Jerbal in Karejar kōn Kōjatdikdik im Tōmak

Ilo ad kōjparok bujen ko ad kōn tōmak, jemaron̄ jipan̄ tōl ro jet n̄an Unjen eo an kōjatdikdik.

Pija

kōrā eo ej jibwe nuknuk eo an Jisōs

Juon Waanjon̄ak in Kōjatdikdik im Tōmak

Ilo Gospel eo an Mark, jej riit kōn juon bwebwenato eim̧we kōn “juon kōrā eo ekar nan̄inmej in to̧o̧rļo̧k kōn bōtōktōk ium̧win jon̄oulruo iiō.” Jej jeļā bwe liin “ekar en̄taan kōn elōn̄ rū wūno, im ear aji m̧weien otemjej, im e jab mour ļo̧k, a ej doorlaļļo̧k” (Mark 5:25–26).

Jon̄oulruo iiō ej juon tōre aetok n̄an en̄taan. Men otemjeļo̧k ekar ļap joļo̧k n̄ani. Im liin ekar nana ļo̧k wōt an pād. Eļan̄n̄e ewōr juon en kar wōr an jim̧we n̄an en̄jake ejjeļok kōjatdikdik, en kar liin.

Aaet, “ke ear ron̄ kōn Jisōs, [ej] itok ilo bwiljin jar eo [ilo̧kōn], im jibwe un̄n̄ūr kopā eo An” kōn an tōmak, “Eļan̄n̄e I naaj un̄n̄ūr wōt jidik nuknuk ko An, I naaj mour.”

Mark ej je bwe kōn tōmak eo an, “e m̧ōaj an m̧ōrā unin bōtōktōkin, im ej en̄jake ilo ānbwinnen bwe ej mour jān nan̄inmej eo an” (Mark 5:27–29).

Kōjatdikdik im tōmak eo an kōrā in ilo Jisōs ekar uwaake kōn juon kōjeraam̧m̧an. “Im E ba n̄an e, Nejū, am̧ tōmak ear kemour eok; kwōn ilo̧k aenōm̧m̧an, im mour jān am̧ nan̄inmej” (Mark 5:34).

Ilo jabdewōt apan̄, jekdo̧o̧n jon̄an ak aetokin, kōjatdikdik ej menin aikuj. Mijak im ebweer emaron̄ kūnōōr laļļo̧k kōj. Ak kōjatdikdik im tōmak ilo Jisōs Kraist rej bōk An kajoor im kōjeraam̧m̧an ko n̄an mour ko ad.

Kōjerbal Kōjatdikdik im Tōmak ilo Jerbal in Karejar

Āinwōt jein im jatin m̧aan im kōrā an jerbal in karejar ro, jenaaj aikuj in bar kūr ioon ejja kōjatdikik im tōmak in wōt. Jerbal in karejar emaron̄ jimor ilo nōbar im apan̄. N̄e juon eo jej kōņaan jipan̄ e ejjab kōņaan, emaron̄ in pidodo an jako kōjatdikdik. Bōlen kwomaron̄ ioon jekjek in kiiō ippān baam̧le eo, eo m̧ōttad, ak juon eo kwaar ijjitōn̄ n̄an jipan̄. Bōlen, āinwōt kōrā eo eaar to̧o̧rļo̧k kōn bōtōktōk, Irooj wōt ejeļā jon̄an iien im kijejeto ko kwaar juļo̧kki n̄an kajjieon̄ pukot ro rej aikuj jipan̄. Ak āinwōt kōrā in, n̄e jenaaj lo kōjatdikdik n̄an etal wōt kōn tōmak, kajoor eo an Rilo̧mo̧o̧r emaron̄ kōm̧m̧an juon oktak.

Jet iien apan̄ eo n̄an jerbal in karejar n̄an ro rej apan̄ ippāer make n̄an en̄jake jidik kōjatdikdik n̄an kōjerbal tōmak. Ewōr ro me, āinwōt kōrā in ilo Mark, maron̄ ioon nan̄inmej ko reļļap, apan̄ ko an jāān, ak jabdewōt jon̄an apan̄ ko. Jeļā bwe rejjab make ļo̧k kōn apan̄ ko aer emaron̄ in juon unjen ekajoor kōn kōjatdikdik. Jemaron̄ jipan̄ er lo kōjatdikdik in ilo ad kwaļo̧k ad kōņaan ineek eddo ko aer, jan̄ ippāer, kaenōm̧m̧an er, im jutak āinwōt rikam̧ool ro an Anij (lale Mosaia 18:9–10).¹

Pija

ruo kōrā rej riiti juon māākjiin ippān leddik eo

Kōļapļo̧k Kōjatdikdik im Tōmak

Ekōjkan ad ejaak m̧wil eo m̧wilin Kraist ilo kōjatdikdik im tōmak? Erkein rej jet ļōmņak ko:

Elder Dieter F. Uchtdorf jān Doulul eo an Jon̄oul Ruo Rijilōk ro eaar kwaļo̧k bwe kōjatdikdik ej lōke bwe Jisōs Kraist enaaj kakūrm̧ool kallim̧ur ko An n̄an eok.² Kōnke “kōjatdikdik ej juon menin letok eo an Jetōb Moronai 8:26],”³ ej juon men eo jemaron̄ jake kake (lale Katak im Bujen Ko 46:7–9).
Būreejtōn Russell M. Nelson ekar kwaļo̧k bwe kōļapļo̧k tōmak ebōk jerbale. Ekar kwaļo̧k ekōjkan ad maron̄ kōļapļo̧k ad tōmak ilo ekkatak, kālet n̄an tōmak, jerbal kōn tōmak, bōk kain̄ ko rekwojarjar ilo erreeo, im kajjitōk ippān Jemedwōj Ilan̄ n̄an jipan̄.⁴