ព័ត៌មានសាសនាចក្រ
សេចក្តីណែនាំដើម្បីកម្លាំងនៃយុវជន ត្រូវបានធ្វើបច្ចប្បន្នភាព
សាសនាចក្របានកែប្រែសេចក្តីណែនាំរបស់ខ្លួនសម្រាប់យុវវ័យពួកបរិសុទ្ធថ្ងៃចុងក្រោយ ។ ដើម្បីកម្លាំងនៃយុវជន ៖សេចក្តីណែនាំដើម្បីធ្វើការជ្រើសរើស អញ្ជើញយុវវ័យឲ្យអនុវត្តសិទ្ធិ ជ្រើសរើសរបស់ពួកគេ និងស្វែងរកការបំផុសគំនិតដើម្បីរស់នៅតាមបទដ្ឋានដំណឹងល្អ ។
« សេចក្តីណែនាំដ៏ល្អបំផុតដែលបងប្អូនអាចមានសម្រាប់ធ្វើការជ្រើសរើសគឺ ព្រះយេស៊ូវគ្រីស្ទ ។ ព្រះយេស៊ូវគ្រីស្ទ គឺជា កម្លាំងនៃយុវជន » បានបង្រៀនដោយអែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ នាសម័យប្រជុំសន្និសីទទូទៅព្រឹកថ្ងៃសៅរ៍ ។ « គោលបំណង ដើម្បីកម្លាំងនៃយុវជន គឺដើម្បីចង្អុលប្រាប់បងប្អូនទៅកាន់ទ្រង់ ។ វាបង្រៀនបងប្អូនអំពីសេចក្ដីពិតដ៏អស់កល្បជានិច្ចនៃដំណឹងល្អដែលបានស្ដារឡើងវិញរបស់ទ្រង់—សេចក្ដីពិតអំពីបងប្អូនជានរណា អំពីទ្រង់ជានរណា និងអ្វីដែលបងប្អូនអាចសម្រេចបានដោយមានកម្លាំងរបស់ទ្រង់ » ( « ព្រះយេស៊ូវគ្រីស្ទគឺជាកម្លាំងនៃយុវជន » លីអាហូណា ខែ វិច្ឆិកា ឆ្នាំ ២០២២ ទំព័រ ១០–១១ ) ។
យុវវ័យត្រូវបានលើកទឹកចិត្តឲ្យប្រើគោលការណ៍នៅក្នុងសេចក្តីណែនាំនេះដើម្បីធ្វើការជ្រើសរើសដោយសុចរិតក្នុងគ្រប់ទិដ្ឋភាពនៃជីវិតរបស់ពួកគេ ។ ឪពុកម្តាយ ថ្នាក់ដឹកនាំ និងយុវវ័យអាចមានបំណងចង់សិក្សា និងចែកចាយសេចក្តីណែនាំនេះនៅផ្ទះ ក្នុងប្រជុំថ្ងៃអាទិត្យ និងក្នុងសកម្មភាពនានា រួមទាំងការបោះជំរុំ និងសន្និសីទយុវវ័យផងដែរ ។ ថ្នាក់ដឹកនាំយុវជន និងយុវនារីអាចនឹងចង់បញ្ជាក់ពីគោលការណ៍ដែលមាននៅក្នុងសេចក្តីណែនាំនេះជាប្រចាំ ។ គោលការណ៍ទាំងនោះក៏អាចជាការផ្តោតអារម្មណ៍នៃរាត្រីបទដ្ឋានប្រចាំឆ្នាំសម្រាប់យុវវ័យ និងឪពុកម្ដាយរបស់ពួកគេបានផងដែរ ។
សេចក្តីណែនាំថ្មីនេះមានជាឌីជីថល ៥០ ភាសានៅក្នុងផ្នែកយុវវ័យនៃបណ្ណាល័យដំណឹងល្អ និងនៅលើគេហទំព័រ youth.ChurchofJesusChrist.org ។ ច្បាប់ចម្លងដែលបានបោះពុម្ពនឹងត្រូវបានបញ្ជូនទៅវួដ និងសាខាទូទាំងពិភពលោកនាឆាប់ៗនេះហើយ ។