txog lub noob ntawm qhov tseeb, kev txawj ntse, thiab kev ua tim khawv uas tab tom loj tuaj. “Kuv hais rau nej tias, Yeej muaj tseeb, vim qhov no yog qhov kaj; thiab txhua yam uas kaj yeej zoo, vim yus txawj to taub yam ntawd, yog li ntawd nej yuav tsum paub tias yam ntawd yeej zoo” (Amas 32:35).
Khetos daim Duab, los ntawm Heinrich Hofmann
Nrhiav tus Cawm Seej hauv Kev Tsaus Ntuj Nti
Thaum kuv tus phooj ywg Kamryn muaj 10 xyoo, nws raug mob qhov muag uas raug nws lub ntsiab muag sab xis, es tsawg tus neeg raug qhov mob no.4 Tej lub sij hawm thaum nws hnov mob tsis tu tsis tseg, Kamryn nyiaj tsis taus qhov kaj hlo li. Nws niam nws txiv, vim nkawd txhawj tias nws yuav dig muag, tau thaiv tej qhov rais ntawm nws chav txaj kom nws thiaj li nyob taus. Kamryn niam, Janna, hais tias:
“Kwv yees li plaub lub hlis tom qab cov kws kho mob qhia tias nws muaj mob dab tsi, kuv nkag hauv nws chav tsaus ntuj nti. Thaum kuv qhov muag pom tau kev zuj zus, kuv pom tau Kamryn pw khoov vos hauv nws lub txaj. Nws mob sab kawg li nws thiaj li tsis txav hlo li los sis quaj thaum nws hnov kuv nkag los haud. Nws cia li pw muaj ob lub qhov muag o thiaj li rua muag tsis taus.
“Kuv txhos caug rau ntawm nws lub txaj, tuav nws tes thiab muab nyem peb zaug—yog qhov uas qhia tias ‘Kuv hlub koj.’ Feem ntau nws yuav rov qab nyem plaub zaug kom qhia tias ‘Kuv hlub koj tshaj,’ tiam sis nws tsis teb hlo li. Nws mob sab dhau. Kuv los kua muag rau kuv ob sab plhu, kuv ntsia kuv tus me nyuam muaj 10 xyoo uas pw khoov vos. Ua rau kuv lub siab ntais rhe.”
Janna tau thov Vajtswv hauv nws lub siab.
“Kuv qhia Leej Txiv Saum Ntuj Ceeb Tsheej tias kuv nkag siab tias Nws paub zoo tshaj, tiam sis kuv kuj hais ‘Thov pab nws.’ Thaum kuv tab tom thov Vajtswv, ua rau kuv lub siab sov so. Kev xav txog tus Cawm Seej Yexus Khetos ua rau kuv txais kev nplij siab: ‘Nws yog txoj kev kaj. Cia li nrhiav Nws hauv qhov tsaus ntuj.’”
Janna tau tsa taub hau thiab ntxhi lus rau Kamryn pob ntseg tias: “Koj yuav tsum nrhiav tus Cawm Seej hauv qhov tsaus ntuj.”
Tom qab ntawd, Kamryn twb pw tsaug zog thaum nws mloog tej zaj nkauj qhuas Vajtswv thiab cov vaj lug kub hauv qhov app rau lub Koom Txoos cov ntawv.
Thaum nws lub qhov muag rov qab pib mob, Kamryn nrhiav tus Cawm Seej hauv qhov tsaus ntuj.
Daim duab yog Kamryn tsev neeg pub siv
Kab mob uas Kamryn muaj los feem ntau tsis meem txom, tiam sis thaum nws rov qab raug mob, Janna thiab nws txiv, Darrin, nplij nws lub siab thiab muab daim pam dai rau ntawm nws chav txaj tej qhov rais. Thaum tej lub sij hawm raug mob ntawd, Kamryn hais tias, “Kuv tsuas nrhiav tus Cawm Seej hauv qhov tsaus ntuj xwb.”5
Thaum peb lub neej zoo li “ib lub roob moj sab qhua uas tsaus ntuj thiab muaj kev nyuaj siab” (1 Nifais 8:4), tej zaum peb kuj yuav tsum nrhiav tus Cawm Seej hauv qhov tsaus ntuj. Kuv ua tim khawv tias Phau Ntawv Maumoos, uas ua tim khawv “tias Yexus yog tus Khetos, tus Vajtswv uas Nyob Mus Ib Txhis,”6 yuav coj peb mus cuag Nws. Kuv paub tias cov uas mob siab nyeem Phau Ntawv Maumoos, ua raws li tej lub ntsiab cai uas nyob haud, thiab thov Vajtswv seb puas muaj tseeb yuav hnov tus Vaj Ntsuj Plig Dawb Huv thiab yuav haj yam ntseeg, thiab muaj ib zaj lus tim khawv ntxiv txog tus Cawm Seej.
Thov kom peb qhia tias peb ris Vajtswv txiaj rau phau ntawv uas “raug tshaj”7 thaum peb nyeem, saib rau nqi, thiab siv phau no kom txhawb peb txoj kev ntseeg thiab lwm tus txoj kev ntseeg tus uas yog txoj Kev Kaj rau lub Ntiaj Teb.
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, January 2024. Language. 19273 295