2023
Auauna atu ma le Agaalofa
Iuni 2023

“Auauna atu ma le Agaalofa,” Liahona, Iuni 2023.

Mataupu Faavae o le Auaunaga

Auauna atu ma le Agaalofa

O le atiina a’e o le agaalofa i isi e fesoasoani ia i tatou e tauave ai avega a le tasi ma le isi.

Ata
Ata vitio o le Tusi Paia o le Faaola o loo talanoa ma se tagata matua atu

O Se Faataitaiga o le Agaalofa

I le taimi o le Faasatauroga o le Faaola, sa i ai se vaega o i latou o e sa alolofa ia te Ia sa nonofo i vae o le satauro. Faatasi ai ma i latou sa i ai iina ia Lona tina, le uso o Lona tina, o Maria le Makatala, ma Ioane. Oka se tulaga faigata mo i latou o e alolofa tele ia te Ia. E ui ina sa lē mafai ona latou tuumamaina o Ia i Ona puapuaga, ae sa latou tuuina atu o latou taimi, alofa, ma le lagolago, e ui lava atonu sa lē lagolelei, faigata, ma atonu foi e matautia.

O nisi o nei tamaitai sa tumau pea ia te Ia seia oo i le iuga ma faaauau pea ona auauna atu e ui lava ina ua maliu o Ia e ala i le sauniaina o Lona tino mo le tanuga i laau ma ie moega. (Tagai i le Mataio 27:55–56; Mareko 15:40–41, 47; Luka 23:55–56; Ioane 19:25–27.)

Auauna atu ma le Agaalofa

O le agaalofa o se iloa agalelei lea o le “faanoanoa o isi faatasi ai ma se manao e tuumamaina.”1 I le avea ai ma tagata soifua, o le a tatou oo i le faanoanoa. O le mea moni, o i latou tatou te auauna atu i ai o le a i ai luitau, ma o nisi atonu o loo mafatia moni lava.

Na saunoa mai Elder Neal A. Maxwell (1926–2004) o le Korama a Aposetolo e Toasefululua, “Pe afai, mo se taimi, e le o faaloaloa atu i tatou lava i luga o se satauro faapitoa, e tatau ona tatou i ai i vae o se isi tagata—e tumu i le tigaalofa ma ofo atu le faamamaina faaleagaga.”2

Atonu e foliga taufaafefe le galuega, aemaise lava pe afai o i latou tatou te auauna atu i ai o loo feagai ma se tofotofoga mamafa. A i ai se auala e tuumamaina ai mafatiaga, tatou te faia le mea sili tatou te mafaia e fesoasoani atu ai. Ae i nisi taimi, atonu e itiiti lava ni mea e mafai ona tatou faia. O le na o le vaai atu i ai, e pei ona sa faia e Maria, e mafai ona faigata. Ae tusa lava pe lē mafai ona tatou tuumamaina puapuaga, e mafai lava ona tatou i ai iina i le lotolotoi o lena mea, e ofo atu lo tatou alofa ma le lagolago.

E ui o le toatele e lē mananao ia misialofa atu, o le toatele e talisapaia le malamalama agaalofa ma le lagolago pe a i ai taimi faigata.

Ata
lima o loo aapa atu i se alii o loo faanounou lona ulu

Atiina A’e o le Agaalofa

A oo ina tatou iloa le Faaola, o le a sili atu ona tatou malamalama i le auala Na te tuuina mai ai le alofa mutimutivale ia i latou uma o ē omai ia te Ia. E mafai faapefea ona tatou atiina ae lenei uiga faa-Keriso i o tatou olaga?

  1. Suesue tala ia na faaalia ai e le Faaola le agaalofa. I lea taimi ma lea taimi, sa Ia faaalia le agaalofa e ui lava ina sa lelava pe pisi o Ia. Mafaufau pe o a ni Ona lagona ia i latou sa Ia fesoasoani i ai.

  2. Manatua ni taimi na faamafanafanaina pe lagolagoina ai i tatou e isi i o tatou tofotofoga. E mafai ona fesoasoani lenei mea e atiina ae ai le agaalofa ma manatua ai auala e mafai ona tatou lagolagoina ai isi.

  3. Anapogi ma tatalo mo le agaalofa faateleina ma ole atu mo le taitaiga po o a faatinoga e mafai ona tatou faia e faaalia ai lo tatou alolofa ma le popole.

  4. Taumafai ia iloa isi ma malamalama lelei i o latou tulaga. A o tuputupu ae lo tatou malamalama ma le agaalofa, e faapena foi a tatou fegalegaleaiga, avea ma faauooga o le a anoa ma tumau.

  5. Faataitai ona iloa tulaga o isi e ala i le fesili ifo ia te oe lava i fesili e pei o le, “O le a se mea e ono faigata i le olaga o lena tagata i le taimi nei?” “O le a so’u lagona pe ana ou i ai i le tulaga o lena tagata?”

  6. Faataitai ona iloa pe a e tuuitiitia pe faate’aese mafatiaga o se isi tagata. Pe a vave ona tatou faateaeseina puapuaga o se tasi, tatou te lē faatagaina i tatou lava ia maua se taimi e faagaeetiaina ai ma le agaalofa.