“Ad Meram ilo Āne Jem̧aden,” Liaona, Jān. 2024.
Ad Meram ilo Āne jem̧aden
Ro rej lukkuun riiti Bok in Mormon, mour kōn katak ko ie, im jar kōn m̧ool eo naaj en̄jake Jetōb Kwojarjar n̄an kōļapļo̧k aer tōmak ilo, im naan in kam̧ool kōn, Rilo̧mo̧o̧r.
Pijain ļeo jein Jared ej kōm̧m̧an dekā kilaaj jān Normand Poulter
Men̄e āinwōt juon ļaddik edik, ekar wōr aō naan in kam̧ool kōn Bok in Mormon. Iaar en̄jake elaptata bwebwenato in ļeo jein im jatin Jared im armej ro an ilo iaļ eo aer ļo̧k n̄an “āneen kallim̧ur” (Ether 2:9).
N̄e jej ioon mijak ilo iaļ in ilo baaj ko rejjab peļļo̧k, ļeo jein im jatin Jared eaar ba, “Lo, O Irooj, Kwōn kōtļo̧k ke bwe kōmin naaj kijoone dān in eļap ilo marok jilōn̄lōn̄?” Uwaak eo, Irooj eaar ba, “Ta kwo kōņaan bwe in kōm̧m̧an bwe en wōr ami meram ilo wa ko? (Ether 2:22, 23).
Ļeo jein im jatin Jared ekar jeļā bwe Irooj ekajoor otemjeļo̧k. Eaar jeļā bwe Irooj ekar unjen meram otemjeļo̧k. Eaar jeļā bwe Irooj eaar kakien armej ro an n̄an kūr ioon Etan ilo iien aikuj. Kōn menin, kōjerbal tōmak ilo Irooj, ļeo im jatin Jared eaar kepooj 16 dekā ko. Kwoj keememej ke ekar kajjitōk ippān Irooj n̄an jibwi dekā ko kōn addin Pein, “bwe ren romaakļo̧k ilo maroklep” (Ether 3:4).
Annan̄in Irooj eaar jibwi dekā ko eaar kalikkar kōļmenļo̧kjeņ eo aō ke iaar jino riiti bwebwenato in. Imaron̄ lo jikin eo āinwōt n̄e ej waļo̧k im̧aan meja. Bōlen kōnke maroklep eo eaar jakoļo̧k kōn meram eo em̧ool ilo n̄a.
N̄e ijjab en̄jake Jetōb Kwojarjar, n̄e ijaad erļo̧k jidik jen Jetōbin Irooj, ij en̄jake maroklep. Ak n̄e ij riiti Bok in Mormon, ero̧o̧ltok meram. Bok in Mormon ej āinwōt n̄an eō juon dekā emeram kar jibwe jen Irooj. Ej kōmeram aō iaļen mour.
Juon Meram Indeeo
Āinwōt ro kar bōktok er jen pein Irooj n̄an Amedka eo etto, jej aolep ioon lan̄ ko im raan ko reppen ilo iaļ in ad n̄an āneen kallim̧ur n̄an mour ijo ilōn̄tata. Ak Irooj enaaj kōm̧m̧ane n̄an kōj ta eo E ekar kōm̧m̧ane n̄an riJared ro im riNipai ro. E enaaj tōl kōj im kōmeram ad iaļ—n̄e jej pokake E, kōjerbal tōmak ilo E, im akweļap n̄an An jipan̄.
Irooj eaar jiron̄ Nipai, “Inaaj barāinwōt ami meram ilo āne jem̧aden; im Inaaj kōpooj juon iaļ im̧ami, n̄e kom̧ij kōjparok kien ko Aō; kōn menin, toun wōt ami kōjparok kien ko Aō naaj tōlļo̧k kom̧ n̄an āne jem̧aden; im kom̧ naaj jeļā bwe ej kōn Eō kar tōl kom̧” (1 Nipai 17:13).
Irooj eaar jiron̄ ļeo jatin Nipai, “Inaaj meram eo n̄an er indeeo, ro rej ron̄jake naan ko Aō” (2 Nipai 10:14).
Kōn Rilo̧mo̧o̧r eo, rikanaan Abinadai eaar kam̧oole, “E ej meram eo im mour eo an laļ; aaet, meram eo ejjeļo̧k jem̧ļo̧kin, eo emaron̄ jab tinaad” (Mosaia 16:9).
Jān E Make, Rilo̧mo̧o̧r eaar ba, “N̄aij meram eo im mour eo an laļ.” Eaar bar ba, “Lo N̄a meram eo; Iaar kwaļo̧k jon̄ok eo n̄an kom̧”(3 Nipai 9:18; 18:16).
En̄jake Meram
Ij iakwe rikanaan eo ad, Būreejtōn Russell M. Nelson. Ij jeraam̧m̧an bwe ij jerbal iturin. N̄e ej delo̧n̄etok ilo ruum̧ eo, ruum̧ eo em̧ōkaj an meram. Ej bōktok Meram in Kraist ippān tok.
Meram in Kraist em̧ool. Ej “Maron̄, kajoor, im jelōt jān lan̄ eo ej etal jān Anij kōn Kraist im ej leļo̧k mour im meram n̄an aolep men ko otemjeļo̧k.” Ej juon menin letok an jetōb ekam̧ōņōņō me emaron̄ tōlļo̧k ro nejin Anij n̄an Jetōb Kwojarjar im n̄an gospel eo an Jisōs Kraist.1 Riiti Bok in Mormon ej kōkajoorļo̧k Meram eo.
Jet iien jej aikuj relikļo̧k ilo mour ko ad n̄an keememej elmen ad kar bōk jipan̄ ilo iaļ in ad. Ilo ad relikļo̧k, jemaron̄ en̄jake bar juon alen en̄jake im̧we eo an Rilo̧mo̧o̧r. Ilo an jeje ko rekwojarjar ba, “Keememej, keememej” (Hilamōn 5:12), Ij ļōmņak rej ba n̄an kōj, “Jab baj keememej ta eo kwaar jeļā ak en̄jake, ijoke, bar en̄jake meram in.”
N̄an jet, epidodo n̄an en̄jake jetōb in meram. N̄an jet, jetōbin meram emaron̄ in pen n̄an en̄jake kōn wōt apan̄ ko ad make ak men ko an mour in. Ak n̄e jej tiljek, meram enaaj itok—ilo wāween iien ko jejjab kōtmeni.
Būreejtōn Nelson, eo ekar kapilōk kōj n̄an “lukkuun ekkatak kōn Bok in Mormon aolep raan,”2 eaar kwaļo̧k jet wāween ko me Bok in Mormon emaron̄ kepaakļo̧k kōj n̄an Rilo̧mo̧o̧r im jipan̄ kōj en̄jake meram in gospel, meļeļe m̧ool ko an gospel in, im mour kōn katak ko an gospel in.
Ilo ad riiti Bok in Mormon, Būreejtōn Nelson ekar ba, ad meļeļe kake, im kam̧m̧ool kake, kōn Pinmuur eo an Jisōs Kraist enaaj kajoorļo̧k.
Jenaaj en̄jake juon ikdeleel n̄an “bar ļotak” (Mosaia 27:25) ilo an bok in jipan̄ kōj en̄jake juon oktak in bōro (lale Mosaia 5:2).
Ilo ad riiti im ekkatak katak ko ilo Bok in Mormon kōn aiintok Israel, jenaaj en̄jake juon ikdeleel eļap n̄an kappukot ro jibwid im jim̧m̧ad remej n̄an kōm̧m̧ani kain̄i ko an lo̧mo̧o̧r im mour ijo ilōn̄tata n̄an er ilo tampeļ.
Jenaaj en̄jake meram ilo ad būki uwaak ko n̄an kajjitōk ko ad, tōl n̄an kōm̧m̧ani kāālet ko, im kajoor n̄an ukweļo̧k n̄an jum̧ae nana.
lm ilo ad riiti m̧ool ko rej waļo̧k ilo Bok in Mormon, jenaaj en̄jake kōmour, aenōm̧m̧an, kāāl, jipan̄, kajoor, ineem̧m̧an, m̧ōņōņō n̄an n̄an jetōb eo ad.3
“O innām, ejjab m̧ool men in ke?” Alma eaar ba kōn an juļ im eo̧n̄, jino eddōk kōn m̧ool, jeļā, im naan in kam̧ool. “Ij ba n̄an kom̧, Aaet, kōnke en̄in ej meram; im jabdewōt men eo watōke meram, em̧m̧an, kōnke maron̄ kile, kōn menin kom̧ij aikuj jeļā bwe ej em̧m̧an” (Alma 32:35).
Pijain Kraist, jān Heinrich Hofmann
Pukot Rilo̧mo̧o̧r ilo Marok
Ke eo m̧ōtta Kamryn ekar 10 iiō rūttoon, ekar wōr jidik an jorrāāņ in mej me ekar jelet mej eo tuanbwijmaron̄ in mejen.4 Jet iien, n̄e ej metak im jino nana im jab em̧m̧an, Kamryn ejjab maron̄ kalimjōk meram. Jinen im jemān, raar inepata n̄e enaaj pilo, raar kōmarok wintō in ruum̧ eo an n̄an jipan̄ kaenōm̧m̧an e. Jinen Kamryn, Jenna, eaar keememej:
“Emaron̄ emān allōn̄ ālkin kakōlkōl eo an, iaar etetal ļo̧k n̄an ruum̧ eo an emarok. Ke meja eaar peļļo̧k, iaar lo an Kamryn nokjōk ilo peet eo an. Eaar lukkuun metak im kōm̧m̧an menin an jab m̧akūtkūt ak jan̄ ke ej ron̄ aō deļo̧n̄ļo̧k. Eaar babu wōt ilo an mej ko mejen kilōk.
“Iaar bukwelōlō ilo peet eo an, jibwetok pein ilo peiū, im keeņe jilu alen—kōl eo amro n̄an ba ‘ij iakwe eok.’ Ekkā an bar keeņe peiū emāņ alen n̄an kwaļo̧k ‘eļapļo̧k aō iakwe eok,’ ak ekar jab uwaak. Ekar lukkuun metak. Ilo an lap ao jan̄, iaar kalimjōk ajri in neju eo ekar kajoor jet iien remootļo̧k nokjōk āinwōt juon ball. Eaar rub būruō.”
Janna jar, kōn ejeļo̧k anikien im aolepen būruen.
“Iaar ba n̄an Jemedwōj Ilan̄ ke ijeļā ke E ejeļā men otemjeļo̧k, ak iaar jar, ‘jouj jipan̄ e.’ Ke ij jijet ijo im jar, juon en̄jake eaar kaenōm̧m̧an eō. Ikar en̄jake inem̧m̧an āinwōt an itok ilo ļōmņak eo aō kōn Rilo̧mo̧o̧r Jisōs Kraist: ‘E ej meram eo. Pukot E ilo marok.’”
Janna eaar kotak bōran im unoojdikdik n̄an lo̧jiln̄in Kamryn: “kwoj aikuj pukot Rilo̧mo̧o̧r ilo marok.”
Ālkin wōt, Kamryn eaar babu im ron̄jake al in jar ko im jeje ko rekwojarjar jān Church library app eo.
Ke jorrāān in mejen eaar ļapļo̧k, Kamryn ej pukot Rilo̧mo̧o̧r ilo marok.
Pijain baam̧le eo an Kamryn
Nan̄inmej eo an Kamryn eaar jab em̧m̧an aolep iien, bwe n̄e ej metak, Janna im ļeo pāleen, Darrin, rej kaenōm̧m̧an e im pinej kōn bulan̄kōj wintō in ruum̧ eo an. Ilo iien ko rekōmetak, Kamryn eaar ba, “Iaar pukot wōt Rilo̧mo̧o̧r ilo marok.”5
Mour ej āinwōt “juon marok im āne jem̧aden” (1 Nipai 8:4), jemaron̄ bar aikuj in pukot Rilo̧mo̧o̧r ilo marok. Ij kam̧ool bwe Bok in Mormon, ej kam̧ool “bwe Jisōs ej RiKraist eo, Anij Indeeo,”6 eo enaaj tōlļo̧k kōj n̄an E. Ijeļā bwe ro rej lukkuun riiti Bok in Mormon, mour kōn katak ko ie, im jar kōn m̧ool eo naaj en̄jake Jetōb Kwojarjar n̄an kōļapļo̧k aer tōmak kake, im naan in kam̧ool kake, kōn Rilo̧mo̧o̧r.
Jen kwaļo̧k ad kam̧m̧oolol kōn bok “ej make wōt jim̧we” tata7 n̄an riiti, kaorōke, im kōjerbale n̄an kōkajoor ad tōmak im tōmak eo an ro jet n̄an Kōmeram Laļin.