ITULAU I LE LOTOIFALE
Faatupula’ia le Faatuatua ma Isi Mea Lelei i KiriPati
O le fesoasoani atu ia i latou o iai i tauiviga o le galuega lea a le Faaola ma o se avanoa maoae ma se faamanuiaga e fesoasoani ai ia te Ia.
E lē tau vaai mamao atu se tasi e sailia i latou o manaomia le fesoasoani ma o se faamoemoega o le Ekalesia a Iesu Keriso o le Au Paia o Aso e Gata Ai le fesoasoani atu i fanau uma a le Atua i le auala e auauna ai Keriso.
E saili le Ekalesia e auai i poloketi e ofoina atu ai le siitia i “luga o lima” lea e faamalosia le ola faalagolago o le tagata ia te ia lava, auai ma le faatumauina.
O lea ituaiga o poloketi e faaauauina pea i le motu o le Pasefika o Kiripati.
O Tamana Natanaera, o le pule faale-lotoifale o le ola faalagolago o le tagata ia te ia lava mo le Ekalesia a Iesu Keriso o le Au Paia o Aso e Gata Ai, sa tuuina i ai se galuega i le sailia o tagata lotu e iai ni tomai faitogalaau ma se faananau mo le faaolaolaina o ni mea.
I le galulue faatasi ai ma taitai faale-lotoifale o le Au Paia o Aso e Gata Ai, sa fesoasoani ai Tamana e faailoa ni tagata lotu agavaa se toafitu ua ia faatatau i ai o ni “siamupini.”
O siamupini taitasi sa tuuina i ai se meafaigaluega e faatuina ai se faafailelega o laau e faatatau ia ofi i se avanoa ua iai.
O se falelaau meamata faigofie sa tuuina atu e taofi ma puipuia ai fata o fatu laau, faapea foi ona ofaina atu le paolo a o manaomia. O fatulaau sa saunia mo le faaolaina o fualaauaina maloloina e pei o kukama, isaraelu, pepa meleke, kapisi, tamato, meleni, esi ma meleni papa.
O se faatulagana o le vai o se faiga patino alagatatau i Kiripati. E ui lava o le 33 motu laiti e aofia i le atu Kiripati e salalau atu i le 3,500,000 sikuea kilomita o vai o le vasa, o le suavai fou e utiuti lava.
O siamupini sa saunia i ai se faatulagana o vai e aofia ai se pamu e alu i le la e mimitiina a’e vai mai se vaieli, o se tanevai ma se tulaga, ma se faatulagana o paipa.
Sa matauina e Tamana Natanaera o faatulagana o vai sa tuuina i siamupini o se fesoasoani tele auā sa “faaleleia atili ai lo latou gafatia e gaosia mea e sili atu.”
Faatasi ai ma nei meafaigaluega talafeagai, sa mafai e faitogalaau siamupini ona faatino la latou vaega. Mo le lua nei o tausaga, sa o latou totoina ia fatu i totonu o apa laau laiti ma faafailele i latou.
Pe afai ua saunia fatu faamili mo le siiina atu i se togalaau, ona amata ai lea ona faasoa atu e siamupini i tuaoi ma uo. Latou te ono fesili atu i taitai faale-lotu e faasilasila atu i a latou faalapotopotoga o loo maua fatulaau toto. Latou te ono tuuina atu foi fatulaau toto mo le faaolaina o a latou lava fualaauaina.
O siamupini Koruea Kaburara sa ia taumateina o ia ma lona toalua ua fesoasoani atu i le tusa ma le 100 tagata i masina taitasi. E matuā faaeteete lava o ia i le leoleoina o i latou e tuuina atu i ai ana fatulaau toto i le saunia lea o faatonuga ma le taitaiga.
O nisi taimi na te fesoasoani ia i latou i le tuuina atu o palapala poo faapalaga na te gaosiaina.
E tuuina atu e Koruea ana laau mu’amu’a ia i latou e moni lo latou naunautai e mulimuli atu. “E toatele tagata lotu e omai ia te a’u ma faapea foi tagata i la’u galuega ma lo’u nuu. Ou te lagona le fia fesoasoani ia i latou uma. Latou te fiafia e maua laau.”
Pe a iai ni fatulaau toto a siamupini e totoe, latou te sii atu i latou i a latou lava togalaau mo lo latou faaogaina pe latou te faatauina foi a latou fualaauaina faasili i tuaoi.
Ua mafai e Koruea ona fafaga lona aiga ma faatupuina se tupe maua faaopoopo e ala i lana pulega atamai. Ua faafetai ona tuaoi ina ua mafai ona faatau mai mai ia te ia fualaau faisua fou. O le faatulagaga foafoa ua faamanuiaina ai i latou uma na aafia ai ma e mafai ona faatumauina.
O le Ekalesia a Iesu Keriso o le Au Paia o Aso e Gata Ai o le a saunia fatulaau mo siamupini mo le toe tasi le tausaga ma i le faaiuga o lena piriota, o le aufaitogalaau e ono gafatia ona gaosia a latou lava fatulaau ina ia faatumauina ai le faaolaina ma le faasoaina o fatulauu toto. O le polokalama o le a faaauauina ona faamanuiaina ai le toatele o tagata i alalafaga o Kiripati.
O lenei poloketi ua lē na o se faataitaiga o le faaolaina o fatulaau toto, ae o le faaolaina foi o le ola faalagolago o le tagata ia te ia lava, le agaga faale-lotoifale ma faauoga faale-tuaoi. O le faavae o nei mea uma o se faatuatua tuputupu a’e—i tagata auai e toatele—ia te Ia o lē sa foafoaina mea uma, ma tausi mo Ana fanau taitoatasi.