“Stap Askem Ol Kwestin, Faenem Ol Ansa: Paten we Josef Smit I Bin Soem,” Liahona, Jenuware 2025.
Kam Folem Mi
Stap Askem Ol Kwestin, Faenem Ol Ansa: Paten we Josef Smit I Bin Soem
Wan Laet I Saen, i kam long Dan Burr, oli no save mekem kopi
Long 1820, Josef Smit, we Lod i bin jusum hem finis, we i gat 14 yia olsem wan fam boe long Niu Yok stet, i kasem wan merikel blong Fas Visen we bae i makem wan niufala stat blong ful wol. Hemia ol trifala kwestin mo ol ansa abaot olsem wanem blong mekem ol testemoni blong yumi abaot Fas Visen i kam moa strong.
?Wanem nao yumi lanem aot long paten blong Josef Smit abaot blong stap askem ol kwestin?
Josef i stap lukaotem fasin blong kasem fogivnes from ol sin blong hem mo ol ansa long ol kwestin blong hem. Hem i wantem save se wanem jos nao we bae hem i joenem. Hem i go long ol defdefren jos mo i go long Baebol blong kasem ol ansa. Jemes 1:5 i givim insperesen long hem blong askem long God, we i stamba blong evri trutok. (Luk long Josef Smit—Histri 1:10–13.)
Taem Josef i rere blong prea, hem i faenem wan ples we i kwaet. Nomata long ol samting we i kam agensem hem long stat blong prea blong hem, Josef i yusum “evri paoa blong [hem] blong askem God blong i mekem [hem] i fri” (Josef Smit—Histri 1:16) mo i kasem wan ansa long kwestin blong hem (luk long ol ves 18–19).
Aot long eksperiens blong Josef, i gat plante samting we yumi save lanem abaot fet, prea mo blong stap kasem ol ansa. Hem i impoten blong save se, taem we Josef i bin kasem ol ansa long ol fas kwestin long visen blong hem abaot Papa mo Pikinini, truaot long laef blong hem, hem i gohed blong lukaotem ol ansa long God tru long prea. Ol ansa ia oli gohed blong kam ova long plante yia taem hem i gohed blong lukaotem, stap obei, mo stap gat fet blong God i save ansa long hem.
Presiden Russell M. Nelson i bin tijim se “Profet Josef Smit i putum wan paten i stap blong yumi folem blong stretem ol kwestin blong yumi”:
?Fas Visen i impoten blong gat insaed long testemoni blong mi?
Fas Visen i makem stat blong Restoresen blong gospel blong Jisas Kraes we i gogohed kasem ol dei ia tedei. Long wan spring dei ia long 1820, God i toktok wetem Josef, i ansarem prea blong hem, mo givim daereksen we i lid i go blong stanemap Jos Ia blong Jisas Kraes long wol ia bakegen.
Sapos yumi biliv se Lod i toktok wetem Josef, i minim se, yumi save biliv se Lod i save toktok long yumi. Sapos yumi trastem se Hem i stanemap Jos Ia blong Hem tru long Profet Josef, yumi save trastem se Hem i gohed blong lidim yumi tru long profet blong yumi tedei, Presiden Russell M. Nelson.
Olsem Josef Smit, ol profet we oli stap laef oli kasem revelesen blong lidim Jos. Presiden Russell M. Nelson i talem se, “Sapos eksperiens blong Josef Smit long Tabu Bus i stap tijim yumi eni samting, hem i we, ol heven oli open mo we God i stap toktok long ol pikinini blong Hem.”
Wetem wan testemoni abaot Fas Visen, fet blong yumi long Lod, Jos Ia blong Hem, mo ol revelesen we Hem i gohed blong givim long ol profet blong yumi mo ol aposol tedei, bae i kam moa strong.
?Olsem wanem nao bae yumi kasem wan testemoni abaot Fas Visen?
From se, rod blong fasin blong jenisim laef blong wanwan man i defdefren, long en, evriwan i nidim wan konfemesen we i kam tru long Spirit, blong mekem se oli save kasem wan testemoni abaot Fas Visen mo ol narafala trutok blong gospel.
Presiden Jeffrey R. Holland, Akting Presiden blong Kworom blong Olgeta Twelef Aposol i bin tijim se, “Wetem ones fasin, luksave ol kwestin mo wari blong yu, be faswan, fanem faea blong fet blong yu, from se evri samting i posibol long olgeta we oli stap biliv.”
Prea i ki we i openem doa blong kasem revelesen blong yuwan abaot Fas Visen—mo evri narafala kwestin. Askem God. Askem Hem sapos Josef i bin luk Papa mo Pikinini blong Hem. Lukaotem Spirit, trastem Lod, mo gohed blong traem. Yu save talem olsem we Josef i talem: “Mi [save] hemia, mo mi [save] se God i [save] hemia, mo mi [no save] talem se i no tru” (Josef Smit—Histri 1:25).