“Apay nga Agbayadtayo iti Apagkapullo,” Liahona, Dis. 2022.
Mensahe ti Binulan a Liahona , Disiembre 2022
Apay nga Agbayadtayo iti Apagkapullo
Mangted dagiti miembro ti Ti Simbaan ni Jesucristo dagiti Santo iti Ud-udina nga Aldaw iti maysa nga apagkapullo ti natgedanda iti Simbaan. Maawagan daytoy iti apagkapullo. Mausar ti kuarta a mangipatungpal iti aramid ti Simbaan iti intero a lubong.
Ania ti Apagkapullo?
Maysa kadagiti bilin ti Dios ket ti panagbayad iti apagkapullo, a maysa nga apagkasangapulo ti matgedantayo, iti Simbaanna. No agbayadtayo iti apagkapullo, maipakitatayo ti panagyamantayo iti Dios para kadagiti paraburtayo. Ipakitatayo nga agtalektayo iti Apo ken sidadaantayo nga agtulnog Kenkuana iti amin a banag.
Melquisedec—Agay-aywan iti Pagidulinan a Balay, ni Clark Kelley Price
Dagiti Pannursuro iti Daan a Tulag
Nagbayaden dagiti tao ti Dios iti apagkapullo manipud pay kadagidi panawen ti Daan a Tulag. Kas pagarigan, nagbayad ni Abraham iti apagkapullo (kitaen iti Genesis 14:18–20). Ti linteg ti apagkapullo ket insuro pay dagiti nagkauna a propeta, agraman da Moises ken Malakias (kitaen iti Levitico 27:30–34; Nehemias 10:35–37; Malakias 3:10).
Pannakaisubli ti Linteg ti Apagkapullo
Idi 1838 dinamag ni Propeta Joseph Smith iti Apo no kasano a nasken nga agbayad dagiti miembro ti Simbaan iti apagkapullo. Naisurat ti sungbat ti Apo iti Doktrina ken Katulagan 119, a mangdakamat a nasken nga agbayad dagiti miembro iti maysa nga apagkapullo ti matgedanda iti Simbaan (kitaen iti bersikulo 4). Insuro dagiti lider ti simbaan a ti “matgedan” kayatna a sawen ti naullo a kuarta [income].
Naala a ladawan ni Jamie Dale Johnson
Kasano ti Agbayad iti Apagkapullo
Mabalintayo ti agbayad iti apagkapullo babaen ti panagpunno iti porma ti donasion iti online iti donations.ChurchofJesusChrist.org. Wenno mabalintayo a punnuan ti porma a papel ket ited ti kuarta iti maysa a miembro ti bishopric wenno panguluen ti branch. Maipatulod ti amin a kuarta iti kuartel ti Simbaan, a nainkararagan nga ikeddeng dagiti lider ti Simbaan (ti Umuna a Panguluen, Korum dagiti Sangapulo-ket-dua nga Apostol, ken Presiding Bishopric) no kasano a maaramatto daytoy.
Dagiti Bendision
Inkari ti Apo a mabendisionan iti temporal ken naespirituan dagiti agbayad iti apagkapullo. Ti apagkapullo ti mangbendision pay kadagiti amin nga annak ti Dios iti gundaway a makasursuro Kenkuana ken dumur-as iti ebanghelio.
Kasano a Mausar dagiti Pundo iti Apagkapullo
Mausar ti kuarta iti apagkapullo a mangbangonl iti Simbaan ti Apo iti intero a lubong. Iraman daytoy ti panangbangon kadagiti templo ken dadduma pay a pasdek ti Simbaan, panangimprenta kadagiti nasantuan a kasuratan ken dadduma pay a material, panangpundo kadagiti pagadalan a kukua ti Simbaan, ken panangtulong iti aramid iti family history ken aramid ti misionario.
Palawag iti Apagkapullo
Maminsan iti makatawen, makipagkita dagiti miembro ti Simbaan iti bishopda (wenno branch president) tapno ibagada kenkuana no agbaybayadda iti naan-anay nga apagkapullo.
Ania ti Pakaibayadan ti Apagkapullo
Naala a Ladawan ti Templo ti Oakland California ni Longin Lonczyna Jr.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, December 2022. Ilokano. 18318 864