ITULAU I LE LOTOIFALE
O Se Vavega o Ona Po Nei Ua Maua Se Faifeautalai
O le tau’amataga o le tausaga ua te’a, sa talosaga ai Elder Allistair B. Odgers i peresitene o siteki e faatuina se sini mo le aofai o faifeautalai faamisiona o le a o matou maua e auauna atu ia Tesema 2022.
I le maea ai o le tele o tatalo ma anapogi, sa ou faatuina se sini lea o le a faatelēina i matou o se siteki; o se sini lea e manaomia ai se faatuatua maoa’e ma aumaia ni aafiaga faapitoa faaleagaga ma vavega i olaga o tagata lotu. Sa ou iloa le aofai o faifeautalai faamisiona o auauna atu i le taimi nei, ma faifeautalai faamoemoeina sa o matou galulue i ai, e faamaonia le 10–12 faifeautalai e auauna atu ia Tesema. Sa musuia a’u e ofaina le 25 o se matou sini faale-siteki.
Na amata ai lava i le taimi lea ona matou fono ma o matou epikopo, peresitene o paranesi, fautua maualuga ma sui auai o le aufono a le siteki. Sa o matou valaaulia uma ina ia tutū faatasi ma sailia lena faaopoopoga e 10-15 faifeautalai matou te lē o galulue faatasi i le taimi nei. E le’i umi mulimuli ane, i le Konafesi Aoao ia Aperila, sa toe valaaulia ai e Peresitene Russell M. Nelson ia alii talavou uma, ma tamaitai talavou e filifili, e auauna atu i se misiona talai. Sa faamalosia e Peresitene Nelson i latou uma e ‘saili ma fuafua e maua vavega’ a o faateleina lo tatou malosi faaleagaga.1
Sa fesili atu Elder Odgers i peresitene o siteki i la matou fonotaga faamaopoopo, ia valaaulia epikopo ma peresitene o paranesi e valaaulia ni alii talavou se toalua e auauna atu i se misiona i vaiaso taitasi. I le talitonu ai i vavega, sa ou toe faamalosia o matou taitai e toe faafouina taumafaiga e sailia faifeautalai, sa faamamafaina o le a iai ni aafiaga patino faaleagaga ma vavega a o matou sailia musumusuga ma le taitaiga e uiga poo ai e valaaulia.
I le isi matou fonotaga na sosoo ai a fautua maualuga a le siteki, sa fai mai ai se uso ia i matou e iai ona atalii e toalua ua tatau ona auauna atu i ni misiona. O le tasi sa iai le manaoga e auauna atu i le Alii, o le isi sa le’i manao ai. O lenei atalii, o Sione, sa nofo o ia i le Iunaite Sitete, sa faia sana uo teine, ma sa fai mai na te le’i mauaina se tali i ana tatalo, pe faamata e tatau ona ia auauna atu i se misiona.
I le agaga e tasi e pei o Alema, ma loimata i ona fofoga, sa talosaga mai lenei tamā pe mafai ona matou tatalo mo Sione ina ia maua se tali mai le Alii.
E pei o tagata uma, sa faaauau ona ou tatalo ma anapogi mo lenei alii talavou.
Sa ou vave ala i le isi taeao o le Aso Toonai ma taoto ma mafaufau ina ua ou maua se aafiaga aupito ofoofogia ma lotomaualalo. O se faaaliga o Sione sa oo mai i lou mafaufau. Sa faatonuina a’u e asiasi atu ia te ia i le aso e sosoo ai, pe a mae’a faatino o’u tiute faaleaso. Sa faailoa mai lea faaaliga ma sa tuu mai ia te a’u ni fesili patino e fesili atu ia Sione. Ma sa ou faalogoina ana tali, ma pe faapefea ona ou tali atu ia te ia. Sa manino le feau ma patino.
I lena afiafi, sa tatala la’u anapogi ma tatalo mo mea uma i le faaaliga ia tumau pea ona manino ina ia mafai ona ou faamaeaina le tofiga ua tuuina mai ia te a’u.
Sa ou auai atu i le konafesi faale-uarota i le aso na sosoo ai, faatautaia nai faatalanoaga ma alu atu i la’u taavale. A o o’u alu ese mai le faletatalo, sa faamanatu mai e le Agaga lo’u tofiga. I se auala uiga ese ae faaleagaga, sa ou toe vaaia le faaaliga lea sa ou mauaina i le aso muamua.
I le taunuu atu i le fale o le aiga, sa ou tuitui i le faitotoa ma sa faailoa mai o le latou tamā o loo malaga i fafo, peitai o loo iai tinā i le fale. Ina ua sau tinā i le faitotoa, sa ou talosaga atu pe mafai ona matou feiloai ma ia ma Sione. Sa pisi o ia e kuka le taumafataga o le afiafi. Sa valaaulia a’u e tinā i totonu o le fale ma sa matou nonofo toatolu ai i le potumalolo ma talanoa.
Sa ou talosaga atu ia Sione e saunia se tatalo ma i le taimi lava lea na vave ona faailoa mai le faaaliga i se tulaga manino e pei ona iai i le aso ua mavae.
Sa ou fesili atu ia Sione po o le a sona manatu e uiga i le auauna atu i se misiona? Upu i le upu, sa ia tali mai e pei ona ou vaaia i le faaaliga. Sa ia faamalamalamaina na te lē o mautinoa pe tatau ona auauna atu i se misiona; ma sa ia manatunatu ma tatalo peitai na te le’i manatu sa ia mauaina se tali. Sa ou fesiligia pe ua faia sona faamanuiaga faapeteriaka. Sa ia fai mai, “ioe”. Sa ou fesili, “O le a se mea o fai mai ai lou faamanuiaga faapeteriaka?” Sa ia tali mai, “O le a ou auauna atu i se misiona”.
E pei lava ona sa faatonuina ai a’u, sa ou fesili, “E faapefea ona tali mai le Alii i tatalo?” Sa lē mautonu Sione . . . ae na faasoa mai ona manatu. I le faamalosia e le Agaga ma i se uiga matagitagi ma lotomaualalo, sa ou faapea atu ai, “Sa faatonuina a’u e le Alii, o Iesu Keriso, e ala mai i se faaaliga, ou te sau ma āsia oe i le asō. Ou te molimau atu ia te oe e taliina tatalo e ala i lagona, uunaiga, faitauina o tusitusiga paia ma le tele o isi auala. O le asō ua ou iinei e fai ma sui o le Faaola, o Iesu Keriso, o se tali i lau tatalo ma aveesea ai le fenumia’i ma masalosaloga uma. Sione, ua valaaulia oe e le Faaola e auauna atu i se misiona. O iai Sana galuega e te faia ma o se galuega ua na’o Elder Hala e mafai ona faia ona o loo iai se tagata faapitoa o faatalitali mai mo oe e valaaulia i le vai o le papatisoga”. O i sa faaiuina ai le faaaliga.
Sa ou fesili atu poo le a sona lagona. Sa punou lona ulu ma tagi, “Ua taliina la’u tatalo ma ua ou manao e auauna atu i se misiona”.
E lē o toe mamao ona faamaeaina lea e uso Hala ana siaki faafomai ma le fomai nifo ona tuuina atu lea o lana talosaga mo le misiona. O vavega o aso nei e tutupu moni lava pe afai e tuuina atu lo tatou faatuatuaga i le Alii o Iesu Keriso.