“Wok blong Givhan Wetem Hop mo Fet,” Liahona, Maj. 2023.
Ol Prinsipol blong Wok blong Givhan
Wok blong Givhan wetem Hop mo Fet
Taem yumi kipim ol kavenan blong yumi wetem fet, yumi save help blong lidim ol narawan i go long Sos blong hop.
Wan Eksampol blong Hop mo Fet
Long gospel blong Mak, yumi lanem abaot stori blong “wan woman, we hem i gat sik blong woman we sik ya i stap long hem oltaem gogo kasem twelef yia, we i no finis nating.” Yumi lanem se hem i “stap harem nogud tumas. Hem i pas long plante dokta finis, i lusum ol mane blong hem, be sik ya i no godaon nating i stap kam mowas” (Mak 5:25–26).
Twelef yia i wan longfala taem blong stap safa. Evri samting i tumas samting blong spendem. Be sik i kam mowas. Sapos eniwan i filim se i no moa gat hop, hem i woman ia nao.
Yet, “taem hem i harem nius blong Jisas, [hem] i kam wetem ol man ya we oli biaen long [hem], i pusum han blong hem i tajem klos blong hem,” from hem i stap tingting se, “Sapos mi save tajem klos blong hem nomo, bambae sik blong mi i finis ia.”
Mak i ripotem se from fet blong woman ia, “wantaem nomo blad blong hem i nomo ron; mo hem i save we sik blong hem i finis” (Mak 5:27–29).
Ansa blong hop mo fet blong woman ia long Jisas i wan blesing. “Nao Jisas i talem long hem se, Dota blong mi, bilif blong yu i mekem yu yu gud bakegen; yu go yu nomo wari bakegen, sik blong yu i finis nao” (Mak 5:34).
Long eni jalenj, nomata long wanem saes o tekem longfala taem, i rili nidim hop. Fraet mo lusum hop i save mekem yumi paralaes. Be hop mo fet long Jisas Kraes i invaetem paoa mo blesing blong Hem insaed long laef blong yumi.
Stap Praktisim Hop mo Fet long wok blong givhan
Olsem ol givhan brata mo sista, yumi nidim blong gat sem hop mo fet ia. Wok blong givhan i save kam tugeta olsem blesing mo jalenj. Taem wan we yumi wantem blong helpem i no wantem help blong yumi ,i mekem yumi save lusum hop isi nomo. Maet yu stap fesem situesen ia naoia wetem wan famli memba, wan fren, o wan man we oli asaenem long yu blong helpem hem. Maet olsem woman ia we i gat sik blong woman, Lod nomo i save hamas taem mo efot yu spendem traem blong faenem samting we i save help. Be olsem woman ia, sapos yumi faenem hop blong gohed blong go aot wetem fet, paoa blong Sevya i save mekem wan jenis.
Samtaem jalenj long wok blong givhan i olgeta we oli stap traehad blong filim hop inaf blong eksasaesem fet. I gat sam olsem woman ia long Mak, maet oli fesem siknes we i stap blong wan longfala taem, problem long saed blong faenens, o plante hadtaem we i tumas nomo. Blong save se oli no olgetawan blong stap traehad i save stap olsem paoa blong givim hop. Yumi save helpem olgeta blong faenem hop ia taem yumi soemaot se yumi wantem blong karem ol hadtaem blong olgeta, krae wetem olgeta, kamfotem olgeta, mo stap olsem witnes blong God (luk long Mosaea 18:9–10).1
Developem hop mo Fet
?Olsem wanem yumi save developem ol fasin we i olsem hemia blong Kraes? Hemia samfala tingting:
-
Elder Dieter F. Uchtdorf blong Kworom blong Olgeta Twelef Aposol, i bin tijim se hop i blong trastem se Jisas Kraes bae i fulfilim ol promes blong Hem long yu.2 From se “hop i wan presen blong Spirit [luk long Moronae 8:26],”3 i wanem we yumi save prea from (luk long Doktrin mo Ol kavenan 46:7–9).
-
Presiden Russell M. Nelson i tijim se blong fet i gro i nidim wok. Hem i serem olsem wanem yumi save mekem fet blong yumi i kam antap tru stadi, jusum blong bilif, wok long fet, stap klin inaf blong tekem ol tabu odinens, mo askem Papa long Heven blong help.4