«Նյութեր երիտասարդների և երեխաների համար», Լիահոնա, փետ. 2023
Լիահոնա․ ամենամսյա ուղերձ, փետրվար 2023
Նյութեր երիտասարդների և երեխաների համար
Ծնողներն են կրում հիմնական պատասխանատվությունը իրենց երեխաներին Հիսուս Քրիստոսի և Նրա ավետարանի մասին ուսուցանելու համար: Հիսուս Քրիստոսի Վերջին Օրերի Սրբերի Եկեղեցին ունի կազմակերպություններ, ծրագրեր և այլ ռեսուրսներ՝ ծնողներին իրենց ջանքերում օգնելու համար: Ծնողները, Եկեղեցու ղեկավարները և ընկերները միասին կարող են օգնել բոլոր երեխաներին և դեռահասներին գալ դեպի Քրիստոսը:
Լուսանկարը՝ Բեն Ջոնսոնի
Երեխաների միությունը
Երեխաների միությունը եկեղեցու կազմակերպություն է՝ մեկուկես տարեկանից մինչև 11 տարեկան երեխաների համար: Երեխաների միությունում դասերի, երաժշտության և միջոցառումների միջոցով երեխաները սովորում են Հիսուս Քրիստոսի և Նրա ավետարանի մասին: Երեխաների միությունն օգնում է երեխաներին զգալ Աստծո սերն իրենց հանդեպ:
Ահարոնյան քահանայության քվորումները և Երիտասարդ կանանց դասարանները
Այն տարվա հունվարին, որի ընթացքում երեխաները դառնալու են 12 տարեկան, նրանք Երեխաների միությունից տեղափոխվում են կա՛մ Ահարոնյան քահանայության քվորում (տղաները), կա՛մ Երիտասարդ կանանց դասարան (աղջիկները): Իրենց քվորումներում և դասարաններում երիտասարդները շարունակում են ամրապնդել իրենց վկայությունները և ծառայել մարդկանց:
Երեխաների և երիտասարդների ծրագիր
Իր պատանեկության տարիներին Քրիստոսն «Աստծու ու մարդկանց առաջ զարգանում էր իմաստությամբ, հասակով ու շնորհով» (Ղուկաս 2․52)։ Երեխաների և երիտասարդների ծրագիրը օգնում է եկեղեցու երիտասարդ անդամներին հետևել Քրիստոսի օրինակին։ Նրանք սովորում և աճում են իրենց կյանքի բոլոր բնագավառներում՝ հոգևոր, սոցիալական, ֆիզիկական և մտավոր:
Եկեղեցու ամսագրեր
Եկեղեցու մանկական ամսագիրը Ընկեր ամսագիրն է: Երիտասարդներին զորացնելու համար ամսագիրը երիտասարդների համար է։ Այս ամսագրերը ներառում են պատմություններ, ուսմունքներ և միջոցառումներ, որոնք գրված են հատուկ երեխաների և դեռահասների համար:
Երիտասարդներին զորացնելու համար ուղեցույց
Երիտասարդներին զորացնելու համար. Ընտրություն կատարելու ուղեցույց-ը երիտասարդներին ուսուցանում է ավետարանի ճշմարտությունների մասին։ Այն ուսուցանում է նրանց, թե ինչպես կայացնել որոշումներ, որոնք կօգնեն նրանց հետևել Հիսուս Քրիստոսին: Այն նաև ներառում է պատասխաններ ավետարանով ապրելու վերաբերյալ հարցերին, որոնք կարող են ունենալ երիտասարդները։
Ավետարանի գրադարան
Ավետարանի գրադարանն ունի բազմաթիվ թվային ռեսուրսներ, այդ թվում՝ տեսանյութեր, երաժշտություն, սուրբգրային պատմություններ և միջոցառումներ: Այն նաև պարունակում է նյութեր, որոնք կօգնեն ծնողներին և ղեկավարներին ուսուցանել ավետարանի սկզբունքները: Այս ռեսուրսները գտնվում են Ավետարանի գրադարանում՝ ChurchofJesusChrist.org կայքում և Ավետարանի գրադարան հավելվածում։
ԵԶՀ համաժողովներ
Սկսած այն տարվանից, որի ընթացքում նրանք դառնում են 14 տարեկան, երիտասարդները հրավիրվում են մասնակցելու «Երիտասարդներին զորացնելու համար» (ԵԶՀ) համաժողովներին: Այս իրադարձությունները ներառում են միջոցառումներ և դասեր, որոնք օգնում են ամրացնել հավատքն առ Հիսուս Քրիստոս և նպաստում են, որ երիտասարդները աճեն հոգևոր, սոցիալական, ֆիզիկական և մտավոր առումներով։
© 2023 by Intellectual Reserve, Inc. All rights reserved. Տպագրված է ԱՄՆ-ում։ Անգլերենի հաստատումը. 6/19։ Թարգմանության հաստատումը. 6/19։ Monthly Liahona Message, February 2023-ի թարգմանությունը։ Language. 18910 201