“O Le Kerisimasi o Lona Uiga o le Faamoemoe, Filemu, ma le Alofa,” Liahona, Tesema 2023.
O le Kerisimasi o Lona Uiga o le Faamoemoe, Filemu, ma le Alofa
O le pepe o Iesu tatou te faamemelo ma tapuai i ai i le taimi o le Kerisimasi ua ofoina mai ia i tatou le faamoemoe, filemu, ma le alofa i o tatou taimi faigata.
O Hope Gentile, i le fa o aso a o lumanai lona togafitiga muamua o le kimo (chemotherapy) ia Mati 2015.
Ata pue o Hope ma Nocholas Gentile
“Soo se taimi lava e fanau mai ai se tamaitiiti,” na aoao mai ai Peresitene Boyd K. Packer (1924–2015), Peresitene o le Korama a Aposetolo e Toasefululua, “ua faafouina foi le lalolagi i le mamā.”1 Ma ona o le soifua mai o se tamaitiiti ua leva ona folafolaina “i le aai o Tavita” (tagai Luka 2:11), o loto o i latou o e taliaina lena tamaitiiti ma Lana misiona e mafai ona faafouina i aso uma i le faamoemoe ma le filemu ma le alofa.
O le faamoemoe, filemu, ma le alofa o loo maua i le “malamalama tele” (Isaia 9:2) na aumaia e Iesu Keriso i lo tatou lalolagi agasala. O le faamoemoe, filemu, ma le alofa o loo maua foi i le “tala lelei e olioli tele” (Luka 2:10) lea e manuia ai fanau uma a le Atua e ala i Lona soifua mai.
O le taimi o le Kerisimasi o le avanoa sili lea e taulai atu ai o tatou loto ma mafaufau i le tamaitiiti o Keriso na fanau mai i se taimi ua leva ma o le filemu ma le faamoemoe lea e aumaia e le sāvali o Lana talalelei i o tatou loto taitoatasi a’o tatou mulimuli ma le loto i ai ia te Ia.
Faamoemoe i le Faaola
I ni nai tausaga ua mavae, o se upu e tasi—kanesa—na faateia ai le aiga talavou o Nicholas ma Christina Gentile i le mea na ta’ua e Uso Gentile “o le loloto e le’i mafaufauina o se tofotofoga o le ola po o le oti.” O le la tama teine e 19 masina le matua, o Hope, na maua ai se fula i le pito i lalo o lona tua.
“I totonu o le isi lima masina na sosoo ai o taotoga ma togafitiga,” na manatua ai e Uso Gentile, “O le taua a Hope mo le ola na fatuina ai se kalaitosekope (kaleidoscope) o aafiaga lea na i’u ina faamalosia ai le molimau a lo matou aiga i le alofa tunoa o le Faaola.”
O le tofotofoga ma le lē mautinoa ai o le lumanai o Hope na faalatalata atili atu ai le aiga—i le tasi ma le isi ma i le Faaola.
“Sa matou iloa o le mea na matou maitauina sa na o se vaega o le mea moni na silasila i ai le Atua mo Hope,” o le tala lea a Uso Gentile. “E ui i le faanoanoa, sa matou faalagolago ia te Ia, tusa lava po o le a le taunuuga.”
I se tasi po faigata i le taimi o le kimo lona lua a Hope e lima aso, sa maitauina ai e Uso Gentile le tele o lona lauulu na toulu i ni nai aso na muamua atu. O sina vaega itiiti [o lona lauulu] enaena mūmū o loo totoe sa faamanatu atu ai ma le tiga ia te ia lona olaga faaletino. E ui i lea, sa ia maua le mafanafana i le folafolaga a le Alii e faapea “ma o le a lē pa’ū se lauulu o lona ao i le eleele e aunoa ma le iloa” (Mataupu Faavae ma Feagaiga 84:116).
“Sa ou lagonaina sa matuā silafia lelei e Iesu Keriso le malaga a Hope—ma lo matou lototiga,” o le tala lea a Uso Gentile. “Ou te le tuua [i tatou] o matuaoti’ [Ioane 14:18].”
I le taimi o le a moe ai i se tasi afiafi a o ia faitauina se tusi itulau malō ia Hope, sa fesili atu ai Uso Gentile i se leo fiamalie, “Fai mai e a le lulu?” I le ataata ai, na tali mai Hope, “Hoo, hoo!” Ona ia fesili atu lea, “Fai mai e a le povi?” Sa tali mai ma le mitamita Hope, “Moo, moo!”
I lena taimi, na tosina atu Uso Gentile i se ata o le Faaola i luga o le puipui o le potumoe. Sa uunaia o ia e le Agaga e fesili atu, “Hope, ae fai mai e a Iesu?”
A o ia faatalitali mo le tali a lona afafine, sa ia faapupuu atu i lona tauau, pupula ona mata lanumoana lapopoa, ma musumusu atu, “‘Opo ia te oe.’ Fai mai Iesu e, ‘Opo ia te oe.’”
Sa toso lemu atu e Uso Gentile le tino laitiiti o Hope ma opo o ia a o ia tagi masūsū. A o opo mai Hope i ona lima laiti, sa ia musumusu atu, “Alofa mo oe, Tama.”
Na tuuina atu e le Atua ia Uso Gentile ma lona aiga lena taimi mo se mafuaaga faapitoa: “Sa opo e Iesu lo matou aiga i Ona aao agaalofa,” na ia saunoa ai. “Talu mai lena po paia, ua ou mafaufau loloto ai i le upumoni agamalu na aoao mai e le Atua ia te a’u e ala mai i upu a lo’u afafine: O le a opo i tatou e Iesu ma faamanuia i tatou i taimi o o tatou tofotofoga pe afai tatou te faatagaina o Ia. O nei faamanuiaga e oo mai e tusa ai ma Lona taimi tatau, ala, ma le finagalo, ae e oo mai lava. Ou te iloa nei upumoni ona sa fesoasoani le Agaga Paia ia te a’u e lagonaina i latou i totonu o le potu o Hope i lena po faigata.”2
Palanikeke Saogalemu, saunia e David Bowman, e lē mafai ona kopiina
Filemu ia Keriso
Ou te fiafia e ta’u atu e faapea na taliina le faatuatua ma tatalo a le aiga o Gentile. O le asō, o Hope o se tamaitiiti maloloina fiafia e 10 tausaga le matua.
Ae faapefea na taimi na tali ai le Atua ae lē o le mea lea sa tatou faamoemoe i ai? E mafai ona oo mai le filemu i le lotolotoi o le lototiga faaletagata lava ia?
E pei ona mauaina e le aiga o Gentile, e maua lava le filemu i taimi uma tatou te liliu atu ai i le Faaola, o lona soifua mai i Peteleema tatou te faamanatuina ai lenei vaitau. I le taimi o le Kerisimasi, pe a tele ina faavaivaia e tofotofoga faaletagata lava ia, faanoanoaga, ma ma’i a tatou fiafiaga o le Kerisimasi, o la tatou molimau i le soifua mai o le Faaola, maliu, ma le Toetu e maua ai le filemu.
Na aoao i tatou e lo tatou perofeta pele o Peresitene Russell M. Nelson: “E pei lava foi ona ofo mai e le Faaola le filemu lea e ‘silisili lava i mea uma e manatu i ai’ [Filipi 4:7], Na Ia ofoina mai foi le malosi faateleina, loloto, ma le lautele o le olioli lea e tetee ai i tulaga faaletagata po o le malamalama faaletino. Mo se faataitaiga, e lē mafai ona e lagona le olioli pe a mafatia lau tama i se ma’i e leai se togafiti, po o ua leai sau galuega po o ua faalata oe e lou toalua. Peitai o le olioli tonu lava lena o loo ofoina mai e le Faaola. O Lona olioli e faifai pea, ma faamautinoa mai o tatou ‘puapuaga o le a na o sina taimi laitiiti’ [Mataupu Faavae ma Feagaiga 121:7] ma faapaiaina mo lou manuia [tagai 2 Nifae 2:2].”3
Pe a fetalai mai le Alii i le mafanafana i o tatou agaga, e mafai ona tatou auai faatasi ma “au mai le lagi e toatele, ua viviii i le Atua, ua faapea ane, O le viiga i le Atua i mea aupitoaluga; ma le manuia i le lalolagi; o le finagalo alofa i tagata” (Luka 2:13–14).
E mafai ona tatou “o mai … o mai fiafia … i Peteleema.”4
E mafai ona tatou “moe lelei ia oe,”5 ma le iloaina, i le iuga, o le a lelei mea uma ma faia ia sa’o e tusa ai ma folafolaga ma le taimi e tatau ai, ala, ma le finagalo o le Atua.
Agavale: O Hope i le mavae ai o lana togafitiga lona fa o le kimo ia Iuni 2015. Taumatau: O Hope i le iva tausaga le matua.
O Le Meaalofa o le Alofa
E silafia atoatoa e le Tama i tatou taitoatasi—o tatou tofotofoga ma lē atoatoa, o o tatou faanaunauga ma mea ua leiloloa. Ona e alofa o Ia ia i tatou, ua Ia tuuina mai ai ia i tatou le meaalofa silisili e mafai ona tatou mauaina.
“Auā ua faapea lava ona alofa mai o le Atua i le lalolagi, ua Ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).
Ona e faapena foi ona alofa le Alo ia i tatou, o lea na Ia tuuina mai ai ma le loto i ai Lona soifua mo i tatou.
“[O le Alo] e lē faia e ia se mea vagana ai ua mo le manuia o le lalolagi; ona ua alofa o ia i le lalolagi, e oo ina tuuina mai e ia lona lava soifua ina ia mafai ona ia tosina mai o tagata uma ia te ia,” na vavalo ai Nifae e uiga i le Faaola. “O le mea lea, ua lē poloaiina ai e ia se tasi ia latou lē taumamafa i lana faaolataga” (2 Nifae 26:24).
I le avea ai ma soo o le Faaola i aso e gata ai, ua ia i tatou le tiutetauave ma le faamanuiaga e faasoa atu le alofa o le Tama ma le Alo mo i tatou. Tatou te faasoa atu lena alofa a o tatou molimau atu i fanau a le Atua e uiga i le malamalama taua ua tatou maua e faapea o loo soifua le Atua, na afio mai Lona Alo i le lalolagi e laveai i tatou mai le oti faaletino ma le faaleagaga, ma i o tatou aso ua toefuatai mai ai e le Faaola Lana Ekalesia—O Le Ekalesia a Iesu Keriso o le Au Paia o Aso e Gata Ai.
O le meaalofa o le Alo Pele e Toatasi o le Atua o le mafuaaga lea tatou te faamanatuina ai le Kerisimasi. O le Kerisimasi o lona uiga o le faamoemoe tumau ma le filemu ua mafai ona maua e ala i le Togiola ma le Toetu a le Faaola na faia ona o le alofa mo i tatou. O le Kerisimasi o lona uiga o le ola e faavavau ma faatasiga e faavavau ua mafai ona o sauniga paia e faatinoina i malumalu paia.
“O le mafuaaga autu tatou te faamanatu ai le Kerisimasi ona o le Eseta,” na saunoa ai Peresitene Nelson. Sa ia faaopoopo mai, “Ona o Iesu Keriso, ua mafai ai ona tatou salamo ma faamagaloina a tatou agasala. Ona o Ia, o le a toetutu ai i tatou taitoatasi.”6
Tatou te faitau i tala paia i le Feagaiga Fou o le soifua mai o le Faaola. O lenei tala o loo i le totonugalemu o le tele o a tatou tu masani o le Kerisimasi e sili ona fiafia i ai. Peitai, a o tatou faamanatuina Lona soifua mai, ia aua nei galo ia i tatou a aunoa ma Lona Toetu ma le Togiola, o le a tatou lē maua le Kerisimasi.
O loo molimau mai le Tusi a Mamona i le moni o le Keriso toetu faapea foi le tamaoaiga ma le loloto o le mataupu faavae a Keriso. I le vaitau o le Kerisimasi, o i latou o e faaaogaina upumoni e uiga ia Keriso o loo maua i totonu o ona itulau o le a faaopoopo atili ai le uiga i faafiafiaga o le Kerisimasi a o latou aiga.
Ou te iloa ona o le alofa o le Faaola ma le matafaioi autu i le ata o le faaolataga, ua mafai ai ona tatou maua Lona filemu (tagai Ioane 14:27) ma “se faamoemoe lelei sili atu” (Eteru 12:32)—i le vaitau o le Kerisimasi ma taimi uma.