« មូលហេតុដែលយើងបង់ដង្វាយមួយភាគក្នុងដប់ » លីអាហូណា ខែ ធ្នូ ឆ្នាំ ២០២២
សារលិខិត លីអាហូណា ប្រចាំខែ ធ្នូ ឆ្នាំ ២០២២
មូលហេតុដែលយើងថ្វាយដង្វាយមួយភាគក្នុងដប់
សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយថ្វាយដង្វាយមួយភាគក្នុងដប់នៃប្រាក់ចំណូលរបស់ពួកគេទៅកាន់សាសនាចក្រ ។ ការណ៍នេះត្រូវហៅថា ដង្វាយមួយភាគក្នុងដប់ ។ ប្រាក់នេះត្រូវបានប្រើប្រាស់ដើម្បីសម្រេចបាននូវកិច្ចការរបស់សាសនាចក្រទូទាំងពិភពលោក ។
តើដង្វាយមួយភាគក្នុងដប់ជាអ្វី ?
ព្រះបញ្ញត្តិមួយនៃព្រះបញ្ញត្តិនានារបស់ព្រះគឺថ្វាយដង្វាយមួយភាគក្នុងដប់ គឺថ្វាយមួយភាគក្នុងដប់នៃប្រាក់ចំណូលរបស់យើងទៅកាន់សាសនាចក្ររបស់ទ្រង់ ។ ពេលយើងថ្វាយដង្វាយមួយភាគក្នុងដប់ យើងបង្ហាញការដឹងគុណរបស់យើងចំពោះព្រះ សម្រាប់ពរជ័យរបស់យើង ។ យើងបង្ហាញថា យើងទុកចិត្តលើព្រះអម្ចាស់ ហើយថាយើងមានឆន្ទៈគោរពតាមទ្រង់នៅក្នុងគ្រប់កិច្ចការទាំងអស់ ។
ការបង្រៀនមកពីព្រះគម្ពីរសញ្ញាចាស់
រាស្ត្ររបស់ព្រះបានថ្វាយដង្វាយមួយភាគក្នុងដប់ចាប់តាំងពីសម័យកាលនៃព្រះគម្ពីរសញ្ញាចាស់មកម៉្លេះ ។ ឧទាហរណ៍ អ័ប្រាហាំបានថ្វាយដង្វាយមួយភាគក្នុងដប់ ( សូមមើល លោកុប្បត្តិ ១៤:១៨–២០ ) ។ ច្បាប់ដង្វាយមួយភាគក្នុងដប់ក៏ត្រូវបានបង្រៀនដោយពួកព្យាការីបុរាណផងដែរ រួមមានទាំង ម៉ូសេ និង ម៉ាឡាគី ( សូមមើល លេវីវិន័យ ២៧:៣០–៣៤; នេហេមា ១០:៣៥–៣៧; ម៉ាឡាគី ៣:១០ ) ។
ការស្តារឡើងវិញនៃច្បាប់ដង្វាយមួយភាគក្នុងដប់
នៅក្នុងឆ្នាំ ១៨៣៨ ព្យាការី យ៉ូសែប ស៊្មីធ បានទូលសួរព្រះអម្ចាស់អំពីរបៀបដែលសមាជិកសាសនាចក្រគួរតែថ្វាយដង្វាយមួយភាគក្នុងដប់ ។ ចម្លើយរបស់ព្រះអម្ចាស់ត្រូវបានកត់ត្រានៅក្នុង គោលលទ្ធិ និងសេចក្តីសញ្ញា ១១៩ ដែលបានចែងថា សមាជិកគួរតែថ្វាយមួយភាគដប់នូវធនធានរបស់ពួកគេទៅកាន់សាសនាចក្រ ( សូមមើល ខទី ៤ ) ។ ថ្នាក់ដឹកនាំសាសនាចក្របានបង្រៀនថា « ធនធាន » មានន័យថា ប្រាក់ចំណូល ។
ថតរូបដោយ ជែមី ឌែល ចនសុន
របៀបថ្វាយដង្វាយមួយភាគក្នុងដប់
យើងអាចថ្វាយដង្វាយមួយភាគក្នុងដប់ដោយការបំពេញទម្រង់បែបបទបរិច្ចាគតាមអនឡាញនៅគេហទំព័រ donations.ChurchofJesusChrist.org ។ ឬយើងអាចបំពេញទម្រង់បែបបទជាក្រដាស ហើយផ្តល់ប្រាក់នោះទៅសមាជិកនៃគណៈប៊ីស្សព ឬគណៈប្រធានសាខា ។ ប្រាក់ទាំងអស់ត្រូវបានបញ្ជូលទៅទីស្នាក់ការកណ្តាលសាសនាចក្រ ជាកន្លែងដែលថ្នាក់ដឹកនាំសាសនាចក្រ ( គណៈប្រធានទីមួយ កូរ៉ុមនៃពួកសាវកដប់ពីរនាក់ និងគណៈប៊ីស្សពជាអធិបតី ) សម្រេចចិត្តប្រកបដោយការអធិស្ឋានអំពីរបៀបប្រើប្រាស់ដង្វាយមួយភាគក្នុងដប់នោះ ។
ពរជ័យ
ព្រះអម្ចាស់បានសន្យាថា អស់អ្នកដែលថ្វាយដង្វាយមួយភាគក្នុងដប់នឹងត្រូវបានផ្តល់ពរឲ្យទាំងខាងសាច់ឈាម និងខាងវិញ្ញាណ ។ ដង្វាយមួយភាគក្នុងដប់ក៏ផ្តល់ពរដល់បុត្រាបុត្រីទាំងអស់របស់ព្រះ នូវឱកាសដើម្បីរៀនពីទ្រង់ និងរីកចម្រើននៅក្នុងដំណឹងល្អ ។
របៀបដែលមូលនិធិនៃដង្វាយមួយភាគក្នុងដប់ត្រូវបានប្រើប្រាស់
ប្រាក់ដង្វាយមួយភាគក្នុងដប់នេះត្រូវបានប្រើប្រាស់ដើម្បីស្ថាបនាសាសនាចក្ររបស់ព្រះអម្ចាស់នៅទូទាំងពិភពលោក ។ ការណ៍នេះរួមមានទាំងការស្ថាបនាព្រះវិហារបរិសុទ្ធ និងសំណង់ផ្សេងទៀតនៃសាសនាចក្រ បោះពុម្ពព្រះគម្ពីរ និងឯកសារផ្សេងៗទៀត ផ្តល់មូលនិធិដល់សាលារៀនដែលមានសាសនាចក្រជាម្ចាស់ និងការជួយកិច្ចការពង្សប្រវត្តិ និងកិច្ចការផ្សព្វផ្សាយសាសនា ។
ការប្រកាសដង្វាយមួយភាគក្នុងដប់
មួយឆ្នាំម្តង សមាជិកសាសនាចក្រជួបជាមួយប៊ីស្សពរបស់ពួកគេ ( ឬប្រធានសាខា ) ដើម្បីប្រាប់គាត់ ប្រសិនបើពួកគេគឺជាអ្នកថ្វាយដង្វាយមួយភាគក្នុងដប់ពេញលេញដែរឬទេ ។
អ្វីដែលត្រូវចំណាយដោយប្រើដង្វាយមួយភាគក្នុងដប់
រូបថតនៃ ព្រះវិហារបរិសុទ្ធ អូកលែន កាលីហ្វ័រញ៉ា ដោយ ឡងហ្គីន ឡុនស្ស៊ីណា ជុញ្ញ័រ
© 2022 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, December 2022. Cambodian. 18318 258