“Peresitene M. Russell Ballard: Tuuto i le Faasoaina Atu o le Talalelei,” Liahona, Ian. 2024.
Saafiafiga mo
Peresitene M. Russell Ballard: Tuuto i le Faasoaina Atu o le Talalelei
“O Iesu Keriso, le Faaola ma le Togiola o tagata uma, e le o maliu. O loo soifua o Ia—o loo soifua le Alo toetu o le Atua—o la’u molimau lena, ma o loo Ia taialaina mataupu o Lana Ekalesia i aso nei.”1
A o avea Russell Ballard ma se alii talavou e umia le Perisitua Arona, sa auai o ia ma se uo i se sauniga aoao a le au perisitua i le Tapeneko i Sate Leki. “[Sa ma] oo atu … i autafa o faasitepu ia sa le tatau ona ma i ai,” sa ia faamatala mulimuli ane ai. “Sa iloa mai e Peresitene Siaosi Alapati Samita [1870–1951], i lana ala agalelei, lo ma faaletonu ma valaaulia i ma’ua e nonofo i luga o faasitepu. A o ma saofafai ai iina ma matamata i taualumaga o le sauniga, ou te lei talitonu o le a ou toe latalata atu lava i lenei pulelaa. Ou te manatua lo’u fai atu i la’u uo a o ma tuua le Tapeneko, ‘E mautinoa lava le manaia o le avea ma se Pulega Aoao; e te maua ai se tasi o na nofoa e nofo ai i luga o le tulaga.’
“… Sa ou le iloa o le a oo mai le taimi i lo’u olaga o le a ou tautua ai o se epikopo, se peresitene o le misiona, se Fitugafulu, ma … se Aposetolo. E le mafai ona tatou muai vaai i mea o loo finagalo ai le Alii mo i tatou. Pau lava la tatou mea e fai o le saunia lea ma agavaa mo soo se mea na te manaomia.”2
Sa faaalu e Peresitene M. Russell Ballard lona soifuaga e sauniuni ai ma faataunuu le auaunaga sa valaauina o ia e tuuina atu. Faatasi ai ma lona naunautaiga faapitoa ma le faanaunauga mo le galuega faafaifeautalai, o lana faataitaiga ma le molimau na oo atu ai i le anoanoai o olaga, uunaia ai tagata uma “ia tutulai a’e, ia lava le lelei, ma ia saunia atoatoa e auauna atu i le Alii.”3
Galue Malosi ma le Taitaiga
Na soifua mai Melvin Russell Ballard le Itiiti i le Aai o Sate Leki, Iuta i le aso 8 o Oketopa, 1928, ia Melvin Russell Ballard le Matua ma Geraldine Smith Ballard. O le tama e toatasi o le fanauga e toafa, na aoao ai Russell e faaaloalo i tamaitai a o laitiiti lava.
M. Russell Ballard o se tamaitiiti.
O lona tamā, o se faipisinisi atamai ma mataalia, sa ona ia se pisinisi faatau taavale, o le Kamupani Taavaleafi a Ballard. E ui ina sa lei malosi lona tamā i le Ekalesia a o laitiiti Russell, ae sa ta’ua lava e Russell, “Sa i ai sona aafiaga loloto i lo’u olaga. Sa ia totoina ia te au le manao e galue malosi.”4
O le olaga faalegaluega a lona tamā sa le na o le pau lea o le faataitaiga o le galue malosi na faatuina e le tamā mo lona atalii. Sa umia e le tamā o Russell se tama’i togalaau peach i Holladay, Iuta, lea sa ia tuu ai ni lagomeli e feavea’ia poleni e fuga tele ai peach. “Sa alofa tamā i ana lagomeli agamalu. … Sa taumafai i taimi uma [o ia] e faaaofia a’u i ana galuega i ofagapi, ae sa ou fiafia tele e tuu atu ia te ia e tausi i ana lagomeli.”5
O le tosinaga o lena talatuu o le galue malosi na aoaoina mai lona tamā, o le a faaauau pea i le olaga o Russell Ballard. Sa manatua e lona tuafafine o Ann Keddington, “Sa i ai i taimi uma sana galuega, e oo lava a o laitiiti o ia.” O ana galuega muamua o le moaina o le fanua ma le tausiga o le fanua, ae na iu lava ina amata ona faigaluega i Aso Toonai ma i le tuua o le aoga i le pisinisi faatau taavale a lona tamā.6
I le aoga maualuga, sa maua ai e Russell ni avanoa e atiina ae ai ona tomai faaletaitai, auai i taitai o tamaiti aoga i le Aoga Maualuga a Sasae i le Aai o Sate Leki ma sa avea ma peresitene o le Seminare a le [Aoga] Maualuga a Sasae i lona tausaga sinia, faatasi ai ma isi gaoioiga.7 Ina ua mae’a le aoga maualuga sa auai o ia i le Iunivesite o Iuta, lea na auai ai i le Sigma Chi Fraternity ma maua ai le igoa tauvalaau “o le epikopo” i ona uso faaleusoga mo lana faataitaiga o le faamaoni i lona faatuatuaga.8
Faamanuiaga o le Galuega Faafaifeautalai
Atatosi o M. Russell Ballard o se faifeautalai talavou.
Sa valaauina Russell e auauna atu i le Misiona a Peretania i le 1948, lea sa avea ai o ia ma se fesoasoani i le au peresitene o le misiona i lalo o ni peresitene eseese se toalua o le misiona. Sa ia auauna atu i le faatoa mae’a ai o le Taua Lona II a le Lalolagi, ma sa ia faamatalaina mulimuli ane e faapea, i lena taimi “o Mamona ‘e amusia ma faalumaina’ (3 Nifae 16:9), ma sa ulagia faifeautalai ma tauemuina.” Na ia manatuaina: “Na oo lava ina tauai mai e tagata mea ia i matou, ma o nisi e tuufeanu mai ia i matou. Peitai, matou te lei solomuli ai.”9 Sa ia aoao mai ona aafiaga ma, e pei ona ia fai mai, “sa fiafia e avea ma se faifeautalai i Egelani.”10
O se tasi o faamanuiaga silisili na maua e Russell mai le auauna atu i se misiona o se molimau e le maluelue. Sa ia ta’ua: “Ona o lo’u aafiaga faafaifeautalai, na ou taula ai i se molimau i le moni o le toefuataiga o le Ekalesia a Iesu Keriso e ala i le Perofeta o Iosefa Samita. Sa ou tu i Hyde Park ma le tele o isi tulimanu o magaala i Atumotu o Peretania ma tuuina atu la’u molimau o Iosefa Samita o se perofeta a le Atua, ua toefuataiina mai le talalelei i lona atoatoaga, ma o le perisitua ma le pule e faamanuia ai tagata ua toe i ai i luga o le fogaeleele. O le tele o lo’u tuuina atu o la’u molimau, o le tele foi lena o lona avea ma se vaega o a’u.”11
O Elder Ballard o loo talai atu i se lotoa o le maketi i Nottingham, Egelani, i le 1949.
E moni lava, o lana auaunaga faafaifeautalai o le a fesoasoani e saunia ai o ia mo le tele o valaauga i le lumanai. A o lei valaauina o ia i le Korama a Aposetolo e Toasefululua, sa ta’ua e Peresitene Ballard: “Mai aoaoga uma ua ou mauaina i o’u tofiga faale-Ekalesia, e leai se mea na sili atu ona taua ia te a’u nai lo le aoaoga faamasani sa ou mauaina o se alii faifeautalai e 19 tausaga le matua o loo auauna atu i se misiona talai i Atumotu o Peretania. A o ou toe tepa i tua i le taimi nei, ua mafai ona ou iloa ai e leai se aoaoga i lo’u olaga sa sili atu ona taua mo mea o loo ou faia nei i le Ekalesia nai lo le aoaoga faamasani sa ou mauaina o se faifeautalai faamisiona.”12
Tuuto Atu i le Olaga Faaleaiga
Ina ua mae’a lana misiona, sa faaauau e Russell lana aoga i le Iunivesite o Iuta. E lei leva ona toe foi i le fale, ae alu o ia i se “Siva o le Aso Faatalofa.” Sa ia faamatalaina: “Sa ta’u mai e sa’u uo … e uiga i se teine lalelei tausaga muamua e igoa ia Barbara Bowen, lea sa ia manatu e tatau ona ou feiloai i ai. Sa ia aumai o ia ma ma feiloai, ma amata loa ona ma sisiva.
“Ae paga lea, o le siva lea sa matou masani ona ta’ua o le “siva eu,” o lona uiga e te siva ma se teine seia oo ina eu pe pōpō mai oe e se isi tagata e fia siva i le teine. Sa tiotio ma lauiloa tele Barbara, o lea sa le’i atoa ai se minute na ma sisiva ai ae eu mai a’u e se isi alii talavou.
“Ou te lei taliaina lena mea. I le aoaoina ai o le taua o le toe tulitatao i la’u misiona, sa ou maua ai le numera o lana telefoni ma valaau i ai i le aso na sosoo ai mo se ma tafaoga faamasani, ae sa pisi o ia i le aoga ma isi fegalegaleaiga faaagafesootai. E faafetai, ona sa aoaoina au i la’u misiona ina ia finau pea e tusa lava pe oo mai le lotovaivai, ma sa iu ai lava ina ma tafafao faamasani. Ma o lena tafaoga na sosoo ai ma isi tafaoga faamasani. Masalo o taimi o na tafaoga faamasani sa mafai ai ona ou faatalitonuina o ia ua na o au lava le faifeautalai ua foi mai le misiona e moni ma ola—pe atonu na o le pau lena o le mea e tatau ona popole i ai.”13
Sa faaipoipo Russell ma Barbara i le aso 28 o Aokuso, 1951.
Sa tauia lona naunautaiga ma le tuuto, ma sa faaipoipo i laua ma Barbara i le Malumalu o Sate Leki i le aso 28 Aokuso, 1951. E toafitu le la fanau: O Clark, Holly, Meleea, Tamara, Stacey, Brynn, ma Craig.
Sa faasoa mai e Peresitene Ballard se aafiaga sa ia oo i ai a o avea ma se tamā talavou lea na ia aoaoina ai le faigata tele o le matafaioi o le tulaga faatina. “Sa avea a’u o se fesoasoani ona sosoo ai lea o se epikopo mo se vaitau e 10 tausaga. I lena taimi sa faamanuiaina i ma’ua i le toaono o le ma fanau e toafitu. Sa masani ona le lavā Barbara i le taimi ou te taunuu ai i le fale i le afiafi o le Aso Sa. Sa taumafai o ia e faamatala mai pe na faapei le nofo i le laina pito i tua i le sauniga faamanatuga faatasi ma lo matou aiga laiti. Ona oo mai lea o le aso na faamalolo ai au. Ina ua uma ona ou nofo i luga o le tulaga mo le 10 tausaga, o lea ua ou saofai nei faatasi ma lo’u aiga i le laina pito i tua.
“O le aufaipese a tina pepese o le uarota na saunia musika, o lea sa ou saofai ai na o au ma le ma fanau e toaono. E lei i ai se taimi o lo’u olaga atoa na matuai o’u pisi ai. Sa i ai ni papeti lima sa faamaulu i o’u lima uma e lua, ma sa le’i aogā tele lena mea. Sa aveese atu mai ia te a’u [meaai māmā], ma sa o se mea e maasiasi ai lena mea. O tusi valivali sa lei foliga mai e faafiafiaina e pei ona sa tatau ai.
“A o ou tauivi ma tamaiti i le taimi o le sauniga, sa ou tilotilo atu ia Barbara, ma sa ia matamata mai ia te au ma ataata. Sa ou aoaoina mo au lava ina ia talisapaia atoatoa mea sa matuai lelei ona faia ma le faamaoni tele e tina pele … uma!”14
O Elder Ballard ma lona aiga i lona aso fanau lona 80 ia Oketopa 2008.
Sa manatua foi e lona toalua le tele o le taimi na ia tuuina i totonu o lona aiga. Sa “matua tuuto atu o ia i lona aiga, ma e masani lava ona faamuamua i latou,” o lana tala lea. “Sa epikopo o ia mo le tele o tausaga ma sa umia le tele o galuega a le Ekalesia, ae o na tiutetauave e lei afaina ai lava lona aiga. Pe a i ai o ia i le fale, sa ia faatauaina le taimi.15
Mulimuli ane i le olaga, sa fiafia Peresitene ma Sister Ballard e faaalu le taimi ma le la fanau, fanau a fanau, ma a latou fanau. E faatauaina e lana fanau ma fanau a fanau ia manatuaga o tafaoga faaleaiga e asiasi i nofoaga o talafaasolopito o le Ekalesia e pei o Palamaira, Katelani, ma Navu; auai i le faapaiaga o le Malumalu o Preston Egelani i le 1998; malaga i le Nuu Paia; ma savalia se vaega o le alasopo a paionia.
Ina ua mavae le maliu o lona faletua ia Oketopa 2018, sa saunoa Peresitene Ballard, “E maeu lo’u faafetai i le iloa o le mea o loo i ai la’u pele o Barbara ma o le a matou toe faatasi, faatasi ma lo matou aiga, mo le faavavau atoa.”16
Faamalosia e ala i se Talatuu o le Faatuatua
I le avea ai ma se e tupuga mai i le uso o Iosefa Samita o Ailama, sa mitamita lava Russell Ballard i taimi uma i ona tuaa paionia. E toalua ona tamamatutua ma le tama o lona tamamatua sa auauna atu i le Korama a Aposetolo e Toasefululua. Ina ua mavae lona lava valaauga i lena tofi, sa saunoa mai Peresitene Ballard: “Ou te faitauina o se faamanuiaga le avea ma se sui i le taimi nei o le aiga o Iosefa ma Ailama, ma faailoa atu faalauaitele e faapea, ina ia mulimuli i le tamā o lo’u tamamatua, o Iosefa F. Samita, ma o’u tamamatua uma e toalua, o Ailama Maki Samita ma Melvin J. Ballard, i le Aufono a Aposetolo e Toasefululua o se faamamaluga ma se tiutetauave maoae. O le a ou faia le mea sili ou te mafaia e avea ai ma ituaiga o auauna e agavaa mo se tofi faapena.
“I ni nai taimi sa faamautinoa mai ai ia te au e lo’u Usoga ua latou lagonaina atonu na lagolagoina e o’u tuaa lo’u valaauga i aufono i le isi itu faapea foi le Au Peresitene Sili ma le Aufono a le Toasefululua i lenei itu o le veli.”17
O le faaaliga na maua e lona tamamatua o Melvin J. Ballard i le opoina o le Faaola i totonu o le Malumalu o Sate Leki na fesoasoani ia Peresitene Ballard i taimi faigata,18 ma o se maa faatasi ai ma upu faaiu a lona tamamatua i le olaga nei—“E sili atu i lo isi mea uma, uso e, ia tatou mafaufau sa’o”—o loo tautau i luga o se puipui i lona ofisa. “E leai se aso o le vaiaso ou te alu ai i totonu o lo’u ofisa ou te le vaai ai i na upu,” na faamalamalama mai ai e Peresitene Ballard. “Ua ou iloa e fesoasoani tele ia te au.”19 E moni, o na upu faigofie e lua, “mafaufau sa’o,” na avea ma se anavatau faaleaiga mo Peresitene Ballard a o ia uunaia tagata o lona aiga e mafaufau manino i le faia o faaiuga lelei ma ia manatua le faigofie o le talalelei.20
O Peresitene Ballard o se faataitaiga sili o le faalagolago ma le faaauauina o se talatuu o le faatuatua e ala i aiga. Mo ia, o le talafaasolopito o le Ekalesia ma le faatuatua o le Au Paia anamua sa fesootai e faavavau i lona lava talafaasolopito o aiga. Sa ia faamanatu mai ia i tatou e mafai e i tatou uma ona “maua uma le malosi sili, aemaise lava a tatou talavou, mai le malamalama i la tatou talafaasolopito o le Ekalesia.”21 E ui ina sa tofotofoina le faatuatua o le toatele o le Au Paia i le “savaliga umi a paionia Mamona o le seneturi lona 19, e tatau ona tatou manatua o ‘loo faaauau pea le savaliga i le olaga!’ mo i tatou taitoatasi a o tatou faamaonia atu lo tatou lava ‘faatuatua i tulaga aoao uma.’”22
Sa faate’a e Elder Ballard le uluai te’a faamanatu i luma o se taaloga a Los Angeles Dodgers ia Aokuso 2009.
Ata na pueina e Lori Shepler / AP
Manuia ma Toilalo o le Pisinisi
I lona soifuaga faalegaluega, sa faigaluega ai Russell Ballard i pisinisi tau taavale, fale ma fanua, ma faafaigaluegaina o tupe. O lesona taua o le olaga na oo mai mai punaoa e lei faamoemoeina, ma na muai aoaoina e Russell le taua o le faalogo i fautuaga a lona tamā ma uunaiga a le Agaga i mataupu e faaleagaga ma faaletino.
“Sa saili e le Kamupani Taavale o le Ford le au faatau taavale e faatau atu a latou laina fou o taavale,” na ia faamatala ai. “Sa valaaulia ma’ua ma lo’u tamā e faatonusili o le Ford i se muai faaaliga, o le mea sa latou manatu o le a avea ma se oloa manuia ofoofogia. Ina ua ma vaai i taavale, sa lapataia a’u e lo’u tamā, o lā sa silia ma le 35 tausaga le poto masani i le pisinisi, e uiga i le avea ma se e faatauina taavale.”
Sa faamalamalama mai e Peresitene Ballard: “A o ou tauivi ai ma lenei mea, sa ou ole atu foi i le Alii e uiga i ai, ma ole atu mo se taitaiga. Sa o se faaiuga telē; sa aofia ai le tele o tupe, o le tele o tautinoga i la’u vaega. O le taimi lava na ma vaai ai ma lo’u tamā i taavale, sa ou maua ai se uunaiga manino e aua nei o’u taliaina le maliega.”
Peitai, sa saunoa mai Peresitene Ballard, “sa matuai faatauanau lava le aufaigaluega o fefaatauaiga a le Ford, ma sa ou filifili ai e avea ma tagata muamua o le Aai o Sate Leki—ma o le mea moni o le tagata mulimuli lava—e faatauina atu le Edsel. Ma afai e te le iloa po o le a le Edsel, fesili i lou tamamatua. O le a ia ta’u atua ia te oe o le Edsel o se toilalo ofoofogia.”
O se Ford Edsel, lea na faatau atu e Russell Ballard i lana pisinisi faatau taavale i le Aai o Sate Leki.
Atapue mai le Getty Images
Sa matauina e Peresitene Ballard: “Sa ou faatagaina a’u lava e se’e ese mai uunaiga a le Agaga lea na ou maua muamua. Sa ou mulimuli i le fautuaga a le vaega lona iva o le Mataupu Faavae ma Feagaiga, ae sa ou se’e ese mai le uunaiga na tuuina mai e le Alii ia te au.” O le lesona lea na aoao mai ai: “Afai e te naunau e faalogo ma aoao, o nisi o aoaoga e sili ona ‘anoa e maua mai ia i latou o e na muamua atu ia te oe. … Afai e te faalogo ma tali atu i a latou fautuaga, e mafai ona latou fesoasoani e taiala oe agai i filifiliga o le a avea ma ou manuia ma faamanuiaga ma uli ese ai oe mai faaiuga e mafai ona faatamaia ai oe.”23
E ui lava ina sa faamanuiaina tele ana taumafaiga faapisinisi uma, ae sa talia e Russell lenei faaletonu o se aafiaga e aoao ai lea o le a fesoasoani ia te ia e “mafaufau sa’o” ai e uiga i na ituaiga o faaiuga i le lumanai.24
Auauna atu i le Alii
Ina ua uma ona auauna atu faalua o se epikopo, sa avea Russell Ballard ma fautua maualuga ma se faufautua o le korama a ositaulaga a o lei valaauina ia Iulai 1974 e pulefaamalumalu i le Misiona a Kanata Toronto. O lena valaauga na faamaonia o se sauniuniga taua tele mo ana tofiga o auaunaga i le olaga atoa i le lumanai i le Ekalesia. E lua tausaga mulimuli ane, i le aso 3 Aperila, 1976, sa valaauina ai o ia o se tasi o le Korama Muamua a Fitugafulu. Sa valaauina o ia i le au peresitene o lena korama i le aso 21 Fepuari, 1980. I le aso 6 Oketopa, 1985, na valaauina ai o ia o se tasi o le Korama a Aposetolo e Toasefululua i le 57 o ona tausaga. O lona faauuga i lena valaauga i le aso 10 Oketopa, 1985, e Peresitene Spencer W. Kimball (1895–1985) o le sauniga mulimuli lea o le perisitua na faatinoina e Peresitene Kimball a o lei maliu o ia.
I le aso 14 Ianuari, 2018, ina ua mavae le maliu o Peresitene Thomas S. Monson (1927–2018) ma le vaetofiaina o Peresitene Russell M. Nelson e avea ma Peresitene lona 17 o le Ekalesia, sa vaetofia ai Peresitene Ballard e avea ma Sui Peresitene o le Korama a Aposetolo e Toasefululua.
Peresitene Russell M. Nelson ma Peresitene Ballard i fafo atu o le Vatikana i Roma, Italia, ia Mati 2019.
I lona tulaga o se Pulega Aoao, sa maua ai e Peresitene Ballard le avanoa e faaaofia ai i le galuega a le Alii i ni auala eseese. Sa avea o ia ma Faatonu Sili o le Matagaluega o Faifeautalai ma sa taitaia foi Matagaluega o Mataupu Aoaoina ma le Faamaopoopoga. Sa fesoasoani foi o ia e vaaia le Komiti o le Va i Fafo a le Ekalesia.
I le 1980 sa ia faatagaina ai le uluai falesa e fausia i Nigeria. O le fa tausaga mulimuli ane, sa ia toe foi atu ai i Aferika, ma malaga atu i Itiopia ina ua mavae se oge e filifili ai pe faapefea ona tufatufa atu tupe mai se anapogi faapitoa a le Ekalesia atoa. Faatasi ai ma Glenn L. Pace, o le pule faatonusili o le Matagaluega o Auaunaga o le Uelefea a le Ekalesia i lena taimi, na feiloai ai le toalua lea ma le tagata e toatasi o le Ekalesia i Itiopia i lena taimi, o se e umia le Perisitua Mekisateko. I le taimi o lena fonotaga, sa faia ai e Peresitene Ballard se tatalo ma se faamanuiaga i luga o Itiopia, lea sa faapea ona ia, e pei ona ta’ua e Brother Pace, “valaau atu ai i le mana ma le pule o le Perisitua paia Mekisateko ma poloaiina elemene ia faapotopoto faatasi e aumai le timu i luga o le laueleele, ma faapea ona amata ai ona fesoasoani ia i latou o e sa mafatia mo le tele o tausaga. Sa lei timu i se tausaga, ma sa faia le tatalo i se taeao o le Aso Sa i le manino ma le susulu o le la.”
Mulimuli ane i lena aso, sa ta’ua ai e Brother Pace, “Sa ou saofai i se tamai kesi o tusitusi i la’u apitalaaga ina ua ou faalogo i se gapā o le faititili. Sa ou alu i le poletito i le taimi tonu lava e vaai ai i le amataga o uaga tetele. … Sa ou alu i le faletele ma tuitui i le faitotoa o Elder Ballard. Ina ua sau o ia i le faitotoa, sa mafai ona ou iloa sa lofituina o ia [e pei ona sa ou i ai]. Sa ma faia se tatalo o le faafetai ma toe foi atu i le malu o o ma’ua lava potu ma mafaufauga. Mai lena aso agai i luma, po o fea lava na matou malaga i ai, na timuga lava.”25 Ae mo Peresitene Ballard, sa o se aafiaga na suia ai olaga.
O Elder Ballard o loo asiasi i Itiopia i le taimi o le oge i le 1985 e filima’oti ai pe faapefea ona sili atu le faaaogaina o le silia ma le $6 miliona lea na foai atu e tagata o le Ekalesia i le taimi o se anapogi faapitoa.
O se isi aafiaga e le mafaagaloina sa tupu i le 1988, ina ua faatuina e Peresitene Ballard ni siteki fou se fitu i Lima, Peru, i le faaiuga o le vaiaso e tasi. Sa faapaiaina e lona tamamatua o Elder Melvin J. Ballard ia Amerika i Saute mo le talaiga o le talalelei i le 1925, ma muai vaaia ai le maoae o le tuputupu ae o le Ekalesia iina. Na saunoa Peresitene Ballard, “O lenei aafiaga na tuuina mai ia te au … se lagona faapitoa ona sa ou lagonaina le tosinaga a Tamamatua i se auala maoae i le iloaina sa ou faataunuuina se vaega o lana valoaga ofoofogia.”26
Aoaoga
I ana aoaoga uma, sa faamamafa mai ai e Peresitene Ballard le taua o le mauaina o se molimau ma faasoa atu le savali o le talalelei toefuataiina: “Afai tatou te le malamalama ma naunau e aoao atu isi e uiga i le Toefuataiga o le talalelei a Iesu Keriso e ala i le Perofeta o Iosefa Samita, o ai o le a faia?”27 Sa masani ona ia luiina tagata e faatulaga se aso e sue ai se tasi e mafai ona latou faasoa atu i ai le talalelei, ma ia mautinoa e tulitatao na lu’i.
Sa ia faamamaluina foi le matafaioi taua a tamaitai i le aiga ma le Ekalesia, aoao atu le auala e faaaoga lelei ai aufono, ma lagolagoina ai le galuega a faifeautalai faamisiona ma faifeautalai o le au paia, o lea sa i ai se taimi na talasua ai se tasi o ona uso a Aposetolo faapea o le “M.” i lona igoa o le “misionare.”28
Sa ia fautuaina faifeautalai ma tagata o le ekalesia i le lalolagi atoa i lana vaaiga lelei e uiga i le galuega faafaifeautalai. I le Iunivesite a Polika Iaga, sa ia faamanatu atu ai i tamaiti aoga, o le toatele o i latou sa avea ma faifeautalai po o ni faifeautalai faaolioli, e faapea “o le tuputupu ae o le Ekalesia … o loo i ai moni lava i o outou lima ma i lo’u lima, ma i lima o tagata toaaga o le Ekalesia.” Sa ia fai mai ao masani ona ia faalogo o le a manaomia ona faasoa atu le talalelei i tagata ola uma, “Ou te faapea ifo ia te au lava, … ua fetalai mai le Alii ia i tatou e fai se mea e faigata ona fai. [Ae] e le faigata. E le faigata pe afai o le a tuuto e tagata auai o le Ekalesia i latou lava i mea ua Ia poloaiina ai i latou e fai, ma e tatau ona aofia malosi i le aveina atu o le talalelei i le lalolagi.”
Sa ia saunoa, “E le manaomia ona tatou popole e uiga i le tuu o lenei Ekalesia ia tuputupu ae.”. “O le a saunia e le Alii ma o le a sii i luga e le Alii ma o le a musuia e le Alii ma o le a faia e le Alii ia mafai ai e Lana galuega ona taavale atu i luma. … Ia faamanuia outou e le Atua, ona, faamanuia mai lea ia te a’u, ina ia tatou maua le lototetele, le faamasinoga lelei, le aoaiga ma sauniuniga patino, ina ia tatou saunia i auala uma e faia la tatou vaega, po o le a lava lena mea, i le fausiaina o le malo o le Atua i le lalolagi atoa.”29
I Sikotilani e feiloai ai ma taitai o le malo ia Oketopa 2021, sa asiasi atu ai Peresitene Ballard i le fanuamaliu lea sa auai ai matua o matua o matua matutua i le lotu ma lagomau ai i le lotoa.
Molimau i le Talalelei Toefuataiina
O le molimau sa totoina a o laitiiti, na faamautuina i le taimi o lana misiona, ma faamalosia i lona olaga atoa o auaunaga sa mauaa i taimi uma i le faigofie o upumoni o le talalelei. “Ou te sii ae lo’u leo i le lalolagi atoa i le molimau ua ou iloa e aunoa ma le faatuai pe fesiligia na tatalaina e Iosefa Samita lenei tisipenisione e ala i faaaliga faalelagi ma amata ai le toefuataiga i le lalolagi o le Ekalesia moni a Iesu Keriso.”30
Faatasi ai ma le Au Peresitene Sili ma le Korama a Aposetolo e Toasefululua mo le faapaiaga o le Malumalu o Roma Italia i le 2019.
Sa ia tautino mai o lo tatou faatuatua “e tatau ona faatotonugalemu ia Iesu Keriso, i lona soifuaga, i lana togiola, ma i le toefuataiga o lana talalelei i le lalolagi i aso e gata ai. …
. …E leai se mea e sili atu ona ofoofogia pe taua i lenei olaga nai lo le iloaina o le Atua lo tatou Tama Faavavau ma lona Alo, o Iesu Keriso, ua toe fetalai mai mai le lagi ma ua valaauina perofeta ma aposetolo e toe aoao atu le atoaga o le talalelei e faavavau i luga o le fogaeleele.”31
E mautinoa lava, o lona soifuaga atoa o le auauna atu ma le tuuto i le faanatinatiina o le galuega a le Alii na fesoasoani ia te ia e avea ai ma tagata na manaomia e le Alii e avea ai o ia. “O lo’u malamalama i le talalelei ua ou maua ai le taitaiga i le ituaiga tamā ma i le taimi nei le ituaiga tamamatua e tatau ona avea ai a’u. O la’u molimau, na maua i lo’u talavou, ua fesoasoani ou te tali atu ai i valaauga uma i le Ekalesia, e aofia ai lenei valaauga lofituina i le taimi nei e avea ma se uso o le Korama a Aposetolo e Toasefululua. O la’u molimau, na maua i se taimi ua leva i tulimanu o le magaala o Egelani, ua tuputupu a’e i lea fuaiupu ma lea fuaiupu ma lea mataupu ma lea mataupu seia oo ina mafai ona ou tu i o outou luma … ma molimau atu o se molimau faapitoa a le Alii o Iesu Keriso o loo soifua lo tatou Faaola ma o Ia o le Alo o le Atua lo tatou Tama e Faavavau. E lei toe tutusa lava lo’u olaga talu ona ou taulaina lo’u agaga i upumoni o le talalelei toefuataiina a Iesu Keriso.”32