Mensahe sa Pagpangulo sa Area
Dinasig nga mga Desisyon Mopanalangin sa Kaliwatan
Ang usa ka dinasig nga desisyon mahitabo kon Ipatigbabaw sa mga indibidwal ug mga pamilya ang Dios diha sa ilang mga kinabuhi. 10 anyos ko sa dihang kami mihimo og dinasig nga desisyon sa pagdawat sa pagdapit sa Ginoo sa pagpasakop sa Iyang tinuod nga Simbahan. Uban sa akong mga igsoon nga si Tomas, si Nodel, ug si Victor, kami misunod sa among mga ginikanan nga si Francisco ug Agripina ngadto sa katubigan sa bunyag sa buntag sa Marso 8, 1981.
Ang akong uyoan si Jacinto, ang igsoong lalaki sa akong inahan, mao ang una sa among pamilya nga nakigkita sa mga misyonaryo ug gidawat ang ilang mensahe. Human sa iyang bunyag, iyaha kaming gipaila ila ngadto sa mga misyonaryo. Ang akong mga ginikanan mga miyembro sa usa ka prominente nga tinuohan, ug ang pag-adto sa simbahan usa ka importanteng butang sa pamilya ug usa ka prayoridad ngadto nila. Sa pagdako, akong nakita kon sa unsang paagi ilang gipakita ang ehemplo sa iyang pagtuo pinaagi sa pagtudlo kanamo sa pag-ampo sa kada adlaw isip usa ka pamilya ug kanunay nga motambong sa simbahan. Bisan og siya adunay mga bisyo, ang akong amaan nagtudlo kanamo sa pagtuo diha sa Dios.
Usa ka Pagdapit sa Pagtuman sa Kasugoan
Tungod kay bata pa kaayo ko, wala nako masabti sa hingpit ang mga butang nga gitudlo sa mga misyonaryo ngari kanamo. Ang akong mga igsoon ug ako mahinangpon kaayo sa pag-apil sa among mga ginikanan sa matag higayon nga mibisita ang mga misyonaryo. Ang akong amahan hinabako kaayo [chain smoker] ug lisod para niya nga moundang sa iyang nabatasan apan kana nausab sa dihang si Elder Richard Irving ug si Elder Kurt Trotter nagtudlo kanila sa Pulong sa Kaalam.
“Ang imong mga ginikanan seryoso sa pagpaminaw ngadto sa mensahe, ug sa dihang kami midapit sa pagtuman sa Pulong sa Kaalam, ang imong amahan miuyon ug mipasalig sa pagtuman sa Pulong sa Kaalam, ang imong amahan miuyon ug mipasalig sa pagtuman sa balaon sa Ginoo sa Kahimsog ug milikay sa pagpanegarilyo,” gisaysay ni Brother Irving sa dihang nagkita mi 43 katuig na ang milabay. “Isip usa ka pagpahayag sa iyang pagtuo diha sa Manluluwas nga si Jesukristo ug sa iyang tinguha sa pagsunod Kaniya, ang imong amahan mitunol ug gisurender ngari kanamo ang kaha sa sigarilyo nga anaa kaniya,” midugang si Brother Irving.
Kadto tinuod gayod nga makapatuboy sa hugot nga pagtuo nga kasinatian para nako ang masayod nga ang akong Amahan andam sa pagsunod sa mga sugo ug mag-usab gikan sa usa ka pagka-natural nga tawo ngadto sa usa ka tawo sa Dios. Akong nahinumdoman kon sa unsang paagi si Nephi mipasalamat ni Lehi tungod sa iyang talagsaong ehemplo ngadto sa iyang pamilya, ug kon sa unsang paagi kining ehemplo si Nephi nakahimo sa pagsunod sa iyang mga lakang ug nahimong usa ka tawo sa Dios.
Ang Kabubut-On sa Pagpadayon sa Unahan Uban sa Kaligdong Diha ni Kristo
Tulo ka tuig human sa among bunyag, ako lang ang sakop sa pamilya nga moadto gihapon sa Simbahan. Ang akong mga ginikanan ug mga igsoon mihunong sa pag-adto. Kada Dominggo ang akong responsibilidad mao ang paghatag og imbitasyon para nila sa pag-uban kanako ngadto sa simbahan, apan kanunay ko nga makadawat sa samang tubag: “Pag-ampo lang alang kanamo.”
Naghimo ko og tumong sa pagdala sa tanan balik sa simbahan, busa akong gibuhat ang akong labing maayo nga mahimong maayo nga ehemplo ngadto kanila ug dili gayod maluya sa pagpahinumdom kanila ug paghatag og imbitasyon sa pagbalik. Ang akong mga pag- ampo isip usa ka 13 anyos natubag sa Ginoo ug ang tanan sa kataposan mibalik sa pagkaaktibo sa Simbahan. Ang among pamilya naselyo sa Manila Temple niadtong 1992, apan subo lang kay ang akong amahan namatay sa wala pa siya naselyo uban kanamo.
Pagserbisyo Usa ka Panalangin
Diha nako sa akong kataposang tuig sa koliheyo sa dihang ang akong amahan namatay niadtong Marso 1992. Atol sa gradwasyon, ako nakabaton og tinguha sa pagserbisyo sa Ginoo og full-time nga misyon. Ako naghago didto sa Philippines Quezon City Mission gikan sa 1993–1995. Mikuha ko og board exam sa wala pa ako miserbisyo, ug samtang didto sa natad sa misyon, nakadawat ko og pahibalo nga ako nakapasa!
Samtang diha sa akong unang area, ang akong inahan ug ubang mga igsoon nangandam sa pagdawat sa ilang mga ordinansa sa templo. Bulahan ko nga natugotan nga makaapil. Ako naselyo ngadto sa akong mga ginikanan didto sa Manila Philippines Temple. Ang akong ikatulong misyonaryong kompanyon nahatagan og oportunidad nga mahimong puli alang sa akong amahan atol sa pagselyo. Usa kadto ka talagsaong espiritunahon nga kasinatian para sa among pamilya sa pagdawat sa walay makatupong nga panalangin gikan sa Ginoo.
Ako mituo nga kami nakadawat niadtong tipik sa mga panalangin tungod sa akong matinud-anong serbisyo isip usa ka batan- ong misyonaryo. Sa pagkatinuod, ang Ginoo mituman sa Iyang saad: “Paharia ninyo ang Dios, ug pagkinabuhi kamo uyon sa iyang kabubut- on ug ang ubang mga butang ihatag ra niya kaninyo” (Mateo 6:33). Ang Ginoo kanunayng nagmatinuoron ngadto sa Iyang mga saad hangtod nga kita mobutang Kaniya una sa tanan natong buhaton. Walay gidaghanon sa temporal nga panalangin ang makatupong sa espirituhanong mga panalangin sa mga pamilya nga naselyo alang sa panahon ug sa tanang kamatuoran.
Ang mga panalangin nga moabot isip usa ka resulta sa dinasig nga mga desisyon mobenepisyon sa sumusunod nga mga henerasyon. Human ang akong mga igsoon ug ako miserbisyo og mga misyon, daghan pang mga sakop sa among pamilya miadto usab aron moserbisyon, lakip sa akong mga anak. Ilang nasinati ang tinuod nga kalipay nga moabot gikan sa pagserbisyo sa Dios ug sa among isig katawo. Kini wala unta nahitabo kon dili pa tungod sa matarong nga ehemplo ni Elder Irving ug ni Elder Trotter, ang duha ka batan-ong Amerikano nga mga misyonaryo kansang dinasig nga desisyon migiya ngadto sa pagkakabig sa among pamilya.
Usa ka Tam-Is nga Panagkita og Balik
Isip usa ka timaan sa pasalamat ngadto sa mga misyonaryo kinsa midala sa Ebanghelyo ni Jesukristo ngadto sa among pamilya, akong gihimo ang akong labing maayo nga mokonektar ngadto kanila pag-usab. Usa kadto ka hagit tungod kay ang mga litrato ug mga sulat nga ilang gibilin kanamo walay impormasyon aron makontak sila.
Niadtong 2019, samtang nagserbisyo isip presidente sa stake, naaghat ko nga siksikon ang Church Directory of Leaders (CDOL) alang sa mga ngalan. Nakakita ko og 10 ka Richard Irvings sa Utah nagserbisyo isip mga bishop. Mihukom ko sa pagkontak sa ilang mga klerk. Ang labing unang klerk nga akong gipadalhan og email mitubag sa dihang akong gipangutana kon ang iyaha bang bishop miserbisyo isip usa ka batan-ong misyonaryo sa Pilipinas niadtong mga 1980.
Samtang ako naghinumdom, sa adlaw nga siya nakadawat sa impormasyon gikan sa iyang klerk, si Bishop Erving diha sa usa ka kalihokan nga mutual uban sa mga kabatan-onan sa iyang ward ug siya nagsugilon kanila og mga istorya mahitungod sa iyang misyon, mahitungod sa mga pamilya nga natudloan niya ug sa iyang kompanyon niadtong 1981.
Sa laktod, si Bishop Irving mibalik sa Pilipina niadtong Nobyembre 2022 hapit 41 ka tuig na sukad sa iyang misyon. Sa dihang mianhi siya, gidala niya ang usa ka sulat nga gipadala sa akong amahan ngadto niya sa dihang nabalhin siya gikan sa Tuguegarao ngadto sa laing area. Sa sulat, ang akong amahan mipahayag sa iyang kalipay, ug sa iyang espirituhanong mga kasinatian isip usa ka bag-ong miyembro, lakip sa kalipay sa pagdawat sa pagkapari sa usa ka komperensiya sa distirct nga iyang gitambongan. Siya mipahayag sa iyang talagsaong kalipya sa pag- apil sa Simbahan uban sa iyang pamilya kon diin walay kantidad sa kalibotanong maangkon ang ikatandi.
Pagpanalangin sa Uban ug Labaw pa Kaayong Napanalanginan
Isip usa ka Area Seventy, nakabaton ko og dili maihap nga mga oportunidad sa pagpangalagad ug pagpanalangin sa mga kinabuhi sa mga tawo nga akong ikahinagbo. Ako usab nabulahan sa mga kasinatian nga wala nako damha nga akong maangkon, sama sa pagtambong sa Kinatibuk-ang Komperesiya ug pakigtambayayong sa mga propeta, mga apostol, ug uban pang pinili nga mga sulugoon sa Dios. Samtang didto sa Utah, napanalanginan ko sa pagkonektar pag-usab sa akong mga kompanyon sa misyon ug sa pamilya ni Bishop Irving. Miadto kami sa Suba sa Jordan ug sa mga Templo sa Siyudad sa Provo uban sa among mga asawa, ug sa unang higayon kami misimba “Wala gayod ako nagtuo nga mahitabo kini, diha ako uban nimo sa imong bunyag niadtong 1981 ug human sa 42 ka tuig, karon ania kitang duha nag-uban sa pagsimba sa Templo.”
Ako mopamatuod nga ang Dios buhi. Siya mopanalangin kanato labaw pa sa atong mga gilaoman kon kita mopili sa pag-una Kaniya sa tanan nga atong buhaton. Sama sa gitudlo ni Presidente Thomas S. Monson niadtong April 2002 nga Komperensiya, “Matag usa kanato adunay responsibilidad sa pagpili. Tingali mangutana ka, “Ingon ba niana kaimportante ang mga desisyon?” Ako mosulti kaninyo, nga ang mga desisyon motino sa atong padulngan. Dili ka makahimo og mahangtoron nga mga desisyon kon walay mahangtoron nga mga sangpotanan.”
Ako mahangtoron nga mapasalamaton sa dinasig nga desisyon nga gihimo sa akong amahan ug inahan sa dihang ang mga misyonaryo mihatag sa ilang pagdapit sa pagsunod sa Manluluwas si Jesukristo. Kini sa pagkatinuod mipanalangin kanako, sa akong pamilya, ug sa akong kaliwatan. Sa ngalan ni Jesukristo, amen.