Lokol Pej
Ol Ae we I Lukluk Nomo long Laet blong Tempol
Long Naet, skae i tudak mo Kwins Rod, we i go long Suva, Fiji, i laet nomo long ol laet blong trak we oli stap kam. Samtaem, rod ia i luk olsem se bae i lus long tudak ia, mo i had blong luk wanem i stap long fored. Be, long kona nomo, i gat wan naesfala laet we i kamaot antap long hil, olsem we heven i kam aot. Naesfala laet ia blong Suva, Fiji Tempol blong Jos Ia blong Jisas Kraes blong Ol Lata-Dei Sent i pulum ol ae blong ol man we oli stap travel blong lukluk i go antap mo singaotem evriwan blong go antap blong kamaot long tudak ia mo go long laet.
Ol memba blong Sigatoka Branj oli bin glad tumas blong go long Suva, Fiji Tempol long moning ia long Ogis 2022. Long ol memba blong Jos, tempol i wan tabu ples blong wosip, wan ples blong pis mo revelesen, wan ples blong oli filim kolosap moa long Papa long Heven mo Jisas Kraes. Hem i ples we oli mekem ol tabu odinens mo ol famli oli joen tugeta—i no kasem ded i seraotem olgeta, be hem i blong wan taem we i no save finis.
Long Febwari 2022, Branj Presiden blong Sigatoka (wan jos lida) i askem Sista Basilisa Nadreke Lotawa blong i givim seves long tempol mo lukaotem famli histri. Wok blong Basilisa i blong talem strong long kongregesen blong hem blong leftemap ol ae blong olgeta long saed blong spirit blong lukluk i go long laet blong tempol mo rere long olgetawan long tempol wosip. Hem i mas lanem tu olsem wanem blong stap lukaotem ol bubu mo afta tijim ol Sent blong olsem wanem blong luksave ol bubu blong olgeta we oli ded finis, blong mekem se oli save tekpat blong mekem wok long bihaf blong olgeta we oli ded finis, mo mekem ol tempol odinens long bihaf blong olgeta we i ded finis.
Basilisa, i wan yang mama blong tri pikinini, i seksekem hed blong hem mo i laf. “Mi no save wan samting abaot olsem wanem blong mekem famli histri—mi no save wan samting . . . mo mi yang tumas blong mekem hemia.” Be hem i wantem blong givim seves i go long Lod, hem i askem help long wan we i gat eksperiens long saed blong stap lukaotem ol bubu mo i no longtaem, hem i bin save helpem ol memba long branj blong hem. Wetem niufala strong tingting ia mo lav from famli histri, Basilisa i talem: “Mi gat blesing ia mo ona ia blong tekpat long naesfala wok ia. !Hem i naes mo gud tumas! Mi bin luk ol merikel mo ol sapraes. Lod i bin mekem wan wei blong mi mekem wok ia mo helpem branj blong mi.”
Wetem ol yangfala pikinini blong hem we oli folem hem, Basilisa i spendem plante aoa long kompiuta long japel, blong hem i stap helpem ol narawan long ol narafala branj wetem ol famli tri blong olgeta. Hem i invaetem olgeta—ol adalt mo yut—blong faenem faef memba blong famli we oli ded finis we oli nidim blong mekem baptaes long bihaf blong olgeta. !Ol memba long Branj oli faenem glad ia we hem tu i gat blong mekem wok ia mo oli faenem tu handred nem blong ol bubu blong olgeta!
Long 2 klok long moning long 27 Ogis 2022, ol memba blong Sigatoka Branj oli jiam long wan bas blong go long Suva tempol. Eli stat ia i no daonem spirit blong olgeta. Glad blong olgeta oli save filim taem oli kasem tempol graon—oli rere blong tekpat long ol odinens long bihaf blong ol bubu blong olgeta we oli ded finis, mo ol nara odinens blong olgetawan.
Hem i bin wan spesel dei blong glad long Martiano Ratumeli, we i Branj Presiden blong Sigatoka. Hem mo waef blong hem mo tufala pikinini boe blong tufala i joen insaed long tempol olsem wan famli we i no save finis, tru long paoa mo atoriti we olgeta skripja oli singaotem, “siling paoa”. Presiden Ratumeli, i talem wetem wota blong ae we i fulap: “Hem i naes tumas blong talem se mi glad tumas se mi mi wan long olgeta ia we i gat blesing ia blong sil insaed long tempol. Mi no ting se bae i hapen . . . se bae branj bae i stap wetem mi, be Lod i planem se bae olgeta i witnesem siling ia. Gol blong mi i blong givim insperesen long ol narafalawan blong kam. Mi filim i gud tumas mo gat blesing ia se famli blong mi i save stap blong wantaem we i no save finis.” Ol narafala memba blong branj oli sapraes taem oli “filim Spirit” mo “filim ol memba blong famli blong olgeta i stap.”
Be blong Basilisa, i nogat wan tu tingting long lav blong hem long tempol mo famli histri wok—iven long bisi laef blong hem, bae i gohed blong blesem hem. Hem i talem: “Mi filim semmak glad ia taem mi stap mekem [wok] ia, semmak olsem taem mi stap givim seves long misin blong mi.” Hem mo branj blong hem naoia ol ae blong olgeta i lukluk nomo i go long tempol.