Mi Sud Lisin Nomo

I Kam long Miguel A. Rodríguez, Puerto Rico

Mi lanem hamas i impoten blong stap folem Spirit afta we mi jusum blong no lisin long kwaet toktok blong spirit we i kam long mi plante taem.

Sam yia i pas, mi statem wan niufala wok blong stap manejem wan tim dipatmen we i responsibol blong wok from ol gol we kampani i putum blong ol sel. Hem i wan wok we i had tumas, be mi bin gat sakses.

Afta we mi stap wok blong kampani blong ova long wan yia, mi filim wan strong filing we i kam tru long Spirit tri taem long wan singgel manis: “Lego wok ia.” Be, mi nidim wok ia, mekem mi ting nating long kwaet toktok blong spirit ia.

I no longtaem afta, bos blong kampani i kam long mi mo talem se, “!Yu wan stilman! Yu mas givimbak evri mane we yu bin mekem long komisen blong yi.” Afta, hem i aot mo i no givim wan janis long mi blong askem from wanem hem i tok agensem mi abaot fasin blong no stap talem trutok.

Eksperiens ia i mekem mi gat ol series tingting we i fasfas abaot miwan. Oltaem mi traem blong obei ol komanmen mo gohed blong holemtaet ol valiu we papa mo mama blong mi mo gospel i bin tijim long mi, we i tekem tu, fasin blong stap talem trutok. Be mi mas askem miwan se “?I tru se mi mekem wan samting i rong? ?I tru se mi wan stilman?”

Ol tingting blong mi we i fasfas i mekem mi wari long saed blong spirit i go kasem poen ia se, bae mi tekem sakramen long ol Sandei o no. Afta we mi livim kaekae [fast], mi filim paoa blong Tabu Spirit i stap daonem wari blong mi se mi klin inaf mo se evri samting bae i oraet—be tu, i stap rimaenem mi se, mi bin kasem woning finis blong lego wok ia.

Kampani blong mi i wantem mi blong saenem wan pepa wok blong talemaot se mi mi rong mo agri blong pembak wan bigfala amaon blong mane. Mi no akseptem. Mi save se ol toktok blong agensem mi ia, oli no tru.

Long stret taem, mi faenemaot se wan long ol bos blong mi, i hem ia nao we i stap stil long kampani. Hemia i mekem wari blong mi abaot miwan i kamaot. Yes, mi bin talem trutok. Yes, mi gat respek. Mo yes, mi bin stap tru long wanem we oli bin tijim long mi.

Eksperiens ia i tijim mi se, oltaem mi mas folem kwaet toktok blong Spirit, no mata wanem we i stap hapen long laef blong mi. Taem we Elda Dieter F. Uchtdorf blong Kworom blong Olgeta Twelef Aposol i bin tijim, “Sapos yumi lisin mo stap folem ol kwaet toktok blong Spirit, bae oli olsem wan Liahona, we i lidim yumi tru long ol samting we yumi no save, mo stap fesem ol ples we i gat jalenj mo ol maonten we i blokem yumi long fored (luk long 1 Nifae 1:16).”

Mi save se oltaem Lod i save wanem i stap hapen long yumi, iven long ol smosmol samting long laef blong yumi, mo bae Hem i neva lidim yumi go lus.