BWEBWENATO KO AN IJO JOKWE IE
Kattar Kōjeram̧m̧an ko Irooj ekar Kallim̧ur Kaki
Aulola Mateialona ekar ļotak im rūttoļo̧k ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ekar rūttoļo̧k ippān rittōmak ro jibūn im jim̧m̧aan ilo Ha’alaufuli, Vava’u, Tonga im ekar peptaij ke ej ralitōk iiō drettan. Aulola ekar tokālik kadiwōjļok jān Liahona High School, juon jikuuļ an Kabun̄ in.
Ke ekar 15 an iiō, Aulola ekar bōk kōjeram̧m̧an an petriak, eo ekar kallim̧ur bwe n̄e enaaj pād wōt ilo an m̧ool n̄an bujen ko an ippān Anij, enaaj kar m̧are ilo tampeļ. Ekar jab m̧ae jet iiō ko tokālik, ilo an kar kōpopo n̄an etal im mijen, bwe Aulola ekar likio an meļeļe jon̄an ļap in kōjeram̧m̧an eo kar kallim̧ur kake. Ilo jinointata in an kab baj etetal ilowaan Nuku’alofa Tonga Tampeļ, ekar obrak kōn ikdeelel n̄an juon raan jepļaak ippān eo karejeran indeeo im n̄an liāp n̄an e ilo jikin eo ekwojarjar.
Kōņaan eo an Aulola, mekarta, ekar jab ļoor karōk eo ilo būruōn. Ālkin mijen eo an, ekar bōk jet iien m̧okta jān an kar likūt m̧are bwe en men eo eaorōk tata n̄an e, innem kiiō ekar pād ilo juon iakwe ippān juon eo eoktak tōmak eo an jene.
“Ej juon likao em̧m̧an,” Aulola ekar ba. “Aolep iien ej karuwaineneik mijinede ro jān [Kabun̄ eo aō] n̄an m̧weo im̧ōm im naajdik er aolep iien, bōtaab ekar jab ikdeelel n̄an eo̧ron̄ ennaan eo aer.” Baam̧le eo an rekar membōr ro reniknik ilo tōmak eo aer make, im ekar jab kōņaan rubwe imminene eo aer. Oktak eo aer ilo kabun̄ ekar kōm̧m̧an lokjak eļap ilo mour in m̧are eo aerro. Aulola ekar jab maron̄ ikutkut an etal n̄an kweilo̧k ko an kwojkwoj eo, im ekar jab maron̄ karrūtoļo̧k ajri ro nejin ilo Kabun̄ in ilo jekjek eo ekar rūttoļo̧k ie. Āliktata, iakweelel eo ilo m̧weo m̧weer ekar alikkar. Ālkin 23 iiō, ripālele rein rekar kālet n̄an jepel.
Aulola ekar rūb būruon. Em̧ōj an jako m̧are eo an, ippānļo̧k, kōjatdikdik eo an kōn ilju im jekļaj ippān baam̧le eo an, ak ekar barāinwōt en̄taan kiiō jān m̧ōjno ko kōn nan̄inmej ko an. Kōn būrom̧ōj im metak eo an, ekar oktakļo̧k n̄an Jemān Ilan̄ n̄an bōk tōl. “Ikar jitlo̧k im jar, im ikar kallim̧ur n̄an Irooj bwe eļan̄n̄e Enaaj bar wōnm̧aeiki eō bar juon alen, ijjāmin bar oktak likļo̧k.”
Jar ko an reļakkar bōk e likļo̧k n̄an kōjeram̧m̧an an petriak eo an, eo ekar boktok kainem̧m̧an im ineem̧m̧an ilo iien kain rōt in epen. Juon raan, ekar bar riiti kallim̧ur eo bwe enaaj kar liāp ilo tampeļ, im Aulola ekar jeļā ta eo aikuj in kōm̧m̧ane. “Ikar kile bwe eļan̄n̄e ijab kōm̧m̧ane ijo koņaaō, eban jerbal.” Ilo iien eo, ekar kōkāāl kallim̧ur eo an n̄an ļoor aolepān kien ko an Jemedwōj Ilan̄, im kepaakeļo̧k E n̄an kobaļo̧k n̄an jikin jar, jar im ekkatak jān jeje ko rekwojarjar aolep raan.
Ekar jab to, Aulola ekar bar ekkōnono ippān ro ekar jeļā kajeer m̧oktaļo̧k ilo raan ko an ilo Tonga: Brother Semisi Mounga Mateialona, juon rikabwijer priesthood eo im ej kab bar jepel. Rekar ejaake juon jemjerā jān aer kwaļo̧k en̄jake ko aer im iakwe eo aer n̄an gospel eo an Jisōs Kraist, im Aulola ekar jeļā ilo būruon bwe en̄in ej likao eo ekkar n̄an e. Rijerā rein rekar m̧are ilo New Zealand ilo 2019 im ilo jem̧ļo̧kin Jeptōm̧ba 2022, rekar etal n̄an Nuku’alofa Tonga Tampeļ eo n̄an liāp n̄an doon n̄an indeeo.
Ilo juon iien tampeļ fireside jidik iien remootļo̧k ilo Auckland Papatoetoe Stake, Aulola ekar ļōmņak likļo̧k kōn ta eo ej ba bwe ej juon menin bwilōn̄. Āinwōt juon jiron̄, em̧ōj an kar ioon im en̄jake em̧m̧an in ekwojarjar eo an tampeļ im ekar jeļā wāween an aorōk n̄an kabun̄ jar ijo. Innem, ilo 23 iiō ko, ekar jab jeļā eļan̄n̄e enaaj kar maron̄ tōprak n̄an kōjeram̧m̧an ko an tampeļ kar kallim̧ur n̄ane ilo kōjeram̧m̧an an petriak eo an . . . bōtaab ekar jab jem̧ļo̧k an kōjatdikdik.
Ekar bōk iien, kijenmej im kain tōmak eo me ej ukōt mour, ak tōrein Aulola ej en̄jake an m̧ōj an bar jepļaaktok. Kiiō, emaron̄ kwaļo̧k kam̧ool : “N̄e kwoj pād epaake Anij, E enaaj kōjeram̧m̧an eok āinwōt An kar kallim̧ur . . . eļan̄n̄e kwonaaj kōm̧m̧ane ijo koņaam̧.”