“Digitaka mo Dau Nanuma Vakayalo,” Liaona, Sepi. 2022.
Digitaka mo Dau Nanuma Vakayalo
Na tomani tikoga ni noda toso ki liu vakayalo ena salatu ni kosipeli e vaka na vodo basikeli—e gadrevi ruarua na sasaga vagumatua.
Droini mai vei Dilleen Marsh
Na sotavi ni veisau kei na kilai ni veika me caka ena gauna ni leqaleqa sa dua na veivakalougatataki duatani ni lewena yalodina na Lotu ni Turaga. Na isolisoli ni Yalo Tabu sa madigi me da ciqoma tikoga na veidusimaki kei na veivakauqeti tomani tiko ni da yalodina tikoga.
Bula, Vakacegu, Tuberi, ka Taqomaki
E kaya na iApositolo o Paula, “Ni sa vakasama vakayalo na bula kei na vakacegu” (Roma 8:6; raica talega na tikina e 5).
Na digitaki ni vakasama vakayalo ena nomu bula kilikili kaya na veivakauqeti malumu ni Yalo Tabu ena vakarautaka vei iko na veidusimaki ena nomu vakatulewa kei na veitaqomaki mai na veika rerevaki vakayago ka vakayalo talega. Ena Vukuna na Yalo Tabu, e rawa ni o ciqoma kina na isolisoli ni Yalona me yaga vei iko ka vakakina vei ira o dau lomana ka qarava. Na Nona veitaratara ki yalomu e veivakadeitaki vakavinaka cake sara mai na veitaratara kecega e rawa ni o ciqoma mai na veiwakilakila kecega ni yagomu.
E rawa vakacava ni o bulataka e dua na bula vakayalo ka rawata vakalevu cake na veidusimaki mai vua na Yalo Tabu?
1. Mo salavata kei na Tamada Vakalomalagi kei na iVakabula.
Ni da sa duavata kei na Tamada Vakalomalagi, sa tiko vei keda na veitokani ni Yalona. Ni da vakaliuca na duavata oqori ena noda bula, eda na toro voleka yani Vua kei na Luvena, “O Jisu Karisito, o koya sa tala mai ko koya (Vunau kei na Veiyalayalati 132:24).
2. Lomana na Kalou.
Ni da lomana na Tamada Vakalomalagi ka teivaka e dua na veiwekani kei Koya ena masu ena maroroi Koya ena noda vakasama kei na yaloda.
Na iApositolo o Joni, ena nona ivakadinadina me baleta na loloma ni Kalou vei keda kei na nona vakadinadinataki Jisu Karisito, e vakalasuya na vakabauta lasu ni rawati na veivakabulai mai na dua tale na sala ka sega ena vakabauti Jisu Karisito. A sureti ira na dauwiliwili o Joni me ra vakila na reki ni ra lomavata kei na Tamana kei na Luvena (raica na 1 Joni 1:3). A tomana:
“Kakua ni lomana na vuravura, se na veika sa tu e vuravura. Kevaka e dua na tamata e lomana na vuravura, sa sega ni tiko vua na loloma nei Tamana. …
“Ia ko vuravura sa lako tani yani, kei na kena gagadre talega: ia ko koya sa cakava na ka sa vinakata na Kalou sa tu dei ga ka sega ni mudu” (1 Joni 2:15, 17).
Ena bula oqo eda rawa ni vakila na loloma ni Kalou mai na veitokani ni Nona Yalotabu. Ni da cakava na loma ni Tamada Vakalomalagi ka saga meda tiko ga ena salatu e muataki keda ki Vua, na Yalo Tabu e rawa ni dusimaki keda.1
3. Nanuma na ka a cakava na iVakabula ena vukuda.
Na yalayala ena masu ruarua ni sakaramede sai koya “me ra …[vakaivotavota] me tiko vata kei ira na Yalona” (Vunau kei na Veiyalayalati 20:77, 79). Eda taura na sakaramede ena veimacawa baleta ni da vinakata me da maroroya ka susuga na noda bula vakayalo.
E vakatavulica o Peresitedi Dallin H. Oaks, na iMatai ni Daunivakasala ena Mataveiliutaki Taumada: “Ni da toso vakayawa mai na veika vakavuravura, eda vakila ni da toro voleka vua na Tamada Vakalomalagi ka rawa me dusimaki keda vakalevu cake na Yalona. Eda vakatoka na ivakarau oqo ni bula vakayalo.” A kuria o Peresitedi Oaks: “Na noda vakadewataka na veika eda sotava e sa dua talega na itavi ni noda diqiri ni bula vakayalo. … O keda e tiko na noda ivakadinadina ni kosipeli i Jisu Karisito e dodonu me da vakadewataka na veika eda sotava ena ivakarau ni noda kila na inaki ni bula, na itavi ni noda iVakabula, kei na nodra icavacava tawamudu na luve ni Kalou.”2
4. Kidava na veika vakayalo.
Au vakadinadinataka ni bula vakayalo sa dua na veivakalougatataki ni noda igu cikecike. Ni da vakasaqara meda vulica ka muria na veivakauqeti ni Yalo, sa rawa meda vakamatatataka cake na veika ni Kalou mai na veika ni vuravura.
E kaya o Elder Quentin L. Cook ena Kuoramu ni iApositolo Le Tinikarua, “Me vaka ga na kena dau tokaruataki ka vakawasoma na gagadre e gadrevi me rawati kina na kaukauwa vakayago se vakasama, e dina ena veika vakayalo.”3
Vakatorocaketaka Na Nomu Bula Vakayalo
Me vakavinavinakataki na nodra rai raraba na iliuliu ni Lotu, sa tu vei keda e vuqa na iyaragi uasivi me vukei keda ena kena vaqaqacotaki na noda bula vakayalo. Vakasamataka na vakatorocaketaki ni app ni Gospel Library ka vakatara na kaukauwa ni ivolanikalou kei na vulici ni kosipeli me tiko ena nomu taga ena veigauna kece sara. Vakasamataka na veisau e salavata kei na veiqaravi ka vakauqeta na vakayagataki ni tekinolaji ni da dolele yani vei ira na tani. Vakasamataka na ituvatuva ni vuvale, tokona na Lotu me vuli kei na lewenivuli ni Lako Mai, Mo Muri Au ka na rawa ni laveta cake na noda bula vakayalo ena vanua cava ga eda tiko kina.
E sega ni gadrevi meda tu ena dua na vakatikitiki vakayalo ni sa tu rawa na ivurevure kece oqo! E rawa ni da cakacaka vata, ka digitaka na veimadigi yadua me da nanuma vakayalo, vakayaloqaqataka na bula kei na vakacegu, ka vakayacora kila dei na bula vakayalo me tiki bibi ni noda bula. E vakavulica na ivolanikalou, “Ia na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei] na ivalavala malua” (Kalatia 5:22–23).
Cakava ka Vakayacora na Takete Vakayalo
E dua na tamata e vakanananu vakayalo e segata me vaqaqacotaka na nona bula vakayalo, ia ni vakarautaki na takete, taroga, “Sa vakananuma veirauti tiko beka na noqu lalawa ki na noqu gagadre vakayalo?”
Na tamata e vakanananu vakayalo e vakasaqara me kila na sala me muria kina na veivakauqeti vakayalo ka qai cakacakataka na veivakauqeti oqori. O koya gona, sa ka bibi kina na tuva lalawa ena tubu vakayalo.
O Annie, na makubui keirau yalewa yabaki lima, a lalawataka me vulica na vodo basikeli. A vakatovotovo ka toboka vakatotolo, rau sa qai kauti koya na nona itubutubu ena vodo basikeli vakamatavuvale.
Ni rau vodo basikeli tiko, a vakaraitaka na tinai Annie na kurabui ni nona vodo basikeli o Annie ena dua na delana ka takosova e dua na ikawakawa. E wasea o Annie na ka vuni me baleta na nona rawa-ka: “Au tautauri matua tikoga, Na, ka qaqi tikoga.”
Meda cakava talega vaka oya. Ena noda qaqia tiko eda na dabe donu tikoga. Na veicakacaka rawarawa, cakacaka ni masu ena veisiga, vulici ni ivolanikalou, kei na muri ni ivakasala vakaparofita me toso tikoga ki liu na noda bula vakayalo veitalia na veidelana, mate dewa, kei na veisau ni bula.
A kaya o Peresitedi Russell M. Nelson: “Ena gauna e nomu gagadre cecere duadua kina mo laiva na Kalou me qaqa tikoga, mo lewe i Isireli, sa na rawarawa cake eso na vakatulewa. E levu na veika dredre sa yaco me sega ni dredre! O kila na veika o vinakata mo rawata. O kila na mataqali tamata o vinakata dina mo vaka.”4
Ni o vakanamata ki na veika e bibi dina, o na raica ni iwalewale ni kena vaqaqacotaki na nomu bula vakayalo kei na vakasama vakayalo me rawarawa, e dina ga ni gadrevi kina na sasaga kei na gugumatua. O koya, mo tautauri ka qaqi matua tikoga!
Vakamareqeta na Nomu Liaona Vakayalo
O na drigiti, cuqeni, ka dreti ki na vuqa na idusidusi ena vuqa na domo ni vuravura oqo ka so na gauna o ni na rairai lomalomaruataka na vanua mo ni gole kina. Nanuma tiko ni nomu Liaona vakayalo e dau cakacaka vinaka duadua ni o vakaduiduitaka na domo ni Yalona mai na domoi vuravura.
Na Yalo Tabu e malumu, matata, ka veivakacegui. E solia na veidusimaki matata me kauta mai vei iko na vakacegu kei na inuinui. E cakacaka duavata vakavinaka sara kei Tamada Vakalomalagi kei Jisu Karisito, ka qarava kina e vica na itavi me vukei iko mo bula dodonu ka rawata na veivakalougatataki ni kosipeli.
“Na ivurevure cecere duadua ni kaukauwa vakayalo sai koya na Kalou na Tamada,” e kaya o Peresitedi Nelson. “Na italai ni kaukauwa oqo sai koya na Yalo Tabu. Na kaukauwa oqo e duidui mai na kaukauwa vakalivaliva. E dua na iyaya livaliva e kana kaukauwa. Na vakayagataki ni Nona kaukauwa vakayalo e vakatawana noda kaukauwa. E dina ga ni rawa ni vakayagataki ga na kaukauwa vakalivaliva ena ivakarau ni tiki ni gauna, sa rawa ni vakayagataki na kaukauwa vakayalo me baleta na gauna oqo kei na tawamudu!”5
Me yaco me da vakanananu vakayalo, tautauri matua, qaqi tikoga, ka tuva na lalawa vakayalo. Vakayagataka na ivurevure e vuqa sa vakarautaki tu me vaqaqacotaka na yalomu.
Au vakadinadinataka ni noda vakasama vakayalo e bula dina kei na vakacegu (raica na 2 Nifai 9:39), ni noda itovo ni bula e vakavinakataka cake ni da lomavata kei na Tamada kei na Luvena, ka ni lomani keda na Kalou ka dau nanumi keda kei na noda gagadre.
Mai na dua na vosa ena lotu, “Me Da Vakasama Vakayalo sai Koya na Bula kei na Vakacegu,” tauci ena Brigham Young Univesiti ena 9 ni Feperueri, 2021. Me baleta na vosa taucoko, gole ki na speeches.byu.edu.